3 Jn 1
1
1Laa'in li cheekel winq sa' li Iklees nintz'iib'ak aawik'in, at Gayo#1 Laj Gayo a'an jun li xtzolom li cheekel winq. raarookat inb'aan: relik chi yaal naq nakatinra.
2At inrahom, ninnaw naq chaab'il yookat chi xk'amb'al laayu'am, ut nintijok chawix re naq kawaqat ut us chat-elq rik'in chixjunil. 3K'ajo' naq xsaho'k linch'ool naq xe'k'ulunk laj paab'anel ut xe'xye resil naq li yaal wank aawik'in ut chanru yookat chi b'eek sa' li yaal. 4A'an a'in li xnimal xsahil linch'ool: naq laa'in nawab'i naq eb' li walal ink'ajol yookeb' chi b'eek sa' li yaal.
5At inrahom, nakak'ut naq chaab'il aach'ool rik'in chixjunil li nakab'aanu cho'q reheb' laj paab'anel: ut eb' a'an jalan xtenamiteb'! 6Xe'xye resil chiru li Iklees chanru nakatrahok. Us taab'aanu wi taak'eheb' re li k'aru nak'anjelak re li xb'eenikeb', jo' xk'ulub'eb' sa' xk'ab'a' li Yos. 7Xb'aan naq xe'ok chi b'eek sa' xk'ab'a' li Kriist chi maak'a' xk'ulumeb' sa' ruq'eb' li maji' neke'xpaab' li qaYos. 8Jo'kan naq tento chiqak'uleb' li winq a'in re naq too'okenq chi xk'anjelankil li yaal.
9Wank k'aru ak intz'iib'ahom rik'in li Iklees, ab'anan laj Diótrefes#9 Laj Diotrefes a'an jun aj jolominel re li komonil chi kristiyan, ab'an naxq'etq'eti rib' chiru li cheekel winq. ink'a' nokooxk'ul, xb'aan naq naxrahi li wank chi xjolomil. 10Jo'kan wi tinxik aran, toxinjultika li yo chi xb'aanunkil, chanru yo chi xwech'inkil qix rik'in yib' aj aatin. Ut moko nak'ojlaak ta xch'ool rik'in a'an, toj jun chik naxb'aanu: ink'a' naxk'uleb' laj paab'anel; ut eb' li neke'raj raj xb'aanunkil naxrameb' chiru, ut narisiheb' sa' li Iklees.
11At inrahom, maak'am aawe rik'in li ink'a' us, chak'am b'an aawe rik'in li us. Ani nab'aanunk re li us, a'an re li Yos; ut li naxb'aanu li ink'a' us, moko rilom ta ru li Yos.
12Chixjunileb' chaab'il neke'xye chirix laj Demetrio, ut a'an tz'aqal yaal. Laa'o ajwi' naqach'olob' a'an, ut laa'at nakanaw naq tz'aqal yaal li qayehom.
13Toj wank raj naab'al tintz'iib'a aawik'in, ab'an ink'a' nawaj xtz'iib'ankil rik'in b'on ut tz'iib'leb'. 14Nawoyb'eni rilb'al aawu chi seeb', ut aran tqaatina qib' chiqib'il qib'.
15Chiwanq taxaq aawik'in li tuqtuukil usilal. Neke'xtaqla xsahil aach'ool eb' laawamiiw. Chak'e xsahilaleb' xch'ool li qamiiw chi xjunjunqaleb'.
Currently Selected:
3 Jn 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.