YouVersion Logo
Search Icon

Juan 12

12
Huaꞌsaiquë oporantëtërinsoꞌ
(Mateo 26.6-13; Marcos 14.3-9)
1Saota tahuëri pahuanarin Pascoa nanicasoꞌ. Naporoꞌ Quisoso Pitaniaquë paantarin. Inaquë Nasaro yaꞌhuërin, ananpitaantarinsoꞌ. 2Inaquë canconpatëira, yaꞌhuëhuanoꞌsaꞌ amatërinacoi caꞌpataꞌhuaiso marëꞌ. Quisoso nosoroatonaꞌ, napopi. Martasoꞌ cosharoꞌ oꞌhuinarin. Nasarontaꞌ inaquë coshatarin. 3Naporoꞌ Mariasoꞌ aꞌna potiria paꞌton huaꞌsaiꞌ yaꞌhuërinquë manin. Inaquë Quisoso nantëquën pashirantëtërin. Ina quëran ainën quëran amirantërin. Yaꞌipi pëiꞌ pimoanahuanin. 4Cotasë Iscariotiso nipirinhuëꞌ, co noyahuëꞌ niꞌnin. Inasoꞌ Quisoso caꞌtanaponahuëꞌ, yashaꞌhuirapirin.
5—¿Onpoatontaꞌ iso huaꞌsaiꞌ chiniarin? Paꞌanin naporini, cara pasa tahuëri sacatërëso marëꞌ canarëso pochin coriqui canaitonhuëꞌ. Saꞌahuaroꞌsantaꞌ quëchitonhuëꞌ, tënin Cotasë.
6Nipirinhuëꞌ, co saꞌahuaroꞌsaꞌ yonquiaton naporinhuëꞌ. Yaihuataton, naporin. Inari chachin coriqui tanpanantëꞌ aꞌpairin niꞌton, piꞌpian piꞌpian ihuatarin. 7Napopirinhuëꞌ, Quisosori itërin:
—Iso sanapi tananpitëquëꞌ. Noya napotarinco. Chiminaꞌhuasoꞌ yonquiaton, pashirantëtërinco paꞌpitinacoso marëꞌ. 8Nani tahuëri saꞌahuaroꞌsasoꞌ yaꞌhuërarin. Caso nipirinhuëꞌ, co isëquë yaꞌhuëmiatarahuëꞌ, itërin.
Nasarontaꞌ yatëpapisoꞌ
9Quisoso Pitaniaquë yaꞌhuëasoꞌ, naꞌa cotioroꞌsaꞌ natantopi. Ina natantahuatonaꞌ, huëꞌpi Quisoso nicaponaꞌ. Nasarontaꞌ yaniꞌpi. Quisosori ananpitaantarin niꞌton, yaniꞌpi. 10-11Ananpitaantarinso marëꞌ naꞌayaꞌpi co huachi cotio huaꞌanoꞌsaꞌ yanatëpihuëꞌ. Inapita aꞌporahuatonaꞌ, Quisoso imasapi. Napoaton huaꞌanoꞌsari yonquipi Nasarontaꞌ tëpacaiso marëꞌ.
Quirosarinquë canconinsoꞌ
(Mateo 21.1-11; Marcos 11.1-11; Lucas 19.28-40)
12Huaꞌhuayátërahuë piyapiꞌsaꞌ Quirosarinquë paꞌsapi. Pascoa naꞌhuëcaiso marëꞌ inatohuaꞌ paꞌsapi. Tahuëririnquë Quisosontaꞌ inatohua chachin paꞌsarin. Ina natantahuatonaꞌ, 13mërëmë pochin nininsoꞌ mapi. Ina quëran nacapiaponaꞌ paꞌsapi. Paꞌyatatonaꞌ, chiníquën itaponaꞌ:
—¡Nichaꞌëcoi Tata Yosë! ¡Ma noyacha Quisososo paya! ¡Quëmari chachin chiníquën nanan quëtëran! ¡Quëma nohuanton, israiroꞌsacoi huaꞌanëntarincoi! tosapi.
