Éxodo 1
1
Israelifo Egipto anoashu omitsiscani cuscan
1Ascan nan nocofunu Jacob ahuun anu futsa Israel ahuun facufo non aton yorafoya Egipto ano fonifo. Ahuun facufoan ato anufo un mato yoipacunon. 2Futsan Rubén non Simeón non Leví non Judá non 3Isacar non Zabulón non Benjamín non 4Dan non Neftalí non Gad non Aser. 5Nantifi Jacob ahuun funafo setenta a fu Egipto mai ano fonifo. Egipto ano nocoataima ahuun facu futsan ahuun anu José, nannoshon ato manani.
6Ascano José, yafi ahuun ochifo non ahuun ushtori nantifi ahuun caifo a fu iyopaonifo nantifi nai futsunifo. 7Ascafiani aton funafo ichaparasi cainnifo. Egipto mai anoafo Israelifo ichapacoin ipaonifo.
8Ascan chipo Egipcio niaifo futsan. José Egipciofo shara huapaoni cuscacai nan niaifo futsan anori shinannima. 9Ascashon ahuun caifo yoini isca huaquin, —Ua nica sharacahuun. Nan Israelifo fasi ichapacoin caianfo. Ascaracai sharama. Noco finontiro. Fasi musucoin. 10Non natian shinanon ahuuscashomain non ato finontiroquin. Non ato finonyamaino noco chaca huatirofo. Nan noicasmaifoan aton ranushumuafoan noco rutuaifoanno nan Israelifoan ato futan noco rutufaini nocon mai anoashu fotiroforan, —ishon niaifoan ato yoini.
11Nannori niaifo ato yoiaiton nicacatan Egipciofoan Israelifo yononi aton yonomatifo inon. Ascashon ato curushcain yonomanifo. Pitón mai anoa yafi Ramsés mai ano pushu rasi ato huashononfo. Nan pushu rasifo ano Egipciofoan ato tushufo mucushonifo.
12-13Egipciofoan ato curushcain yonomaitian nan shafatifi Israelifoan aton facufo ichapa rasi cainifoanno. Ascano Egipciofo atoqui musunifo. Ascashon curushcaincoin ato yononifo. 14Nan ladrillofo mai yafi foi osia ato oni huashofain aton mau ano ato curushcain yonomanifo. Ascano fasi omitsiscanifo. 15Nan Israelifo aton anu futsa Hebreofo. Nan Hebreo ainfo rafu aton anu Sifra yafi Fúa. Nan rafutan aton caifo ainfofo aton facu cainyaintian ato cushushonifo. Ascashon nantia Egipcio niaifoan nan ainfo rafu yononi isca huaquin,
16—Maton caifo Hebreo ainfofo aton facufo cainyaintian man ato cushutiro shotocofacu caianshu nitiro. Ascan furonanfacu caincun ato rutucahuun, —ishon niaifoan ato yononi.
17Nannori ato yoifia nan rafutan Upa Diosi icoinra huacashon ahuun tsain fusti tanasharacoincashon. Ato niaifoan yonoa cuscacai anori shinanpainifoma. Tsoancai furonanfacu caincun rutupainifoma ninonfo ishon. 18Nan niaifoan nicaitian ato cunani yocashquin.
—Un mato yonoa cuscan man huama. ¿Ahuuscai man furonanfacufo man rutuamamun nanonfo? —ishon niaifoan ato yocani.
19Ascashon nan ainfo rafutan niaifo cumani, —Niaifon, Faraón, nan Hebreo ainfofocai min caifo ainfofo cuscarafoma. Nocon caifo ainfofoan fasi curushcain yonomisifo. Ascan non atoqui nocoataima aton facufo cainriscaniran, —ishon Sifra futan Fúa nannori niaifo yoinifo.
20Nannori yoiaifotian Diosin ato shara huani. Ascano aton caifofo Israelifo paratama cainnifo. 21Aton caifofo facu cainyaintian aton cushumisifo Sifra yafi Fúa Diosi icoinra huafoan Diosin shara huaquin atorifi facu inan arifi facuyanonfo. 22Ascashon Egipciofoan aton niaifoan Faraón nantifi ahuun caifofo ato yononi isca huaquin, —Hebreofo aton facu furonanfacufo rama cainyaifo ato unu Nilo muran potacahuun asanonfo. Ascan shotocofacufo unu muran potayamacahuun ninonfo, —ishon ato niaifo Faraón yononi.
Currently Selected:
Éxodo 1: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.