1 Petrub 1
1
1Petruta, Jesub Xristub* di apostelta* xu.
ǃKhūb di ǁhûiǂuisaben, ǃhaokhoen ase Pontub, Galatiab, Kapadosiab, Asiab tsî Bitiniab ǃnâ ǀgaruǀgaruhe hân ǃoa. 2Elob, ǁGûb ge sado ge ǃkhōǂuibasen tsî ǁîb Gagab ge sado ge ǃanuǃanu. Jesub Xristuba ǁnâuǀnam tsî du ge ǁîb ǀaob ǀkha ge ǀgapi-aihe.
A du ǀkhommi tsî ǂkhîb tsîkha ǂguiǂguibahe.
Ama ǂgomǃgâhe ǁkhā ǃâubasens
3Ab karehe Elob tsî ǁGûb sada ǃKhūb Jesub Xristub diba. Elob di kai ǀkhomxasiba ǃoa sada ǁkhawa ǃnae kai hâba ûitsama ǃâubasens ǃoa, Jesub Xristub di ǁō hâna xu khâis ǀkha. 4Elob ge sado ǀhommi ǃnâ ǁōǁoasa, ǃanu tsî kāǁoasa ǀumisa sâuba hâ, 5sadu ǂgomsa xu Elob di ǀgaib ǃnâ sâuhe hâdo, ǃgâiǃōsib ǀuni tsēdi ǃnâ nî ǂhaiǂhaiheba ǃoa. 6ǁÎb ǃaroma du ge nî ǃgâiaǂgao, ǃkharagaǃnâgu ǃâitsâgu ǃnâ du ga nēsi ǁaeroba hâ xawes tsîna.
7Sadu ǂgoms di ǃūmûsib, ǃhuniǀurib, ǀaes ǀkhab ga ǃâitsâhe xawe kā ǁkhāb ǃgâ-ai ǃgomǀgausab nî Jesub Xristub ga ǂhaiǂhaiheo, kares, ǂkhaisib tsî ǃgôasiba ǁgauǂuise. 8Jesuba du ge mû bi tama du ge hâ i xawe a ǀnam, tsî du ge nēsi mû bi tama du hâ xawe ǁîb ǃnâ ǂgom tsî ǃhoaǂuiheǁoa ǂkhaisa ǃgâiaǂgaob ǀkha ra dâ. 9Sadu ge ǂgoms di ǂâibasensa nî ǃkhōǃoa, sadu ǀomdi ǃgâiǃōsiba ra hōbasenǃâ.
10ǁÎ ǃgâiǃōsiba gu ge kēbo-aogu, sado ge ǃnaeba ǀkhommi xa gere kēboga, ôa tsî ge dîǃgâ. 11Xristub di Gagab ge ǁîgu ǃnâ ge hâ i tsî ǁîga gere mîba mâtib Xristuba nî hā, tsâ tsî ǁnās khaoǃgâ kai ǃgôasiba nî māhe ǃkhaisa. ǁNās ǃaroma gu ge ǂōrisase, mâti tsî mâ ǁaes nē ǃnaeǃkhaisa nî ī ǃkhaisa gere ôaǃnâ. 12O gu ge ge ǂhaiǂhaibahe, ǁîgu aitsama sîsenbasen tama, xawe sado ra ǃoaba ǃkhaisa. Xawe du ge nēna sado ǃGâiǂhôasa ra aoǁnâbagu xa ge mîbahe tsî ǃAnu Gagab ǃnâ-u ǀhomma xu sîhe tsî sado ge ǂanǂanhe. Tsî gu ge ǀhomǃgāgu tsîna nēs xa ǃnāsase gere ǂan ǂgao.
ǃAnuse ûis ǃoa hâ ǂgaikhâis
13ǁNā-amaga ǂâidi âdo ǂhomi, î ǂkhaikari hâ, î hoaragase ǃâubasen ǁnā ǀkhommi Jesub Xristub di ǂhaiǂhaisens ǃnâ sadu ǃoa ra hā-ūheb ai, 14î ǁnâuǀnamxa ǀgôadu ase tanisen. Tā gu sadu ûiga sadu turagu xa gaohe, sadu ge ǀūǂamsis ǃnâ hâ i ǁaeb khami, 15xawe Elob sado ra ǂgaib a ǃanus ǁkhās khami ǃanu re, sadu tanisens hoas ǃnâ. 16#Lev. 11:44-45Xoamâihe hâ xui-ao: “Tita a ǃanu, amaga du ge nî ǃanu.”
17Sadu ge Elob ǃoa du ga ǀgoreo, ǁîba ǁGûb ti ra ǂgai, ǁîb hîa hoa khoena ǀgui ǀgaub ai ra ǀgoraǃgâba mâ-i hoa-i di sîsenga ǃoa, xuige ǁnâi ǃhūbaib ai du ûi hâ ǁaeba ǃaoǃgâb ǀkha ûi. 18Sadu a ǂan ǃkhais ge tare-i ǀkha du ge ǁnā ǁau tanisens ǁgûga xu du ge ǀumisa xu orehesa. ǁÎn ge hîkākāhe ra xūn hîa ǀhaiǀurib tsî ǃhuniǀurib tsîn khami ge ī tama hâ i, 19xawe du ge ǃgomǀgausa ǀaob Xristub, ǂnao-o tsî ūo ǁkhaob dib ǀkha ge orehe. 20ǁÎb ge ǁnāb ǃhūbaib di ǃgaoǃgaohes aiǃâ ge Elob xa ǃkhōǂuibasenhe tsî nē ǀuni ǁaeb ǃnâ sadu ǃaroma ǂhaiǂhaiheba. 21Sadu ge Elob ǃnâ ǂgomǃgâsa ǁîb ǃnâ-u ūhâ, ǁîb hîa ǁō hâna xu ge ǂkhaiǂkhai tsî ǂkhaisiba mā biba. ǁNā-amagas ge sadu ǂgoms tsî ǃâubasens tsîra Elob ai hâ.
22Sadu ge ǀomde ge ǃanuǃanu, amaba ǁnâuǀnams ǀkha, î du ǃanu ǂgaoba xu ǀaexase ǀnamgu, 23ǁkhawa ǃnae hâdu ase ǁgaoǁoasa ûiba xu tama i, xawe ǀamo ûib, ûitsama tsî ra hâhâ mîs Elob disa xu, 24#Jes. 40:6-8Xoas ra mî khami,
“Khoesib hoab ge ǀgâb khami ī
tsî ǂkhaisib âb hoab ge ǀgâb di ǃkhādi khami ī.
ǀGâb ge ra ǂnâ tsî ǃkhādi ge ra ǁnā,
25xawe ǃKhūb di mîs ge ǀamose ra hâ.”
Tsî nēs ge ǃGâiǂhôas sadu gere aoǁnâbahesa.
Currently Selected:
1 Petrub 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.