Génesis 33

Cacopo Isaorëꞌ nanan anoyatopisoꞌ

1Cacoposoꞌ, Isao catapini pasa quëmapiꞌsarë chachin huëꞌsarin niꞌnin. Ina niꞌsahuaton, cara huënton huiꞌninpita acorin. Niataquë aꞌna huënton, Naquirataquë aꞌna huënton, cosonaroꞌsataquë, aꞌna huënton. 2Cosonaroꞌsaꞌton huaꞌhuinpitarë chachin aquëchitërin. Ina quëran Nia huaꞌhuinpitarë chachin ahuancanatërin. Naquirasoꞌ, Cosirëꞌ piquëran acorin. 3Inaporahuaton, Cacoposo quëchitërin. Iin masho yaꞌcariapon pochin, canchisëro mosharin. Isonin quëran noꞌpaquë huarëꞌ monshorahuaton mosharin. 4Cacoposoꞌ tëꞌhuaton naporin. Napopirinhuë Isaorisoꞌ, taꞌaquirahuaton iin iporin. Iporahuaton, apinorin, naporin. Cato chachin noya ancantatonaꞌ, ninaꞌnëtopi. 5Ina quëran Isaosoꞌ, sanapiꞌsaꞌ, huaꞌhuaroꞌsa inapita niꞌnin. Niꞌsahuaton iin natanin:

—¿Isopita poꞌ? ¿Inpitata? itërin.

—Huiꞌnahuëpita taꞌa. Yosë nohuanton yaꞌhuërinsoꞌ, tënin Cacopo. 6Naporoꞌ cosonaroꞌsaso huaꞌhuinpitarë chachin, Isao huëcapaipi. Ina notënanquë huëꞌsahuatonaꞌ, isonpi. Isonpi quëran noꞌpaquë huarëꞌ monshorahuatonaꞌ, moshaipi. 7Ina quëran Nia yaꞌhuërëꞌ huaꞌhuinpitarë chachin, inapoantapi. Piquëran Cosisoꞌ, aꞌshinë chachin, huëꞌsahuatonaꞌ, Isao notënanquë inahuanta inapoantapi.

8Ina quëran Isaosoꞌ, Cacopo natanin:

—¿Maꞌmarëta ina nápo pëꞌtahua huëntonoꞌsa aꞌparansopita, nacapirimarahuë? itërin.

—Noya ninicatë yaꞌhuantacaso marëꞌ aꞌpatëranquënsopita, itërin Cacopori.

9—Ama iyaꞌhua napoquësohuëꞌ. Canta yaꞌhuëtërinco chachin. Co quëtaancoso yaꞌhuërinhuëꞌ, itërin Isaori. 10Itopirinhuëꞌ, Cacoposoꞌ taantarin:

—Ama iya masho napoquësohuëꞌ. Tëhuënchachin noya ninicatë yaꞌhuantacaso nohuantohuatan, onpopionta maquë taꞌa. Quëmaora chachin noya nontaantarancosoꞌ nicato, Yosë chachin napotërincoso pochin cancantërahuë. 11Yosë nohuanton maꞌhuanahuë, co manta pahuantërincohuëꞌ. Napoaton, quëshiranquënsopita, onpopionta maquëꞌ, itërin. Napotápaton Isao anohuantërin. Yaꞌipi aꞌpatërinsopita manin huachi.

12Ina quëran Isao taantarin:

—Noyapaꞌ. Huëquë nipachin carinquën caꞌtainquën paꞌa, itërin. 13Napotohuachina, Cacoporiso itapon:

—Tëhuënchachin iya masho nosoroatonco napotëranco. Nipirinhuëꞌ huiꞌnahuëpita huaꞌhuaroꞌsaráchin. Ohuicaroꞌsaꞌ, ohuacaroꞌsaꞌ, inapitanta nasha huaꞌhuatopiso yaꞌhuërin. Manon quëpahuatësoꞌ, aꞌna tahuëri marëáchin nanitërin, ohuicaꞌhuaroꞌsa taquicaisoꞌ. 14Noya quëmasoꞌ pataquë topirahuë. Quiyaso nipirinhuëꞌ oshaquëranchin pacapoi. Huaꞌhuaroꞌsapitarëꞌcoi, pëꞌtahuaroꞌsapitarëꞌcoi oshaquëran paꞌsarai. Co huaꞌquiya quëranhuëꞌ, Sëir parti cantoontapatënquën, inaquë niquënaantarihua huachi, itërin.

15—Noyapaꞌ. Naporan niꞌquëhuarëꞌ, quëchitotaꞌi nipachin. Nipirinhuëꞌ caꞌtainquënso marëꞌ caraya piyapinëhuëpita pachi, itërin. Itopirinhuëꞌ, Cacoposo taantarin:

—Ama iya napoquësohuëꞌ. Noya quiyaora paꞌsarai, itërin. 16Napotohuachina, Isaoso piyapinënpitarë chachin Sëir parti paantarin.

17Cacoposo nipirinhuëꞌ, Socoto parti paꞌnin. Inaquë pëitacaiso marëꞌ piyapinënpita camairin. Naporahuaton, pëꞌtahuanënpita naꞌicaiso marëꞌ tanporaꞌhuaroꞌsa anitërin. Napoaton, ina noꞌpaꞌ “Socoto#33.17 Socotosoꞌ: Tanporaꞌhuaroꞌsaꞌ, tapon naporin.” itërin. 18Inaquë huaꞌquimiachin yaꞌhuërin. Ina quëran Cacoposoꞌ, yaꞌipi huëntonënë chachin Siquimo ninano notënanquë paꞌnin. Inaquë nëꞌmëtë pëiroꞌsa otëantarin. Inapoaton Patan-aran quëran huëꞌninsoꞌ, Canaan noꞌpaquë noya canquirin. 19Nëꞌmëtë pëiroꞌsa ótënpisoꞌ noꞌpaꞌ, Cacoposoꞌ pasa coriqui marëꞌ paꞌanin. Ina noꞌpasoꞌ, aꞌna quëmapi Amoro itopisoꞌ huiꞌninpitari huaꞌanëntopirinhuëꞌ, paꞌantërin. Inasoꞌ, aꞌnara huiꞌnin yaꞌhuëtërin, Siquimo itopi. 20Ina piquëran Cacoposoꞌ, Yosë chinotacaso marëꞌ aꞌnara artaro ninin. Ina nisahuaton aninihuanin: Ir Iroi Israiro#33.20 Ir Iroi Israirosoꞌ: Yosësoꞌ, Israirori chinotërinsoꞌ, tapon naporin., itërin.

Currently Selected:

Génesis 33: cbt

Highlight

Copy

Compare