Juan 8
8
1Quisososo nipirinhuëꞌ Oriposë panënquë paꞌnin. 2Tahuëririnquë tashiramiachin Yosë chinotopiso pëiquë paantarin. Naꞌa piyapiꞌsaꞌ huëꞌpi ina natanacaiso marëꞌ. Inaquë huënsërahuaton, aꞌchinapirinhuëꞌ, 3Cotio maistroꞌsaꞌ, parisioroꞌsaꞌ, inapita huëcatonaꞌ, aꞌna sanapi quëpi. Soꞌyahuan nipirinhuëꞌ, nisha quëmapiri ichihuëꞌërin. Nani quënanpi niꞌton, masahuatonaꞌ, Quisosoquë quëpi. Sanapi huancánachin ahuanirahuatonaꞌ, Quisoso itaponaꞌ:
4—Maistro, iso sanapi soꞌyahuan nipirinhuëꞌ, nisha quëmapiri ichihuëꞌërin, quënanai. 5Iráca Moisësë pënëninpoaꞌ. “Monshihuanpisopita naꞌpiquë tëꞌyaratomaꞌ, tëpacoꞌ,” tënin. ¿Maꞌtaꞌ tënan quëma ipora? ¿Tëpaꞌii ti? itopi.
6Quisoso atëhuërahuatonaꞌ shaꞌhuirapicaiso marëꞌ natanapi. Quisososo nipirinhuëꞌ iꞌchorahuaton, imirin quëran noꞌpaquë ninshitarin.
7—¿Maꞌtaꞌ onpochii? Shaꞌhuitocoi, itantahuachinara, huaniantarin.
—Noyahuaꞌ. Insonquëma tërantaꞌ co piꞌpian tërantaꞌ oshahuanpatamahuëꞌ, inariꞌton naꞌpiquë tëꞌyarain, itërin.
8Ina quëran iꞌchoantarahuaton, noꞌpaquë ninshitaantarin. 9Ina natanahuatonaꞌ, aꞌnaya aꞌnaya paꞌpi. Mashoroꞌsaꞌton paꞌpi. Ina quëran aꞌnaya aꞌnaya paꞌpi. Yaꞌipiya paꞌpachinara, sanapiíchin huaniárin. 10Quisoso huaniantarahuaton, itapon:
—¿Inso huachi, imoya, quëmapiꞌsaꞌ yaanaꞌintërinënquënsoꞌ? ¿Co huachi yaanaꞌintërinënquënhuëꞌ? itërin.
11—Nani paꞌpi Sinioro, itërin.
—Co carinquëontaꞌ yaanaꞌintëranquënhuëꞌ. Paaton, ama huachi aquëtëꞌ oshahuaantaquësohuëꞌ. Noya niquë huachi, itërin. Napotohuachina, paꞌnin.]
Quisoso aꞌpintërinpoasoꞌ
12Ina quëran piyapiꞌsaꞌ aꞌchintantarin.
—Casoꞌ aꞌpintatë pochin nicato, yaꞌipi piyapiꞌsaꞌ noꞌtëquën anitotarahuë. Imapatamaco, co huachi tashinan pochin cancantaramahuëꞌ. Tahuëri pochin cancantaramaꞌ. Ina pochin cancantohuatamaꞌ, Yosë nohuitatomaꞌ nanpimiataramaꞌ. 13Parisioroꞌsari natanahuatonaꞌ, itaponaꞌ:
—Quëmaora yonquinën quëran naporan. Co natëcaꞌhuainquënsoꞌ yaꞌhuërinhuëꞌ, itopi.
14—Caora yonquinëhuë quëran napopirahuëꞌ, tëhuënchachin noꞌtëquën nonahuë. Intohua quëransona oꞌmarahuësoꞌ nitotërahuë. Aꞌna tahuëri inatohua chachin panantarahuë. Casáchin ina nitotërahuë. Canpitaso nipirinhuëꞌ co nitotëramahuëꞌ. Napoaton natëcamacosoꞌ yaꞌhuërin. 15Canpitasoꞌ piyapiꞌsaꞌ inahuara yonquipiso pochin napoonin yonquirapitomaco shaꞌhuiramaꞌ. Caso nipirinhuëꞌ, co insonta ina pochin yonquirapito shaꞌhuirahuëꞌ. 16Shaꞌhuihuatëraso napoaponahuëꞌ, noꞌtëquën shaꞌhuirahuë. Co casáchin shaꞌhuirahuëꞌ. Tatahuëntaꞌ ina pochachin yonquiaton shaꞌhuitarinquëmaꞌ. Ina aꞌpaimarinco. 17Moisësë pënëntërinsoꞌ yaꞌhuëtërinquëmaꞌ. Inaquë iráca ninshitërin. “Aꞌna piyapiáchin shaꞌhuihuachina, nonpiámara. Nipirinhuëꞌ, catoꞌ piyapi inachachin shaꞌhuihuachinaꞌ, naporo huarëꞌ natëtacasoꞌ yaꞌhuërin,” tënin. 18Carinquëmaꞌ nani shaꞌhuitaranquëmaꞌ. Tatahuëntaꞌ inachachin anitotarinquëmaꞌ. Ina aꞌpaimarinco, itërin Quisosori.
19—¿Insëquëtaꞌ tataparin? itopi.
—Canpitasoꞌ co ina nohuitëramahuëꞌ. Cantaꞌ co tëhuënchachin nohuitëramacohuëꞌ. Nohuitëramaco naporini, tatahuëntaꞌ nohuichitomahuëꞌ, itërin.
20Yosë chinotopiso pëiquë aꞌchintaton, napotërin. Coriqui cacon notënanquë aꞌchintarin. Yosë nohuanton, co chiminacasoꞌ naniyatërarinhuëꞌ. Napoaton co insoari tërantaꞌ maninhuëꞌ.
Quisoso paꞌmiatarinsoꞌ
21Ina quëran itantarin:
—Aꞌna tahuëri paꞌmiatarahuë. Naporoꞌ yonípiramacohuëntaꞌ, co quënanaramacohuëꞌ. Oshanëmarëꞌquëma chachin chiminaramaꞌ. Insëquësona paꞌpato, co canpitasoꞌ nanitaramahuëꞌ pacacamasoꞌ, itërin. 22Ina natanahuatonaꞌ, cotioroꞌsaꞌ ninontopi.
—¿Maꞌtaꞌ tapon naporin? “Insëquësona paꞌpato, co nanitaramahuëꞌ pacacamasoꞌ,” itërinpoaꞌ. ¿Yanitëpamara ti? nitopi.
23—Canpitasoꞌ isoroꞌpaquë yaꞌhuatomaꞌ, aꞌnapita piyapiꞌsa pochin yonquiramaꞌ. Caso nipirinhuëꞌ inápa quëran oꞌmarahuë niꞌto, Yosë pochin yonquirahuë. 24Napoaton napotëranquëmaꞌ. Caso iráca quëran huarëꞌ yaꞌhuato, yaꞌhuëmiatarahuë. Co natëhuatamacohuëꞌ, oshanëmarëꞌquëma chachin chiminaramaꞌ, itërin.
25Napohuachina:
—¿Inquëntaꞌ quëmasoꞌ? itopi.
—Nani iráca quëran huarëꞌ shaꞌhuitëranquëmaꞌ. Ca inaco tënahuë. 26Canpitaso co noyahuëꞌ ninama niꞌton, naꞌcon shaꞌhuitaꞌhuanquëmaso yaꞌhuërin. Aꞌpaimarincosoꞌ noꞌtëquënáchin nonin. Ina shaꞌhuitohuachincora natanato, ina chachin shaꞌhuitaranquëmaꞌ, tënin.
27Tata Yosë tapon naporinsoꞌ co nitotopihuëꞌ.
28—Yosë quëran quëmapico niporahuëꞌ, corosëquë achinpiarinaco. Naporo huarëꞌ ca yaꞌhuëmiatarahuësoꞌ nohuitaramaco. Naporahuaton: “Tëhuënchachin co inaora yonquinën quëran aꞌchininhuëꞌ. Paꞌpini aꞌchintërinso chachin aꞌchinin,” tosaramaꞌ. 29Tatahuë aꞌpaimarinco niꞌton, caꞌtaninco. Ina nohuantërinsoráchin noꞌtëquën natërahuë niꞌton, co patarincohuëꞌ, itërin.
