2 Samel 1
1
KO̰ƁEE LƎ DABID
Pa gə́ Dabid no̰ ne yoo Sawul gə Jonatan lé
1Goo kwəi’g lə Sawul lé Dabid ḭ loo təd rɔ Amalekje’g ndá yeḛ si Siklag as ndɔ joo. 2Ndɔ gə́ njekɔm’g munda ndá dəw kára ḭ loo-si njérɔje’g lə Sawul. Kubuje gə́ rəa’g ŋgisi ləm, kor wa dəa lub-lub ləm tɔ. Loo gə́ yeḛ ree aar no̰ Dabid’g ndá yeḛ oso naŋg bəbərə dəb kəmee naŋg.
3Dabid dəjee pana: See i ḭ ra wa.
Yeḛ tel ilá keneŋ pana: M’ḭ loo-si njérɔje’g lə Israɛlje ɓa m’aḭ.
4Dabid dəjee pana: See ɗi ɓa ra né wa, ulam ɓa!
Yeḛ tel ulá pana: Njérɔje d’ḭ loo-rɔ’g d’aḭ ləm, njérɔje bula d’wəi ləm tɔ ndá Sawul gə Jonatan kara d’wəi tɔ.
5Dabid dəji basa gə́ njekulá ta neelé pana: See i ra to gə́ ban ɓa oo ne to gə́ Sawul gə ŋgonee Jonatan d’wəi wa.
6Ndá basa gə́ njekulá taje neelé tel ilá keneŋ pana: Ma m’aar dɔ mbal gə́ Gilboa ndá aa oo, Sawul man rəa dɔ niŋga-ndəi’g ləa tɔɓəi aa oo, pusu-rɔje gə njérɔ gə kundaje ree gə́ rəa’g . 7Yeḛ tel kəmee gə́ gogo oom tɔɓəi yeḛ ɓarm ndá m’pana: Yḛ̀ m’aar nee. 8Ndá yeḛ dəjim pana: See m’to nawa. Ma m’tel m’ilá keneŋ m’pana: M’to gə́ Amalek. 9Yeḛ pana: Maji kam m’rəm pər gə́ rɔ neḛ’g m’tɔl neḛ mbata kəm neḛ ila neḛ nɛ n’isi kəmba ɓəi. 10Ma m’rəm pər gə́ rəa’g m’tɔlee mbata ma m’gər gao to gə́ yeḛ a tel si kəmba gogo el. Ma m’ɔr dɔgugu gə́ to dəa’g ləm, gə niŋga gə́ to jia’g ləm tɔ ndá m’ree ne nee mba kari-i, mbai ləm.
11Dabid wa kubuje gə́ rəa’g hao̰-hao̰ til ndá koso-dəwje lai gə́ d’isi səa kara ra togə́bè ya tɔ. 12Deḛ d’wa ndòo yoo ləm, no̰ ləma, d’ɔg meḛ dee ɓoo ləm tɔ saar kàrkemetag mbata lə Sawul gə ŋgonee Jonatan gə koso-dəwje lə Njesigənea̰ gə gel-bɔje lə Israɛl to mbata deḛ tɔl dee gə kiambas. 13Dabid dəji basa gə́ ree ɔr sor taje neelé pana: See i to dəw gə́ ra wa.
Yeḛ tel ilá keneŋ pana: Ma m’to ŋgolə dəw-dɔ-ɓee gə́ to gə́ Amalek.
14Dabid tel dəjee pana: See i ɓəl el ɓa un jii ɔrɔ ne rɔ yeḛ gə́ Njesigənea̰ wa dəa gə ubu lé ya aree wəi wa.
15Dabid ɓar dəw kára mbuna kuraje’g ləa ulá pana: Aw pər gə́ rəa’g tɔlee.
Dəw neelé aw unda dəw gə́ Amalek lé tɔlee ya tɔ. 16Tɔɓəi Dabid ulá pana: Maji kar ta məsi wa dɔi-i ya mbata ta gə́ teḛ tai’g ɓa gaŋgta dɔi’g. Mbata i nja pana: I tɔl yeḛ gə́ Njesigənea̰ wa dəa gə ubu lé.
Pa no̰ yoo gə́ Dabid ɔs wɔji ne dɔ Sawul gə Jonatan lé
17Aa ooje, pa no̰ yoo gə́ Dabid ɔs wɔji ne dɔ Sawul gə ŋgonee Jonatan ɓa nee ya. 18Yeḛ un ndia mba kar dee ndoo Judaje pa neelé. To pa gə́ wɔji dɔ ɓandaŋg ndá deḛ ndaŋgee mee maktub’g lə Njera nédanasur .
19Ai seḭ Israɛlje, njésiŋgamoŋje lə sí ya to naŋg dɔdərloo’g tereŋ kən!
Ŋga bao-rɔje yḛ̀ d’ɔm dee naŋg to gə́ ban wa.
20Maji kar sí paje taree
Gat’g el ləm,
Ilaje ne mbər sor taree
Rəwje gə́ Askalo̰ el ləm tɔ
Nà ŋgama̰dje gə́ ɓee gə́ Pilisti’g
D’a kal ne rɔ dee ləm,
Nà ŋgalə njélal kinja tamɔd deeje gə́ dené
D’a kun ne baŋga ləm tɔ.
21Mbalje gə́ Gilboa lé
Maji kar tàl əsé ndi oso keneŋ teŋ el ləm,
Maji kar ndɔje gə dɔ koje gə́ doŋgɔr
Gə́ to nékarje lé kara godo keneŋ ləm tɔ!
Mbata lé neelé ɓa
D’ɔm dərje gə́ bao-rɔje keneŋ ləm,
Dər lə Sawul ləm tɔ,
D’a kwa dee gə ubu gogo el ŋga.
22Məs deḛ gə́ d’iŋga doo ləm,
Gə ubu njésiŋgamoŋje ləm tɔ lé
Ɓandaŋ lə Jonatan tel gə gée el ləm,
Kiambas lə Sawul kara tel kari ba el ləm tɔ.
23Sawul gə Jonatan ndigi na̰
D’unda na̰ dan kəm na̰’d
Loo gə́ d’aw ne kəmba,
Ndá ndɔ kwəi lə dee kara
D’ya̰ na̰ el tɔ.
Rɔ dee wɔilɔ pélé-pélé
Unda niŋgatə̰dəje ləm,
Siŋga dee kara unda ka̰ toboḭje ləm tɔ.
24Seḭ ŋgama̰dje gə́ Israɛl,
Maji kar sí no̰je Sawul
Yeḛ gə́ to njekula kubu gə́ bḭ maji
Gə́ ndiri kas rɔ sí’g ləm,
Yeḛ gə́ tɔs né gə́ ra gə larlɔr
Dɔ kubuje’g lə sí lé ləm tɔ.
25See to gə́ ban ɓa bao-rɔje toso naŋg tereŋ-tereŋ dɔdərlooje’g lə sí bèe wa.
See to gə́ ban ɓa Jonatan to naŋg tereŋ dɔdərlooje’g lə sí bèe wa.
26Ma m’isi dan meeko̰’g mbata ləi-i,
Ŋgokɔm Jonatan!
I ra néje lai gə́ taa kəm rəgm,
Ndigi gə́ i ndigim lé maji dum ləm,
Ur dɔ ndigi gə́ ndigi denéje ləm tɔ.
27See to gə́ ban ɓa bao-rɔje toso wa.
See to gə́ ban ɓa nérɔje lə dee d’igi wa.
Currently Selected:
2 Samel 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.