2 Juan 1
1
Ri Juan kuya pan rutzil kiwach riglesia
1Ri'in in nimalaj winaq, in aj wach re riglesia; kantz'ib'aj pan wa carta che alaq, ri alaq cha'tal ruma ri Dios, ri kamol ib' alaq pa rub'i' ri Qanimajawal Jesucristo.#1:1 Pa ri ch'a'tem griego kub'i'ij “che rixoq cha'talik y chike ri ralk'o'al”. E k'o ri kakich'ob'o “rixoq” e ke'elawi riglesia y “ri ralk'o'al” e ri hermanos re riglesia. Paqatzij wi lik k'ax kanna' alaq, y na xew ta ri'in ma konoje ri kikojom ri Q'ijsaq re ri Dios k'ax kakina' alaq. 2K'ax kaqana' alaq ruma ri Q'ijsaq qakojom junam uk' alaq y wa' na jinta utaqexik k'o quk' qonoje ri'oj.
3K'ola k'u uk' alaq y quk' ri'oj ri unimal rutzil k'u'xaj ruk' ri k'utub'al re ri rutzil k'u'xaj y ri utzil chomal re ri Qaqaw Dios y re ri Qanimajawal Jesucristo, Ruk'ajol ri Qaqaw. Kaqak'ul k'u ronoje wa' ruma e qakojom ri Q'ijsaq yey ruma qak'utum ri rutzil uk'u'x ri Dios chike ri tikawex.
Rutaqanik ri Dios puwi ri rutzil k'u'xaj
4Lik xinki'kotik ma xeb'enuriq jujun che alaq keb'in chi utz chupa ri Q'ijsaq jela' pacha' ri taqanik xqak'ul che ri Qaqaw. 5Ek'u wo'ora hermanos ri alaq utinamit ri Dios,#1:5 “Utinamit ri Dios”: Pa ri ch'a'tem griego kub'i'ij “ixoq”. kantz'onoj che alaq lik k'ax qana'a qib' chiqawach. Wa kan'ano na e ta pacha' kantz'ib'aj pan jun k'ak' tzijpixab' che alaq, ma wa' e ri xex chi tom wi lo alaq. 6Ek'u ri rutzil qak'u'x kaq'alajinik echiri' kojb'in jela' pacha' ri kojutaq ri Dios che u'anik pa Rutzij Upixab'. Ek'u ri kojutaq che e wa': Qatijoj qib' che uk'utik ri rutzil k'u'xaj. Yey wa' xex chi tom wi lo alaq.
Mojsokotaj kuma ri e aj sokoso'nel
7Lik e k'i ri e aj sokoso'nel eb'enaq pa taq tinamit che ruwachulew, rike kakib'i'ij: «Na qatzij taj ri Qanimajawal Jesucristo e Rucha'o'n lo ri Dios yey xu'an achi echiri' xk'un che ruwachulew» kecha'. Janipa ri jewa' kakib'i'ij, e sokoso'nel y eyaktajinaq chirij ri Cristo. 8Chajij k'u ib' alaq cha' na kasokotaj ta alaq kuma rike; e masach alaq uwach ri rajil uk'axel ri chak ka'an alaq, cha' jela' tz'aqat uwach ri kak'ul alaq. 9E junoq kuya kan rub'e ri Dios y na katiki' ta chupa ri k'utunik re ri Cristo, ri' na jinta ri Dios ruk'. No'j ri katiki' chupa ri k'utunik re ri Cristo, ri' k'o ri Qaqaw Dios y k'o Ruk'ajol ri Dios ruk'. 10We k'o junoq kopon uk' alaq yey ri kuk'utu na e ta ri saqil k'utunik puwi ri Cristo, mak'ul alaq pa ocho alaq y mab'i'ij ne alaq che: «¡Utzilaj k'unem!» 11Ma e ri kab'i'n che: «¡Utzilaj k'unem!» ri' e jun ruk' che u'anikil ri kichak na chom ta uwach.
K'isb'al uch'a'tem ri Juan che riglesia
12Lik k'i taq ri kuaj kantzijoj che alaq, pero wa' na kuaj taj kantz'ib'aj che alaq, ma ri kuaj ri'in e kinopon uk' alaq y jek'ula' kojch'a't chiqawach cha' junam kojki'kotik.
13Ri hermanos kimolom kib' wara,#1:13 Pa ri ch'a'tem griego kub'i'ij “ri ralk'o'al ri atzixel la”. Wa' e ke'elawi riglesia pa k'o wi ri Juan. ri echa'tal ruma ri Dios, kakiya pan rutzil wach alaq. Amén.
Currently Selected:
2 Juan 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.