Rut 1
1
Lix Rut ut lix Nohemí
1Sa'eb' li kutan naq toj maak'a'eb' chaq li awab'ej#1,1 Naraj naxye: Sa'eb' li kutan naq eb' laj Raqol aatin neke'jolomink reheb' laj Israel. A'aneb' li winq aj k'amol b'e sa' li yalok ut aj raqol aatin (Jueces nayeemank reheb' sa' kaxlan aatin) li naqataw sa' li Hu Jueces xk'ab'a'. aran Israel, kiwank jun li nimla we'ej sa' chixjunil li na'ajej a'an. Jo'kan naq jun li winq aj Belén re Judá koho chi na'ajink sa' xteepal Mohab, rochb'een li rixaqil ut eb' li wiib' chi ralal. 2Li winq a'an, aj Elimelek xk'ab'a'; li rixaqil a'an xNohemí, ut eb' li ralal aj Majalón ut aj Kilyón. A'aneb' xkomoneb' laj Efratá,#1,1-2 1 Kr 4,4. ut wankeb' aran Belén, sa' xteepal Judá. Ut naq ke'wulak Mohab, ke'kanaak sa' li na'ajej a'an.
3Kikamk laj Elimelek, li xb'eelom lix Nohemí, ut a'in kikanaak xjunes rochb'een li xwiib' chi yum. 4Eb' a'in ke'sumlaak rik'ineb' ixq aj Mohab: li jun x'Orpá chaq xk'ab'a' ut li jun chik a'an xRut. Ut ke'wank aran chiru lajeeb' chihab'. 5Ke'kamk ajwi' xkab'ichaleb' laj Majalón ut laj Kilyón, ut lix Nohemí kikanaak xjunes, chi maak'a' chik xb'eelom ut xkab'ichaleb' li xyum.
6Toja' naq kiwulak sa' xch'ool elk chaq aran Mohab rochb'een xkab'ichaleb' li ralib', xb'aan naq kirab'i naq li Qaawa' kixtoq'ob'a ru li xtenamit ut maak'a' chik we'ej aran. 7Jo'kan naq ki'elk chaq rochb'eeneb' li ralib' sa' li tenamit kiwank wi', ut ke'xchap xb'e re sutq'iik sa' xteepal Judá. 8Toja' naq lix Nohemí kixye reheb' li ralib':
—Ayuqex ut sutq'inqex chejunjunqal sa' rochoch leena'. A' taxaq li Qaawa' chi'uxtaananq eeru jo' xeb'aanu laa'ex reheb' li xe'kamk jo' ajwi' we laa'in. 9A' taxaq li Qaawa' chik'ehoq eere naq texsumlaaq wi' chik ut texwanq chi sa sa' leech'ool sa' leerochoch.
Ut kixtz'ub' ruheb'. Ab'an eb' a'an ke'ok chi yaab'ak 10ut ke'xye:
—Ink'a' toosutq'iiq, tooxik b'an chawix sa' laatenamit, chankeb'.
11Kichaq'ok lix Nohemí ut kixye reheb':
—Sutq'inqex, ex inko'. K'a'ut naq teeraj xik chiwix? Ma wanqeb' tab'i' inkok'al li texsumlaaq wi'? 12Sutq'inqex, ex inko'. Ayuqex xb'aan naq jwal tiixin aj chik; moko sumlaak ta chik we. Us ta raj tinye toj wank woyb'enihom naq hoon ajwi' chi q'eq twanq raj inb'eelom ut te'wanq raj inkok'al, 13ma toj teeroyb'eni tab'i' naq te'winqo'q? Ma toj texkanaaq chi jo'kan chi ink'a' texsumlaaq xb'aan a'an? Ink'a', ex inko'. Ak xk'ehom li Qaawa' naab'al li rahilal sa' inb'een; ab'anan q'axal ra wi' chik sa' inch'ool wi ta twil naq laa'ex wanqex sa' rahil ch'oolej inb'aan laa'in.
14Naq ke'rab'i a'in, eb' li ralib' ke'ok wi' chik chi yaab'ak. Chirix chik a'an lix Orpá kixtz'ub' ru laj alib'ahom re ut kisutq'iik sa' li xtenamit; ab'an lix Rut kikanaak rik'in lix Nohemí. 15Toja' naq lix Nohemí kixye re:
—K'e reetal, laab'alk xsutq'iik wi' chik sa' li xtenamit ut rik'ineb' li xyos. Ayu ajwi' laa'at chirix.
16Ab'anan lix Rut kichaq'ok ut kixye:
“Maawelaji wu re tatinchaq'rab'i ut tin'elq aawik'in,
xb'aan naq b'ar tatxik laa'at, aran tinxik ajwi' laa'in;
b'ar wanqat laa'at, aran wanqin laa'in.
Laatenamit a'anaq lintenamit,
ut laayos a'anaq linyos.
17B'ar tatkamq laa'at,
aran twaj tinkamq ut tinmuqe'q laa'in.
Li Qaawa' chik'ehoq we xtojb'al linmaak chi q'axal ra,
wi laa'in tatinkanab'.
Maak'a' truuq taajachoq qe;
ka'ajwi' li kamk taajachoq qe”.
18Naq lix Nohemí kixk'e reetal naq lix Rut kaw xch'ool chi rochb'eeninkil, ink'a' chik kirelaji ru. 19Jo'kan naq koheb' xkab'ichaleb' toj Belén ut, naq ke'wulak aran, chixjunileb' li poyanam ke'sachk xch'ool chi rilb'aleb': “Ma maawa' tab'i' a'in lix Nohemí?”, chankeb' li ixq.
20Ab'an a'an kixsumeheb':
—Meeye chik xNohemí we, xMará b'an teeye we xb'aan naq li Nimajwal Yos xinxnujob'resi rik'in rahil ch'oolej! 21Numtajenaq k'aru we naq kohin, ut anaqwan xinsutq'iik chaq chi maak'a' wank we. K'a' naq toj xNohemí nekeye we, wi li Qaawa' xraqok aatin sa' inb'een ut xinxk'e chi wank sa' rahil ch'oolej?
22Jo'ka'in naq lix Nohemí ki'elk chaq aran Mohab, rochb'een lix Rut, li ralib' aj Mohab: ke'sutq'iik ut ke'wulak Belén sa' xtiklajik li xxokb'al ru li seb'aad.
Currently Selected:
Rut 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.