Juan 5
5
Apia anoyatërinsoꞌ
1Ina quëran cotio niyontonpiso tahuëri naniriarin. Naporoꞌ Quisoso Quirosarinquë paantarin. 2Inaquë iꞌsha yaꞌhuërin, anpomiachin. Cotio nananquë Pitista itopi. Ninano yaꞌcoana pirayan yaꞌhuërin, ohuicaroꞌsaꞌ yaꞌcoananën itopiquë. Iꞌsha pirayan aꞌnatërápo imënamë pochin nininsoꞌ yaꞌhuërin. 3-4Inaquë naꞌa caniaꞌpiroꞌsaꞌ quëhuënapi. Aꞌnaquën somaraya. Aꞌnaquën sonpacha. Aꞌnaquën nantën tachitërin niꞌton, co nanitërinhuëꞌ huanicasoꞌ. Inaquë ninarapi. [“Huaꞌqui quëran huaꞌqui quëran Sinioro anquëninën oꞌmaton, iꞌsha acoꞌsacaitërin,” topi. “Napohuachina, insoꞌton iꞌquë yaꞌconpachina, aꞌnaroáchin noyatërin,” taꞌtonaꞌ, ninarapi.] 5Inaquë aꞌna quëmapi yaꞌhuërin. Nani cara shonca posa piꞌipi caniorin. Co nanitërinhuëꞌ huanicasoꞌ. 6Inaquë quëhuënápirinhuëꞌ, Quisosori quënanquirin. “Nani huaꞌquiꞌ caniorin,” itohuachina, apia itapon:
—¿Nohuantëran noyatamaso ti? itërin.
7—Nohuantopirahuëꞌ Sinioro. Saꞌahuaco. Co insontaꞌ yaꞌhuërinhuëꞌ iꞌquë poꞌmoincosoꞌ. Iꞌsha coꞌsacaitohuachina, yayaꞌconpirahuëꞌ. Aꞌnaꞌton yaꞌconin, itërin.
8—Huaniquëꞌ iyasha. Pëꞌsaraꞌhuaya masahuaton, iratëquëꞌ, itërin.
9Napotohuachina, aꞌnaroáchin apia noyatërin. Pëꞌsaraꞌhuaya masahuaton, iratërin. Chinoto tahuëri chachin naporin. 10Cotio huaꞌanoꞌsari quënanahuatonaꞌ, apia huëcapaipi.
—Ipora tahuërisoꞌ, chinoto tahuëri niꞌton, co maꞌsha quëpacasoꞌ yaꞌhuërinhuëꞌ, itopi.
11—Quëmapi anoyatërincosoꞌ nani shaꞌhuitërinco. “Pëꞌsaraꞌhuaya masahuaton, iratëquëꞌ,” itërinco, tënin.
12—¿Ma quëmapitaꞌ napotërinquën? itopi. 13“Ahuën. Co nohuitërahuëꞌ,” tënin. Huaꞌhuayatërahuëꞌ piyapi inaquë yaꞌhuërin niꞌton, nani Quisoso paꞌnin. 14Ina quëran chinotopiso pëiquë paꞌsahuaton, apia anoyatërinsoꞌ quënancoantarin.
—Niꞌquëꞌ iyasha. Nani quëmasoꞌ noyatëran. Ama huachi oshahuaantaquësohuëꞌ, naꞌcon naꞌcon maꞌsha onpotan, itërin.
15Ina natanahuaton, Yosë chinotopiso pëi quëran pipirahuaton, cotioroꞌsaꞌ shaꞌhuitonin. “Quisoso anoyatërinco,” itoonin. 16Napoaton Quisoso noꞌhuipi. Chinoto tahuëri anoyatërinso marëꞌ co quëꞌyapihuëꞌ. 17Quisosoriso nipirinhuëꞌ itërin:
—Tatahuësoꞌ co ipora huantaꞌ chinotërinhuëꞌ. Sacatárin piyapiꞌsaꞌ catahuacaso marëꞌ. Cantaꞌ co chinotërahuëꞌ. Nani tahuëri piyapiꞌsaꞌ catahuarahuë, tënin.
18Chinoto tahuëri piyapi anoyatërin niꞌton, cotioroꞌsari yatëpapi. “ ‘Yosësoꞌ tatahuë chachin,’ topachina, Yosë pochachin niconin,” taꞌtonaꞌ, aquë aquëtëꞌ yatëpapi.
Yosë huiꞌnin niꞌton chiníquën nanantërinsoꞌ
19Ina quëran Quisosori itantarin: “Noꞌtëquën itaranquëmaꞌ. Caora yonquinëhuë quëran co mantaꞌ ninahuëꞌ. Tatahuëráchin nonanahuë. Huiꞌninco niꞌto, inapochachin cantaꞌ ninahuë. 20Tatahuë naꞌcon nosororinco. Nosoroatonco, yonquirinso chachin anitotërinco. Aꞌna tahuëri catahuaarinco saca sacaiꞌ nininsoꞌ nicaꞌhuasoꞌ. Canpitasoꞌ niꞌpatamaꞌ, paꞌyanaramaꞌ. 21Tatahuë chimipi ananpitaantarin. Inapochachin cantaꞌ insosona nohuantërahuësoꞌ ananpitaantarahuë. 22Aꞌna tahuëri coisë pochin nicato, yaꞌipi piyapiꞌsaꞌ noꞌtëquën shaꞌhuitarahuë. Noya nipisopita noya acoarahuë. Oshahuanoꞌsaso nipirinhuëꞌ noꞌtëquën anaꞌintarahuë. Co tatahuëri anaꞌintarinhuëꞌ. Nani nanan quëtërinco anaꞌintaꞌhuaso marëꞌ. 23Ina quëran yaꞌipi piyapiꞌsaꞌ noya niꞌsarinaco. Tatahuë noya niꞌpiso pochachin niꞌsarinaco. Ina marëꞌ nanan quëtërinco. Co noya niꞌpatamacohuëꞌ, Tatahuëntaꞌ co noya niꞌnamahuëꞌ. Ina aꞌpaimarinco.
24Noꞌtëquën itaranquëmaꞌ. Yosë chachin aꞌpaimarinco. Noya natanpatamaco, cancanëma quëran huarëꞌ ina imapatamaꞌ, nanpimiataramaꞌ. Co onporontaꞌ anaꞌintaranquëmahuëꞌ. Chiminpatamaꞌ, co parisitomiataramahuëꞌ. Nani Yosë nohuitaramaꞌ niꞌton, nanpimiataramaꞌ. 25Casoꞌ Yosë huiꞌninco. Iporaso huachi aꞌnaquën chimipi pochin nipisopita natanarinaco. Inapita noya natanpachinaco, Yosë anohuitarahuë. Ina nohuitohuachinaꞌ, nanpimiatapi. 26Tata Yosë inaora nohuanton, nanpirin. Inari piyapiꞌsaꞌ nanpicasoꞌ quëtërin. Inapochachin cantaꞌ ina nohuanton, nanpirahuë. Naporahuaton, aꞌnapitantaꞌ ananpitaꞌhuasoꞌ nanitaparahuë. 27Yosë quëran quëmapico niꞌto, nanan quëtërinco piyapiꞌsaꞌ anaꞌintaꞌhuaso marëꞌ. 28Ama ina yonquiatomaꞌ, paꞌyancosohuëꞌ. Aꞌna tahuëri yaꞌipi chiminpisopita natanarinaco. 29Natanpachinaco, poꞌoro quëran pipiapi. Noya nipisopita noya noya nanpiantarapi. Co noyahuëꞌ nipisopitaso nipirinhuëꞌ, anaꞌintarahuë,” tënin Quisoso.
Yosëri aꞌpaimarinsoꞌ
30Ina quëran Quisosori itantarin: “Co caora nohuanto mantaꞌ ninahuëꞌ. Tata Yosë shaꞌhuitohuachincora, inachachin shaꞌhuirahuë. Co casoꞌ nisha yonquirahuëꞌ. Tata yonquirinsoráchin nohuantërahuë. Napoaton noꞌtëquën anaꞌintarahuë. 31Casoꞌ Cristoco. Yosë quëran oꞌmarahuë, tënahuë. Casáchin naporahuë naporini, co natëinacosoꞌ yaꞌhuëitonhuëꞌ. 32Nipirinhuëꞌ, Tata Yosëntaꞌ inachachin shaꞌhuitarinquëmaꞌ. Noꞌtëquën nonin, tënahuë. 33Iꞌhua piyapiꞌsaꞌ aꞌparamaꞌ Coansha natanacaiso marëꞌ. ‘Co casoꞌ Cristocohuëꞌ. Inasoꞌ Cristo, Yosëri aꞌpaimarinsoꞌ,’ itërin. Noꞌtëquën naporin. 34Casoꞌ co piyapi noninsoachin yonquirahuëꞌ. Nipirinhuëꞌ, isoꞌ shaꞌhuitaranquëmaꞌ canpita natëtomaꞌ chaꞌëcamaso marëꞌ. 35Coanshasoꞌ noya quëmapi. Huaroro noya orotërinso pochin niꞌton, noya anitotërinquëmaꞌ. Yaꞌnan natanpatamara, huaꞌquimiachin paꞌyatëramaꞌ. 36Inasoꞌ noꞌtëquën shaꞌhuitërinquëmaꞌ. ‘Yosëri chachin Quisoso aꞌpaimarin,’ itërinquëmaꞌ. Nipirinhuëꞌ, co inasáchin anitotërinquëmahuëꞌ. Yosësoꞌ chini chiníquën nanantaton, catahuarinco niꞌton, sacaiꞌ nininsoꞌ ninahuë. Caniaꞌpiroꞌsaꞌ aꞌnaroáchin anoyatërahuë. Yosë nohuanton, ina pochin ninahuë. Ina marëꞌ naꞌcon naꞌcon natëamacosoꞌ yaꞌhuërin. 37Tatahuë aꞌpaimarincosontaꞌ nani shaꞌhuitërinquëmaꞌ. Co onporontaꞌ noninsoꞌ natanchinamahuëꞌ. Co niꞌchinamahuëꞌ. 38Nanamëntaꞌ co natëramahuëꞌ. Aꞌpaimapirincohuëꞌ co natëramacohuëꞌ niꞌton, naporamaꞌ. 39Yosë quiricanën naꞌcon nontëramaꞌ. ‘Ina nontohuatëhuaꞌ, nanpimiatacaiso marëꞌ anitotarinpoaꞌ,’ tënamaꞌ. Napopiramahuëꞌ, co tëhuënchachin natëramahuëꞌ. Ina quiricaquë chachin ninorinaco. 40Noꞌtëquën ninopirinacohuëꞌ, co yaimaramacohuëꞌ. Ananpimiataꞌhuanquëmasoꞌ yaꞌhuëpirinhuëꞌ, co nohuantëramacohuëꞌ.
41Co canpita noya nicamacoso marëꞌ napotëranquëmahuëꞌ. 42Nani nohuitëranquëmaꞌ. Co cancanëma quëran Yosë nosororamahuëꞌ, tënahuë. 43Yosë chachin aꞌpaimarinco niꞌton, oꞌmapirahuëꞌ, co nohuantëramacohuëꞌ. Aꞌnaquënso nipirinhuëꞌ inaora yonquinën quëran aꞌchintohuachinquëmaꞌ, nohuantaramaꞌ. 44Canpita capini nipaꞌyatacasoráchin yonquiatomaꞌ, co Yosë noya nicainquëmasoꞌ yonquiramahuëꞌ. Napoaton co natëramacohuëꞌ. 45Co carinquëmaꞌ Yosëquë shaꞌhuirapiaranquëmahuëꞌ. Moisësë tëhuënchinsoꞌ shaꞌhuirapiarinquëmaꞌ. ‘Ina catahuarinpoaꞌ,’ taꞌtomaꞌ, imapiramahuëꞌ, co natëramahuëꞌ niꞌton, shaꞌhuirapiarinquëmaꞌ. 46Inasoꞌ, iráca ninotonco ninshitërin. Ina natëramaꞌ naporini, cantaꞌ natëitomacohuëꞌ. 47Ninshitopirinhuëꞌ, co natëramahuëꞌ niꞌton, carinquëmantaꞌ aꞌchintopiranquëmahuëꞌ, ‘Co noꞌtëquën nonanhuëꞌ,’ itëramaco,” itërin Quisosori, cotio huaꞌanoꞌsaꞌ nontaton.
Currently Selected:
Juan 5: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.