Teḛ-Raga 1
1
ISRAƐLJE D’ISI EJIPTƎ
Nékəmndoo gə́ ra Israɛlje mee ɓee gə́ Ejiptə
1Aa ooje ri Israɛlje gə́ ree Ejiptə gə Jakob na̰’d lé nana kara deḛ gə njémeekəije ləa-ləa, ri dee ɓa nee : 2Rubḛ, Simeo̰, Ləbi, Juda, 3Isakar, Jabulo̰, Bḛjami, 4Dan, Neptali, Gad gə Aser. 5Deḛ lai gə́ to ŋgaka Jakob lé d’as dəwje rɔ-siri, Jisəb ɓa yḛ̀ si Ejiptə mba̰. 6Gée gə́ gogo Jisəb wəi ləm, ŋgakea̰je lai d’wəi ləma, njéboakojije lə deḛ lai kara d’wəi ləm tɔ. 7Israɛlje lé d’oji na̰ gə́ kédé-kédé ləm deḛ bula digi-digi ləm siŋga dee kara ḭ dɔ maree’d gə́ kédé-kédé ləm tɔ. Deḛ taa loo mee ɓee’g neelé pəl-pəl .
8Nɛ mbai gə́ sigi ɓa un kudu ko̰ɓee gə́ Ejiptə, to yeḛ gər Jisəb kédé el . 9Yeḛ ula dəwje ləa pana: Aa ooje, Israɛlje lé bula d’unda sí ləm, siŋga dee kara ur dɔ ka̰ síjeḛ’g ləm tɔ. 10Yen! ar sí n’ra deeje gə kəmkàree j’ɔg deeje loo koji na̰ gə́ kédé-kédé nà banelə ɓó lé rɔ a tɔ ndá d’a kɔm gel njéba̰je’g lə sí gə mba rɔ sə sí ləm, gə mba teḛ kya̰ ɓee gə́ nee lé ləm tɔ .
11Yen ŋga Ejiptəje d’ɔr njékaa dɔ Israɛlje gə mba kar dee d’unda kulaje gə́ kədərə gə́ wɔi dɔ dee’g. Bèe ɓa d’ar dee ra ne ɓee-booje gə́ Pitɔm ləm gə Ramsɛs ləm mba kar dee to loo-ŋgəm-nékiŋgaje lə Parao̰. 12Nɛ lé d’ula kəm dee ndòo bèe kara deḛ d’oji na̰ gə́ kédé-kédé ya ləm, bula lə dee aw gə́ kédé-kédé ya ləm tɔ, ŋgan Israɛlje lé dəwje d’ə̰ji dee bəḭ-bəḭ ya. 13Togə́bè ɓa njé gə́ Ejiptə d’ar Israɛlje ra ne kula ɓər d’aar dee ya. 14Deḛ d’ar meḛ dee adə dee mbag-mbag dɔ kula gə́ kədərə gə́ wɔji dɔ mbɔḭ a̰ji ləm, gə kɔr bɔrɔ ləma, gə kula ndɔje lai ləm tɔ, gə goo meeyèr gə́ to kḛji ɓa deḛ d’ɔm ne kulaje gə́ wɔi dɔ dee’g bèe ya.
15Njétaa-ndóoje lə Ǝbrəje joo d’isi keneŋ, yeḛ gə́ kára ria la Sipra, yeḛ gə́ raŋg ria lə Pua tɔ. 16Mbai gə́ njeko̰ɓee gə́ Ejiptə lé un ndia ar dee pana: Loo gə́ seḭ si taaje dené Ǝbrəje ndóo ɓa seḭ ooje to gə́ d’a gə koji ŋgon’g lé ɓó lé to ŋgon gə́ diŋgam ndá seḭ a kuduje ŋgon neelé kəmə, nɛ ɓó lé to ŋgon gə́ dené ndá a kyá̰je kaareeje si kəmba tɔ.
17Nɛ njétaa-ndóoje neelé ɓəl Ala, gelee gə́ nee ɓa deḛ mbad ra né torndu mbai gə́ njeko̰ɓee gə́ Ejiptə lé ndá d’ar ŋganje gə́ diŋgam d’isi ne kəmba ya. 18Mbai gə́ njeko̰ɓee lé ula kula ɓar njétaa-ndóoje neelé ar dee ree rəa’g ndá dəji dee pana: See gelee ban ɓa seḭ raje né gə́ togə́bè ya̰je ne ŋganje gə́ diŋgam ar deeje d’isi ne kəmba wa.
19Njétaa-ndóoje lé d’ila Parao̰ keneŋ pana: Mbata dené Ǝbrəje lé to d’asəna gə denéje gə́ Ejiptə nee bèe el, siŋga dee to kɔgərɔ-kɔgərɔ ndá deḛ ya d’oji ŋganje kédé mba̰ ɓa njetaa-ndóo teḛ lée’g ɓəi.
20Ala ra meemaji gə njétaa-ndóoje neelé, tɔɓəi Israɛlje lé d’oji na̰ gə́ kédé-kédé tel bula ne digi-digi tɔ. 21Gə goo ɓəl gə́ njétaa-ndóoje neelé ɓəl Ala yeḛ ar ŋgaka deeje d’ɔs ne goo na̰ gə́ kédé-kédé ya. 22Togə́bè ɓa Parao̰ un ndia ar koso-dəwje ləa lai pana: Ŋganje gə́ diŋgam lai gə́ to Ǝbrəje gə́ d’oji dee lé seḭ a kɔm deeje dan mán baa’g nɛ ŋganje gə́ dené ɓa seḭ a kya̰ deeje kəmba ya .
Currently Selected:
Teḛ-Raga 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.