YouVersion Logo
Search Icon

Juan 8

8
Katz'onox che ri Jesús kuq'at tzij puwi jun ixoq na jusuk' ta ub'inik
1Ri Jesús xe'ek chwa ri juyub' Olivos. 2Echiri' xsaqirik, xtzelej tanchi pa ri Rocho Dios. Konoje ri winaq xeqib' ruk' y Rire xtz'uyi' chikiwach y xujeqo ku'an k'utunik.
3Ek'uchiri', raj k'utunel re ri tzijpixab' y ri fariseos xkik'am lo jun ixoq chwach. Wa' wi'xoq xkimajo e ri' kamakun chirij ri k'ulanikil ruk' jun achi na rachijil taj. Xkiya k'u chikinik'ajal konoje ri e k'o chiri' 4y jewa' xkib'i'ij che ri Jesús:
—Lal tijonel, wa jun ixoq xqamajo lik e ri' kamakun chirij ri k'ulanikil ruk' jun achi na rachijil taj. 5Yey ri Moisés, chupa ri Tzij Pixab' kataqan che ka'an pa'b'aj juna ixoq we ku'an wa'.#Lv. 20:10; Dt. 22:22-24 ¿Sa' k'u ri kab'i'ij rilal che? —xecha'. 6Xkib'i'ij wa' che ri Jesús xa re k'amb'al upa cha' kakikoj umak.
Ek'u ri Jesús xch'uki'ik y ruk' ruwi uq'ab' xujeq katz'ib'an chwa rulew. 7Yey rike lik kakik'ot upa cha' kuk'ul uwach ri tz'onob'al. Ek'u ri Jesús xtak'i'ik y xub'i'ij chike:
—We k'o junoq che alaq kuna'o na jinta k'ana umak, e nab'e ri' chuk'aqa rab'aj che wi'xoq —xcha'. 8Tek'uchiri', xch'uki' tanchik y ruk' ruwi uq'ab' xtz'ib'an tanchi chwa rulew.
9Konoje rike echiri' xkita wa' wa xub'i'ij, xkina' kib' k'o kimak. E uwari'che, pa jujun xeb'el b'i. Nab'e xeb'el b'i ri e nimaq winaq; tek'uchiri', ri e k'ak'al. Echiri' konoje eb'elinaq chub'i, xew ri Jesús y rixoq xekanaj kan chiri'.
10Ek'uchiri' xtak'i' ri Jesús y xrilo na jinta chi junoq chiri', xew chi rixoq, xub'i'ij k'u che:
—Ixoq ¿pa e k'o wi ri kakikoj amak? ¿Na jinta junoq xuq'at tzij re kamik pawi'? —xcha'.
11Rixoq xub'i'ij che:
—Na jinta junoq, Wajawal —xcha'.
Ek'uchiri', ri Jesús xub'i'ij che:
—Jenela' ri'in na kanq'at ta tzij re kamik pawi'. Jat k'u ri' y matmakun chik —xcha'.
Ri Jesús e ri Q'ijsaq
12Ri Jesús xch'a't tanchi kuk' ri winaq, jewa' xub'i'ij chike:
—In ri Q'ijsaq che ruwachulew. China k'u ri katerej lo chwij, na kab'in ta chi k'enoq pa q'equ'm ma k'o ri Q'ijsaq ruk' yey wa' e ri kuya k'aslemal —xcha'.
13Ek'uchiri', ri fariseos xkib'i'ij che ri Jesús:
—Na jinta uchak ri kab'i'ij la, ma xa chi'ib'il ib' la kab'i'ij la sa' ri wach la —xecha'.
14Ri Jesús xuk'ul uwach:
—Tob' in ri kinq'alajisan re sa' ri nuwach, ri kamb'i'ij lik qatzij; ma weta'am pa in petinaq wi y weta'am pa kin'ek wi. No'j ralaq na eta'am ta alaq pa in petinaq wi y na eta'am tane alaq pa kin'ek wi.