14Mora quënanconahuaton, ina aipi Quisoso huënsërin. Iráca Yosë quiricanënquë, pënëntonaꞌpi ninshitërin Quirosarinquë yaꞌhuëpisopita nitotacaiso marëꞌ.
15“Quirosarinquë yaꞌhuëramasopita, ama paꞌyancosohuëꞌ.
Niꞌcoꞌ. Huaꞌanëmaꞌ huëꞌsarin. Mora huiꞌnapishin aipi huënsëriarin.
Inaquë yaꞌmitahuaton huëꞌsarin,” tënin ninshitaton.
16Yosë quiricanën quëran ninorin. Caꞌtanoꞌsanënpitacoiso nipirinhuëꞌ, co ina yonquiraihuëꞌ. Quisoso nanpiantahuachina, naporo huarëꞌ yonquirai. “Mora aipi chachin huënsërahuaton, Quirosarinquë huëꞌnin,” tënai.
17Nasaro ananpitaantarinsoꞌ niꞌpisopita shaꞌhuirápi. “Tëhuënchachin chiminpirinhuëꞌ, catapini tahuëri quëran Quisosori ananpitaantarin. Poꞌmopi quëran përarin quiyari niꞌnai,” tosapi. 18Ina marëꞌ notohuaroꞌ piyapiꞌsaꞌ Quisoso nacapiaponaꞌ paꞌpi. 19Natanahuatonaꞌ, parisioroꞌsaꞌ ninontopi.
—Topinan quëran pënënpirëhuahuëꞌ, co piyapiꞌsaꞌ piꞌpisha tërantaꞌ natërinënpoahuëꞌ. ¡Niꞌcochi! ¡Naꞌcon naꞌcon piyapiꞌsaꞌ Quisoso imasapi! nitopi ninontatonaꞌ.
Cricoroꞌsari Quisoso yanontopisoꞌ
20Aꞌnaquën Crico piyapiꞌsantaꞌ Quirosarinquë huëꞌpi. Nisha piyapi niponahuëꞌ, Yosë yonquiapi antaꞌ. Niyontonpiso tahuëri niꞌton, Yosë chinotacaiso marëꞌ huëꞌpi. 21Quisoso yanohuitatonaꞌ, Pinipi nontiipi. Pinipisoꞌ Pitsaitaquë yaꞌhuërin, Cariria parti yaꞌhuërinsoꞌ.
—Quiyantaꞌ iyasha Quisoso yanohuitopiraihuëꞌ, itopi.
22Ina natanahuaton, Antërisë shaꞌhuitonin. Naporahuaton, cato chachin paatonaꞌ, Quisoso shaꞌhuitonpi. 23Natanahuaton, itërin:
—Noya iyaroꞌsapaꞌ. Nani tahuëri nanirin huachi. Yosë quëran quëmapico niꞌto, chiminapo. Ina quëran naꞌa piyapiꞌsaꞌ noya niꞌsarinaco. 24Noꞌtëquën shaꞌhuitëranquëmaꞌ. Tricoraya pochin ninin. Co shaꞌpatërahuëꞌ, co naꞌarinhuëꞌ. Aꞌnaíchin nisárin. Napoaponahuëꞌ, shaꞌpatëra, chiminin pochin niponahuëꞌ, papotohuachina, naꞌa nitërin. 25Canpitantaꞌ isoroꞌpaquë yaꞌhuërinsopitaráchin yonquihuatamaꞌ, topinan quëran nanpiaramaꞌ. Nipirinhuëꞌ, Yosë naꞌcon naꞌcon yonquihuatamaꞌ, ina nohuitatomaꞌ noya nisaramaꞌ. Canpitaora nohuantëramasoáchin naniantohuatamaꞌ, aꞌna tahuëri inápaquë nanpimiatontaramaꞌ. 26Nohuantërahuësoꞌ yanipatamaꞌ, ca pochin cancantatomaꞌ imaco. Insëquësona paꞌpato, piyapinëhuëpita imasarinaco. Inquëma tërantaꞌ ca marëꞌ sacatohuatamaꞌ, Yosë noya niꞌsarinquëmaꞌ, itërin Quisosori.
Chiminacasoꞌ ninorinsoꞌ
27Ina quëran itaantarin: “Iporasoꞌ sëtochinachin cancantërahuë. ¿Maꞌtaꞌ Yosë ichi? tënahuë, yonquiato. Co parisitaꞌhuasoꞌ nohuantopirahuëꞌ, ‘Catahuaco Tata ama parisichisohuëꞌ,’ co itarahuëꞌ. Chiminaꞌhuaso marëꞌ oꞌmarahuë,” itahuaton, Yosë itapon: 28“Catahuaco Tata nohuantëranso nii. Ina quëran piyapiꞌsaꞌ nóya niꞌsarinënquën,” itërin, Yosë nontaton. Itohuachina, inápa quëran Yosëri itërin: “Nani catahuaranquën. Nohuantërahuëso ninan niꞌton, piyapiꞌsaꞌ nóya niꞌninaco. Iporasoꞌ catahuaantaranquën nohuantërahuëso nicacaso marëꞌ. Napoaton noya noya niꞌsarinaco,” itërin Yosëri.
29Piyapiꞌsaꞌ natanahuatonaꞌ, ninontopi. “Huirátarin,” topi aꞌnaquën.
—Co huirahuëꞌ. Anquëniri nontërin nimara, topi aꞌnaquëontaꞌ.
30Napohuachinara, Quisosori itërin:
—Co ca marëꞌ inápa quëran nontërincohuëꞌ. Canpita natëamacoso marëꞌ nontërinco, natanamaꞌ. 31Iporasoꞌ co natëpisopitahuëꞌ noꞌhuiarinaco niꞌton, anaꞌintacasoꞌ yaꞌhuërin huachi. Huaꞌquiꞌ sopairi piyapiꞌsaꞌ camaipirinhuëꞌ, cari minsërahuato, ocoiarahuë. 32Co huaꞌquiya quëranhuëꞌ inápaquë achinpiarinaco. Ina quëran nisha nisha piyapiꞌsaꞌ imasarinaco, itërin.
33“Corosëquë chachin chiminapo,” tapon naporin. 34Ina quëran nataninsopitari itaponaꞌ:
—Cristo nanpimiatarin. Co onporontaꞌ chimianinhuëꞌ, tënai. Yosë quiricanënquë naporin, nontërai. Quëmaso nipirinhuëꞌ nisha nonan. “Yosë quëran quëmapico niporahuëꞌ, inápaquë achinpiarinaco,” tënan. ¿Onpoatontaꞌ naporan? ¿Ma quëmapinquëntaꞌ quëmasoꞌ? itopi.
35—Iporáchin tahuëri pochin aꞌpintaranquëmaꞌ. Co huachi huaꞌquiꞌ yaꞌhuapohuëꞌ. Aꞌpininso pochin noꞌtëquën anitotëranquëmaꞌ. Anitotohuatënquëmaꞌ, noya nicoꞌ. Niꞌcona tashinan pochin cancantotamaꞌ. Tashinanquë iratohuatëra, chihuërëꞌ. 36Carinquëmaꞌ aꞌpintaranquëmaꞌ. Coꞌhuara paꞌshantatërasocohuëꞌ, natëco. Natëhuatamaco, canpitantaꞌ tahuëri pochin cancantaramaꞌ, itërin.
Ina tosahuaton, paꞌnin. Co huachi aꞌninquëchin iratërinhuëꞌ.
Tanshirëso pochin cancantopisopita
37Nani naꞌa piyapiꞌsaꞌ aꞌnaroáchin anoyatërin. Cosharoꞌ anaꞌatërin. Yosë pochin nininsoꞌ nicaponaraihuëꞌ, co yanatëpihuëꞌ. 38Iráca Isaiasë pënëntaton, tapon:
“Nani aꞌchintopiraihuëꞌ, Sinioro. Quëma nohuanton,
sacaiꞌ nininsoꞌ nani aꞌnotopiraihuëꞌ.
