Números 22
22
Copirno Paracori, Paramo amatërinsoꞌ
1Israiroꞌsa paꞌsápatonaꞌ, Moapo canonamatëquë canconpi. Canconahuatonaꞌ, inaquë yaꞌhuëantapi. Moapo noꞌpasoꞌ, Cortaniiꞌ quëran piꞌi pipirinso parti quëparitërin. Quirico ninano notënanquë yaꞌhuërin.
2-4Israiroꞌsari amororoꞌsa ataꞌhuantërinso natantahuaton, Moapo copirnoso paꞌyanin. Naporo tahuëriꞌsa Paraco itopisoꞌ, Moapo copirno ninin. Inasoꞌ copirno Sipor itopisoꞌ huiꞌnin. Piyapinënpitarinta israiroꞌsa huaꞌhuayátërahuë huësapiso niꞌsahuatonaꞌ, paꞌpi tëꞌhuatopi. Ina yonquiatona Matian ansianoꞌsa shaꞌhuitonpi: “Israiroꞌsasoꞌ, notohuaroꞌ niꞌtonaꞌ, tiquiaponacoi quiyasoꞌ. Toro masho panpatoroꞌ capaton pëꞌyarinso pochin, nitaponacoi,” itopi.
5Napoaton copirnosoꞌ, piyapinënpita Pitor ninanoquë aꞌparin. Paramo macontacaiso marëꞌ aꞌparin. Inasoꞌ, Pioro huiꞌnin. Pitor ninanontaꞌ, Amapi roꞌtëquë yaꞌhuërin. Iopiratisiiꞌ yonsanquë. Paracori piyapinënpita camairin Paramo napotacaisoꞌ: “Iquipito quëran notohuaroꞌ piyapiꞌsa pipirahuatonaꞌ, yaꞌipi yaꞌhuërai roꞌtëquë yaꞌsoipi. Iporaso yaꞌhuërahuë ninano notënanquë chachin, yaꞌhuëintarapi. 6Chini chiníquënoꞌsa niꞌton, maꞌshátërahuë quiyasoꞌ canaponacoi. Napoaton aꞌnaroáchin huëcaton, ama huachi noya yaꞌhuëcaiso marëhuëꞌ quëmari shaꞌhuitiiquëꞌ. Quëmasoꞌ noya yaꞌhuëcaiso marëꞌ shaꞌhuitohuatana, ina inachachin ninin. Naporahuaton ama huachi noya yaꞌhuëcaiso marëhuëꞌ shaꞌhuitohuatanantaꞌ, ina inachachin ninin. Quëmari inapotohuatan, tapona minsërahuatoi, yaꞌhuërai quëran yaaꞌparai,” itocoꞌ, itërin.
7Moapo ansianoꞌsaꞌ, Matian ansianoꞌsaꞌ, inapitaso naꞌcon coriqui quëpapi. Paramori israiroꞌsa inapotohuachin, pahuërëcaiso marëꞌ quëpapi. Yaꞌhuërinquë canpachinara, Paracori nanan aꞌpatërinso shaꞌhuitopi. 8Shaꞌhuitohuachinara, Paramori itapon:
—Isëquë tahuërianpitocoꞌ. Ina quëran maꞌsona Sinioro camairincosoꞌ, shaꞌhuichinquëmaꞌ, itërin. Napotohuachina, Moapo ansianoꞌsasoꞌ, inaquë quëparitopi.
9Naporo tashi Siniorori Paramo yaꞌnotahuaton, itapon:
10-11—¿Inpitata quëma pëinënquë nisapi? itërin.
—Sipor huiꞌnin Paraco itopisoꞌ Moaporoꞌsa huaꞌanëntërin. Ina, piyapinënpita aꞌpairin shaꞌhuitiinacoso marëꞌ: “Iquipito quëran notohuaroꞌ piyapiꞌsa pipirahuatonaꞌ, yaꞌipi yaꞌhuërai roꞌtëquë yaꞌsoipi. Napoaton aꞌnaroáchin huëcaton ama huachi noya yaꞌhuëcaiso marëhuëꞌ shaꞌhuitiiquëꞌ. Quëmari inapotohuatan, tapona minsërahuatoi, noꞌpanëhuëi quëran aꞌparai,” tiquipi, itërin.