15»Ralaq, echiri' kab'i'ij alaq sa' ri kach'ob' alaq puwi junoq, ka'an alaq wa' xa ruk' ri na'oj re ruwachulew. No'j ri'in na je ta la' kan'ano. 16Echiri' k'o kanq'alajisaj chirij junoq, qatzij ri kamb'i'ij. Ma na xa ta pa we ri'in ri kamb'i'ij; ma ri nuna'oj ri'in lik junam ruk' runa'oj ri Nuqaw, ri xtaqaw lo we'in.
17»Yey chupa ri Tzij Pixab' e alaq, tz'ib'ital kanoq: “We e k'o ka'ib' tikawex junam kakijikib'a' uwach ri kakib'i'ij, e kakoj ke ri'.”#Dt. 19:15 18Ri kanq'alajisaj ri'in chiwib'il wib', kajikib'ax uwach ruma ri Nuqaw, ri taqayom lo we'in —xcha'.
19Xkitz'onoj k'u che:
—¿Pa k'u k'o wi ri qaw la? —xecha'.
Ri Jesús xuk'ul uwach:
—Ralaq na eta'am ta alaq nuwach ri'in y na eta'am ta alaq uwach ri Nuqaw; ma we ta eta'am alaq nuwach ri'in, jek'ula' ri' eta'am alaq uwach ri Nuqaw —xcha'.
20Ri Jesús xub'i'ij wa' echiri' kak'utun pa ri Rocho Dios, chiri' pa k'o wi ri kaxa re qasa'n. No'j na jinta junoq xchapaw b'i re, ma k'amaja' kopon ruq'ijol.
Ri Jesús petinaq chila' chikaj
21Xub'i'ij tanchi ri Jesús chike:
—Ri'in kin'ek y ralaq kintzukuj k'u alaq, pero kakam na k'u alaq ri' pa ri mak alaq. Ma pa kin'ek wi ri'in, na kopon ta ralaq chila' —xcha'.
22Xkib'i'ij k'u raj judi'ab' chikiwach: «Laj kukamisaj rib'; e uwari'che kub'i'ij na utz taj kojopon ri'oj chila' pa ke'ek wi rire» xecha'.
23Ek'u ri Jesús xub'i'ij chike:
—Ralaq na alaq ta re chila' chikaj, no'j ri'in in petinaq chila' chikaj. Ralaq alaq re ruwachulew, no'j ri'in na in ta re ruwachulew. 24E uwari'che ximb'i'ij kakam na k'u alaq ri' pa ri mak alaq. Ma we na kakoj ta alaq “In Ri'in”,#8:24 Wa' ke'elawi ri Jesús xex chi k'o wi y na jinta utaqexik ruk'aslemal. Éx. 3:14; Is. 43:10; Ap. 1:4 ri' kakam alaq pa ri mak alaq —xcha'.
25Ek'uchiri' xkitz'onoj che:
—¿Lal china k'u ri' rilal? —xecha'.
Ri Jesús xuk'ul uwach:
—E ri nub'i'im chi lo che alaq. 26Ri'in lik k'o weta'am chi'ij alaq re kojob'al mak alaq y re q'atb'al tzij pawi' alaq; pero xew kamb'i'ij chikiwach konoje ri tikawex sa' ri nutom che ri taqayom lo we'in, yey Rire lik qatzij janipa ri kub'i'ij —xcha'.
27Ri Jesús e kach'a't puwi Ruqaw, pero rike na xkimaj ta usuk' wa'.
28E uwari'che ri Jesús xub'i'ij chike:
—Echiri' kayak alaq Ralaxel Chikixo'l Tikawex y kaya alaq chwa ri cruz,#Jn. 3:14; 12:32 k'a ek'uchiri' keta'maj alaq ri': “In Ri'in”. Yey na jinta k'o kan'an xa pa we ri'in, ma xew kamb'i'ij janipa ruk'utum ri Nuqaw chwe. 29Ma ri taqayom lo we'in k'o wuk'; ri Nuqaw na inuya'om ta kan nutukel, ma ri'in xew kan'ano janipa ri karaj Rire —xcha'.