Naꞌcon naꞌcon piyapiꞌsaꞌ co natërapihuëꞌ,” tënin.
39Noꞌtëquën ninorin. Napoaton co nanitopihuëꞌ natëtacaisoꞌ. Isaiasë chachin itantarin:
40“Yosëri tananpitërin niꞌton, tanshirëso pochin cancantatonaꞌ,
co natëtochináchinhuëꞌ cancantopi.
Huaꞌquiꞌ co yanatëpihuëꞌ niꞌton, napotërin.
Noya niꞌpi naporini, quënanchitonahuëꞌ.
Noya natanpi naporini, natëchitonahuëꞌ.
Imarinaco naporini, anoyacancanchitohuëꞌ,” tënin.
41Iráca coꞌhuara Quisoso isoroꞌpaquë huëꞌshamátërasohuëꞌ, Isaiasëri huaꞌnarëso pochin quënanin. Quisososoꞌ Yosë pochachin nóya niꞌton, ina yonquiaton, naporin.
42Napoaponahuëꞌ, naꞌamiachin cotioroꞌsaꞌ huaꞌanoꞌsanënpitarë chachin natëpi. Napopirinahuëꞌ, parisioroꞌsaꞌ tëꞌhuatatonaꞌ, co aꞌninquëchin shaꞌhuipihuëꞌ. “Niyontonpiso pëiroꞌsa quëran ocoihuachinënpoaꞌ,” taꞌtonaꞌ, taꞌtápi. 43Yosëáchin paꞌyatacaiso nipirinhuëꞌ, piyapiꞌsari paꞌyatacaisoꞌ naꞌcon naꞌcon nohuantatona napopi.
Co Quisoso aꞌchininsoꞌ natëhuachinahuëꞌ, anaꞌintacasoꞌ yaꞌhuërinsoꞌ
44Ina quëran Quisosori chiníquën nonaton, aꞌchintantarin yaꞌipiya natanacaiso marëꞌ. “Noꞌtëquën aꞌchintëranquëmaꞌ. Natëhuatamaco, co casáchin natëaramacohuëꞌ. Tata Yosëntaꞌ natëarama antaꞌ. Ina aꞌpaimarinco. 45Ca nohuitohuatamaco, Yosëntaꞌ nohuitaramaꞌ. 46Carinquëmaꞌ aꞌpintëranquëmaꞌ. Imapatamaco, co tashinan pochin cancantaramahuëꞌ. Tahuëri pochin cancantaramaꞌ. Ina marëꞌ isoroꞌpaquë oꞌmarahuë. 47Aꞌnaquëmaꞌ natanpiramacohuëꞌ, co natëramacohuëꞌ. Co natëhuatamacohuëꞌ, co carimaꞌ anaꞌintaranquëmahuëꞌ. Co ina marëꞌ oꞌmarahuëꞌ. Piyapiꞌsaꞌ nichaꞌëcaꞌhuaso marëꞌ oꞌmarahuë. 48Co nohuantohuatamacohuëꞌ, aꞌchintëranquëmasontaꞌ co natëhuatamahuëꞌ, canpitaora tëhuënëmaquë ninaꞌintaramaꞌ. Nonahuëso chachin co natëramahuëꞌ niꞌton, ayaroꞌ tahuëri naꞌintarinquëmaꞌ. 49Co caora yonquinëhuë quëran aꞌchinahuëꞌ. Tata Yosë shaꞌhuitërinco nani maꞌsha aꞌchinaꞌhuasoꞌ. 50Yosë aꞌchininsoꞌ imapatamaꞌ, ina nohuitatomaꞌ nanpimiatarama huachi, tënahuë. Shaꞌhuitohuachincora, inachachin carinquëmantaꞌ shaꞌhuitaranquëmaꞌ,” itërin.

Currently Selected:

Juan 12: cbt

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy