Rut 1
1
Elimelexa, taras tsî ǀgôakha âb ǀkha, Moab ǃnâ
1ǂHanuǂhanu-aogu ǂgaeǂguis ǁaeb ǃnâb ge ǃâtsūǀkhāba Israeli ǃnâ ge hā. Ob ge khoeb, Betlehems, Judab ǃnâ ǂnôas diba taras tsî ǀgôakha âb tsîn ǀkha ge doe, Moab ǀkharib ǃnâb sī ǃhaokhoese nî hâse. 2ǁNā khoeb ge Elimelex ti ge ǀon hâ i tsî taras âba Naomi tsî ǀgôakha âb ge Maxlonni tsî Kiljonni tsîkha ge i, Efrataǁîn, Betlehems, Judab dis dina. Tsîn ge Moab ǀkharib ǃnâ sī ge ǁan. 3Elimelexi, Naomis aob ge ǁō, os ge ǀgôakha ǀkha ǀgui ge ǃgau. 4ǁÎkha ge Moabǁî tarara ge ǃgame; ǀguis ge Orpa ti ge ǀon hâ i tsî nausa Rut. ǁNāpan ge disi kuriga ge hâ, 5tsî kha ge Maxlonni tsî Kiljonni tsîkha ona ge ǁō. ǁNātis ge Naomisa ǀguri ge ǃgau, aob tsî ǀgôakha âs tsîgu ose.
Naomis ge Ruts ǀkha Betlehems ǁga ra oa
6Naomis ge ǃKhūb go ǁaes âba ǀkhae tsî ǀoasa ǃgaosa mā ǃkhaisa ǁnâu, os ge ǀuiǀgôara âs ǀkha ǂhomisen tsî Moab ǀkhariba xu ge ǁaru. 7ǁÎdi ge hâ di ge i ǃkhaisa xu ge ǂoa, Judab ǃoa di nî ǁaruse. 8Os ge Naomisa ǀuiǀgôara âs ǃoa ge mî: “Oa ro re, mâs hoasa ǁîs îs di oms ǁga. Ab ǃKhūba ǃgâidī ro re, saro ge ǁō ge gu tsî tita tsîna dības ǁkhās xase. 9Îb ǃKhūba īǁkhā kai, mâs hoas âro aob tsî omma nî hōsa.”
Tsî ǁoa ras ge, o ra ge ge ātsoatsoa, 10tsî ra ge ǁîs ǃoa ge mî: “Sim ge sas ǀkha sa khoen ǁga nî ǃgû.”
11Os ge Naomisa ge mî: “Oa ro re, ti ôa, tare-i ǃaroma ro kha tita nî sao? Tita kha xare ǁkhawa ǀgôakha hō ǁkhā ta nî, saro ǀkha nî ǃgamese? 12Oa ro re, ti ôa, tita ǁkhawa ǃgamesa kairaba hâ xuige. Tsî ǂâi ta ka, īǁkhāsib hâsa tsî nē tsuxub ǂûb ǃnâ ǃgame tsî ǀgôakha ǁora, 13xawe ǃâu ro nî kai kha nîs kōse? ǁKhaesen ro nî ǁkhawa ǃgamesa xu? ǁNās ge tita kaise saro ǃgâ-ai a auba, ǃKhūb go ti ǃoagu khâi amaga.”
14ǁÎra ge ǁkhawa ge ātsoatsoa. Orpas ge ǀuiǁgûs âsa tawedeǁnāxū, xawes ge Rutsa ǁîsa ǁnāxū ǂgao tama ge i. 15Os ge Naomisa ǁîs ǃoa ge mî: “Mû, sa ǀgamis ge ǁîs ǁaes tsî elogu âs ǃoa go oa. Sas ona ǁîs ǀkha oa re.”
16Xawes ge Rutsa ge mî: “Tā sasa ǁnāxū tsî ta nî oasa ǂgaoǀkhā te; sas ra ǃgûǀî ǃgû tsî ta ge sas ra hâpa nî hâ, sa ǁaes ge nî ti ǁae, tsî sa Elob ge nî ti Elo. 17Sas ra ǁō ǃkhais ai ǁō tsî ta ge ǁnāpa nî ǁkhōhe. Ab ǃKhūba ǁkhōse ǁkhara te, ǁōb ǀguib ose iga ǀnî xū-e samma ǀgorao.”
18Tsî Naomis ge mû, Ruts mîǁguib âs ai mâsa, os ge ge ǃnō.
19ǁNāti ra ge ǁîra ge ǃgû Betlehems tawa ra ge sīs kōse. Betlehems ǃnâ ra ge sī, o di ge ǃās taradi hoade ge gongonǃnâhe, tsî di ge ge mî: “Nēsa kha Naomi tamasa!”
20Os ge ge ǃeream: “Tā Naomi ti ǂgai te, î Mara#1:20 Naomi…Mara: Hebregowab ǃnâs ge Naomisa ǃGâi tsî Marasa Au ti ra ǂâibasen. ti ǂgai te, Hoaǀgaixab ge ûiba au-auba te xuige. 21ǀOasase ūhâse ta ge nēpa xu ge doe, xaweb ge ǃKhūba ǀkhaiǃomse go oahā kai te. Tare-i ǃaroma du Naomi ti ra ǂgai te? ǃKhūb ge ti ǃoagu ge khâimâ, Hoaǀgaixab ge ge tsâtsâ te.”
22Nētis ge Naomisa Moab ǀkhariba xu ǁîs di Moabǁî ǀuiǀgôas Ruts ǀkha ge oahā. ǁÎra ge ǃhoroǃgaos tsoatsoas ǁaeb ǃnâ Betlehems ǃnâ ge hā.
Currently Selected:
Rut 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.