30Echiri' xub'i'ij taq wa' ri Jesús, lik e k'i ri xkikojo Rire e ri jun q'alajisanel koye'em kak'unik.
Ri e k'o puq'ab' ri Dios y ri e k'o puq'ab' ri mak
31Ek'uchiri', ri Jesús xub'i'ij chike ri e aj judi'ab' xkikojo Rire e ri jun q'alajisanel koye'em kak'unik.
—We kataqej k'u alaq janipa wa kamb'i'ij che alaq, ri' paqatzij wi ku'an alaq nutijo'n; 32y jek'ula' keta'maj alaq ri Q'ijsaq, y ri Q'ijsaq karesaj lo alaq puq'ab' ri ajaw alaq —xcha'.
33Rike xkik'ul uwach:
—Ri'oj oj ralk'o'al kan ri Abraham y na oj k'oji'naq ta puq'ab' junoq. ¿Su'b'e k'u ri' kab'i'ij la chiqe kojesax lo puq'ab' ri qajaw? —xecha'.
34Ri Jesús xub'i'ij chike:
—Paqatzij wi kamb'i'ij che alaq: Konoje ri kemakunik, puq'ab' ri mak e k'o wi. 35Juna aj chak pa ja na junam ta uwach ruk' ruk'ajol ri rajaw ja, ma ri aj chak xa ajilam q'ij k'o pa ja; no'j ruk'ajol na jinta utaqexik e ralk'o'al ruqaw. 36E uwari'che, we Ruk'ajol ri Dios karesaj lo alaq che ri mak k'o wi alaq, paqatzij wi k'u ri' kakiritaj lo alaq che ri mak.
37»Ri'in weta'am alaq ralk'o'al kan ri Abraham; na ruk' ta k'u ri', ka'aj alaq kinkamisaj alaq ma na kak'ul ta alaq ri kank'ut che alaq. 38Ri'in e kamb'i'ij ri uk'utum ri Nuqaw chwe, yey ralaq e ka'an alaq janipa rub'i'im ri qaw alaq —xcha'.
39Rike xkik'ul uwach:
—Ri qaqaw ri'oj e ri Abraham —xecha'.
Ek'u ri Jesús xub'i'ij chike:
—We ta paqatzij wi alaq ralk'o'al ri Abraham, e ka'an alaq ri' ri xu'an rire. 40No'j ralaq na je ta la' katajin alaq che u'anik. Ma tob' nub'i'im che alaq ri Q'ijsaq uk'utum ri Dios chwe, na ruk' ta k'u ri', ka'aj alaq kinkamisaj alaq. ¡Ri Abraham na je ta la' xu'ano! 41Ralaq e ka'an alaq pacha' ri ku'an ri qaw alaq —xcha'.
Ek'uchiri', xkib'i'ij rike che:
—Ri'oj na oj ta pacha' ri winaq na keta'am taj china ri kiqaw; ma xa jun ri Qaqaw, e ri Dios —xecha'.
42Xub'i'ij k'u ri Jesús chike:
—We ta paqatzij wi e qaw alaq ri Dios, ralaq lik k'ax kinna' alaq ri', ma ri'in ruk' ri Dios in petinaq wi yey ri' in k'o chiwach alaq. Na in petinaq ta k'u xa pa we ri'in, ma e ri Dios taqayom lo we'in.
43»¿Su'b'e na kamaj ta alaq usuk' janipa ri kamb'i'ij che alaq? E ruma ri na ka'aj ta alaq kata alaq ri kamb'i'ij ri'in. 44Ri qaw alaq e ritzel winaq, ma e ka'an alaq sa' ri karaj rire. Ritzel winaq aj kamisanel chwi lo ri jeqeb'al ruwachulew. Yey rire na xtiki' ta kan pa ri Q'ijsaq, y na jinta ne k'ana Q'ijsaq ruk'. Echiri' ku'an raq'ub'al, e kuq'alajisaj sa' ri k'o pa ranima'; ma xex wi aj raq'ul yey ronoje raq'ub'al ruk' rire kape wi. 45No'j ri'in e kanq'alajisaj ri lik qatzij, yey ralaq na kakoj ta alaq.
