2 Sôrta Gḭka Israɛlje 1
1
Sorta lə Salomo̰ gə́ to mbai gə́ Israɛl
1Salomo̰ gə́ ŋgolə Dabid lé ar ɓeeko̰ ləa to njaŋg ləm, Njesigənea̰ Ala nai səa ləma, undá tar ɗaŋg gə́ dəw gə́ boo ləm tɔ.
Salomo̰ dəji Ala kəmkàr
1Mb 3.4-15
2Salomo̰ ɓar Israɛlje lai ləm, gə ɓé-njérɔje gə́ tɔl-dɔg-dɔg (1.000) gə njérɔje gə́ tɔl-tɔl (100) ləm, gə njégaŋ-rəwtaje ləm, gə njékaa dɔ dəb ɓeeko̰je lə Israɛlje lai ləma, gə mbai dɔ gel-bɔje lə dee ləm tɔ. 3Salomo̰ aw gə koso-dəwje lai neelé na̰’d dɔ loo gə́ ndəw’d gə́ to Gabao̰. Lée gə́ neelé ɓa d’iŋga kəi-kubu-kiŋga-na̰ lə Ala gə́ Moyis, kura lə Njesigənea̰ ra dɔdilaloo’g lé keneŋ.
4Sa̰duk-manrɔ lə Ala kédé Dabid unee Kirjat-Yearim aw ne loo gə́ gɔl wɔji ne dəa mbata yeḛ ra kəi-kubu Jerusalem wɔji ne dəa ya . 5Lée gə́ neelé no̰ kəi-kubu-kiŋga-na̰’g lə Njesigənea̰ lé loo-nékinjaməs gə́ ra gə larkas gə́ Besalel, ŋgolə Uri gə́ to ŋgolə Hur ra lé to keneŋ tɔ.
Salomo̰ gə koso-dəwje dəji Njesigənea̰ ta keneŋ . 6Dɔ loo-nékinjaməs’d gə́ ra gə larkas gə́ to no̰ kəi-kubu-kiŋga-na̰’g lé ɓa Salomo̰ inja nékinjanéməsje gə́ ka̰ roo as tɔl-dɔg (1.000) ar Njesigənea̰ keneŋ. 7Loondul’g lé Ala teḛ dɔ Salomo̰’g ulá pana: Maji kari dəjim né gə́ i ndigi gə mba karm m’ari.
8Salomo̰ tel ila Ala keneŋ pana: I ra gə bɔm Dabid boo-némeemajije ndá i am m’o̰ ɓee toree’g. 9Ɓasinè Njesigənea̰ Ala, maji kar ndukun ləi gə́ i un ar bɔm Dabid lé aw lée’g béréré ya mbata i am m’o̰ ɓee dɔ koso-dəwje gə́ bula digi-digi’g d’asəna gə nduji naŋg bèe . 10Maji kari am kəmkàr gə gosonégər gə mba karm m’gər ne né gə́ kəm ra gə mba kɔr ne no̰ koso-dəwje gə́ neelé. Mbata see na̰ ɓa askəm gaŋg rəwta lə koso-dəwje ləi gə́ to koso-dəwje gə́ bula digi-digi neelé wa.
11Ala ula Salomo̰ pana: Mbata yee nee ɓa gə́ né gə́ to məəi’g mbata i dəji nébaoje gə némajije gə rɔnduba el nɛ i dəji kəmkàr gə gosonégər mba gaŋg ne rəwta dɔ koso-dəwje’g ləm gə́ m’ari o̰ dɔ dee lé 12ndá m’a kari kəmkàr gə gosonégər ya. Tɔɓəi m’a kari né gə́ raŋg dɔ’g ɓəi, nébaoje gə némajije gə rɔnduba gə́ mbai gə́ nɔḭ’g kédé iŋga togə́bè el ləm, yeḛ gə́ njekorè gooi kara a kiŋga bèe el ləm tɔ.
13Bèe ɓa Salomo̰ ḭ dɔ loo gə́ ndəw’d gə́ to Gabao̰, loo gə́ kəi-kubu-kiŋga-na̰ to keneŋ lé tel ree Jerusalem ɓa yeḛ o̰ ne ɓee dɔ Israɛlje’g ɓəi .
Siŋgamoŋ gə nébaoje lə Salomo̰
1Mb 10.26-29, 2SgI 9.25-28
14Salomo̰ mbo̰ pusuje gə njérɔ gə kundaje dɔ na̰’d, yeḛ aw gə pusu-rɔje lé tɔl-dɔg gə dəa tɔl-sɔ (1.400) ləm, gə njérɔ gə kundaje d’as tɔl-dɔg-loo dɔg-giree-joo (12.000) ləm tɔ, yeḛ ar dee d’isi mee ɓee-booje gə́ d’aw ŋgəm pusu-rɔje ləa keneŋ ləm, gə Jerusalem mbɔr mbai’g ləm tɔ . 15Mbai lé ar larnda gə larlɔr kara to Jerusalem yaa̰ asəna gə kɔri-mbalje bèe ləm, ar kag-sɛdrəje kara bula to gə́ kag-ɓɔlje taa ne loo pəl-pəl ndag-loo’g bèe ləm tɔ. 16Kundaje lə Salomo̰ lé d’ḭ sə dee Ejiptə gə Silisi, njérab-néndogoje gə́ wɔji dɔ mbai lé ɓa d’aw ndogo dee ree sə dee gə goo lar dee gə́ d’wɔji njaŋg togə́bè ya , 17deḛ d’ḭ gə pusu-rɔ kára Ejiptə ndá gadee as larnda tɔl-misa̰ (600) ləm, kunda kára ndá gadee as larnda tɔl-dəa-rɔ-mi (150) ləm tɔ. Deḛ ree sə dee togə́bè mbata mbaije lə Hetje lai ləm, gə mbata lə mbaije gə́ Siri kara ləm tɔ.
Salomo̰ wa dɔ gɔl rəa mba kunda kəi gə́ to gə kəmee
1Mb 5.15-32, 7.13-14
18Salomo̰ un ndia gə mba kar dee d’unda kəi gə ri Njesigənea̰ ləm, gə d’unda kəi-mbai gə mbata ləa-yeḛ ləm tɔ.
Currently Selected:
2 Sôrta Gḭka Israɛlje 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.