Romanos 10

1Paꞌpi nohuantërahuë israiroꞌsaꞌ chaꞌëcaisoꞌ. Ina marëꞌ iyaroꞌsaꞌ, chiníquën Yosë nontárahuë. 2Tëhuënchachin Yosë yachinotopirinahuëꞌ, co nanamën noꞌtëquën yonquipihuëꞌ. 3Yosëíchin anoyacancantërinpoaꞌ. Nipirinhuëꞌ, co nohuantopihuëꞌ ina nanan imacaisoꞌ. “Pënëntërinsoꞌ natëhuatëhuaꞌ, Yosë noya niꞌsarinpoaꞌ,” toconpi. “Quëma Sinioro anoyacancantocoi,” co itopihuëꞌ. 4Iráca Moisësë pënëntërin. Iporaso nipirinhuëꞌ co ina natërëhuaso marëꞌ Yosë noya niꞌninpoahuëꞌ. Quisocristo nani oꞌmarin oshanënpoaꞌ inquitinpoaso marëꞌ. “Quisocristoíchin anoyacancantarinpoaꞌ,” topatëhuaꞌ, Yosë noya niꞌsarinpoaꞌ.

5Moisësëri ninshitërin pënëntërinso nanan imacaiso marëꞌ. “Noꞌtëquën natëhuatamaꞌ, Yosë noya niꞌsarinquëmaꞌ. Yaꞌipiya natëcasoꞌ yaꞌhuërin,” tënin ninshitaton. 6Canpoaso nipirinhuëꞌ Quisocristo imapatëhuaꞌ, Yosë noya niꞌsarinpoaꞌ. Quisocristo nanamënsoꞌ co sacaiyahuëꞌ nitotacasoꞌ. “¿Inta inápaquë pantapon Quisocristo quëmacaso marëꞌ?” co taꞌcasoꞌ yaꞌhuërinhuëꞌ. Nani oꞌmarin. 7“¿Intaꞌ chimipiroꞌsaꞌ yaꞌhuëpiquë papon ina quëran Cristo quënantacaso marëꞌ?” co taꞌcasoꞌ yaꞌhuërinhuëꞌ. Nani nanpiantarin.

8¿Maꞌtaꞌ quiricanën quëran anitotërinpoaꞌ? “Ina nanansoꞌ, co sacaihuëꞌ nitotacasoꞌ. Nanamënpoa quëran shaꞌhuicaso yaꞌhuërin. Cancanënpoa quërantaꞌ, natëcaso yaꞌhuërin,” itërinpoaꞌ. Inasáchin natëcoꞌ, itëranquëmaꞌ cantaꞌ. 9Tata Yosë nohuanton, Quisocristo tëhuënchachin nanpiantarin. Ina cancanënpoa quëran natëhuatëhuaꞌ, “Quisocristoíchin imarahuë,” topatëhuaꞌ, Yosë anoyacancantarinpoaꞌ. 10“Yosë co onporontaꞌ nonpintarinpoahuëꞌ,” taꞌtëhuaꞌ, cancanënpoa quëran natëhuatëhuaꞌ, noya niꞌsarinpoaꞌ. “Casoꞌ Quisocristo imarahuë,” topatëhuaꞌ, naporo chachin anoyacancantarinpoaꞌ.

11“Insosona Quisocristo natëhuachin, co sëtarinhuëꞌ. Co aꞌpoarahuëꞌ,” tënin Yosë quiricanënquë. 12Aꞌnaíchin Yosë yaꞌhuërin. Yaꞌipinpoaꞌ huaꞌanëntërinpoaꞌ. Co cotioroꞌsaráchin naꞌcon nosororinhuëꞌ. Nisha piyapiꞌsantaꞌ nosororin. Ina nontohuatëhuaꞌ, nóya catahuarinpoaꞌ. 13“Oshanëhuë Sinioro inquitoco,” topatëhuaꞌ, anoyacancantatonpoaꞌ nichaꞌësarinpoaꞌ. 14Napoaponahuëꞌ, co aꞌchintohuatëhuahuëꞌ, co nitotapihuëꞌ. Co nitotohuachinahuëꞌ, co nanitapihuëꞌ natëtacaisoꞌ. Co natëtohuachinahuëꞌ, co nanitapihuëꞌ Yosë nontacaisoꞌ. Napoaton aꞌchintacasoꞌ yaꞌhuërin. 15Co Yosëri aꞌchinaꞌpiroꞌsaꞌ aꞌpahuachinhuëꞌ, ¿onpo nitotaponataꞌ? Yosë quiricanën quëran naporin: “Ma noyacha niꞌton, noya nanan shaꞌhuitaonpoaꞌ huëꞌsarin paya,” tënin.

16Aꞌnaquënso nipirinhuëꞌ, noya nanan natanpirinahuëꞌ, co nanitopihuëꞌ natëcaisoꞌ. “Nanamën Sinioro, shaꞌhuitopirahuëꞌ co insonta natëtërinhuëꞌ,” tënin Isaiasë iráca. 17Quisocristo nanamën natanacasoꞌ yaꞌhuërin. Natanpatëhuaꞌ: “Noꞌtëquën nonin,” topatëhuaꞌ, natëtarihuaꞌ.

18¿Co natanpihuëꞌ ti? ¡Nani mini natanpi! tënahuë. Yosë quiricanënquë naporin:

“Nisha nisha parti nanamën shaꞌhuitopi.

Yaꞌipi parti nahuinin,” tënin Yosë quiricanënquë.

19Naquëranchin natainquëmaꞌ. Israiroꞌsasoꞌ natanaponaraihuëꞌ, maꞌsona tapon naporinsoꞌ ¿co nitotopihuëꞌ ti? Nitotaponaraihuëꞌ, co natëpihuëꞌ. Moisësë ninshitaton, naporin:

“Nisha piyapiꞌsaꞌ co yonquipirinacohuëꞌ catahuararahuë niꞌton, canpitarisoꞌ aꞌpitaramaꞌ.

Ina marëꞌ noꞌhuitaramaꞌ, tënin Yosë,” itërin.

20Isaiasëntaꞌ co tëꞌhuatonhuëꞌ, Yosë noninsoꞌ shaꞌhuirin.

“Nisha piyapiꞌsaꞌ co yanohuitopirinacohuëꞌ, iporasoꞌ imasarinaco.

Co iráca nohuantopirinacohuëꞌ, iporasoꞌ nohuitarinaco, tënin Yosë,” itërin.

21Israiroꞌsaso nipirinhuëꞌ co yanatëpihuëꞌ. Inapita yonquiaton, Isaiasë quëran taantarin: “Iráca quëran huarëꞌ yacatahuarahuë. Imirahuë ihuëtatë pochin nitato: ‘Huëcoꞌ catahuainquëmaꞌ,’ itopirahuëꞌ, co yanatërinacohuëꞌ. Co natantochináchinhuëꞌ cancantopi, tënin Yosë,” itërin.

Currently Selected:

Romanos 10: cbt

Highlight

Copy

Compare