46»¿K'o nawi junoq che alaq kuriq juna mak chwij? Yey we qatzij ri kamb'i'ij, ¿su'b'e k'u ri' na kakoj ta alaq? 47E junoq ralk'o'al ri Dios, e kuta Ruch'a'tem ri Dios; no'j ralaq na alaq ta ralk'o'al ri Dios, ma na kata ta alaq Ruch'a'tem —xcha'.
Ri Cristo xex chi k'o lo wi chwa ri Abraham
48Ek'uchiri', raj judi'ab' xkib'i'ij che ri Jesús:
—Lik qatzij ri xqab'i'ij pawi' la: Rilal lal kuk'il ri aj Samaria y lal k'o puq'ab' jun itzel uxlab'ixel —xecha'.
49Ek'u ri Jesús xuk'ul uwach chike:
—Ri'in na in jinta puq'ab' juna itzel uxlab'ixel; ri kan'ano e kanyak uq'ij ri Nuqaw y ralaq kak'aq b'i alaq nuq'ij. 50Ri'in na kantzukuj ta yakb'al nuq'ij, tob' k'o Jun karaj kayaki' nuq'ij yey puq'ab' Rire k'o wi kuq'alajisaj china ri k'o Q'ijsaq ruk'. 51Paqatzij wi kamb'i'ij che alaq: China ri kakojow re ri kanq'alajisaj ri'in, na kakam taj ma k'o uk'aslemal na jinta utaqexik —xcha'.
52Ek'uchiri', raj judi'ab' xkik'ul uwach:
—Wo'ora kaqajikib'a' uwach, lal k'o puq'ab' jun itzel uxlab'ixel. Ma ri Abraham y ri q'alajisanelab' xekamik, yey rilal kab'i'ij la: “China kakojow re ri kanq'alajisaj, na kakam taj ma k'o uk'aslemal na jinta utaqexik.” 53¿Lik neb'a más k'o wach rilal chwa ri qaqaw Abraham? Rire xkamik yey taq ri q'alajisanelab' xekamik. Chiwach rilal, ¿sa' ri wach la? —xecha'.
54Ri Jesús xuk'ul uwach:
—We kanyak nuq'ij ri'in chiwib'il wib', ri' na jinta uchak ri yakb'al nuq'ij kan'ano; no'j k'u ri kayakaw nuq'ij e ri Nuqaw, ri kab'i'ij alaq e Dios alaq. 55Ek'u ralaq na eta'am ta alaq uwach Rire; no'j ri'in lik weta'am uwach. We ta e la' kamb'i'ij na weta'am ta uwach, ri' kinelik in aj raq'ul jela' pacha' ralaq. No'j ri'in paqatzij wi weta'am uwach Rire yey lik kan'an ronoje ri kub'i'ij. 56Ri Abraham, ri mam alaq ojertan, lik xki'kotik echiri' xreta'maj kink'un che ruwachulew; xril pan ri nuq'ijol y lik xki'kot che —xcha'.
57Ek'uchiri', raj judi'ab' xkib'i'ij che ri Jesús:
—K'amaja' ne cincuenta ri junab' la, ¿yey kab'i'ij la xil la uwach ri Abraham? —xecha'.
58Ri Jesús xuk'ul uwach:
—Paqatzij wi kamb'i'ij che alaq: Ri'in xex chi in k'o lo wi echiri' k'amaja' ne kalax ri Abraham —xcha'.
59Ek'uchiri', ri winaq xkijeq kakisik' ab'aj re kaki'an ri Jesús pa'b'aj; no'j Rire xewax chikiwach, e la' xik'ow chikixo'l y xel b'i che ri Rocho Dios.

Currently Selected:

Juan 8: acrN

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy