2 Pedro 1
1
Uandajperata
1Simoni Pédru, Jesukristueri jántspiri ka uandakua pári, uadajpaaxaka iámenduechani engaksï juchari Diósïri ka Jesukristu p'ímutantspiri jimbo xáni sési jakajkukuni jaka, ísï eskani jucha na jakajkuni jaka, imaksï no jukari ambe arhijpesïndi. 2Eskaksïni Diósï kánekua ambe kóndeaka, ka eskaksïni sési jakua íntskuaka jimbokajtsï Diósïni ka juchari Acha Jesusini míteskia.
Irekorheni eska Diósï na uéjka
3Diósï imeri auandarhu anapu uinhapekua jimbojtsïni iámendu ambe íntskusti, engachi jimbo úaka Diósïni íntskukorhentani ísï eska ima na uéjka, engajtsïni mítetaraka imani engajtsïni imeri k'érikua jimbo uandajpaka, ka imani xáni k'éri ambe jimbo enga ima úpka. 4Indeni jimbochi jucha intsïnhaska xáni sési ambe enga ima aiatspeka, indeni jimbojtsï Diósïriuaka, ka ísïksïni no pájtamaati íni parhakpeni anapu ísku jánhchakuarhu enga sánhani arhijka k'amajpeni. 5Jángorhekuntsï je chári jakajkukuani arini ambe kúndani: Sési ireka je, ka sési irekaparini míakua juka je, 6ka míakua jukarini, p'íngukorhe je, ka p'íngukorhetini, tekaantsï je, ka tekaantatini, Diósïni íntskukorhentsï je, 7ka Diósïni íntskukorhentatini, sési arhijpere je, ka sési arhijperatini, xénhchperakuaterku kúnda jeia.
8Engajtsï cha íni ambe míauakia, chári irekua marhuauati ka juchari Acha Jesukristujtsï no ísku míteaka. 9Ne enga íni ambe no jánhaskajka, pátenharhisti ka axujku exesïndi; ka mirikurhistia eska pímbinhajkunhantaskia. 10Ísï jimbo, erachicha, Diósïksïni erakusti, jángorhentsï je chári irekuarhu íni ambe sési inchajtsïni. Ka ísï jámantsï nómeni k'amanharhintaaka. 11Ísïjtsï Acha ka p'ímutantspiri Jesukritueri irechekuarhu méntkisï anapurhu kókosï mítamenhaaka.
Uandakua mintsinharhikuesti
12Ísï jimboksïni ji íni ambe méntku míatani jauaka, nájkirukajtsï mítetini jakaia, nájkirukajtsï uinhamu jakajkutini jaka imani ambe enga ísïka engajtsï mítetini jakaia. 13Sési exesïnga, ekani jamberi jámani jauaka míatanksïni jarhani. 14Mítetixaka eskani p'íkunhantaakia, jimbokarini juchari Acha Jesukristu ísï arhiska. 15K'óruni jángorhekuntaaka eskajtsï méntkisï íni ambe míauaka engani ji nóteruni jauakia.
16Engaksïni aianguntaka eska Acha Jesukristu uinhapekua jinguni junguaka, jucha nómbema újtsïkorheska, jucha Jesusiri k'érikuani xékorheska. 17Jimboka Diósï Táte k'érikuarhu péraska, jiájkani enga t'íntskua arhipka: “Ísti jucheti Uátsï xénhachakata engani jimbo ji xáni tsípejka.” 18Imani jucha kurhaakorheska, enga auadarhu uéraka, jiájkani engachi juáta erakukatarhu Jesusi jinguni jápka.
19Ísïchi úaka iámu ambe jakajkukuaani engaksï Diósïri uandaricha uandaka, sési japirindi eskajtsï erajkutakueni kurhanguntapiringa, enga pájpakandu t'íntskarani jarhajka, ka eka jamberi eramarhandekueuaka ka eka jamberi chári mintsitecharhu k'uanhari andarani jauakia. 20Ka méntku míani ja je eska nóma ma enga Diósïri karakata jurhentpejka úaka jánhaskorhenhani eska na uékanhaaka; 21jimboka nóma Diósïri uandari imeri jimbo uandaska; méntku ménderuenisti, Espiritu Sántusï Diósïri ambe uandarpeti.
Currently Selected:
2 Pedro 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.