Juan 1
1
Iráca Quisocristo Yosëꞌpaꞌ yaꞌhuërinsoꞌ
1Iráca quëran huarëꞌ Yosë noninsoꞌ yaꞌhuërin, Quisocristo itërëhuasoꞌ. Tata Yosërëꞌ yaꞌhuërin. Yosë pochachin ninin antaꞌ. 2Coꞌhuara isoroꞌpaꞌ yaꞌhuëyátërasohuëꞌ, Yosëꞌpaꞌ yaꞌhuërin. 3Naporoꞌ Yosë yonquirin yaꞌipi maꞌsha acocasoꞌ. Ina nohuanton, huiꞌnini acorin. Yaꞌipi maꞌsha ninin. Co aꞌnaya tërantaꞌ inaora yaꞌhuërinhuëꞌ. Co acorinhuëꞌ naporini, co mantaꞌ yaꞌhuëꞌitonhuëꞌ. 4Inariáchin yaꞌipiya ananpirin. Piyapinpoantaꞌ aꞌpintatë pochin aꞌchintërinpoaꞌ ina nohuitatëhuaꞌ nanpimiatacaso marëꞌ. 5Tashinantërinsoꞌ aꞌpintohuatëra, aꞌnaroáchin tahuëri pochin ninin. Co tashiri tacopitërinhuëꞌ. Inapochachin Quisocristo aꞌpintërinpoaꞌ. Co noyahuëꞌ nininsopitari yaminsëpirinahuëꞌ, co nanitapapihuëꞌ.
6Aꞌna quëmapi yaꞌhuërin, Coansha itopisoꞌ. Yosëri aꞌparin 7aꞌpininsoꞌ anohuitiinpoaso marëꞌ. Yaꞌipi piyapiꞌsari natëcaiso marëꞌ shaꞌhuirin. 8Coanshasoꞌ co aꞌpintërinpoahuëꞌ. Yosëri aꞌparin aꞌpininsoꞌ anohuitiinpoaso marëꞌ. 9Shaꞌhuitërinpoaso chachin Quisocristo isoroꞌpaquë oꞌmarin. Oꞌmarahuaton, yaꞌipi piyapinpoaꞌ aꞌpintimarinpoaꞌ. Inasáchin noꞌtëquën anitotërinpoaꞌ.
10Isoroꞌpaquë oꞌmarin. Iráca Tata Yosë nohuanton, yaꞌipi maꞌsha ninin. Inari acopirinhuëꞌ, co piyapiꞌsari nohuitopihuëꞌ. 11Noꞌpanënquë chachin oꞌmapirinhuëꞌ, co piyapinënpitari nohuantopihuëꞌ. Nipirinhuëꞌ, 12Quisocristo cancanën mapatëhuaꞌ, huiꞌnin pochin Yosë niꞌninpoaꞌ. Natërëhuasopitarachin huëntonënquë ayaꞌconinpoaꞌ. 13Yaꞌipinpoaꞌ piyapi quëran nasitërëhuaso nipirëhuahuëꞌ, co ina quëran Yosë huëntonënquë yaꞌconëhuahuëꞌ. Co piyapi nanitërinhuëꞌ ayaꞌcoꞌinpoasoꞌ. Co canpoara nohuanton, yaꞌconëhuahuëꞌ. Yosëíchin ayaꞌconinpoaꞌ. Ina quëran huiꞌninpita pochin niꞌninpoaꞌ.
14Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ. 15Coansharintaꞌ niꞌnin. Niꞌpachina, piyapiꞌsaꞌ shaꞌhuitërin: “Iꞌhua chachin shaꞌhuitëranquëmaꞌ. ‘Ca piquëran aꞌna quëmapi huëꞌsarin. Coꞌhuara ca nasichátërapohuëꞌ, inasoꞌ Yosëꞌpaꞌ yaꞌhuërin. Napoaton ca quëran chini chiníquën nanantërin inasoꞌ,’ itëranquëmaꞌ. Nani oꞌmarin huachi,” itërin.
16Inasoꞌ paꞌpi nosororinpoaꞌ. Nóya niꞌton, nosoroatonpoaꞌ, naꞌcon catahuarinpoaꞌ. Co canpoara nanitopirëhuahuëꞌ, ina imapatëhuaꞌ, nani tahuëri catahuarinpoaꞌ. 17Iráca Yosë nohuanton, Moisësë pënëntërin nani maꞌsha natëcasoꞌ. Pënëntopirinhuëꞌ, co yaꞌipiya anitotërinpoahuëꞌ. Quisocristoso nipirinhuëꞌ nosororinpoaꞌ. Noꞌtëquën nonaton, yaꞌipi nanamën anitotërinpoaꞌ. 18Co inquënpoa tërantaꞌ Yosë quënanëhuahuëꞌ. Huiꞌniniso nipirinhuëꞌ noyá nohuitërin. Yosë pochachin niꞌton, napopianachin yonquipi. Inasáchin Tata Yosë anohuitërinpoaꞌ.
Coansha Paotista shaꞌhuirinsoꞌ
(Mateo 3.11-12; Marcos 1.7-8; Lucas 3.15-17)
19Coansha pënëntápachina, corto huaꞌanoꞌsaꞌ, nihuiroꞌsaꞌ, inapita paꞌpi Coansha nontacaiso marëꞌ. Cotio huaꞌanoꞌsari aꞌpapi niꞌton, Quirosarin quëran paꞌsahuatonaꞌ, Coansha itaponaꞌ: “¿Inquëntaꞌ quëmasoꞌ?” itoonpi.
20—Caso co Cristocohuëꞌ. Aꞌnaquën napotopirinacohuëꞌ, co casoꞌ inacohuëꞌ, itërin Coanshari.
21—Quëmasoꞌ Iniasënquën, iráca ayaponahuëꞌ, ¿yaꞌnoantamaranquën ti? itopi.
—Co casoꞌ inacohuëꞌ, tënin.
—¿Quëmasoꞌ pënëntonaꞌpi ninaraisoꞌ nimara ti? itaantapi.
—Co inacohuëꞌ, tënin.
22—¿Inquëntaꞌ quëmasoꞌ nipachin? Shaꞌhuitocoi huaꞌanoꞌsaꞌ shaꞌhuitontaꞌii. ¿Maꞌmarëtaꞌ pënëntaran? itaantapi.
23—Yosë nohuanton, pënëntarahuë. Iráca Isaiasë ninotonco, naporin: “Aꞌna quëmapi inotëroquë pënëntaton, tapon: ‘Ira coꞌshon coꞌshon toconin niꞌton, otëëquëꞌ Sinioro oꞌmain,’ tënin. Naporinso chachin cantaꞌ piyapiꞌsaꞌ pënënarahuë. ‘Cancanëmaꞌ anoyatocoꞌ Sinioro oꞌmain,’ itarahuë,” itërin Coanshari.
24Ina quëran Parisioroꞌsari itantapi:
25—Co quëmasoꞌ Cristonquënhuëꞌ. Co Iniasënquënhuëꞌ. Co pënëntonaꞌpi ninaraisonquënhuëꞌ niꞌquëhuarëꞌ, ¿onpoatontaꞌ nipachin, piyapiꞌsaꞌ aporintaran? ¿Intaꞌ nanan quëtërinquën aporintamasoꞌ? itërin.
26—Iꞌquë mini aporintarahuë. Nipirinhuëꞌ, iporasoꞌ aꞌna quëmapi yaꞌhuërin, co nohuitëramasohuëꞌ. 27Inasoꞌ chini chiníquën nanantërin. Casoꞌ co ina pochin chiníquën nanantërahuëꞌ. Co maquëyancohuëꞌ niꞌton, co sapatën iꞌquiritaꞌhuaso tërantaꞌ nanitarahuëꞌ. Ca piquëran ina pënëntapon, itërin.
28Naporoꞌ Cortaniiꞌ aquëtëran Coansha piyapiꞌsaꞌ aporintarin, Pitania itopiquë. Inaquë paaparahuatona natanconpi.
Quisoso anohuitërinsoꞌ
29Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon. 30Iꞌhua chachin shaꞌhuitëranquëmaꞌ. ‘Ca piquëran aꞌna quëmapi huëꞌsarin. Coꞌhuara ca nasichátërapohuëꞌ, inasoꞌ Yosëꞌpaꞌ yaꞌhuërin. Napoaton ca quëran chini chiníquën nanantërin inasoꞌ,’ itëranquëmaꞌ. Nani oꞌmarin. 31Co carintaꞌ nohuitopirahuëꞌ, nani nohuitërahuë. Yosë aꞌparinco yaꞌipi piyapinënpita anohuitaꞌhuaso marëꞌ. Ina marëꞌ pënënato, iꞌquë aporintarahuë.
32-33Co Quisoso nohuichatërapohuëꞌ, Yosë shaꞌhuitërinco. ‘Aꞌna tahuëri Ispirito Santo nëpë pochin nohuaraimarahuaton, aꞌna quëmapi motoanshiranënquë chachin huanitimarin, niꞌsaran. Quëmasoꞌ iꞌquë aporintëran. Ina quëmapiso nipirinhuëꞌ Ispirito Santo ayaꞌcoancantarinquëmaꞌ,’ itërinco Yosë. Ispirito Santo inápa quëran oꞌmahuachina, niꞌnahuë. Nëpë pochin yaꞌnoton, Quisoso motoanshiranënquë chachin huanitiimarin. 34Cari niꞌnahuë. Napoaton nani nohuitato, shaꞌhuitaranquëmaꞌ. Iso quëmapi Yosë huiꞌnin, tënahuë,” itërin Coanshari.
