Hebreos 1
1
Yosë nanamën anitotërinpoasoꞌ
1Iráca quëran huarëꞌ Yosësoꞌ nanamën anitotërinpoaꞌ. Shimashonënpoapita, pënëntonaꞌpiroꞌsa quëran naꞌaro anitotërin. Naporahuaton nisha nisha quëran anitotërin. Co aꞌnaromaráchin yaꞌipi anitotërinhuëꞌ. 2Iporaso nipirinhuëꞌ, huiꞌnin quëran nontërinpoaꞌ. Iráca Yosëri shaꞌhuitohuachina, Quisocristori isoroꞌpaꞌ, inápaquë yaꞌhuërinsopita, yaꞌipi ninin. Aꞌna tahuëri Yosë nohuanton, yaꞌipi huaꞌanëntarin. 3Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.
Quisocristosoꞌ noya noya ninin
4Yosë huiꞌnin niꞌton, anquëniroꞌsa quëran chini chiníquën nanantërin inasoꞌ. Yosëri acorin niꞌton, inasoꞌ noya noya. 5Iráca Yosëri shaꞌhuitërin. Quiricanënquë naporin:
“Quëmasoꞌ huiꞌnahuënquën. Ipora chachin noya nicatënquën, acoaranquën piyapiꞌsaꞌ huaꞌanëntamaso marëꞌ,” itërin. Ina quëran taantarin:
“Ca huiꞌnahuë inasoꞌ. Casoꞌ ina paꞌpinco,” tënin. Co inso anquëni tërantaꞌ ina pochin nontërinhuëꞌ.
6Huiꞌnin chachin nipirinhuëꞌ isoroꞌpaquë aꞌpaimahuachina, chini chiníquën nanan quëtaton, tapon:
“Yaꞌipi anquëniroꞌsarintaꞌ ina chinochinaꞌ,” tënin.
7Anquëniroꞌsaꞌ yonquiaton, quiricanën quëran Yosë tapon:
“Anquëniroꞌsasoꞌ comisionëhuëpita. Cari camairahuë. Camaihuatëra, ihuan pochin aꞌnaroáchin paꞌpi.
Aꞌnaquën ca nohuanto, pën pochin nipi,” tënin.
8Huiꞌninso nipirinhuëꞌ, noya noya acorin. Ina nontaton, itapon:
“Quëmantaꞌ Yosënquën niꞌquëhuarëꞌ, yaꞌipi huaꞌanëntaran. Co onporontaꞌ pipiaranhuëꞌ.
Piyapiroꞌsaꞌ noꞌtëquënáchin pënënaran niꞌton, noya nicaponën.
9Noyasáchin yonquiaran. Co piꞌpisha tërantaꞌ oshahuanamasoꞌ yonquiaranhuëꞌ.
Napoaton noya niꞌnanquën. Noya noya acoranquën niꞌton,
yaꞌipi nipayaransopita quëran noya noya cancantaran,” itërin Yosëri. Quiricanënquë ninshitopi.
10Ina quëran itantarin:
“Quëma Sinioro iráca isoroꞌpaꞌ acoran. Piꞌiroꞌtëꞌ, tayora, yoqui, inapitantaꞌ acoran.
11Aꞌna tahuëri yaꞌipi inapitasoꞌ taꞌhuantarin.
Aꞌmorëso mocarinso pochin nisapi.
Quëmaso nipirinhuëꞌ yaꞌhuëmiataran.
12Aꞌmorëso siꞌpirahuatëꞌ, tëꞌyatërëso pochin yaꞌipi ataꞌhuantaran.
Nasha aꞌmorëso pochin, yaꞌipi nasha acoantaran.
Quëmaso nipirinhuëꞌ co onporontaꞌ taꞌhuantaranhuëꞌ.
Co nishataranhuëꞌ. Inachachin yaꞌhuërápon,” itërin.
13Ina quëran huiꞌnin itantarin:
“Chiníquën nanantaton, inchinanëhuë quëran huënsëquëꞌ
yaꞌipi inimiconënpita carinquën minsëchinquën,” itërin Yosëri.
Co inso anquëni tërantaꞌ ina pochin nontërinhuëꞌ. 14Inapitasoꞌ inpriatonënpita pochin niꞌton, Yosëri camairin. Aꞌpaimarin imarëhuasopita catahuainpoaso marëꞌ. Yosë chachin nichaꞌësarinpoaꞌ. Nani ina nitotëramaꞌ.
Currently Selected:
Hebreos 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.