Junas 1
1
Junas al ta ta Njesigənea̰’g
1Njesigənea̰ ula Junas, ŋgolə Amitai pana : 2Maji kari ḭta, aw Ninibə ɓee-boo’g neelé aw ila mber ndaŋg dee ne mbata néra deeje gə́ yèr lé aw njal teḛ rɔm’g ya.
3Nɛ Junas lé uba naŋg ḭ gə mba kaḭ kaw Tarsis gə mba kisi əw kar kəm Njesigənea̰ oso dəa’g el. Yeḛ aw Japo ndá yeḛ iŋga bato gə́ aw gə́ Tarsis. Yeḛ uga bato neelé gə lar ɓa uru mée’g gə mba kaw gə deḛ gə́ d’odo dee d’aw sə dee gə́ Tarsis gə mba kisi ne əw kar kəm Njesigənea̰ oso dəa’g el tɔ.
4Nɛ Njesigənea̰ ar lel-boo ḭ gigigi dɔ baa-boo’g ndá lel-boo neelé ula mbḭ-mbḭ tɔ. Nai lam bèe mba kar bato lé tuji mán ya. 5Njébatoje neelé ɓəl yaa̰ ar nana kara no̰ ɓar magə ləa-ləa ya, tɔɓəi deḛ d’odo néje gə́ mee bato’g lé d’ɔm dan mán baa-boo’g ɓa gə mba kya̰ bato lé karee wɔilɔ pélé. Nɛ Junas lé uru mee bato gə́ bər to keneŋ ar ɓi tɔlee pərəg tɔ. 6Njekwa-ŋgao bato lé ree pər gə́ rəa’g dəjee pana: See ban ɓa i toɓi bèe wa. Uba naŋg ḭ tar ɓar magə ləi oo ɓa banelə yeḛ ə̰ji dɔ sí’g ndá j’a kudu ne el.
7Deḛ kára-kára lai d’ula na̰ ta gə́ yo gə́ nee pana: Gə́ reeje, ar sí n’raje né asəna gə téḛ bèe gə mba koo see na̰ ɓa ar tuji neelé oso dɔ sí’g wa. Deḛ ra né neelé ndá oso dɔ Junas’g ya ɗəgərə. 8Yen ŋga deḛ d’ulá pana: Ula sí ar sí j’ooje see na̰ ɓa ar tuji neelé oso dɔ sí’g bèe wa. See kula raije to gə́ ɗi wa əsé i ḭ ra wa. Ɓee ləi ra wa. See ginkoji gə́ ra ɓa i ḭ keneŋ wa.
9Yeḛ ila dee keneŋ pana: Ma lé m’to gə́ Ǝbrə, ma m’ɓəl Njesigənea̰, Ala gə́ si mee dara’g, yeḛ gə́ ma m’polee lé, yeḛ gə́ ra baa-boo kad gə dɔ naŋg nee lé tɔ.
10Dəwje neelé ɓəl unda dee badə gaŋg dee ndá deḛ dəjee pana: See ban ɓa i ra togə́bè wa. Dəwje neelé gər to gə́ yeḛ aḭ aw əw gə Njesigənea̰ mbata yeḛ riba sə dee dɔ nérea kédé ya. 11Deḛ dəjee pana: See ɗi ɓa j’a ra səi ɓa mba kar baa-boo to ne ndiŋ wa.
Mbata paŋgəm-mán baa-boo lé ḭ dɔ maree’g gə́ kédé-kédé.
12Yeḛ ila dee keneŋ pana: Unmje, ilamje dan baa-boo’g. Togə́bè ɓa baa-boo a kwa rəa to ndiŋ mbata ma m’gər gao to ma ya ɓa lel-boo neelé teḛ ne dɔ sí’g gə mbəa.
13Dəwje neelé d’wa hai kɔgərɔ gə mba teḛ kaar koŋgo’d nɛ d’oma̰ pi mbata baa-boo lé ḭ dɔ maree’d gə́ kédé-kédé ya. 14Yen ŋga deḛ no̰ ɓar Njesigənea̰ pana: Ǝi, Njesigənea̰, ya̰ sí ar sí n’tujije mbata lə dəw gə́ neelé el ləm, ar məs njegelgodo neelé nai dɔ síjeḛ’g el ləm tɔ. Mbata i, Njesigənea̰ lé i ya ra né to gə́ məəi ndigi.
15Bèe ɓa deḛ d’un Junas d’ilá dan baa-boo’g. Ndá mán baa-boo lé tel to ndiŋ tɔ. 16Dəwje neelé kaar dee wa dee paḭ ar dee ɓəl Njesigənea̰, tɔɓəi deḛ d’inja nékinjaməs d’ar Njesigənea̰ ləm, d’un ndu dee d’aree ləm tɔ.
Currently Selected:
Junas 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.