12—Ama inapitarëꞌquën paquësohuëꞌ. Naporahuaton co ina piyapiroꞌsa inapotamaso yaꞌhuërinhuëꞌ. Inapitasoꞌ cari chachin noya yaꞌhuëcaiso marëꞌ nani shaꞌhuitërahuë, itërin Yosëri.
13Tahuëririnquë tashíramiachin capayatahuaton, comisionoꞌsa itapon:
—Sinioro co nohuantërinhuëꞌ canpitaroꞌco pacaꞌhuasoꞌ. Napoaton yaꞌhuëramaquë paantacoꞌ, itërin.
14Napotohuachina Moapo huaꞌanoꞌsasoꞌ, paꞌmantarahuatona Paraco itaponaꞌ:
—Paramo co nohuantërinhuëꞌ imaquintaincoisoꞌ, itiipi.
15Paracoso napoaponahuëꞌ, naquëranchin aꞌnapita huaꞌanoꞌsa yaꞌhuërëꞌ aꞌpaantarin. Chini chiníquën nanantopisoꞌ, nisahuaton naꞌcon naꞌcon aꞌpaantarin. 16-17Paramo cantonahuatonaꞌ, itaponaꞌ:
—Sipor huiꞌnin Paraco itëraiso nanan aꞌpatiantarinquën: “Onpopionta huëcaton, isopita piyapiꞌsa ama huachi noya yaꞌhuëcaiso marëhuëꞌ shaꞌhuitiiquëꞌ. Huëꞌpatan noya noya niꞌsaranquën. Maꞌsona nohuantëransoꞌ natanpatanco, acotaranquën,” tënin, itopi.
18Itopirinahuë Paramorisoꞌ itapon:
—Caso co caora yonquinëhuë quëran maꞌsha nicaꞌhuasoꞌ nanitërahuëꞌ. Pancahuë nipon, naniahuë nipon maꞌsha nipatora, Yosë nohuantërinsoráchin nisarahuë. Pëinën mëntasha oro, prata, inapita Paraco quëtopirincohuë tërantaꞌ, Yosë nohuantërinsoráchin nisarahuë. 19Napoaponahuëꞌ, ipora tashi canpitanta isëquë tahuërianpitocoꞌ. ¿Maꞌtama iporasoꞌ Sinioro taantaꞌin paꞌ? itërin.
20Naporo tashi Siniorori yaꞌnotantarahuaton, itapon:
—Quëma marëꞌ huëꞌpachinasoꞌ, imaquë nipachin. Napoaponahuëꞌ, maꞌsona nohuantërahuësoráchin quëmasoꞌ nisaran, itërin.
Yosë anquëninëni Paramo yaꞌcopirinsoꞌ
21Tahuëririnquë Paramosoꞌ, Moapo huaꞌanoꞌsa imacaso marëꞌ moranën tapararin. 22Nani tapahuachina, inaquë yaꞌmitëahuaton paꞌsarin. Cato piyapinënpitari imasapi. Napoaponahuëꞌ, paꞌsarinso marëꞌ Yosëriso co noyahuëꞌ niꞌnin. Napoaton Sinioro anquëninëni yaꞌcopicaso marëꞌ toꞌshitërin. 23Paramoriso co quënanpirinhuëꞌ, moranënso Sinioro anquëninën quënanin. Iraquë sahuëninën sëꞌquërin quëran huaniarin. Ina quënanaton, pëshonin. Pëshonpachina, Paramori iraquë aꞌpaantacaso marëꞌ naraquë chiníquën huihuirin. 24Sinioro anquëninënso amasha paꞌnin. Paꞌsahuaton, cato oparo naꞌpi quëran pairapipisoꞌ huancánachin ira paꞌninquë toꞌshitaantarin. Inaëchinsoꞌ, ira co pancanayahuëꞌ. 25Moraso naquëranchin Sinioro anquëninën quënaantarahuaton, pëshoantarin. Pëshoantapirinhuëꞌ, naꞌpi paira yaꞌhuërin niꞌton, inaquë huaꞌanën nantëquën yaꞌquëantërarahuaton oquërërin. Napotohuachina, Paramosoꞌ moranën naquëranchin huihuiantarin. 26Napoaponahuëꞌ, Sinioro anquëninënso amasha paantarin. Paꞌsahuaton, ira yami yamianáshaꞌhuaya nininquë toꞌshitaantarin. Inaquësoꞌ, co onpo pëshonchináchinhuëꞌ ninin. 27Moraso naquëranchin Sinioro anquëninën quënaantarahuaton, quëhuënin huachi. Co onpo pëshonacasohuëꞌ niꞌton, naporin. Napohuachina Paramosoꞌ, naquëranchin moranën noꞌhuiton, huihuiantarin. 28Naporoꞌ Sinioro nohuanton, moraso nonin. Nonsahuaton huaꞌanën itapon:
—¡Carinquënsoꞌ, co maꞌsha onpotopiranquënhuëꞌ! Quëmaso isoarëꞌ, nani cararo huihuiranco, itërin.
29—Co yanatërancohuë niꞌton, napotëranquën. Sahuëni yaꞌhuëtërinco naporini, nani tëpaꞌitënquënhuëꞌ, itërin.
30—Iráca quëran huarëꞌ quëparanquën nipirinhuëꞌ, co poꞌtochinanquënhuëꞌ, itaantarin moranëni.
—Naporin mini nipirinhuëꞌ, taantarin Paramo.
31Naporoꞌ Sinioro nohuanton, Paramonta Yosë anquëninën quënanin huachi. Sahuëni sëꞌquëaton iraquë huaniárin quënanin. Ina quënanahuaton isonin. Isonin quëran noꞌpaquë huarëꞌ monshorahuaton, mosharin. 32Sinioro anquëninënisoꞌ itapon:
—Co cara cararo moranën huihuicasohuë nipirinhuëꞌ. Co noyahuëꞌ nicacasoꞌ yonquiran niꞌton, carinquën toꞌshitëapiranquënhuëꞌ. 33Co moranën pëshoninhuëꞌ naporini, nani tëpaꞌitënquënhuë huachi. Napoaponahuëꞌ, moraso co tëpaꞌitohuëꞌ, itërin.
34—Toꞌshitërancosoꞌ co nitotatohuëꞌ, oshahuanahuëꞌ. Napoaponahuëꞌ, quëma topatan ayamantaꞌi nipachin, itërin.
35—Paquë imatëquëꞌ. Napoaponahuëꞌ, maꞌsona shaꞌhuitëranquënsoráchin nonsaran, itërin.
Paramo, Paracorëꞌ niquënanpisoꞌ
Napotohuachina Paramosoꞌ, Paracori huaꞌanoꞌsa aꞌparinso imaquirin. 36Paramo huëꞌsarinso natanahuaton, Paracosoꞌ nacapicaso marëꞌ, noꞌpanën naniconinquë ninarin. Inaquë aꞌna ninano yaꞌhuërin. Arnoiꞌ chinpinamënquë yaꞌhuërin. Paramo quënanahuaton, itapon:
37—Carinquën përapiranquënhuëꞌ. ¿Onpoatonta co yahuëntaranhuëꞌ? “Huëntaran naporini, noya nicatënquën noꞌtëquën pahuërëꞌitënquënhuëꞌ,” itërin.
38—Maꞌtana nani canquirahuë. Napoaponahuëꞌ, co maꞌsha tëranta caora yonquinëhuë quëran, nonaꞌhuaso yaꞌhuërinhuëꞌ. Yosë shaꞌhuitërincosoráchin shaꞌhuipo casoꞌ. 39Ina quëran cato chachin Quiria-osoto ninanoquë paꞌpi. 40Inaquë Paraco camaitërin ohuacaroꞌsaꞌ, ohuicaroꞌsaꞌ, inapita tëpacaisoꞌ. Paramo, huaꞌanoꞌsa imaquirinsoꞌ, inapita quëpatontacaiso marëꞌ naporin.
41Tahuëririnquë Paracosoꞌ, Paramo yonisahuaton, Pamoto-Paaro motopiꞌpaꞌ quëpantarin. Ina quëran nocotahuaton, israiroꞌsa yaꞌhuëpiso intonquë, nëꞌmëtë pëiroꞌsa quënanin.
Currently Selected:
Números 22: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
