YouVersion Logo
Search Icon

1 Pedro 1

1
Ri Pedro kuya pan rutzil kiwach ri echa'tal ruma ri Dios
1Ri'in in Pedro, in taqo'n re ri Qanimajawal Jesucristo. Kintz'ib'an pan che alaq, ri naj k'o wi alaq che ri qatinamit, ri jeqel alaq pa taq ri luwar re Ponto, re Galacia, re Capadocia, re Asia y re Bitinia. 2Ralaq cha'tal lo alaq ruma ri Qaqaw Dios, ma jela' uch'ob'om chi lo Rire ojertan. Ek'u wo'ora, ruma ri Ruxlab'ixel ri Dios, ya'tal che alaq kak'oji' alaq che jun santowilaj b'inik cha' kakoj alaq utzij ri Dios y kach'ajtaj ri mak alaq ruk' rukik'el ri Qanimajawal Jesucristo. E lik k'iyar na k'u pawi' alaq ri unimal rutzil k'u'xaj y ri utzil chomal re ri Dios.
Kub'ul pan qak'u'x che uk'ulik janipa ri kuya ri Dios chiqe
3Lik nim uq'ij ri Dios, Ruqaw ri Qanimajawal Jesucristo, ma ruma ri unimal rutzil uk'u'x xuya jun k'ak' qab'inik qasilab'ik. Yey ruma ruk'astajib'al lo ri Qanimajawal Jesucristo chikixo'l ri ekaminaq, lik kub'ul pan qak'u'x che uk'ulik ri k'aslemal ub'i'tisim chiqe. 4Yey wa qoye'em na kasach ta uwach, na kach'ulax ta uwach ruk' ri mak y na kachup tane k'ana ruchomal. Jikib'am k'u uwach ri' kaya'taj wa' che alaq chila' chikaj. 5Ruma k'u ri kub'ulib'al k'u'x alaq ruk' ri Dios, Rire kuchajij alaq ruk' ruchuq'ab' cha' jela' kak'ul alaq ri kolob'etajik b'i'tisim chi che alaq yey wa' kaq'alajin na chupa taq ri k'isb'al q'ij.
6Ruma k'u ri', kaki'kot alaq wo'ora, tob' kopon jujun q'ij chirajawaxik kik'ow na alaq pa taq uk'iyal k'axk'olil 7cha' kak'am pa alaq puwi ri kub'ulib'al k'u'x alaq ruk' ri Dios jela' pacha' ka'an che ri oro echiri' kik'owisax pa aq', ilib'al re we saqil oro. Yey ri kub'ulib'al k'u'x ralaq ruk' ri Dios más k'o uwach chwa ri oro, ma ri oro xa kak'isik. We xch'ij k'u alaq wa k'axk'ob'ik kik'owib'ej alaq, ri' re yakb'al q'ij ralaq y re yakb'al uq'ij ri Dios. Ma echiri' ri Qanimajawal Jesucristo kuq'alajisaj uwach chiqawach apanoq, kutak'ab'a' q'ij ralaq ruma ri kub'ulib'al k'u'x alaq ruk' ri Dios. 8Ralaq k'ax kana' alaq ri Jesús tob' na ilom ta alaq uwach Rire, yey kub'ul k'u'x alaq ruk' tob' na kil ta alaq uwach wo'ora. Y kaki'kot alaq ruk' unimal ki'kotemal, yey wa' na kariqitaj tane ub'i'xikil. 9Kaki'kot k'u alaq, ma kak'ul na alaq ri kolob'etajik oye'em alaq ruk' kub'ulib'al k'u'xaj.
10Ri q'alajisanelab' re ojertan xeq'alajisan lo puwi ri unimal rutzil uk'u'x ri Dios, ri kaya'i' che ralaq. Rike lik xkiya kina'oj puwi wa kolob'etajik y lik xkitij uq'ij umajik usuk' wa'. 11Ma k'o ri xuq'alajisaj ri Ruxlab'ixel ri Cristo chike puwi taq ri k'axk'ob'ik kutij Rucha'o'n lo ri Dios y ri yakb'al uq'ij ka'anik echiri' ik'owinaq chi chupa wa'. Ek'u rike xkich'ob' raqan china puwi' xb'i'x wa' y jampala' ku'ana'. 12Yey ri Dios xuq'alajisaj chike wa' wa q'alajisanelab' na kakil ta wa' chupa taq ri q'ij e k'o wi rike, ma wa' e ku'ana chupa taq wa q'ij oj k'o wi ri'oj. Yey wa' e ri xya' che alaq kuma ri kitzijom ri Utzilaj Tzij ruk' ruchuq'ab' ri Santowilaj Ruxlab'ixel ri Dios, ri xtaq lo chila' chikaj. Yey ri ángeles lik kakaj ne kakimaj usuk' taq wa'.
