Jer 1
1
1-4Iche p'ante hin'o tä lhey Jeremías. Lajcha Hilcías häpe sacerdote, wet nilhokej iyhäj tä häpehen p'ante sacerdotes, wet lhamel lew'et Anatot tä ihi honhat tä lewuk wichi tä tälhe letes Benjamín. Täjp'ante rey Josías, Amón lhäs, niyat trece nekchämis tä ihi Judá, Lhawuk yämhoplhipej häp Jeremías. Wet Lhawuk tujlhache t'at tä tahuyej Jeremías häp ifwalas p'ante rey Joaquim, Josías lhäs, äp niyatej Judá, pajtha nichäte tä rey Sedequías, Josías lhäs elh, ihi leniyatyaj once nekchämis wet cinco iwel'as. Häp p'ante lewhäytso tä nech'e õyen kwenkaya wichi tä lew'et Jerusalén wet õ'häne honhat tä kalew'eta.
Lhawuk t'äne p'ante Jeremías
Häp tähesna Jeremías lhämtes.
Lhawuk tahuy n'oyej wet yok:
5“Tä kamaj akniwak'alha tä lhehi ako kachowej,
olham pajche ottshupi ame.
Lhäy'e tä kamaj ka'ewache,
pajche oaiw'enhat tä ahäpkhila profeta
tä lefwenhihola olhämtes
häp wichi tä ihiche honhatil.”
6Olham Jeremías onchulho tä oyok:
“Iwuk Dios, ohanhiyejt'a chik oyämlhi,
tsi kamaj omamse t'at.”
7Wet Lhawuk yäm n'oye tä yok:
“Yej lhok, Kamaj omamse.
Is chik lehoye t'at lhip tä ochen ame
wet lewoye olhämet, tsi olham tä olhämet.
8Yej nowaye elh chik häpe,
tsi olham oi'amej wet ot'uhlat ame.
Olham tä Awukn'o olhämet täjtso.”
9Wet Lhawuk ipiyen n'oye takwey wet tachumpe opästey, wet lhämet yok:
10“Otihi apästey olham olhämtes
lhäy'e tä oyachaj ame okhajyhayaj ifwalana
tä oti'pe n'oniyatyajay
lhäy'e tä oti'pe wichi tä ihiche honhatil.
Wet lewohla siläta lhamel tä okänchihla
wet oyokwesichephäla tä ihiche lew'etes,
otihiyeja lewit'äyhyaj lhamel
wet otäyhthihena t'at.
Wet äpte lefwenhihola lhamel
tä oneyhthichephäla wet oyämla kalelhäj lew'et.”
11Lhawuk äp tahuy n'oyej wet yok:
–Jeremías, ¿atsi m'ak tä lew'en?
Olham onchulho wet oyok:
–Ow'en hal'ä lhacha.
12Lhawuk yok:
–Is alhoho m'ak tä lhäme. Hätet iwoye tä ot'uyepej häp hal'ä, ot'uyepej olhämet pajla'tha matche.
13Wet Lhawuk äp yachajo tä yäm n'oye wet yok:
–¿Atsi tä lew'en?
Wet olham onchulho tä oyok:
–Ow'en n'olhatajhi tä tumej tafwojyhiye tä i'pe itäj tä naway, wet yiklhahchä, tatay tapinhiye.
14Wet Lhawuk yäm n'oye wet yok:
“Tälh tafwojyhiye lewit'äyhyaj tä ochätyenla'pe
nilhokej häp wichi tä ihi honhatna.
15Olham Dios tä ofwenho lhamel tä ot'änhiyela
nilhokej wichi tä tälh tafwojyhiye,
wet nämhihena laka niyatey
wet inuhiyela nilhokej hupuy tä ihi Judá,
wet ikalhihila,
wet ilunhiyeja Jerusalén lelafwek tä tuntey,
wet ikalhihila,
wet itihihila leniyatyajw'etes häp Jerusalén lepelis.
16Häp täja olham otasnhayaj
tä owaklhat tä otayhte oka wichi,
tsi häp tä lhamel iwomn'o
wet iwoye m'ak tä ni'isa.
Lhamel iwun incienso wet n'okwiyej
dios lhayis tä w'enha lhamejen tä lhamel lhenhay.
17“¡Wet am, nephä, awaklhat tä lehoye lhamel, fwenho nilhokej m'ak tä one'tek lefwenho! ¡Yej nowaye lhamel! Tsi chik lenoway athana tä ats'ilak, lhäy'ehila lhip anowayhyaj chik lhewej lhamel. 18Ifwalana oaitech'aynej hup tä takhajay, wet ch'ute tä t'un, wet n'olafwek tä chinaj, häpkhilek letatayhlä nilhokej honhat tä Judá, lhäy'e laka reyes, lhäy'e leniyatfwas, lhäy'e sacerdotes, lhäy'e wichi. 19Lhamel iwohla laka'tshayaja amej mat ikalhit'ala amhi, tsi olham oi'amej wet ot'uhlat ame. Olham tä Awukn'o olhämet täjtso.”
Currently Selected:
Jer 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.