2 Kroniks 1
1
Gao-aob Salomob ge gā-aisiba ra ǂganbasen
(1 Gao-aogu 3:1-15)
1Gao-aob Davidi ôab Salomob ge hoaraga Israela ge gaoǂam, tsî ǃKhūb ǁîb di Elob ge ǀkhae bi tsî kaise ge ǀgaiǀgai bi.
2Gao-aob Salomob ge hoaraga ǂgaeǂgui-aogu, ǀoadisigu tsî kaidisigu digu, ǃhūb di ǂamkhoegu, ǃhaoǃnādi di danakhoegu hoagu tsî hoaraga ǁaesa ǂgaikhâi 3tsî ge mîmā, în ǁîb ǀkha Gibeons tawa hâ ǀgoreǀîǃkhais ǁga ǃgû. ǁÎn ge ǁnāǀî ge ǃgû, ǃKhūb di Tentommi, ǃKhūb di ǃgāb Moseb ge ǃgaroǃhūb ǃnâ kuru hâ ib ge ǁnāpa hâ i xui-ao. 4(ǃGaeǀhaos ǂGaes ge noxopa Jerusalems ǃnâ, Kirjat-Jearimsa xub ge ǁîsa hā-ū, ob ge gao-aob Davida ǁîsa dība tents ǃnâ ge mâ i.)#2Sam. 6:1-17; 1Kro. 13:5-14; 15:25—16:1 5Brons altars, Uri ôa tsî Huri di ǁnuriǀgôab Besaleli xa ge kuruhes tsîn ge Gibeons ǃnâ, ǃKhūb di Tentommi aiǃâ ge mâ i. Gao-aob Salomob tsî hoaraga ǁaes tsîn ge ǃKhūba ǁnāpa gere ǀgoreǀî.#Eks. 38:1-7 6Salomob ge ǃKhūba Tentommi aiǃâ gere ǀgoreǀî, ǁîba ǁguibade brons altars ai ǁguibas ǀkha. ǁÎb ge ǀguiǀoadisi khauǁguibade ǁîs ai ge ǁguiba.
7ǁNā tsuxub ǃnâb ge Eloba Salomoba ǂhai tsî ge dî: “Tare-e ta nî mā tsisats ra ǂgao?”
8Ob ge Salomoba ge ǃeream: “Sats ge ti îb Davida hoaǁae kai îǂhôasiba gere ǁgau, tsîts ge nēsi tita ǁîb soas ǃnâ gao-aose go mâi. 9ǃKhū Elotse, ǁnâi ti îbats ge dība mîmâisa dīǀoaǀoa re. Sats ge tita ǃgôaheǁoasase ǂgui ǁaes ǂama gao-aose go mâi.#Gen. 13:16; 28:14 10O ǁnâi gā-aisib tsî ǂans tsîra mā te re, î ta nē kai ǁaes sasa ǂgaeǂgui ǁkhā. ǁNā tamas ka io ta kha ǁnâi tita, mâti nē kai ǁaes sasa nî ǂgaeǂgui ǁkhā?”
11Ob ge Eloba Salomoba ge ǃeream: “ǂHanu xū-ets ge go ǁhûi. ǃKhūsib, ǁuib, ǃgôasib, sa khākhoen di ǁōb tamas ka io gaxu ûiǁaeb xawebats ge ǁhûibasen tama go i. Tsîts ge gā-aisib tsî ǂans tsîra go ǂganbasen, ti ǁaes ǁîs ǂama ta ge gao-aose a mâi tsisats nî ǂgaeǂgui ǁkhāse. 12Tita ge gā-aisib tsî ǂans tsîra nî mā tsi. ǁNās xōǀkhā ta ge ǃnāsa ǃkhūsib, ǁuib tsî ǃgôasib, ǀnî gao-ao-i xare-i ge sats aiǃâ ūhâ tama hâ in tsî sats khaoǃgâs tsîna ūhâ tidena nî mā tsi.”
Gao-aob Salomob di ǀgaib tsî ǃkhūsib
(1 Gao-aogu 10:26-29)
13ǁNās khaoǃgâb ge Salomoba Gibeons tawa hâ ǀgoreǀîǃkhais, ǃKhūb di Tentommi ǁîs tawa hâsa xu Jerusalems ǁga ge ǁaru. 14Gao-aob Salomob ge ǀguiǀoadisi tsî hakakaidisi torokunidi tsî disiǀgamǀaǀoadisi hān tsîna ge ǀhaoǀhaobasen. Tsîb ge ǀnîn ǁîn dina Jerusalems ǃnâ ge ūhâ tsî ǀnîna nau ǃādi, ǃkharagagu di ǃnâ.#1Gao. 4:26 15ǁÎb di ǂgaeǂguis ǁaeb ǃnâ kha ge ǀhaiǀurib tsî ǃhuniǀurib tsîkha, Jerusalems ǃnâ ǀuin kōse ge ǂgui tsî sederhaide ǃaub di haidi kōse. 16Gao-aob Salomob di ǂharugu-aogu ge hāna Egipteb tsî Kueb tsîkha xu gere ǁamaǂgâxa,#Deu. 17:16 17tsî torokunide Egipteba xu. ǁÎgu ge hān tsî torokunidi tsîna Hetǁîn tsî Siriaǁîn di gao-aokha ai gere ǁamaxū. ǀGui kunisa ǃnanikaidisi ǀhaiǀuri maridi ai tsî ǀgui hā-e ǀguikaidisi tsî korodisi ǀhaiǀuri maridi ai.
Currently Selected:
2 Kroniks 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.