YouVersion Logo
Search Icon

Col 1

1
Pablo ichene len'okhayaj häp Dios leles
1-2Amtena ipuhfwas tä Dios aleles tä let'ifwtiyej Cristo tä lheyayhi hupuy tä Colosas. Olham Pablo ohäpe Cristo Jesús laka apóstol, wok oyok, lakachenhay tä lhamenya elh, tsi häpe t'at täjtso Dios lenech'ethayaj. Wet olham lhäy'e n'aelh Timoteo ochen amehen olhämetna.
Is che Lhajcha Dios lep'altsenyaj lhäy'e atamsek i'amejen.
Pablo iwo graciasayej Dios häp lhamel
3Tä olhamel owopej ot'alhyaja atapehen, ow'enhopej oka gracias Dios tä häpe Lhawuk Jesucristo Lajcha. 4Tsi olhamel otoynej amehen tä wuj tä let'ekhaye Cristo Jesús wet wuj tä lehumin nilhokej Dios laka wichi. 5Häp ekhahyaj lhäy'e ahumnhayajna tälhe t'at aniwhayaj tä kalelhäj. Tsi tä letach'ahuyaye p'ante Dios lhämet tä matche tä häpe Lesilätyaj tä Is, wet tälhe ifwalatso leniwhitlä m'ak tä Dios pajche iwaklhat amhohen tä ipuleye.
6Häp Dios Silätyajtso tä nichät p'ante amehen, n'äl tä lhaichihelit wet iwo lhaya tä iyejen wichi tä nilhokpe honhat, mälhyet iwoye tä i'amejen tälhe tä letoyneje Dios tä hap'altsentsaj wet äp letäfwelej tä matche t'at tä lham ahip'altsenhen. 7Häp elh tä ichufwente amejen m'ayhayna häpe t'at Epafras,#Col 4.12; Film 23 wet amel kamaj wuj tä aisej n'aelhtso tä häpe olhamel och'otfwa tä ohumnek wet äp Cristo lakawo tä afwtintsaj. 8Lham t'at tä ifwelnaj n'ohohen häp ahumnhayaj tä tälhe Dios laka Espíritu tä i'amhiche.
Pablo y'alhyene Dios häp lhamel
9Tä mälhyejtso, tälhe häp ifwala tä olhamel ohanch'oye tähestso, olhamel olehiyejt'a tä oy'alhyenpej amehen Dios, yämthilek hiw'en amhohen nilhokej m'ak tä ahusey iwatläk nitäfwelej wet ihanej, häpkhilek lhäy'e lhip tä letäfwelayej Dios lenech'ethayaj. 10Che mälhyejtso, lewohiyepeja m'ak tä t'uhawet amejen tä ahäpehen Lhawuk leles, wet lekänithilhipeja tä lewo aya tä tälhe nilhokej achumtes tä isen, wet lhäy'ehipeja lhip tä letäfwelayej häp lham. 11Is che lham ikhajyen amejen nilhokej lakhajyhayaj tä lhäy'e lhip tä wuj, häpkhilek newache m'ak che ikalh amhihen wet tek lelhak'alwethä, mat atamsekis ihi t'at. 12Wet a'akäslawethä wet lewohla graciasayej Lhajcha tä ayen häpeya wichi tä t'uhawetej tä tachumlä m'ak tä lham t'amajejo leles tä ihi isi. 13Lhajcha ifwayhatte n'amejen honataj lakhajyhayaj,#Ef 6.12 wet y'ayhet n'amehen häp Lhäs tä lehumnek Leniyatyaj, 14häp lham tä lhayen lahaya tä itäyhat n'amejen lhasukyajay.#Ef 1.7
Jesucristo häpe t'at Dios
15Häp Dios tä nin'äla, häp tä lepeyak Cristo, Dios Lhäs tä Lechunkatsek tä kamaj newache nilhokej lhenhay. 16Häp tä isej lham, Dios yenlhi nilhokej m'ayhay, häp m'ak tä iche puleye lhäy'e honhat, häp m'ayhay tä n'äl lhäy'e tä nin'äla, tej tä n'okhajyhayajay tä iche tä kaphä tä häpehen n'owujyajay lhäy'e n'on'ohyajay. Häp tä isej lham, Dios yenlhi nilhokej m'ayhay yämthilek lham tä Lewuk. 17Lham pajche iche t'at tä kamaj newache m'ayhay, wet äp lham t'at tä t'amajchä nilhokej.#Juan 1.1-3; Heb 1.2-3
18Häte häpe Dios leles lhetek.#Ef 1.22-23; 4.15 Häpe N'ochunkatsek, wet äp häpe elh tä ichun tä inuphä tä tälho n'op'itseyhay yämthilek häpe t'at Niyat tä Lhamya. 19Dios ihumin tä lhaimälhetwek tä yen lew'eta Cristo, 20yämthilek isej tä inachaj lhame nilhokej m'ayhay tä iche puleye lhäy'e honhat, häpkhilek letamsekis iyeji, häp tä isej Cristo lew'oyis tä itsäyhchä tä ihi cruz.
21Fwalas tä pajche amel ahäpehen wichi tä nitäfwelayej Dios tä matche, wet ihi ahusey tä letatayhlä Dios tsi lewoyaye t'at m'ayhay tä ni'isachehen. 22Mat athana Dios ainachaj lhame wet ahip'ajtit lhamej, häp tä isej Cristo t'ilek, yämthilek ahäpehen iyhäj tä t'amajchetes, lhäy'e tä naj lech'ohleya, lhäy'e tä najit letesa, che lheyayhi tä lham tatache. 23Mat iwohiyet'ak katujlhayache ekhahyaj, yej letats'in, at'untejiche, wet yej aleyatchenejwethä aniwhayaj tä tälhe Dios Silätyaj tä pajche lelätaye. Häp Lesilätyajna õ'wo silätayej nilhokpe honhat, wet olham Pablo häp tä Dios yenn'o lewoyayej.
Dios yen Lesilätyajwoya Pablo
24Athana okäjlhi tä oteläythayaj in'oyej atapehen. Tsi tä mälhyejtso tä ot'isan leteläythayaj ihi'pe Dios leles tä häpe Cristo t'isan, wet nech'e nilhok Cristo leteläythayaj p'ante, niwohit m'ak che tatäyej. 25Wet Dios yenn'o lewoya amejen, wet t'ekhayej n'oye lechumet tä oyen silätyaja amejen häp lham lhämet tä imälhewek, yämthilek amel aisej. 26Häp täja häpe Dios leskalhek tä nilhokej fwalas tä pajche iskatho wichi, mat athana hin'ältej t'at häp lham leles. 27Tsi Dios t'uhläk ihantejen lhamel tä lham letichunhayajtso tä pajche iskat, häpe t'at m'ak tä lhäy'e lhip tä is, häpkhilek wichi tä kahäpeya Judío lhayis isej. Wet leskalhektso tä nech'e hin'älit häpe täja, oyok, Cristo i'amejen. Tä mälhyejtso, Dios lewujyaj ihlat amejen.
28Häp lham Cristo olhamel owo silätayej nilhokej wichi, wet oyämhopwethä lhamel, oisej nilhokej ohanyaj tä tälhe Dios yämthilek ochufwenejen. Tsi ot'uhläk nilhokej lhamel niwohit m'ak che tatäyej t'ekhahyaj, mat is che Dios hiw'en tä wak'alh wet lhamel hap'akej t'at häp Cristo. 29Häp tä tamenej tä olham lhäy'e lhip tä otchumlhi wet owo olhäkleyhyaja, olhaikhajyenejpej häp Cristo lakhajyhayaj tä wuj tä in'ohi.

Currently Selected:

Col 1: WCHB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy