Numeri 1
1
ǂGuro ǃgôakhâihes Israelǁîn dis
1ǂGuro tsēs ǀgamǁî ǁkhâb, ǀgamǁî kurib dis Israelǁîn ge Egipteba xu ǂgaeǂguiǂuihes khaoǃgâb ge ǃKhūba Sinaiǃgaroǃhūb ǃnâ Moseb ǃoa ǃKhūb di Tentommi ǃnâ nēti ge mî: #Num. 26:1-51 2“Sats tsî Aron hâkho ge Israelǁîna ǁîn di ǃhaoǃnādi tsî ǀaokhoen ǃoa nî ǃgôakhâi. Hoaraga aorekhoegu 3ǀgamdisi kurixa tsî ǁnās xa ǃnāsa kuriga ūhâgu, toroǃkhams ǃaroma a ǂhomisagu di ǀonde xoamâi. 4Mâ ǃhaos hoasa xub ge ǀgui khoeb, ǃhaoǃnās di danaba nî hui kho.” 5-16Sao ra gu ge khoegu, nē sîsenni ǃaroma ge ǁhûihega:
ǃHaos | ǃHaoǃnās di danab |
---|---|
Rubenni | Sedeuri ôab, Elisuri |
Simeonni | Surisadaib ôab, Selumieli |
Judab | Aminadab ôab, Nasonni |
Isaskari | Suari ôab, Netaneli |
Sebulonni | Helonni ôab, Eliab |
Efraimmi | Amihudi ôab, Elisamab |
Manaseb | Pedasuri ôab, Gamalieli |
Benjaminni | Gideonib ôab, Abidanni |
Danni | Amisadaib ôab, Ahieseri |
Aseri | Okranni ôab, Pagieli |
Gadi | Deueli ôab, Eliasafi |
Naftalib | Enanni ôab, Ahirab |
17Nē disiǀgamǀa khoegu di huib ǀkha kha ge Moseb tsî Aron hâkha, 18hoaraga ǀhûhâsiba ǂguro tsēs ǀgamǁî ǁkhâb dis ai ǂgaiǀhao tsî khoena ǁîn di ǃhaoǃnādi tsî ǀaokhoen ǃoa ge xoamâi. Hoaraga aorekhoegu ǀgamdisi kurixa tsî ǁnās xa ǃnāsa kuriga ūhâgu ge ǃgôahe tsî 19ǃKhūb ge mîmā khami ge xoamâihe. Nē xoamâis ge Moseb xa Sinaiǃgaroǃhūb ǃnâ ge dīhe. 20-46Aorekhoegu ǀgamdisi kurixa tsî ǁnās xa ǃnāsa kuriga ūhâgu, toroǃkhams ǃaroma a ǂhomisagu di ǀondi ge ǁîgu ǃhaoǃnādi tsî ǀaokhoen ǃoa ge xoamâihe. Nē xoamâis ge Jakob di ǂguro ǀgôab, Rubenni ǀkha ge tsoatsoa. Sao ra gu ge ǃhaodi di ǃgôaga:
ǃHaos | ǃGôas |
---|---|
Rubenni | hakadisiǃnaniǀaǀoadisi korokaidisi (46,500) |
Simeonni | korodisikhoeseǀaǀoadisi ǃnonakaidisi (59,300) |
Gadi | hakadisikoroǀaǀoadisi ǃnanikaidisikorodisi (45,650) |
Judab | hûdisihakaǀaǀoadisi ǃnanikaidisi (74,600) |
Isaskari | korodisihakaǀaǀoadisi hakakaidisi (54,400) |
Sebulonni | korodisihûǀaǀoadisi hakakaidisi (57,400) |
Efraimmi | hakadisiǀoadisi korokaidisi (40,500) |
Manaseb | ǃnonadisiǀgamǀaǀoadisi ǀgamkaidisi (32,200) |
Benjaminni | ǃnonadisikoroǀaǀoadisi hakakaidisi (35,400) |
Danni | ǃnanidisiǀgamǀaǀoadisi hûkaidisi (62,700) |
Aseri | hakadisiǀguiǀaǀoadisi korokaidisi (41,500) |
Naftalib | korodisiǃnonaǀaǀoadisi hakakaidisi (53,400) |
ǀHaob ai | ǃnanikaidisi tsî ǃnonaǀoadisi korokaidisi korodisi (603,550) |
47Leviǁîn ge nau ǃhaodi ǀkha ǀguipa ge xoamâihe tama hâ i, 48ǃKhūb ge Moseb ǃoa nēti mî xui-ao: 49“Toroǃkhams ǃaroma ǂhomisa khoegu ga xoakhâihe, o tā Leviǁîga ǁnāpa ǃgôaǂgā. 50Leviǁîga ǃKhūb di Tentommi tsî ǁîb ǃnâ hâ xūn hoan di ǃereamsa mā. ǁÎgu ge ǁîb tsî ǁîb ǃnâ hâ xūn tsîna tani, ǁîba kōǃgâ tsî hâǃkhaiba ǁîb ǂnamipe nî ǂnaumâi. 51Doe du ga ǁaeb hoab ai gu ge Leviǁîga Tentomma ūǁnâ tsî ǁkhawa sao ra ǀasa hâǃkhaib ai sī nî ǂnaumâi. Tentommi ǀgūse ga hā khoe-i hoa-i ge nî ǃgamhe. 52ǃGau ra ǃâb Israelǁîn dib ge ǁîn hâǃkhaiba ǃgubidi ǃnâ, mâ danakhoeb hoaba ǁîb ǃgubis tsî ǁîb di ǃkhaub ǃnaka nî ǂnaumâi. 53Xawe Leviǁîgu ge Tentomma gu nî ǃûise ǁîb ǂnamipe nî ǂnaumâi, î i tā khoe-i xare-e ǁîb ǀgūse hā, î ta tā ti ǁaib ǀkha Israelǁîna ǂkhôadī.” 54Israelǁîn ge ǃKhūb ge Moseba mîmā xūn hoana ge dī.
Currently Selected:
Numeri 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.