Juan 20
20
Quisoso nanpiantarinsoꞌ
(Mateo 28.1-10; Marcos 16.1-8; Lucas 24.1-12)
1Tomio tahuëri nipachina, tashiyachin Maria Mactarina paꞌnin Quisoso poꞌmopiquë nicapon. Co noya tahuëriyátërasohuëꞌ, canconin. Canconahuaton niꞌpirinhuëꞌ, naꞌpi paꞌcopitopisoꞌ chiꞌhuincapinan quënanconin. 2“Quisoso nonën nani quëpapi,” taꞌton, taꞌaquirin. Canquirahuaton, Simon Pitroroꞌcoi shaꞌhuitiirincoi.
—¡Sinioro nonën poꞌmopi quëran, nani quëpapi! Intohuasoꞌ quëpapisoꞌ co nitotërahuëꞌ, itiirincoi.
3Napotohuachincoira, naꞌpi naninꞌpaꞌ paꞌnai. 4Napopianachin taꞌapiraihuëꞌ, Pitro naꞌhuëtërarahuato, caꞌton canconahuë. 5Monshorahuato, nëhuëconahuë. Morinquë soꞌpinpisoachin quënanconahuë. Nipirinhuëꞌ, co yaꞌconahuëꞌ. 6Ca piquëran Simon Pitro canconahuaton, yaꞌconin. Morin Quisoso soꞌpinpisoꞌ niꞌconin antaꞌ. 7Nëꞌmëtëꞌ soꞌpinayapisontaꞌ quënanin. Inasoꞌ nisha quëhuëánin. Inantaꞌ soꞌpinpinan. 8Ina quëran cantaꞌ yaꞌconahuë. Nëꞌmëtëꞌ soꞌpinpisoꞌ niꞌsahuato, natërahuë. “Tëhuënchachin Quisoso nanpiantarin,” tënahuë. 9Yosë quiricanënquë iráca ninshitatonaꞌ: “Nanpiantararin,” topirinahuëꞌ, co yonquiyátëraraihuëꞌ. 10Nani niꞌpatëira, yaꞌhuëraiꞌpaꞌ paantarai.
Maria Mactarina yaꞌnotërinsoꞌ
(Marcos 16.9-11)
11Mariaso nipirinhuëꞌ huëantarahuaton, Quisoso poꞌmopisoꞌ aipiran huaniquiantarin. Chiníquën naꞌnërárin. Naꞌnëárin quëran monshorin naꞌpi naninquë nëhuëcaso marëꞌ. 12Nëhuëpirinhuëꞌ, catoꞌ anquëniroꞌsaꞌ quënanin, huiríchin aꞌmopisoꞌ. Quisoso nonën acopiquë huënsëapi. Aꞌnaꞌ motën quëran huënsëarin. Aꞌnantaꞌ nantën parti quëran huënsëarin.
13—¿Onpoatontaꞌ naꞌnëaran? itërin anquëniri.
—Sinioronëhuë nonën nani quëpapi. Intohuasoꞌ quëpapisoꞌ co nitotërahuëꞌ, itërin.
14Tahuërëtahuaton, Quisoso chachin quënanaponahuëꞌ, co nohuitërinhuëꞌ.
15—¿Onpoatontaꞌ imoya naꞌnëaran? ¿Intaꞌ yonisaran? itërin Quisosori. Mariaso napoaponahuëꞌ: “Sacatonaꞌpi taꞌmaꞌ,” tëcaton:
—Quëmari imoya Quisoso nonën quëpahuatan, shaꞌhuitoco macontaꞌi, itërin.
16—¡Maria! itërin Quisosori. Tahuërëtahuaton, nohuitërin huachi. Inaora nananquë nontaton;
—¡Raponi! itërin. Maistro tapon naporin.
17—Aꞌpoco imoya. Co tatahuë yaꞌhuërinꞌpaꞌ pantayátërarahuëꞌ. Apira paaton, iyahuëpita pochin niꞌnahuësopita shaꞌhuitonquëꞌ: “Yosë yaꞌhuërinꞌpaꞌ panantarahuë. Inasoꞌ: ‘Tata,’ itato chinotërahuë. Canpitantaꞌ imaramaco niꞌton, ‘Tata,’ itatomaꞌ chinotëramaꞌ, tënin Quisoso, itonquëꞌ,” itërin.
18Ina natanahuaton, Maria paaton, itaponcoi: “¡Sinioro chachin nani niꞌnahuë!” itiirincoi. Yaꞌipi shaꞌhuitërinso chachin shaꞌhuitërincoi.
Caꞌtanoꞌsanënpitacoi yaꞌnotaantarincoisoꞌ
(Mateo 28.16-20; Marcos 16.14-18; Lucas 24.36-39)
19Naporoꞌ tahuëri Tomio tahuëri. Tashihuachina, pëiquë yaꞌhuarai. Cotioroꞌsaꞌ tëꞌhuatatoi, yaꞌcoana noyá oncotopiraihuëꞌ, Quisoso aꞌnanaya huancánachin yaꞌnotatoncoi:
—Tashita iyaroꞌsaꞌ. Sano cancantocoꞌ, itërincoi.
20Itahuatoncoi, imirin aꞌnotërincoi. Nininpitëontaꞌ aꞌnotërincoi. Ohuanpisoꞌ niꞌnai. Sinioro chachin niꞌsahuatoi, “Ina mini,” taꞌtoi, nóya cancantërai.
21—Sano cancantocoꞌ iyaroꞌsaꞌ. Tatahuë aꞌparincoso pochachin canpitantaꞌ aꞌpaaranquëmaꞌ piyapiꞌsaꞌ aꞌchintacamaso marëꞌ, itërincoi.
22Ina quëran pihuirahuaton,
—Ispirito Santo yaꞌcoancanchinquëma huachi. Ina catahuarinquëmaꞌ noꞌtëquën pënëntacamasoꞌ. 23Insosona natëhuachinquëmaꞌ, “Oshanën iyasha Yosë inquitarinquën,” itocoꞌ. Inquitarin mini. Nipirinhuëꞌ, co yanatëhuachinquëmahuëꞌ, “Co oshanën iyasha inquitarinquënhuëꞌ,” itocoꞌ. Tëhuënchachin co inquitarinhuëꞌ, itërincoi. Itahuatoncoi, paꞌnin.
Tomasëri quënanaton, natërinsoꞌ
24Naporoꞌ shoncayáchincoi yaꞌhuërai. Tomasësoꞌ co yaꞌhuërinhuëꞌ. Inasoꞌ: “Catopiaꞌhua,” itopi. 25Quisoso quënanahuatoi, Tomasë shaꞌhuitonai:
—Sinioro niꞌnai, itopiraihuëꞌ, co yanatërincoihuëꞌ.
—Imirin ohuantopisoꞌ nicato sëꞌhuata huarëꞌ, nininpitëontaꞌ ohuantopisoꞌ sëꞌhuata huarëꞌ, natëarahuëꞌ, itërincoi Tomasë.
26Posa tahuëri quëran niyontoantahuatoira, Tomasëntaꞌ inaquë nisarin. Naquëranchin yaꞌcoana noya oncotaantapiraihuëꞌ. Quisoso aꞌnaroáchin huancánachin yaꞌnoantarahuaton:
—Tashita iyaroꞌsaꞌ. Sano cancantocoꞌ, itërincoi.
27Ina quëran anquirahuaton, Tomasë itërin:
—Imirahuë iyasha nicaton, sëꞌhuaquëꞌ. Nininpitëhuëntaꞌ sëꞌhuatoco. Ama huachi nisha nisha yonquiquësohuëꞌ. Natëco huachi, itërin.
28—¡Quëma mini Sinioronëhuënquën! Natëranquën. Yosënëhuënquën niꞌton, chinotaranquën, itërin Tomasëri.
29—Niꞌnanco niꞌton iyasha, natëranco. Aꞌnapitasoꞌ co nicaponaracohuëꞌ, natëarinaco. Inapitasoꞌ noya noya cancantapi, itërin Quisosori.
Maꞌmarësona iso quirica ninshitërahuësoꞌ
30Quisoso nani maꞌsha Yosë pochin ninin piyapiꞌsari natëcaiso marëꞌ. Caꞌtanoꞌsanënpitacoi niꞌpiraihuëꞌ, co yaꞌipiya isëquë ninshitëranquëmahuëꞌ. 31Iso quiricaquë ninshitërahuësopitasoꞌ, Quisoso natëcamaso marëꞌ ninshitërahuë: “Inasoꞌ tëhuënchachin Cristo, Yosë huiꞌnin. Inari aꞌpaimarinsoꞌ,” taꞌtomaꞌ, ina imaco huachi. Imapatamaꞌ, Yosë nohuitatomaꞌ nanpimiataramaꞌ.
Currently Selected:
Juan 20: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.