Obadja 1
1
1Nēs ge Obadjab ge ǃkhōǃoa aisa. Nētib ge ǃKhūb Eloba Edommi xa ra mî: ǃKhūba xu ge hā ǂhôasa da ge ge ǁnâu. Sîsabeb ge ǃhaodi ǃnâ ge sîǂuihe “Khâi, î da Edommi ǃoagu sī ǃkham” ti.#Jes. 34:5-17; 63:1-6; Jer. 49:7-22; Ese. 25:12-14; 35:1-15; Amo. 1:1-12; Mal. 1:2-5
2 ǃKhūb ge Edomǁîn ǃoa ge mî:
“Tita ge sasa ǃhaodi ǃnâ ǂkhari ǃhaose nî dī,
sas ge kaise nî ǃharaxūhesa.
3Sa ǀgapiǂâixasib ge ge gā si.
Sas ǃgareǀuib di ǁhāgu ǃnâ ǁan hâs,
ǁanǃkhais âs ǀgapise hâs
tsî sas ǂûs ǃnâ ra ǂâisa
‘Tari-e tita nēpa xu nî ǂgaeǁnâ?’ ti.
4ǃAriǃkhās khamis ga ǀgapiseb ǃnâ om;
ǀgamirodi ǁaegus ga oms âsa ǂnubi,
xawe ta ge ǁnāpa xu nî ǂgaeǁnâ si”
tib ge ǃKhūba ra mî.
5“ǃNari-aon ga sats tawa sīo,
ǁgūǀhana-aon ga tsuxuba sats ǃoa hāo,
mâtikō tsūǀkhāba ǃâu tsi hâ;
ǁîna ǂhâban hâs kōsen ǃnari tide?
ǂAuxûiǂûn ǃora-aon ga sats tawa sī ǃorao,
ǁîna ǀnîrona ǃgaun tide?
6Xawe Esaub ge ǁnaraǃnâhe tsî nî ǃnariǂuiǃnâhe.
7Sats ǀkha ǃgaeǀhaosa dī hân ge ge gāxaǃnâ tsi,
ǁîn ge sa ǃhūba xu ge ǁgariǂui tsi.
Sats ǀkha ge ǂkhîb ǃnâ hâ in ge ge mâǃoa tsi,
sats ǀkha gere ǂûǀhaon ge ǁnoa-e ge ǁguiba tsi,
ǃâubasen tamats hâ ǃkhaidi ai.
8“ǁNātsē ta ge Edommi di gā-aina nî hîkākā
tsî ǁnâuǃāxan Edomǃhommi dina.
9Sa toroǃkhamaogu ge nî ǃao, Temantse
tsî Esauǃhommi di-i hoa-i ge nî ǃgamhe”
tib ge ǃKhūba ra mî.
Edommi ge ǁkharabahe ǃaromadi
10“Sa ǃgâsan#1:10 Sa ǃgâsan: Jakob ge ge Israeǁîn di aboxa i tsî ǁîb di ǃgâsab Esaub ge ge Edomǁîn di aboxa i., Jakob din ǃoaguts ge ǂkhabadī,
amagats ge taob xa nî hāǂamhe
tsîts ge ǀamos kōse nî hîkākāhe.
11Sats ge ǁaeǁaesens tsîna ge hî tama hâ i,
ǃhaokhoen ge ǃkhūsib âna tanibē ǃnubai.
ǃHao ǃhūgu khoen ge ǁîn dao-amdi ǃnâ ǂgâ
tsî ǀkhūsa Jerusalems ǂama ǂnau,
ots ge ǁîn ǁkhān khami ge ī.
12Sa ǃgâsab di tsūǃōb tsēs
aits ge ga dâ tama hâ.
Judab khoen ge tsūǃgâ tsēs
aits ge ga ǃgâiaǂgao tama hâ.
ǁÎn ǂōǂōsib di tsēs
aits ge ga âi tama hâ.
13Ti ǁaes di dao-amdi ǃnâts ge ga ǂgâ tama hâ,
ǁîn ǂōǂōsib di tsēs ai.
ǁÎn tsūǀkhāb ǂamats ge ga dâ tama hâ,
ǂōǂōsib ǃnân ge ǂgâ tsēs ai.
ǁÎn ǃkhūsibats ge ga ǃnari tama hâ,
ǂōǂōsib ǃnân ge ǂgâ tsēs ai.
14Daogu ǀgoras tawats ge ga mâ tama hâ,
ǁîb di ǃhūsabenats nî ǃgamse.
ǁÎb di ǃgau genats ge ga māǁnâ tama hâ,
ǁîn tsūǀkhāb di tsēs ai.
ǃKhūb ge ǃhaode nî ǀgoraǃgâ
15“ǃKhūb di tsēs ge a ǀgū,
ǃhaodi hoadi ǃaroma.
Edomtse, sats ge dīn,
ǁkhānats ge nî dī-ūhe.
Sa dīgu ge danas âts ai nî oahā.
16Sadu ge ti ǃanu ǃhommi ai ā
khami di ge nau ǁaedi tsîna nî ā.
ǁÎdi ge ǃaruǀî ǀgui ā tsî nî haraǂgā
tsî tātsēs tsîna ge hâ tama hâ i khami nî ī.
Israels di dans
17“Xawe Sionǃhommi ais ge ûiǂoasa nî hâ,
tsîb ge ǁîba nî ǃanu ǃkhai kai.
Jakob ǃhaos din ge nî ūbasen,
ǁnā ǃhūb ǁîn di ūhâxūse ība.
18Jakob ǁaes ge nî ǀae kai,
Josefi ǁaes ge nî ǀaeǁhabu kai,
tsî Esaub ǁaes ge ǃhoroǀgâse nî ī.
ǁÎn ge Esaub ǁaesa ǂhubi tsî nî hîkākā,
tsî i ge ǁîn xa ǀgui-i tsîna ǃgau tide”
ǃKhūb ge ǁnāsa go mî.
19“ǃKhawagas khoen ge Edomǃhomma nî ū;
ǁnān, huriǂoasǀkhāb din ge Filisteǁîn ǃhūba nî ū.
Israeǁîn ge Efraimmi ǀkharib tsî Samariab ǀkhariba nî ū;
tsî Benjaminni khoen ge Gileadǃhūba nî ū.
20ǃKhōsabese ge ūǃgûhe hâ i Israelǁîn
ge Kanaanǃhūba nî ū, Sarefats kōse.
Jerusalems di ǃkhōsaben Sefarads ǃnâ hân
ge ǃKhawagasǃhūb di ǃāde nî ū.
21Hui-aogu ge Sionǃhommi ai nî ǂoa,
Edomǃhomma gu nî gaoǂamse.
Tsî gaosib ge nî ǃKhūb di.”
Currently Selected:
Obadja 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.