Mar 1
1
Juan Bautista iwo p'ante lhämeta tä ihi ts'anis
(Mat 3.1-12; Luc 3.1-9,15-17; Juan 1.19-28)
1Häp täja letes Dios Silätyaj tä Is tä yäme Jesucristo, Dios Lhäs.
2Dios yäm matche lhämet tä profeta Isaías ilesayen p'ante tä yok:
“Lhek yahinya, ochunkatla ahilä oka silätwo,
häpkhilek iwaklhatche han'äyij.#Mal 3.1
3N'opak t'än tä tumho ts'anis tä yok,
Waklhatache Lhawuk len'äyij,
owajache wet isyenay alhoho.”#Isa 40.3
4Iche p'ante hin'o tä lhey Juan, lham ihi häp ts'anis tä ibautisaynhen wichi wet ifwenhopej lhamel wet yok:
–Woyay ahusey iyhäja wet abautisaynhen, häpkhilek Dios itäyhat amejen hach'isukyajay.
5Wet wujpe wichi tä tälho Judea lhäy'e hupuy tä Jerusalén, lhamel ihoye Juan wet lhaifwelejen lech'isukyajay, wet lham ibautisaynhi tewok tä Jordán.
6Lew'uy häpe t'at n'oyik tä camello w'ole, wet yen kawaka tsänt'äj lhip,#2~Rey 1.8 wet m'ak tä yen lhäka häpe t'at chol lhäy'e akäyek. 7Wet lesilätyaj yopejkwe:
–Iche elh tä nekche on'äyij, lakhajyhayaj inu'pe okhajyhayaj, wet matche tä n'am t'uhawetej che ot'upeyejchä yämthilek olanhi lenisäj t'ak. 8Olham obautisayen amejen inät, mat lham ibautisaynhila amejen Espíritu tä Dios T'amajchet.
Juan ibautisayen Jesús
(Mat 3.13-17; Luc 3.21-22)
9Ifwalastso näm Jesús tälho Nazaret, häp lhip tä ihi Galilea, wet Juan ibautisayen tä ihi Jordán. 10Wet tä Jesús inuphä tä tälho inät, hiw'en pule tä lhahich'enhi, lhäy'e Dios laka Espíritu tä hätet iwoye hokwinaj tä inuhchä tä iho'pe häp lham. 11Wet iche n'opak tä tum puleye tä yok:
–Ahäpe Olhäs tä Ohumnek, wuj tä okäjlhi amej.#Sal 2.7; Isa 42.1; Mat 12.18; Mar 9.7
Satanás yelhte Jesús
(Mat 4.1-11; Luc 4.1-13)
12Tä tajyäme täjtso, Dios laka Espíritu ichäj Jesús wet ihäne ts'anis. 13Wet ihi t'at yäk cuarenta ifwalas, iyej itshätäy, wet Satanás yelhte. Mat Dios laka ángeles tach'ote.
Tä Jesús ihi p'ante Galilea, häp tä nech'e iwo tesa lechumet
(Mat 4.12-17; Luc 4.14-15)
14Tä tajyäme tä õhp'ohi Juan, Jesús ihoye Galilea yämthilek yen lhämeta Dios Silätyaj tä Is. 15Yopejkwe:
–Nichäte lewhäy, Dios Niyatyaj tott'a alhoho. ¡Woyay ahusey iyhäja wet ekhayaye Dios Silätyaj tä Is!
Jesús t'äne cuatro w'ahatwos
(Mat 4.18-22)
16Wet Jesús inukwe lhip häp lewomek tä Galilea, wet hiw'ene hin'o tä lhey Simón lhäy'e häp lechila Andrés, lhamel ithat inäte lewot tsi häpehen w'ahatwos. 17Jesús tahuye wet yok:
–Nekay n'okwe, wet nemla let'ukwe w'ahat, mat let'uhikwela wichi.
18Wet yofwajkwet lhamel ileyej lewotey wet yikche.#Luc 5.10-11
19Tä Jesús yäm kanhi, hiw'ene hin'o tä lhey Zebedeo leles tä häpehen Santiago lhäy'e lech'inij Juan, lhamel ihi chalana tä yenwethä lewotey. 20Wet Jesús äp t'änehen, wet lhamel yikch'oye lajcha tä ihi chalana, lhäy'e lechumyenhay, wet yikche Jesús.
Hin'o tä ahät ihi
(Luc 4.31-37)
21Tä Jesús lhäy'e let'unfwastso nichätho hupuy tä Capernaum, wet ifwala tä n'ot'elakw'et lhamel ihoye Judío lhayis laka n'ohusew'et, wet Jesús iwo lechufwenyaja. 22Wet wichi wuj tä t'iseltejen, tsi tä ichufwen lhamel, mälhyet iwoye hin'o tä len'ohyaj ihi, tek häte iwoye hin'ol tä lhayen lewosayej Ley p'ante tälhe Moisés. 23Wet iche hin'o tä ahät ihi tä iyej iyhäj tä ihi n'ohusew'ettso. Wet lham t'änpe tä yok:
24–Jesús tä Nazaret lhele, ¿chipte tä alenuhtho olhamel? ¿Hä lenäm yämthilek letäyhat olhamel? ¡Olham ontäfwel amej tä ahäpe Dios T'amajchet!
25Mat Jesús ifwone wet yok:
–¡Wo tamseka, mäch'oye hin'otsi!
26Wet ahät ichätyen katsi hin'o wet ifwitsenej tä t'än, wet inuphä tä tälho. 27Wet nilhokej wichi inuhat lhamhohen wet tay'ätshanpej lhamehen tä yok:
–¿Atsi m'ak tä häpe täja? ¡Tsi n'ochufwenyajna nech'ayek, wet wuj len'ohyaj ihi Jesús, tsi tahuye ahät lhayis wet lhamel iwoye t'at lhämet!
28Wet yofwajkwet Jesús letoyaj y'ajpe nilhok Galilea.
Jesús ichesat Simón Pedro lech'efwa ko
(Mat 8.14-15; Luc 4.38-39)
29Tä lhamel inukwephä tä tälhchufwi n'ohusew'et, Jesús ihoye Simón lhäy'e Andrés lew'et, wet Santiago lhäy'e Juan yikche. 30Wet Simón lech'efwa ko imä katsi, t'äj chayo. Wet lhamel ifwenho Jesús, 31wet lham ihoye wet tachuma takwey wet ineyhatphä. Wet yofwajkwet tatäy tä chayo t'äj. Wet atsinha yenlhi lhamel lhäk.
Jesús ichesthen wujpe t'inhayaj länhay
(Mat 8.16-17; Luc 4.40-41)
32Tä ifwala y'uy, tä nech'e ichalajchä, wichi ihäne nilhokej t'inhayaj länhay häp Jesús, lhäy'e iyhäj tä ahät länhay, 33wet nilhokej wichi lhaihuthiwek häp huppe. 34Wet ichesthen wujpe lhamel tä t'inhayaj w'enhahiche, wet ichenchephä wujpe ahät lhayis tä ihiche wichi. Mat tach'anlhahiyet'a ahät lhayistso che yämwethä, tsi lhamel nitäfwelej t'at.
Jesús iwopej lhämeta tä ihiche n'ohusew'etes
(Luc 4.42-44)
35Tä nech'e ifwala, tä kamaj honatsi i'pe honhat, Jesús nephä, yäp'elhtshi tä tiyäje lhip tä naj wichiyahi yämthilek iwo t'alhyaja. 36Tä paj Simón lhäy'e let'unfwas yikhen tä t'ukwe Lewuk. 37Tä lhamel nilhoke, wet tahuyej tä yok:
–Nilhokej wichi tä t'u amche.
38Mat lham yok:
–Mäh n'ahoye lew'etes tä ni'tosayehen yämthilek häte owo silätahi Dios lhämet. Tsi häp täja tä tamenej tä onek.
39Wet häp tä mälhyejtso, Jesús ilunche t'at nilhokej Galilea lhipey tä iwo siläta Dios lhämet tä ihiche n'ohusew'etes wet inuhatchephä ahät lhayis tä ihiche wichi.
Jesús ichesat amostas länek
(Mat 8.1-4; Luc 5.12-16)
40Wet iche hin'o tä amostas ilän, ihoye Jesús wet lakamchetey itihi honhat, wet lhahip'altsene tä yok:
–Che lewoye, lehanej lewoyneje che letäyhat n'oyej ot'inhayaj.
41Jesús hip'altsen, wet tachumpe wet yok:
–Owoye. Otäyhat amej.
42Wet yofwajkwet tatäy amostas wet hin'o iches. 43Wet Jesús ichen, mat y'isej lhämet tä äytajche tä yok:
44–Lhek yahinya, yej fwenhola elh che häpe. Mat apäynela häp sacerdote wet chäje m'ak che lhenla t'awayhata Dios, häp achesyaj tä tamenej, mälhyej tä Moisés p'ante ne'tek õ'woye,#Lev 14.1-32 häpkhilek nilhokej wichi ihanej tä noj anhayaj.
45Matkat hin'otso yik wet ifwenho nilhokej wichi m'ak tä Jesús iwoyeje. Tä mälhyejtso, Jesús nemhit tiyäjo hupuy elh che häpe, mat ihipej lhip che häpe tä wichi newahi. Mat tej tä mälhyejtso, wichi tälhomchepej lew'etes tä ihoye.
Currently Selected:
Mar 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.