Ri Dios kojusik'ij che jun santowilaj b'inik
13E uwari'che suk'upij alaq ri na'oj alaq, lik ch'ob'o na alaq raqan sa' taq ri ka'an alaq. E choye'ej alaq ri unimal rutzil uk'u'x ri Dios, ri kaya' na che alaq echiri' kaq'alajisax uwach ri Qanimajawal Jesucristo. 14Ralaq alaq chi ralk'o'al ri Dios, ruma k'u ri' kojo alaq utzij Rire. Maya k'u ib' alaq che ri rayinik k'o wi alaq ojertan echiri' k'amaja' keta'maj alaq uwach ri Dios. 15Ma jela' pacha' ri Jun sik'iyom e alaq lik na jinta k'ana mak ruk', jek'ula' 'ana alaq che ri b'inik silab'ik ralaq. 16Ma jewa' tz'ib'ital kan pa Ruch'a'tem ri Dios:
Chi'ana jusuk' che ri ib'inik isilab'ik,
ma Ri'in na jinta k'ana mak wuk'. Lv. 19:2
17Yey we kab'i'ij alaq «Qaqaw» che ri Jun na kacha'w ta chikixo'l ri tikawex echiri' ku'an q'atb'al tzij pakiwi konoje ruma taq ri ki'anom, ri' lik chirajawaxik che alaq kab'in alaq ruk' xi'in ib' chwach Rire ronoje q'ij che ri k'aslemal alaq. 18Ma lik eta'am alaq, ri Dios xresaj lo alaq che ri b'inik silab'ik alaq na chom taj, ri xk'ut kan che alaq kuma ri chu'qaw alaq ojertan. Yey rutojik xu'an ri Dios re karesaj lo alaq puq'ab' ri mak, na e ta ruk' oro o ruk' plata, ma wa' xa kasach uwach; 19rutojik xu'ano e ruk' ri loq'laj ukik'el ri Cristo, ri xya'i' pa kamik pacha' juna q'apoj b'exex lik chom y na yewa' ta uwach kaya'i' chwach ri Dios. 20Yey ri Cristo cha'om chi lo ojertan chwi lo echiri' k'amaja' ne ka'an ruwachulew; pero k'a ek'u wo'ora chupa wa k'isb'al q'ij oj k'o wi, ri Dios xuk'utub'ej uwach ruma ri rutzil uk'u'x che alaq. 21Ruma k'u ri Qanimajawal Jesucristo, xkub'i' k'u'x alaq ruk' ri Dios, ma e Rire ri xuk'astajisaj lo ri Cristo chikixo'l ri ekaminaq y lik xuyak uq'ij. Ruma k'u ri', kub'ul k'u'x alaq ruk' ri Dios y oye'em alaq che Rire janipa ri ub'i'tisim che alaq.
22Ruma xkoj alaq ri Q'ijsaq, wo'ora xu'an chom ri k'aslemal alaq cha' paqatzij wi k'ax kana' ib' alaq ri chaq' ib' alaq chupa rub'i' ri Cristo. E uwari'che lik k'ax na'a ib' alaq chiwach alaq ruk' ronoje chuq'ab' alaq y ruk' ronoje k'u'x alaq. 23Ma ralaq alaq alaxinaq tanchik y wa' na e ta kuma ri chu'qaw alaq ri xa e tikawex, ma e ruma Ruch'a'tem ri Dios, ri lik k'aslik y na kasach ta k'ana uwach. 24Ma jewa' tz'ib'ital kan pa Ruch'a'tem ri Dios:
Konoje ri tikawex e jela' pacha' raq'es
yey ri yakb'al kiq'ij e pacha' rukotz'i'jal raq'es;
ma raq'es xa kachup uwach
y rukotz'i'jal xa kachaqijik y kapuqik.
Jek'ula' ri' ri tikawex xa kekamik
y ri yakb'al kiq'ij xa kasach uwach,
25no'j Ruch'a'tem ri Dios na kasach ta k'ana uwach Is. 40:6-8
kacha'. Yey wa ch'a'tem e ri Utzilaj Tzij tzijotal chi lo che alaq.

Currently Selected:

1 Pedro 1: acrN

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy