Deuteronomio 22

22“Pueyasora, nioori sesajuhuaj. Pueyano jaara riuriatasaare niyacaraca maaji numuetuqueyano, naa miijiaca cuaara cojiritiasaaria puecoonu. Niaa jaara naa moriquia puetunu sesa miijiajanaatej, niaari naacua juutenutaniya puetunu nia tajinia quijiaca sesa miijiacajanaatej.

23“Naajuhuaj, tojetaarucuajanaa juhuanojuaja caya numuetucusoo niyacoo jaara tari neyacarano masesano quiya, cuno niyacoo cuaara na cuaqueya cojuaara saa neyacaranojua. Saniniuujia, tamonu pueyano jaara cuno niyacoo riuriatare tiacajinia, jaara na quiare na numuetucusocoriquiano, niyacoo sariyotaaquiniuucua na quiana, cunoori maja maninia. 24Naa miitioojuaca cuaara jayosaaria na tiacajinijinio nequesoreenaa pueyacua. Nojoriiri tii sequesaanutaniya cuaara puetujusaariajanaa saitia jacunu. Cuno niyacoo cuaara naa miishaariatej caya na sariyotaaquiniuucua. Caya saniniuujia, naa mosanoori narta pueyano niquiorano na numuetucunuucua. Niaa jaara naa miijiaca quiriquia pueyaracaanutej niaari puetunu nia tajinia quijiaca sesa miijiaca juurequijiariquiano.

25“Pueyano jaara tariucua poretesano niyacoo quiare tamajaaja na quishacari na cuhuariquiajinia, niyacoo jaara saaja na ruutejorenoj, caya jaara saaja na quiare, na numuetucureeri. Naa miijia pueyano cuaara mosaaria. Majaari niyacoo monu cutara. 26Majaari maajiicua tiuutiatunu cutara naa sacuaraatia caya miishanoniquitij. Nio sacuaraatia miishanoni, cunoori juhua puecooru miishanojua. Puecooru jaara narta pueyano riuriatare tamajaaja, na moreeri. 27Cuno pueyanocuajaari niyacoo riuriataree tamajaaja rucuanejiyano na cuhuariquiajinia. Niyacoo jiyoteeri na sariyotaree juucuacuaja na naacusaanura. ¿Cantucua nocua jiyanooreni?

28“Naajuhuaj, pueyano jaara tojetaarucuajanaa caya numuetucusoo niyacoo riuriatare juhuanojuaja niquiocuarano masesoojuhuaj, cuno pueyano jaara na quiare na numuetucureeri. 29Naa miyano jaara riuriatasaaretej, naa miijia pueyano cuaara niyacoo que niquitioora cincuenta cumaneeca platajiniji shipinishano. Naa cuno niyacoo na najuhuamacurtianuucuatej, cuaara necora na riirianoj. Cuaara na carteyaquiirianoj, cuaara na shaajetaaraja.

Currently Selected:

Deuteronomio 22: arl

Highlight

Copy

Compare