Romanos 11

Israiroꞌsaꞌ huayoninsoꞌ

1Napoaton natananquëmaꞌ: ¿Israiroꞌsaꞌ co natëtopiso marëhuëꞌ Yosëri aꞌpomiatërin ti? Co aꞌporinhuëꞌ. Ipora huantaꞌ piyapinënpita niꞌton, nosororin. Cantaꞌ Israiro piyapico. Tata Apraansoꞌ shimashonëhuë. Mincamin huëntonquë nasitërahuë. 2Inapitasoꞌ, iráca Yosëri huayonahuaton acorin piyapinënpita nicacaiso marëꞌ. Co aꞌporinhuëꞌ. Iráca Iniasë naporinsoꞌ Yosë quiricanënquë ninshitopisoꞌ nitotëramaꞌ. Inariso pënënpirinhuëꞌ, israiroꞌsari noꞌhuipi. Napoaton Yosë nontohuachina, inapita shaꞌhuirapirin. 3“Naꞌamiachincoi Sinioro pënëntopiraihuëꞌ. Co nohuantatonaraihuëꞌ, aꞌnaquëncoi tëparinacoi. Artaroroꞌsaꞌ chinotaꞌhuainquënso marëꞌ aꞌmitëraisontaꞌ tëꞌyatopi. Casáchin pënëntapirahuëꞌ, yatëparinaco cantaꞌ,” itërin. 4Napotopirinhuëꞌ, ¿maꞌtaꞌ Yosëri itantarin? “Aꞌnaquën mini mamanshi moshapi, Paaro itopisoꞌ. Nipirinhuëꞌ, ca nohuanto, canchisë huaranca quëmapiꞌsaꞌ chinotarinaco. Co mamanshi moshapihuëꞌ,” itërin. Nani ina nitotëramaꞌ. 5Inapochachin iporantaꞌ caraya pochin Yosë huëntonënquë yaꞌconpi. Inaora nohuanton, nosoroaton, Yosëri ayaꞌconin. 6Inaora nohuanton, catahuarin. Co noya nipiso marëꞌ catahuarinhuëꞌ. Noya nipiso marëꞌ huayonin naporini, co huachi inaora nohuanton, catahuacasoꞌ yaꞌhuëꞌitonhuëꞌ.

7Napoahuarëꞌ, ¿maꞌtaꞌ nipachin tëcarihuaꞌ? Naꞌa israiroꞌsaꞌ Yosë huëntonënquë yayaꞌconpirinahuëꞌ, co inahuara nanitopihuëꞌ noya cancantacaisoꞌ. Aꞌnaquën huayoninsopitasoꞌ Yosë nohuanton, yaꞌconpi. Aꞌnapitaso nipirinhuëꞌ co natantochináchinhuëꞌ cancantopi. 8“Yosëri tananpitërin niꞌton, huëꞌërëso pochin cancantopi. Yaꞌpirahuanaponaraihuëꞌ, co quënantërëso pochin nipihuëꞌ. Huëratëhuanaponaraihuëꞌ, co natantërëso pochin nipihuëꞌ. Ipora huantaꞌ ina pochin nisapi,” tënin Yosë quiricanënquë. 9Iráca Tapintaꞌ tapon:

“Yosë noꞌhuipi niꞌquëhuarëꞌ, anaꞌinchin. Nani maꞌsha yaꞌhuëtopirinahuëꞌ, co Yosë yonquipihuëꞌ.

Coshatatonaꞌ, capa cancantapirinahuëꞌ, ina quëran chachin nitapicancainaꞌ. Yosëri anaꞌinchin.

10Somaraya pochin cancantopi niꞌquëhuarëꞌ, ama quënantërëso pochin cancanchinasohuëꞌ.

Yosë nohuanton, chiníquën parisitomiachinaꞌ,” tënin iráca.

Inapochachin ipora huantaꞌ nisapi.

Nisha piyapiꞌsaꞌ yaꞌconpisoꞌ

11Napoaton natanaranquëmaꞌ. ¿Israiroꞌsaꞌ co yanatëpihuëꞌ niꞌquëhuarëꞌ Yosëri aꞌpomiatërin ti? Co Yosëri aꞌpomiatërinhuëꞌ. Nipirinhuëꞌ, co imapihuëꞌ niꞌton, nisha piyapiꞌsantaꞌ Yosëri anoyacancantarin. Ina quëran israiroꞌsasoꞌ, apiratonaꞌ yonquiapi: “Canpoantaꞌ inapita pochin cancantohuatëhuaꞌ, Yosë noya niꞌsarinpoaꞌ,” tosapi. 12Inapita co imatonahuëꞌ tëhuëpiso marëꞌ, iporasoꞌ yaꞌipi piyapiꞌsaꞌ nanitopi Yosë huëntonënquë yaꞌconacaisoꞌ. Nisha nisha piyapiꞌsaꞌ niponaraihuëꞌ, Yosëri noya niꞌsarin. Aꞌna tahuëri naꞌa cotioroꞌsaꞌ imaantahuachinaꞌ, noya noya nisarin.

13Aꞌnaquëmasoꞌ nisha piyapiꞌsanquëmaꞌ. Yosë aꞌparinco aꞌchintaꞌhuanquëmaso marëꞌ. Ina marëꞌ noya cancantërahuë. Paꞌsápato, aꞌchintaranquëmaꞌ. 14Naꞌaquëmaꞌ imapatamaꞌ, aꞌnaquën israiroꞌsantaꞌ nohuantapi imacaisoꞌ nimara. Inapitantaꞌ Yosëri anoyacancantarin. 15Iporaso Yosëri tananpitërin niꞌton, nisha nisha piyapiꞌsaꞌ ina nohuitapi. Aꞌna tahuëriso nipirinhuëꞌ israiroꞌsantaꞌ imaantahuachinaꞌ, noya noya nisapi. ¿Ma pochintaꞌ nisapi? Chimipi nanpiantarinso pochin nisapi, tënahuë. 16Niꞌcoꞌ. Pan nipachinara, yaꞌnan nipisoꞌ Yosë marëꞌ acohuachina, yaꞌipi chachin noya ninin. Nara itëntaꞌ noya nipachina, sëꞌpaquëontaꞌ noya nisarin.

17Nara quëran aꞌchinchinquëmaꞌ. Oripo nara sëꞌpaꞌ co noya nitohuachinahuëꞌ, nishitëtahuatëꞌ, tëꞌyatërëꞌ. Ina quëran apinapinsoꞌ oripo sëꞌpaquën tërantaꞌ achinpitërëꞌ papotacaso marëꞌ. Aꞌnaquën israiroꞌsasoꞌ oripo nara sëꞌpa pochin nipi. Co natëpihuëꞌ niꞌton, Yosëri tananpitërin. Canpitasoꞌ nisha piyapinquëmaꞌ nipiramahuëꞌ, huëntonënquë ayaꞌconinquëmaꞌ. Piyapinënpita pochachin niꞌninquëmaꞌ. 18Nipirinhuëꞌ, ama israiroꞌsaꞌ nocancosohuëꞌ. Ama: “Quiyasoꞌ noya noyacoi,” tocosohuëꞌ. Sëꞌpaquëni co nara achinirinhuëꞌ. Itëni achinirinsoꞌ.

19“Quiyantaꞌ imacaꞌhuaiso marëꞌ israiroꞌsaꞌ tananpitërin,” tënamaꞌ nimara. 20Yosëri tananpitërin mini. Nipirinhuëꞌ, co ina marëꞌ tananpitërinhuëꞌ. Co Quisocristo nohuantopihuëꞌ niꞌton, tananpitërin. Canpitantaꞌ imaramaꞌ niꞌton, noya niꞌninquëmaꞌ. Napoaton ama inapita nocancosohuëꞌ. Niꞌcona canpitantaꞌ Quisocristo naniantotamaꞌ. 21Israiroꞌsaꞌton piyapinënpita pochin niꞌpirinhuëꞌ, anaꞌintërin. Quisocristo naniantohuatamaꞌ, anaꞌintarinquëmaꞌ canpitantaꞌ.

22Ma noyacha Yosësoꞌ nosororinpoa paya. Co natëpisopitasohuëꞌ nipirinhuëꞌ, chiníquën anaꞌintarin. Inasáchin imapatamaꞌ, nosoromiatarinquëmaꞌ. Nipirinhuëꞌ naniantohuatamaꞌ, anaꞌintarinquëmaꞌ canpitantaꞌ. 23Naporahuaton israiroꞌsantaꞌ imaantahuachinaꞌ, Yosëri piyapinënpita pochin niantarin. Nara sëꞌparaꞌhuain achinpitantarëso pochin acoantarin. Yosë niꞌton, nanitaparin. 24Nani aꞌchintëranquëmaꞌ. Canpitasoꞌ apinapin nara pochin ninamaꞌ. Apinapinsoꞌ nara sëꞌparaꞌhuain nishitëtahuatëꞌ, oripo nara sëꞌparaꞌhuain achinpihuatëra, papotërin. Aquëtë huarëꞌ sëꞌparaꞌhuain chachinsoꞌ achinpitaantahuatëra, aꞌnaroáchin papotaantarin. Inapochachin israiroꞌsaꞌ noya imapachinaꞌ, Yosëri noya niantarin.

Naꞌa israiroꞌsaꞌ imaantapisoꞌ

25Yosë yonquirinsoꞌ iyaroꞌsaꞌ shaꞌhuichinquëmaꞌ, noꞌtëquën nitotacamaso marëꞌ. Aꞌnapita co nitotopirinahuëꞌ, ama nocantamaso marëhuëꞌ shaꞌhuitaranquëmaꞌ. “Quiyasáchin noꞌtëquën yonquirai,” ama tocosohuëꞌ. Iporasoꞌ naꞌa nisha piyapinquëmaꞌ Yosë huëntonënquë yaꞌconaramaꞌ. Yaꞌipi Yosë nohuantërinquëmasopita yaꞌconamaquë huarëꞌ naꞌa israiroꞌsaꞌ co natantochináchinhuëꞌ cancantapi. 26Aꞌna tahuëriso nipirinhuëꞌ yaꞌipi israiroꞌsantaꞌ chaꞌësapi huachi. Yosë quiricanënquë ninorinso pochachin imaantapi. Iráca ninshitaton, naporin:

“Aꞌna tahuëri aꞌnaraꞌ Israiro quëmapi Quirosarin quëran oꞌmararin piyapi nichaꞌëcaso marëꞌ.

Cacopo shinpita co noyahuëꞌ yonquipisoꞌ ananiantarin.

27Oshanënaꞌ inquitahuato, piyapinëhuëpita pochin niꞌsarahuë.

Apraan shaꞌhuitërahuëso chachin napotarahuë,” tënin Yosë.

28Iporasoꞌ israiroꞌsaꞌ co Quisocristo nanamën natëpihuëꞌ. Yosë inimicotopirinahuëꞌ, canpitasoꞌ imaramaꞌ. Napoaponahuëꞌ, israiroꞌsaꞌton acorin piyapinënpita nicacaiso marëꞌ. Iráca Apraan, Isaco, Cacopo, inapita shaꞌhuitërin niꞌton, ipora huantaꞌ shinpita nosoroarin. 29Nani Yosëri shaꞌhuitohuachin, inachachin nisarin. Co onporontaꞌ nisha nontarinhuëꞌ. Huëntonënquë ayaꞌconpachin, co onporontaꞌ naniantarinhuëꞌ. 30Iráca co canpitasoꞌ natëpiramahuëꞌ, co israiroꞌsaꞌ nohuantopihuëꞌ niꞌton, Yosë nosoroatënquëmaꞌ, catahuarinquëmaꞌ. 31Iporasoꞌ israiroꞌsaꞌ co natëpihuëꞌ. Co natëhuachinarahuëꞌ, Yosë catahuarinquëmaꞌ. Ina niꞌpachinaꞌ, yonquiantaponaꞌ niꞌton, aꞌna tahuëri inahuantaꞌ nosoroaton, catahuaantarin. 32Yosëri yaꞌipi piyapiꞌsaꞌ tananpitërin niꞌton, co natëtochináchinhuëꞌ cancantopi. Yaꞌipinpoaꞌ nosoroinpoaso marëꞌ naporin.

33¡Ma noyacha Yosësoꞌ catahuarinpoa paya! ¡Ma noyacha yonquirin paya! Yaꞌipiya nitotërin. Yonquirinsopita co nitotochináchinhuëꞌ ninin. Naporahuaton, ina pochin cancantacasoꞌ co onporontaꞌ nanitarihuahuëꞌ. 34“Co insonta inaora Yosë yonquirinsoꞌ nitotërinhuëꞌ. ¡Co incari tërantaꞌ nanitërinhuëꞌ noya noya ayonquicasoꞌ! 35¿Incaritaꞌ maꞌsha Yosë quëtërin niꞌton, iꞌhuërëtacasoꞌ yaꞌhuërin? Co incari tërantaꞌ,” tënin quiricanënquë. 36Yaꞌipi maꞌsha Yosëri ninin. Ina nohuanton, co taꞌhuantarëhuahuëꞌ. Yosëíchin paꞌyatacaso marëꞌ yaꞌhuërëhuaꞌ. Inaora nohuanton, anoyacancantërinpoaꞌ. Ma noyacha Yosëso paya, itahuaꞌ. ¡Inasáchin chinotahuaꞌ! Amen.

Currently Selected:

Romanos 11: cbt

Highlight

Copy

Compare