2 Timoteo 1
1
Ri Pablo kuya pan rutzil uwach ri Timoteo
1Ri'in in Pablo, in taqo'n re ri Qanimajawal Jesucristo ma e xraj ri' ri Dios chwe kantzijoj ri k'aslemal b'i'tisim chike ri kakiya kib' puq'ab' ri Qanimajawal Jesucristo. 2Kantz'ib'aj pan wa' wa carta chawe ri'at Timoteo. Ri'in lik k'ax katinna'o ma at pacha' nuk'ajol chupa rub'i' ri Cristo. Chak'ulu k'u ri unimal rutzil k'u'xaj, ri relej k'u'xaj y ri utzil chomal re ri Qaqaw Dios y re ri Qanimajawal Jesucristo.
Ri Pablo kupixab'aj ri Timoteo che utzijoxik ri Utzilaj Tzij
3Lik kintioxin chwach ri Dios, ri kanloq'nimaj jela' pacha' xki'an lo ri wati'-numam ojertan yey lik kuna' nuk'u'x utz nu'anom chwach Rire. Yey echiri' kan'an orar chipaq'ij chichaq'ab' xaqi katk'un chinuk'u'x. 4E kak'un chinuk'u'x roq'ej xa'ano echiri' xatkanaj kanoq y lik kuaj k'ut kanwil awach cha' jela' kaki'kot ri wanima'. 5Yey kak'un chinuk'u'x ri saqil kub'ulib'al ak'u'x ruk' ri Qanimajawal Jesucristo; ma wa' nab'e xk'oji' ruk' rawati' Loida y rachu Eunice, y wo'ora lik q'alaj e ne k'o awuk' ri'at.
6E uwari'che lik katimpixab'aj puwi ri uya'om ri Dios chawe,#1 Co. 12:4-11 wa' e ri xak'ulu echiri' xinya ri nuq'ab' pawi' cha' katu'an at aj chak re ri Dios. Lik k'u chachuq'ub'ej awib' che u'anik wa' ruk' ronoje ak'u'x. 7Ma ri Dios na uya'om ta ri Ruxlab'ixel chiqe cha' koju'an oj turun; e uya'om chiqe cha' kak'oji' qachuq'ab', rutzil qak'u'x y saqil qana'oj. 8E uwari'che, matk'ix che utzijoxik ri Utzilaj Tzij re ri Qanimajawal Jesucristo y matk'ix ne chwe ri'in ma in k'o pa cárcel ruma kantzijoj ri Utzilaj Tzij. Ek'u ri'at, e chakuyu taq ri k'axk'ob'ik kape paqawi' ruma rutzijoxik wa', chach'ija k'u ronoje ruk' ruchuq'ab' ri Dios.
9E ri Dios xkolob'en qe'oj y xojusik'ij cha' kojk'oji' jusuk' chwach; yey wa' na e ta ruma ri qa'anom ri'oj, ma e ruma lik e xraj ri' Rire chiqe. Echiri' k'amaja' ne ku'an ruwachulew, uch'ob'om chik kuya ri unimal rutzil uk'u'x chiqe ruma ri Qanimajawal Jesucristo. 10Y wo'ora uk'utum chi ri rutzil uk'u'x chiqe ma xutaq lo ri Qanimajawal Jesucristo re kojukolob'ej. Rire xuch'ij uchuq'ab' ri kamik y jek'ula' xuq'alajisaj k'o k'aslemal na jinta utaqexik chike ri kikojom ri Utzilaj Tzij.
11Yey ri'in in cha'tal lo ruma ri Dios re kantzijoj wa Utzilaj Tzij y re kinu'an in taqo'n y k'utunel chikiwach ri uk'iyal kiwach taq ri tikawex. 12E uwari'che ri'in kantij ronoje taq wa k'axk'ob'ik in k'o wi y na kink'ix ta k'u che, ma lik weta'am china ruk' kub'ul wi nuk'u'x, yey lik jikil nuk'u'x che e Rire lik k'o uchuq'ab' che uchajixik ri uya'om panuq'ab' k'a che ruk'unib'al ri Cristo.
13E lik chak'utu chikiwach ri tikawex ri saqil k'utunik atom ri'at chwe; cha'ana wa' ruk' ri kub'ulib'al k'u'xaj y ri rutzil k'u'xaj ariqom ruk' ri Qanimajawal Jesucristo. 14Ruk' ruto'b'al ri Santowilaj Ruxlab'ixel ri Dios k'o pa qanima', lik chachajij chi utz ri ya'tal chawe ruma ri Dios.
15Ri'at lik aweta'am, e k'i ri qachb'i'il e aj Asia xinkoq'otaj kanoq, y chikixo'l rike k'o ri Figelo y ri Hermógenes. 16No'j ri Onesíforo na xinroq'otaj taj. Chuk'utu k'u ri Qanimajawal Jesucristo ri rutzil uk'u'x che rire y chike taq ri e k'o pa rocho, ma rire uk'iyal laj xub'ochi'ij nuk'u'x y na xk'ix ta chwe tob' in k'o pa karena chupa ri cárcel. 17Y echiri' xk'un wara Roma, lik xok il che nutzukuxik pa in k'o wi y xinuriqo. 18Yey aweta'am ne ri'at, rire lik xojuto'o echiri' oj k'o chupa ri tinamit Éfeso. E uwari'che kantz'onoj che ri Qanimajawal chuya'a ri rajil uk'axel che ri Onesíforo chupa ri k'isb'al q'ij.
Currently Selected:
2 Timoteo 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.