San Juan 20
20
Jatsïntskuarhuksï tsakapu kénditaspti
(Mt 28.1-10; Mc 16.1-8; Lc 24.1-12)
1Maria Magdalena Domingu jimbo k'éri xarhentku niraspti imani uarhiri jatsintskuarhu, nótki erandesïrempti, ka jatsïntskuarhu t'uíni tsakapu nóteru míkorhexaptia. 2Uiriapantaspti ka jima niántani engaksï Simoni Pédru jápka ka enga máteru jurhegorheri jápka enga Jesusi xénhchempka, ka arhiaspti:
–¡Achanksï jatsintskuarhu petasti, ka nóchi míteska nénaksi páski!
3Pédru máteru jurhengorheri jingunksï uérasti, ka uarhiri jatsintskuarhuksï niraspti. 4Márkuksï uiriapaxapti, k'óru ima máteru jurhengorheri Pédruni urhekupasptia, ka uarhiri jatsintskuarhu urheta niáraspti. 5K'utitsespti eranhani ka takusïni jima eranhaspti, k'óru no inchaspti. 6Simoni Pédrujtu chúngumaspti niárani, inchanhespti uarhiri jatsintskuarhu ka jima takusï erantskaraspti; 7ka takusïntu isï enga irhijtsïtini jápka, támu irhikata jarhani. 8Ka jiájkani máteru jurhengorherijtu inchasptia, ima enga urhetku niárapka uarhiri jatsintskuarhu; exespti ka jakajkunia. 9Jimbokaksï jiájkani jamberi nótki jánhaskasïrempka eska karakata na arhijka eska Jesusi tsíntapiringa. 10Ka jurhengorherichaksï chénjembo níntasptia.
Jesusi, Maria Magdalenani xarhakuntasti
(Mc 16.9-11)
11Maria jima pakaraspti uarhiri jatsintskuarhu ka uérakua, ueraxapti. Ka ueparini k'utitsespti eranhani, 12ka tsimani ánjelichani eranhaaspti, uaxakatinksï jarhani jima enga Jesusi jápka, ma éjpuekuarhu ka ma jantsïrikuarhu. 13Ánjelichaksï kurhamarhespti:
–Nana, ¿Andirisï uerani jaki?
Ima arhiaspti:
–Jimbokaksï jucheti Achani petaska ka nánindiksï péria.
14Enga ísï uandapka, ménderu eraaspti ka Jesusini exeni, anhandetini jarhani, enga úpka no janhaskaspti eska Jesusispka. 15Jesusi arhispti:
–Nana, ¿Andirisï uérani jaki? ¿Néniri jirinhantaxaki?
Ima ísï eranhaskaparini eska kuárispka arhispti:
–Tata, eka t'u petaka, aiangurini naniri péraski, ji niuaka jirinhantani.
16Jesusi arhispti:
–¡Maria!
Ima p'irhipakurhispti ka ebreo jimbo arhini:
–¡Rabuni! (Enga “Jurhentpiri” arhikuekajka)
17Jesusi arhispti:
–Ásïrini p'árhe, jimbokani nótkini karhantasïnga Táte jingunintani. Ka ni sáni jima engaksï jucheti erachicha jaka ka arhiani eskani jucheti Táte jinguni karhantaaka, enga chári Táteka, jucheti Diósï jinguni ka chári Diósï jinguni.
18Maria Magdalena niraspti jurhengorherichani aianguani eska Achani exespka ka eska ima indeni ambe arhispka.
Jesusi jurhengorheri jémbechani xarhakuantaasti
(Mt 28.16-20; Mc 16.14-18; Lc 24.36-49)
19Imani jurhiatekua, domingu xatini engaksï jurhengorhericha minhakorhetini jápka judiouechani chérheani; Jesusi jima teruakuni xarhakuaspti ka arhiani:
¡Cha jinguni jaue sési jakua!
20Enga na ísï arhiapka, jájki exeraaspti ka arhiaspti eskaksï eranhapiringa. Jurhengorherichaksï tsípespti Achani exentatini. 21Ka Jesusi ménderu arhiaspti.
–¡Cha jinguni jaue sési jakua! Eskarini jíndeni Táte na axaka, jíjtuksïni chánksïni axaxaka.
22Ka enga ísï uandapka, p'unijtsïkuaspti ka arhiani:
–P'i je Espiritu Sántuni. 23Néni enga xáni cha puákuantaska, púamenhantaatiksï; ka ne enganijtsï no puákuntaska, nóksï púamenhantaati.
Tomasi jakajkusptia
24Tomasi, enga jurhengorheri mépka, engaksï kuati arhimpka, no jima jarhaspti enga Jesusi niárapka. 25Tátsekuaksï máteru jurhengorhericha aianguxapti:
–Jucha xéntaska Achani.
Ka Tomasi arisï uandaspti:
–Ekani no erajkuska jima engaksï parhantsï inchajkurhataka ka ekani no p'ójkuska ka ekani no p'ónhaska; no jakajkuaka.
26Iúmu tanimu jurhia tátsekua, jurhengorherichaksï ménderu máteru k'umanchekuarhu tángorhentaspti, ka jiájkani k'óru Tomasi jima jarhasptia. Mikatixaptiksï, ka Jesusi inchaspti ísï, terujkani niárakuaspti ka arisï uandaparini uandajpaani:
–Sési jakua cha jinguni jarhasti.
27Tátsekua Tomasini arhispti:
–P'ójkurini, ka erajkurini; ka júrini p'ónhani, ka ásï jáma no jakajkuni, jakajkuia.
28Tomasi jiájkani k'óru uandaspti:
–¡Jucheti Acha ka jucheti Diósï!
29Jesusi arhispti:
–¿Mintsikaxakiri jimbokarini xéska? ¡Tsípeksï ima engaksï no xéparini jakakujka!
Ambe enga úrakueka i karakata
30Jesusi jurhengorherichani uánekua ambeteru xarhatakuaspti engaksï íni karakatarhu no jataka. 31Ka i ambe karanhasti eskajtsï cha jakajkuaka eska Jesusi Krístueska, Diósï Uájpa, ka eskajtsï jakajkutini, imeri jimbo kámaaka tsípekua.
Currently Selected:
San Juan 20: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.