2~Crón 1
1
Salomón t'alheje Dios chik ihan honhatej
(1~Rey 3.3-15)
1David lhäs Salomón, Lhawuk tä laka Dios tach'ote p'ante häp leniyatyaj, wet wuj tä takhajay leniyatyaj wet t'aylhatshi t'at len'ohyaj. 2Wet Salomón t'äne nilhokej häp Israel lhayis, ihutwek sip'äl kaniyatey, lhäy'e n'okalelhthayajwos, lhäy'e nilhokej hin'ol tä niyatej lew'et lheley lhäy'e lepuhfwas. 3Wet nilhokej wichina tä lhamel yikche Salomón tä ihoye n'on'okhayajw'et tä ihi Gabaón. Tsi Dios lew'et tä carpa täjp'ante lakawo Moisés yenlhi tä ihi honhat tä ts'anis, häp tä ihi häp Gabaón. 4Mat Arca tä Dios lhämtes ihi häp tä ihi Jerusalén, tsi rey David ichäj p'ante tälhe Kiriat-jearim pajtha nichäte honhat tä iwaklhat tä itihihla. Tsi häp tä lham pajche iwaklhat hup tä carpa tä itihlachufwi tä ihi häp Jerusalén.#1~Crón 13.5-14; 15.25—16.1 5Mat altar tä bronce tä Urí lhäs Besalel tä äp Hur lecheyäs yenlhi p'ante, ihi t'at tä Lhawuk lewukwe tä carpa tatache tä ihi häp Gabaón. Wet Salomón lhäy'e wichi ihoye häpkhilek ihanej Lhawuk lenech'ethayaj. 6Wet Salomón yen Lhawuk t'awayhata mil itshätäy tä õ'wunhomche tä õ'ti'pe häp altar tä broncetso tä ihi tä Lhawuk lew'et tatache.
7Wet häp honatsitso Dios lhaipäyne Salomón wet yok:
–Alhej n'oye m'ak chik lewatlä, ow'enla amho.
8Wet Salomón nichulho Dios wet yok:
–Am len'ältej p'ante ahumnhayaj tä wuj häp ojcha David. Wet athana olham tä lenachaj n'oye leniyatyaj wet ocheyäjo t'at häp lham lew'et. 9Athana, Iwuk Dios, matitche ämet tä lefwenho p'ante ojcha David. Tsi lhenn'o niyatayej häp wichi tä wujpey tä tet iwoye holotaj, 10wet is chik lew'en n'oho tä ohan honhatej yämthilek ohanej tä ot'uye häp lhamel. Tsi ihichet'a hin'o chik ihanej chik itetshan aka wichi, tsi matche tä wujpey.
11Dios nichulho Salomón wet yok:
–Eh, häp täjtso häp m'ak tä lewatlä. Tek let'alhej n'oye chik lew'en m'ak, häp akäywet tä wuj, wet tek let'alhej n'oye chik han'ohyaj ihi, wet tek let'alhej n'oye chik otäyhat atayhfwas, wet äpte tek let'alhej n'oye chik pitaj haw'atshancheyaj. Mat let'alhej n'oye chik lehan honhatej wet lehanej tä let'uye oka wichi tä oayen niyatayej lhamel. 12Tä mälhyejtso, ow'en amho tä lehan honhatej lhäy'e atäfwnhayaj. Wet äpte ow'en amho tä lew'en m'ak wet wuj akäywet tä lew'enla, lhäy'e tä han'ohyaj ihi. Am tä lew'enla m'ak tä niyatey tä ihipej leniyatyaj niw'ena naji, wet niyatey tä ihichehena tä imälheche han'äyij te leniyatyaj ifwisit'ala aniyatyaj tä i'amejna.
13Tä tajyäme täja, wet Salomón yäple Jerusalén, tälhe häp n'on'okhayajw'et tä ihi Gabaón tä ihi tä carpa tä Lhawuk lew'et tatache. Wet lham t'at tä niyatej Israel lhayis.
Salomón laka kaletas lhäy'e yel'atas tä ichäj
(1~Rey 10.26-29; 2~Crón 9.25-28)
14Salomón iti lhamej p'ante kaletas tä n'oka'tshayajchal lhäy'e sip'äl tä yen lew'uteya yel'atas. Ihi p'ante mil cuatrocientos (1.400) kaletas wet doce mil (12.000) sip'äl tä yen lew'uteya yel'atas. Wet kaletas ihiche lew'etes tä ihiche honhates tä wus, lhäy'e tä iyej rey tä ihi Jerusalén. 15Wet tä Salomón ihi leniyatyaj, lhäy'e lhip tä wuj häp oro lhäy'e plata tä ihi Jerusalén, hätet iwoye tuntey, itaj'atpe honhat. Wet äpte pänhichetek äp wuj, hätet iwoye higo lhiley tä tayhlheley tä ihi honhat tä w'awulhchä tä iwhäye lewomekitaj. 16Wet yel'atas tä Salomón lew'utey tälhe p'ante häp Egipto lhäy'e Cilicia. Rey lech'otfwas tä ifwelwethä lakhäy, häp tä lhamel ichäjen p'ante häp yel'atas tä ihi Egipto lhäy'e Cilicia.#Deut 17.16 17Kaletas tä n'oka'tshayajchal tä Egipto lheley lhenhay, laha seiscientos chinaj t'äj, wet yel'atas laha ciento cincuenta. Häp tä Het lhayis laka reyes lhäy'e Aram lhayis laka reyes, lhamel ichute Salomón lech'otfwas chik ichäjo häp yel'atastso.
Currently Selected:
2~Crón 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.