30Itohuachina, naꞌa piyapiꞌsari “Noꞌtëquën nontërinpoaꞌ,” taꞌtonaꞌ, natëpi.
Sopairi camairinsoꞌ
31Ina quëran nasha imarinsopita itantarin:
—Carinquëmaꞌ aꞌchintëranquëmasoꞌ noya natëhuatamaꞌ, noya imasaramaco. 32Imamiatohuatamaco, noꞌtëquën yonquiaramaꞌ. Co insontaꞌ camaiarinquëmahuëꞌ, itërin.
33—Quiyasoꞌ Apraan shinpitacoi. Co onporontaꞌ aꞌnapita camairinacoihuëꞌ. ¿Onpoatontaꞌ: “Co insontaꞌ camaiarinquëmahuëꞌ,” itërancoi? itopi.
34—Noꞌtëquën itëranquëmaꞌ. Co noyahuëꞌ nipatamaꞌ, sopai huaꞌan camaiarinquëmaꞌ. Piyapinënpita pochin nisaramaꞌ. Co canpitaora nanitaramahuëꞌ oshanëmaꞌ naniantamasoꞌ. Sopai camaihuachinquëmaꞌ, co noyahuëꞌ nisaramaꞌ. 35Niꞌcoꞌ. Patron yaꞌhuërinquë piyapinën co yaꞌhuëmiatërinhuëꞌ. Patronëni nohuantohuachina, ocoiantarin. Huiꞌninso nipirinhuëꞌ yaꞌhuëmiatarin. 36Yosë huiꞌninco niꞌto, catahuahuatënquëmaꞌ, chaꞌësaramaꞌ. Co huachi insontaꞌ camaiantarinquëmahuëꞌ. 37Canpitasoꞌ Apraan shinpitanquëmaꞌ nipomarahuëꞌ, yatëparamaco. Aꞌchintopiranquëmahuëꞌ, nonahuësoꞌ co yanatëramahuëꞌ. 38Tatahuë anitotërincosoꞌ natëto shaꞌhuitaranquëmaꞌ. Canpitaso nipirinhuëꞌ, maꞌsona tatanëma pochin nininsoꞌ camaihuachinquëmara, natëramaꞌ, itërin Quisosori.
39—Apraan mini quiyaso tatanëhuëi, itopi.
—Apraan pochin cancantëramaꞌ naporini, ina pochin noya niitomahuëꞌ. 40Yosë anitotërincoso chachin noꞌtëquën shaꞌhuitopiranquëmahuëꞌ, yatëparamaco. Apraansoꞌ co ina pochin yonquirinhuëꞌ. Yosë nanamën noya natërin. 41Canpitaso nipirinhuëꞌ tatanëma pochin nininsoꞌ nonanamaꞌ, itërin.
—Co quiyasoꞌ maꞌpapiaꞌhuaroꞌsacoihuëꞌ. Yosë chachin tatanëhuëi. Inasáchin natërai, itaantapi.
42Napotohuachinara:
—Yosësoꞌ tatanëmaꞌ naporini, nosoroꞌitomacohuëꞌ. Yosë quëran oꞌmarahuë. Co caora nohuanto, oꞌmarahuëꞌ. Yosë aꞌpaimarinco. 43Aꞌchintopiranquëmahuëꞌ, ¿onpoatomataꞌ co natanamacohuëꞌ? Co natëtochináchinhuëꞌ cancantëramaꞌ niꞌton, co nanitëramahuëꞌ natanamacosoꞌ tënahuë. 44Sopai huaꞌan mini tataparinquëmasoꞌ. Ina pochin cancantatomaꞌ, inasáchin natëaramaꞌ. Iráca quëran huarëꞌ piyapiꞌsaꞌ tëpanaꞌpi inasoꞌ. Co noꞌtëquën nitononinhuëꞌ niꞌton, co piꞌpisha tërantaꞌ natëcasoꞌ yaꞌhuërinhuëꞌ. Paꞌpi nonpintëꞌ inasoꞌ. Inachin, nonpinacasoráchin cancantërin. Ina nohuanton, nonpinëꞌ. 45Noꞌtëquën pënënanquëmaꞌ niꞌton, co yanatëramacohuëꞌ. 46¿Inquëmataꞌ nanitëramaꞌ noꞌtëquën shaꞌhuirapiamacosoꞌ? “Co noyahuëꞌ nicaton, oshahuanan,” itohuatamaco, nonpinaramaꞌ. Casoꞌ noꞌtëquën nontaranquëmaꞌ, nipirinhuëꞌ, ¿onpoatomataꞌ co natëramacohuëꞌ? tënahuë. 47Yosë piyapinënpita ina nanamën noya natanpi. Canpitaso nipirinhuëꞌ co Yosë piyapinënquëmahuëꞌ niꞌton, co yanatanamahuëꞌ, itaantarin Quisosori.
Coꞌhuara Apraan nasichatërasohuëꞌ, Quisoso yaꞌhuërinsoꞌ
48Ina natanahuatonaꞌ huaꞌanoꞌsari itantapi:
—¿Coꞌta quëmasoꞌ Samaria piyapinquën? tënai. “Sopai yaꞌcoancantërinquën niꞌton, huaꞌyantëran,” topatëira, noꞌtëquën napotërainquën, itopi.
49—Co sopai yaꞌcoancantërincohuëꞌ. Tatahuë noya nicato natërahuë. Canpitaso nipirinhuëꞌ nocanatomaco, pinoramaco. 50Co noya niꞌpiramacohuëꞌ, co ina yonquirahuëꞌ. Yosësoꞌ noya niꞌninco. Inasoꞌ coisë pochin nicaton, noꞌtëquënáchin yonquirin. 51Noꞌtëquën itaranquëmaꞌ. Natëhuatamaco, co chiminaramahuëꞌ, itërin Quisosori.
52—Sopai mini nani yaꞌcoancantërinquën. Co huachi yonquiranhuëꞌ. Apraan nani chiminin. Pënëntonaꞌpiroꞌsantaꞌ chiminpi antaꞌ. Quëmaso nipirinhuëꞌ: “Natëhuatamaco, co chiminaramahuëꞌ,” itërancoi. 53Tata Apraan, pënëntonaꞌpiroꞌsaꞌ, inapita chiminpi. ¿Inapita quëran quëmasoꞌ chini chiníquën nanantëran ti? ¿In pochintaꞌ cancantaton, naporan? itaantapi cotioroꞌsari.
54—Casáchin “Noyaco,” tënahuë naporini, topinan quëran napoꞌitohuëꞌ. Nipirinhuëꞌ, Tata Yosë noya niꞌninco. Canpitantaꞌ: “Ina chinotërai,” tënamasoꞌ. 55Co inasoꞌ nohuitopiramahuëꞌ, casoꞌ nohuitërahuë. Yaꞌipi noninsoꞌ natërahuë. “Co nohuitërahuëꞌ,” tënahuë naporini, canpita pochachin cantaꞌ nonpiintohuëꞌ. 56Tata Apraan yonquirinco. “Aꞌna tahuëri Yosëri aꞌpaimarinsoꞌ oꞌmararin,” taꞌton, noya cancantërin. Nani niꞌninco niꞌton, noya cancantërin, itërin Quisosori.
57—Co quëmasoꞌ aꞌnatërápo shonca piꞌipichátëraponahuëꞌ, ¿Apraan niꞌnan ti? itopi.
58—Noꞌtëquën shaꞌhuitëranquëmaꞌ. Coꞌhuara Apraan nasichatërasohuëꞌ, casoꞌ yaꞌhuárahuë, itërin.
59Ina quëran naꞌpiroꞌsaꞌ masahuatonaꞌ, yatëꞌyarapi. Quisososo nipirinhuëꞌ naꞌpirahuaton, Yosë chinotopiso pëi quëran pipirin.
Currently Selected:
Juan 8: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.