Yaꞌnan Quisoso imaraisopitaꞌ
35-36Tahuëririnquë Quisoso naꞌhuësoꞌ, Coanshari quënaantarin. Quënaantarahuaton, catocoi imaraisoꞌ itaponcoi:
—Pasoꞌ quëmapi niꞌcoꞌ. Inasoꞌ carniroaꞌhua pochin ninin, Yosëri aꞌpaimarinsoꞌ, itërincoi.
37Natanahuatoi, Quisoso imarai. 38Ina quëran tahuërëtahuaton, quënanincoi.
—¿Onpoapomataꞌ? itërincoi.
—Yanohuitërainquën Maistro. ¿Insëquëtaꞌ yaꞌhuaran? itërai.
39—Huëcoꞌ niꞌquico, itërincoi.
Paꞌsahuatoi, yaꞌhuërinquë canconai. Iꞌhuaraya niꞌton, inaquë iꞌhuatërai. Huaꞌquiꞌ ninontërai.
40Catoyaꞌpicoi Coansha natanahuatoi, Quisoso imarai. Aꞌnasoꞌ, Simon Pitro iin Antërisë itopi. 41Shiarahuaton, iin quënanconin.
—Iya Simon, Cristo nani quënanai, Yosëri aꞌpaimarinsoꞌ, itërin.
42Itahuaton, Quisosoquë quëparin. Quisosori notëërahuaton, itërin:
—Carinquën nohuitëranquën. Quëmasoꞌ Simonquën. Coansha huiꞌninquën. Nasha nininën acotaranquën. Pitro ichinquën, itërin. Inaora nananquë Sipasë itopi. (Naꞌpi pochin tapon naporin.)
Aꞌnapitantaꞌ imapisoꞌ
43Tahuëririnquë Quisoso Caririaquë yapaꞌsarin. Paꞌsahuaton, Pinipi quënanconin.
—Huëquëꞌ iyasha imacoꞌ, itërin. Itohuachina, imarin.
44Pinipisoꞌ Pitsaitaquë yaꞌhuërin. Ina ninanoquë chachin Antërisë, Pitro, inapitantaꞌ yaꞌhuëpi. 45Pinipiri Natanino yonisahuaton, quënanconin.
—Nani iyasha Cristo quënanai, Yosë quiricanën quëran ninopisoꞌ. Moisësë, pënëntonaꞌpiroꞌsaꞌ, inapita ninotonaꞌ, inaquë ninshitopi. Inasoꞌ Quisoso, Cosi huiꞌnin. Nasaritoquë yaꞌhuërinsoꞌ, itërin.
46—Nasaritoroꞌsasoꞌ, paꞌpi co noya piyapiꞌsahuëꞌ. ¿Aꞌna tërantaꞌ taꞌmaꞌ inaquë yaꞌhuërinsoꞌ noya nihuan nica? tënin Natanino.
—Huëquëꞌ paꞌa nohuitonquëꞌ, itërin Pinipiri.
47Natanino yaꞌcarirahuasoꞌ, Quisosori quënanin.
—Pasoꞌ quëmapi niꞌcoꞌ. Israiromia chachin inasoꞌ. Co piꞌpisha tërantaꞌ nonpininhuëꞌ, itërin Quisosori.
48—¿Onporahuatontaꞌ nohuitërancosoꞌ? itërin.
—Coꞌhuara Pinipi nonchatërasënquënhuëꞌ, ninoto quënananquën. Iquira naraanaquë huënsëasënquën, quënananquën, itërin. Aquë niꞌton, co yaꞌpirin quëran chachin quënanaponahuëꞌ, napotërin niꞌton, Natanino paꞌyanin.
49—Quëmasoꞌ Maistro, Yosë huiꞌninquën. Israiroꞌsaꞌ copirnonquën, tënahuë, itërin.
50—¿Ninoto quënananquënso marëáchin natëranco ti? saca sacai nininsopita niꞌsaran, itërin.
51Ina quëran itaantarin:
—Noꞌtëquën itëranquëmaꞌ. Iráca Cacopo nanpisoꞌ, piꞌiroꞌtëꞌ niꞌsoarin. Niꞌsoatohuachina, anquëniroꞌsari huëcapaimapi. Huëcapaimarahuatonaꞌ, panantarapi. Inapochachin iporasoꞌ Yosë quëran quëmapico niꞌto, oꞌmarahuë Yosë anohuitaꞌhuanquëmaso marëꞌ. Yaꞌipi ninahuësoꞌ niꞌsaramaꞌ, itërin Quisosori.
Currently Selected:
Juan 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.