2 Ko 4

1Xaqab'anb'ilo sa' li k'anjel a'in xb'aan xnimal ruxtaan li Yos, jo'kan naq ink'a' nach'inank qach'ool. 2Xqatz'eqtaana li k'a' re ru xutaanal ut li wank chi muqmu, ut ink'a' yooko chi k'anjelak rik'in b'alaq'il aatin chi moko yooko chi xjalb'al xyaalal li Raatin li Yos, naqak'e b'an chi nawe'k li yaal. Chi jo'kan naqaq'axtesi qib' chiru chixjunileb' re naq te'xk'e reetal chanru wank li qach'ool, chiru li Yos.

3Ut wi toj tz'aptz'o ru li Chaab'il Esilal naqapuktesi laa'o, tz'aptz'o ru cho'q reheb' li yookeb' chi sachk, 4cho'q reheb' li maak'a' neke'xpaab', xb'aan naq li xyos li ruuchich'och' a'in#4,4 A'an laj tza (cf. Jn 12,31; 14,30; Ef 2,2). xmutz'o'b'resi li xk'a'uxeb' re naq ink'a' taalemtz'unq chiruheb' li xsaqenkil li xChaab'il Esil li Kriist nim xloq'al, a'an a'in li xjalam u li Yos. 5Ink'a' yooko chi xpuktesinkil qesil laa'o, a' b'an resil li Kristo Jesus, li Qaawa'; laa'o yal eemoos sa' xk'ab'a' li Jesus. 6Xb'aan naq li Yos li kiyehok: “Chilemtz'unq li saqenk sa' li aak'ab'”,#4,6 Cf. Gn 1,3. a'an ajwi' xk'ehok chi lemtz'unk li saqenk sa' li qach'ool re naq taakutano'q li xloq'al li Yos li nalemtz'unk sa' xnaq' ru li Kriist.

Rahilal ut sahilal sa' xk'anjel li Qaawa'

7Ab'an li xnimal ru qamaatan a'in wank qik'in sa' pak'b'il sek', re naq chik'utunq naq li xnimal ru wankilal a'in nachalk rik'in li Yos, moko qik'in ta laa'o. 8Rahob'tesinb'ilo rik'in chixjunil, ab'an moko yeq'inb'ilo ta chi junajwa; wanko sa' ch'a'ajkilal, ab'an ink'a' nach'inank qach'ool; 9nokoosik'e'k xb'aaneb' li xik' neke'ilok qe, ab'an moko kanajenaqo ta qajunes; neke'numtaak sa' qab'een, ab'an ink'a' nokoohe'xsach. 10Junelik naqak'am sa' li qajunxaqalil li xrahilal xkamik li Jesus, re naq li xyu'am li Jesus chik'utunq ajwi' sa' li qajunxaqalil. 11Xb'aan naq, us ta yo'yooko, ab'an junelik q'axtesinb'ilo chi kamk sa' xk'ab'a' li Jesus, re naq chik'utunq ajwi' li xyu'am li Jesus sa' li qach'och'el qasululel. 12Jo'kan naq li kamk wank xwankil sa' qab'een, ut sa' eeb'een laa'ex a' li yu'am.

13Tz'iib'anb'il sa' li Santil Hu: “Xinpaab', jo'kan naq xin'aatinak”.#4,13 Sal 116,10. Laa'o wank qamaatan chi paab'ank jo' naxye li Saalm a'in; naqapaab' ajwi' laa'o, jo'kan naq nokoo'aatinak. 14Naqanaw naq li Yos li kiwaklesink re chi yo'yo li Qaawa' Jesus, tooxwaklesi ajwi' laa'o qochb'een li Jesus ut toxooxaqab' chiru qochb'eenaqex laa'ex. 15Ut chixjunil a'in re eeraab'al laa'ex, re naq taanumtaaq li rusilal li Yos rik'ineb' naab'al chi poyanam, ut chi jo'kan q'axal chik taak'ihanq li yoxink, cho'q re xnimal xloq'al li Yos.

16Jo'kan naq ink'a' nach'inank qach'ool. Us ta li qach'och'el qasululel yo chi lajk chi oso'k, ab'an li qamusiq' na'ak'ob'resiik rajlal kutan. 17Li rahilal naqak'ul, a'an junpaat ajwi' ut moko aal ta riiqankil; ut a'an k'ajo' xnimal li junelik loq'al yo xkawresinkil cho'q qe laa'o,#4,17 Cf. Ro 8,18; 2 Ts 1,7; Heb 12,11; 1 P 1,6-7; 5,10. 18li ink'a' naxik qach'ool chirix li k'a'aq re ru na'ilmank, chirix b'an li ink'a' na'ilmank. Xb'aan naq li k'a'aq re ru na'ilmank, a'an yal jun k'amok nawank, a'ut li ink'a' na'ilmank, a'an wank chi junelik.

Currently Selected:

2 Ko 4: QQC

Highlight

Copy

Compare