Juan 17
17
Quisoso, imarinsopita marëꞌ Yosë nontërinsoꞌ
1Ina tosahuaton, inápaquë nëꞌpëtërin Yosë nontacaso marëꞌ: “Nani Tata ora naniarin chiminaꞌhuasoꞌ. Aparisitohuachinaco, catahuaco quëma pochachin cancantato, noya natëinquën. Ina quëran aꞌnapita nicatonaco, noya noya yonquiarinënquën. Quëma huiꞌnanco niꞌto, napotaranquën. 2Nani chiníquën nanan quëtëranco yaꞌipi piyapiꞌsaꞌ huaꞌanëntaꞌhuaso marëꞌ. Quëma nohuanton, aꞌnaquën imasarinaco. Inapitasoꞌ anoyacancantërahuë quëma nohuitatënën nanpimiatacaiso marëꞌ. 3Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.
4Piyapiꞌsaꞌ nichaꞌëcaꞌhuaso marëꞌ aꞌpaimaranco. Yaꞌipi shaꞌhuitërancosoꞌ natëarahuë. Yaꞌipi tiquirahuë. Quëmasáchin natëranquën niꞌton, piyapiꞌsaꞌ noya niꞌsarinënquën. 5Iráca coꞌhuara isoroꞌpaꞌ yaꞌhuëyátërasohuëꞌ, quëmaroꞌco noya noya yaꞌhuëpirahuëꞌ, aꞌpaimaranco. Iporasoꞌ, Tata, quëmataquë naquëranchin acoantaco quëmaroꞌco chachin yaꞌhuantaꞌi.
6Quëma nohuanton, aꞌnaya aꞌnaya imasarinaco. Isoroꞌpaquë yaꞌhuëpirinahuëꞌ, huayonan imainacoso marëꞌ. Napoaton, imasarinaco. Nani aꞌchintërahuë. Onpopinsona quëma cancantëransoꞌ nani anitotërahuë niꞌton, nohuitërinënquën. Inapitasoꞌ quëma piyapinënpita. Iráca quëran huarëꞌ yonquiran imainacosoꞌ. Quëma nanamën natëpi. 7Caora yonquinëhuë quëran co mantaꞌ ninahuëꞌ. Quëma shaꞌhuitohuatancora, natëranquën. Ina nitotopi. 8Shaꞌhuitohuatancora, inachachin aꞌchintërahuë, natëtopi. Quëmá quëran oꞌmarahuë. Quëma chachin aꞌpaimarancosontaꞌ natëpi.
9Imarinacosopita marëꞌ chiníquën nontaranquën. Huiꞌnanpita pochin niꞌnan. Iráca quëran huarëꞌ yonquiran imainacosoꞌ. Aꞌnapitasoꞌ co imarinacohuëꞌ. Co inapita marëꞌ nontaranquënhuëꞌ. 10Yaꞌipi imarinacosopita imarinënquën quëmantaꞌ. Quëmari huiꞌnanpita pochin cancantëran. Napopianachin imarinënpoꞌ. Noya natërinaco niꞌton, piyapiꞌsaꞌ noya niꞌsarinaco.
11Co huaꞌquiya quëranhuëꞌ quëmataquë paantarahuë. Isoroꞌpasoꞌ patarahuë. Imarinacosopitaso nipirinhuëꞌ, isëquë yaꞌhuaponaꞌ. Quëma nohuanton, imasarinaco. Quëmasoꞌ Tata nóyanquën niꞌton, noya aꞌpaiquëꞌ imamiachinaco. Yaꞌipiya nanitaparan niꞌton, catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ. 12Inapitaroꞌco yaꞌhuasoco, quëma nanamën aꞌchintërahuë, pënënahuë, naꞌcon catahuarahuë imamiatinacoso marëꞌ. Noya aꞌpairahuë. Co aꞌnaya tërantaꞌ aꞌpoarinacohuëꞌ. Aꞌnaíchin pipirin, parisitopiquë pacacasoꞌ yaꞌhuërinsoꞌ. Quëma quiricanënquë ninoranso chachin nanirin.
13Iporaso nipirinhuëꞌ yaꞌhuëranquë paantarahuë. Coꞌhuara pantayatërapohuëꞌ, isoroꞌpa quëran chachin, nontaranquën imarinacosopita noya cancantacaiso marëꞌ. Yaꞌipi cancanëhuë quëran natëranquën niꞌton, noya cancantërahuë. Catahuaquë inapitantaꞌ ca pochachin noya cancanchinaꞌ. 14Quëma nanamën chachin nani aꞌchintërahuë. Co imarinacosopitarihuëꞌ noꞌhuipi. Co inapita pochin cancantopihuëꞌ niꞌton, noꞌhuipi. Cantaꞌ co inapita pochin cancantërahuëꞌ. 15Co nohuantërahuëꞌ isoroꞌpa quëran ocoicamasoꞌ. Isëquë yaꞌhuëpirinahuëꞌ, catahuaquëꞌ ama sopairi minsëinsohuëꞌ. 16Naꞌa piyapiꞌsaꞌ co noyahuëꞌ nipirinahuëꞌ, co casoꞌ inapita pochin cancantërahuëꞌ. Imarinacosopitantaꞌ co inapita pochin cancantopihuëꞌ. 17Catahuaquëꞌ quëmasáchin cancanchinën. Noꞌtëquën ayonquiquëꞌ noya nicacaiso marëꞌ. Quëma nanamën quëran noꞌtëquën anitotëran. 18Isoroꞌpaquë aꞌpaimaranco. Inapochachin inapitantaꞌ aꞌparahuë piyapiꞌsaꞌ aꞌchintacaiso marëꞌ. 19Imarinacosopita nosoroato, yaꞌipi cancanëhuë quëran quëmasáchin natëaranquën. Inapitantaꞌ noꞌtëquën yonquiatonaꞌ, nóya natëinënquën.
20Co isopita marëáchin nontaranquënhuëꞌ. Aꞌna tahuëri inapitanta aꞌnapita aꞌchintohuachinaꞌ, imasarinaco. 21Inapitantaꞌ catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ. Quëma huiꞌnanco niꞌto, yonquiranso chachin yonquirahuë. Inapitantaꞌ catahuaquëꞌ canpo pochachin yonquiꞌinaꞌ. Ina quëran aꞌnapitantaꞌ natëarinaco. ‘Yosëri chachin aꞌpaimarin,’ tosapi. 22Quëma nohuanton, noyápiachin cancantërahuë. Imarinacosopitantaꞌ catahuarahuë noyápiachin cancantacaiso marëꞌ. Ina quëran aꞌna huënton pochin napopianachin yonquiapi. Canpo pochachin cancantapi. 23Quëma pochachin yonquiato, inapita yaꞌcoancantërahuë canpo pochachin yonquicaiso marëꞌ. Ina quëran co imapisopitahuëntaꞌ nicatonaꞌ: ‘Tëhuënchachin Yosëri huiꞌnin aꞌpaimarin. Huiꞌnin nosororinso pochin imarinsopitantaꞌ nosororin,’ tosapi.
24Quëma nohuanton Tata, isopitasoꞌ imasarinaco. Inapita nohuantërahuë carëꞌ yaꞌhuëcaisoꞌ. Iráca quëran huarëꞌ quëma nosororanco. Coꞌhuara isoroꞌpaꞌ yaꞌhuëyátërasohuëꞌ, nosoroatonco, nóya acoranco. Inatohuaꞌ inapitantaꞌ pantahuachinaꞌ, noya noya niꞌsarinaco. Ina naꞌcon nohuantërahuë. 25Quëmasoꞌ Tata noꞌtëquënáchin yonquiaton, noyasáchin ninan. Co imarinacosopitahuëꞌ co nohuitërinënquënhuëꞌ. Caso nipirinhuëꞌ nohuitëranquën. Quëma isoroꞌpaquë aꞌpaimaranco. Imarinacosopita nitotopi. 26Quëma nanamën nani aꞌchintërahuë nohuitinënquënso marëꞌ. Ipora huantaꞌ aꞌchintarahuë niꞌton, noya noya nohuitarinënquën. Quëma nosororancoso pochachin ninosorocaiso marëꞌ. Inapohuachinaꞌ, inapita yaꞌcoancantato, yaꞌhuëmiatarahuë,” itërin.
Currently Selected:
Juan 17: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.