Jos 1
1
I. KE'REECHANI KANAHÁN (1-12)
“Wanqin aawik'in”
1Chirix li xkamik laj Moisés, aj k'anjel chiru li Qaawa', li Qaawa' kiraatina laj Josué, ralal laj Nun ut aj tenq' re laj Moisés, ut kixye re:
2“Kamenaq chik laj Moisés, aj k'anjel chiwu. Ayu ut numen junpak'al li nima' Jordán aawochb'een chixjunileb' li tenamit a'in. Texxik sa' li na'ajej li tinq'axtesi eere laa'ex aj Israel. 3Tink'e eere chixjunil li ch'och' li toxexxaqliiq wi', jo' kinye re laj Moisés. 4Eerehaq chixjunil li na'ajej chalen chaq sa' li chaqich'och' ut Líbano, toj wan wi' li nimla nima' Éwfrates, chixjunil li xch'och'eb' laj Hit toj sa' li Nimla Palaw li wank sa' rokeb'l saq'e. 5Maa'ani truuq taanumtaaq sa' aab'een chiru chixjunil laayu'am.#1,3-5 Dt 11,24-25. Jo' naq kinwank rik'in laj Moisés, jo'kan ajwi' naq wanqin aawik'in: ink'a' tatinkanab' aajunes chi moko tatintz'eq chirix linch'ool.#1,5 Dt 31,6.8; Heb 13,5. 6Kaw xaqxooqat sa' laak'anjel ut matxiwak,#1,6 Dt 31,6-7.23. xb'aan naq laa'at tatjek'oq re li ch'och' cho'q re li tenamit a'in, a' li ch'och' kinyeechi'i sa' jurament reheb' li xxe'toonil yuwa'eb'. 7Kawaq b'i' aach'ool ut chayal aaq'e chi xpaab'ankil chixjunil li chaq'rab' k'eeb'il aawe xb'aan laj Moisés aj k'anjel chiwu. Chapaab' chi tz'aqal re ru, re naq us tat-elq sa' chixjunil li taab'aanu. 8Ink'a' taakanab' rilb'al xsa' xhuhil li Chaq'rab' a'in; chak'oxla rix chi q'eq ut chi kutan. Chi jo'kan junelik taab'aanu li k'aru naxye; tat-usaaq ut chaab'il tat-elq sa' chixjunil laak'anjel. 9Laa'in li yookin chi taqlank aawe. Yal aaq'e ut kawaq aach'ool. Matxiwak ut kaw xaqxooqat sa' laak'anjel, xb'aan naq li Qaawa' laaYos wanq aawik'in yalaq b'ar tatxik”, chan li Qaawa'.
Jo'ch'inal jo'nimal xoohaataqla wi' tqab'aanu
10Toja' naq laj Josué kixb'oqeb' laj k'amol b'e sa' li tenamit ut kixye reheb': 11“Numenqex sa' chixjunil li xmuheb'aaleb' li tenamit ut yehomaq reheb' naq te'xkawresi rib' ut te'xk'uub' xtzekemqeb', xb'aan naq sa' oxib' kutan toonume'q junpak'al li nima' Jordán ut toxqeechani li ch'och' tixk'e qe li Qaawa' li qaYos”, chan.
12Laj Josué ki'aatinak ajwi' rik'ineb' laj Rubén, laj Gad ut li xyiijachil xteepaleb' laj Manasés, ut kixye reheb': 13“Chijultiko'q eere li kixye chaq eere laj Moisés, aj k'anjel chiru li Qaawa': «Li Qaawa' leeYos tixq'axtesi eere li ch'och' a'in re texhilanq wi'», chan laj Moisés. 14Eb' leerixaqil, leekok'al ut leeketomq te'kanaaq sa' li ch'och' xk'ehom eere laj Moisés arin, chire li nima' Jordán. Ab'an laa'ex li yo'oon wankex chi yalok, texnume'q chi tzol chiruheb' leeras eeriitz'in ut teetenq'aheb', 15toj reetal li Qaawa' tixk'eheb' chi hilank eerochb'eeneb'. Ut akaq xe'reechani li xna'ajeb', texsutq'iiq wi' chik sa' leena'aj k'eeb'il eere xb'aan laj Moisés aj k'anjel chiru li Qaawa', sa' releb'l saq'e, chire li nima' Jordán”,#1,12-15 Nm 32,28-32; Dt 3,18-20; Jos 22,1-6. chan laj Josué.
16Eb' a'an ke'xsume laj Josué ut ke'xye re: “Jo'ch'inal jo'nimal xoohaataqla wi', tqab'aanu. Yalaq b'ar toohaataqla, tooxik. 17Jo' naq koo'ab'ink chiru laj Moisés, too'ab'inq ajwi' chawu laa'at sa' chixjunil. Ka'ajwi' a'in naqatz'aama: naq wanq li Qaawa' aawik'in jo' naq kiwank rik'in laj Moisés. 18Yalaq ani taaq'etoq re laawaatin ut ink'a' tixpaab' laataqlahom sa' chixjunil, taakamsiiq. Li k'aru naqaj laa'o a'an a'in: naq kawaq aach'ool ut kaw xaqxooqat sa' laak'anjel”,#1,16-18 Nm 27,20; Dt 34,9. chankeb'.
Currently Selected:
Jos 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.