1 Timote 1
1
Lapia ləa
1Ma Pool, njekaḭkula lə Jeju Kristi gə goo torndu Ala Mbaikaji lə sí ləm, gə torndu Jeju Kristi, yeḛ gə́ j’unda meḛ sí yel gə́ dəa’g ləm tɔ lé 2m’ndaŋg maktub nee m’ar Timote, ŋgonəm gə́ gəd-gəd gin meekun’g. Maji kar noji, gə meekɔrjol, gə meelɔm gə́ ḭ rɔ Ala Bɔ síje’g ləm, gə rɔ Jeju Kristi Mbaidɔmbaije’g lə sí ləm tɔ lé nai səi .
Ta ndooje gə́ ŋgɔm ləm, gə Tagə́maji ləm tɔ
3Ma m’olé məəi dɔ ta gə́ ma m’ndəjii loo gə́ m’ḭ rɔi’g mba kaw Masedoinə ɓa m’ɔgi naŋg Epesə mba kari ndəji njé gə́ na̰je kar dee d’un ta ndooje gə́ raŋg ndoo ne mar deeje el ŋga ləm, 4mba kar dee reḛ́ dɔ suta’g gə mḭdé ba əsé dɔ ri ka dəwje gə́ gin dee tɔ dèm-dèm el ləm tɔ, mbata taje neelé ar tamaḭ oso mbuna dee’g ɓó ar kula lə Ala gə́ wɔji dɔ meekun lé ra tɔg gə́ kédé-kédé el. 5Gin ndukun ləm lé to mba kar nojimeenda ḭ dɔ maree’g gə goo takə̰ji gə́ maji gə́ ḭ meḛ dee’g ləm, gə goo meekun gə́ gəd ləm tɔ. 6Njé gə́ na̰je lal ra néje neelé ndá deḛ ndəm ne dɔ tamaḭje gə́ gə mḭdé ba. 7Deḛ ndigi to njétegginta godnduje kar mar deeje ya nɛ deḛ gər gin ta gə́ deḛ pa lé el ləm, ta gə́ deḛ pa kəgəgə-kəgəgə kara deḛ gər ginee el ləm tɔ.
8Jeḛ n’gər gao, godndu lé to maji mbata lə dəw gə́ ra née gə goo rəbee. 9Mbata jeḛ n’gər gao d’unda godndu lé mbata lə njera né gə́ gə dɔ najee el nɛ deḛ d’unda mbata lə njémeeyèrje ləm, gə njékɔsta-rəwje ləm, gə njékaiyaje ləm, gə njékɔs Ala rəwje ləm, gə njétɔl bɔ deeje gə ko̰ deeje ləma, gə njétɔl mar deeje ləm tɔ, 10gə mba kar néra dee gə́ to njékəmndaje ləm, əsé ram-dəwje ləm, əsé njéndogo dəwje ləm, əsé gə njéŋgɔmje ləm, gə njékusu dɔ rɔ deeje ləma, əsé gə dəw gə́ rara ɓa ɔs kankəmta rəw ləm tɔ lé a to raga pai-pai ya. 11Ta neelé aw na̰’d gə Tagə́maji lə Ala gə́ njḛgɔ-ronduba gə njemeemaji ləm, yee ɓa to Tagə́maji gə́ yeḛ ɔm jim’g mba karm m’ndoo dəwje ləm tɔ.
12Jeju Kristi, Mbaidɔmbaije lə sí gə́ am siŋgam lé m’rəa oiyo mbata yeḛ oom gə́ majikoji ɓa undam gə́ njekula ləa. 13Ma lé kédé m’to gə́ njekila ndɔl dəa’g ləm, gə njekula kəmee ndòo ləma, gə njera né gə́ ga̰gma̰d ləm tɔ. Nɛ yeḛ ar mée oso lemsé dɔm’g mbata né gə́ ma m’ra lé m’ra dɔ mbə’g loo gə́ ma m’nai gə́ njetaree gə́ tar ɓəi . 14Noji lə Mbaidɔmbaije lə sí tur dɔ loo mbata ləm-ma ar meekun gə meenoji gə́ ḭ rɔ Jeju Kristi’g lé taa ne rɔm pəl-pəl tɔ. 15Ta neelé to ta gə́ gəd ya ləm, to ta gə́ kəm kar nana kara taa ɔm mée dɔ’g jəb-jəb ləm tɔ: Jeju Kristi ree naŋg nee mba kaji njékaiyaje, nɛ ma nja m’to gə́ doŋgɔr lə dee. 16Nɛ yeḛ ar mée oso lemsé dɔm’g gə mba kar Jeju Kristi riba ne dɔ meekila ləa gə́ yeḛ ila dɔm-ma gə́ m’to gə́ doŋgɔr lə dee pərəg ləm, mba kwam gə́ nétɔji lə dee gə́ d’a gə kɔm meḛ dee dəa’g mba kisi gə kəməgə́ gə no̰ lé ləm tɔ. 17Yeḛ gə́ to Mbaidɔmbaije gə́ ləw-ləw ləm, gə njesi gə ləbee-ləbee gə nea̰ ləma, gə yeḛ gə́ dumkoo ləm tɔ, yeḛ ɓa to Ala kára ba kiao lé, maji kila riɓar dəa’g ləm, gə kula rɔnduba dəa’g ləm tɔ gə ləbee-ləbee saar gə no̰. Amen!
18Ŋgonəm Timote, ta gə́ m’tɔgi ne neelé to gə́ goo ta gə́ deḛ tegginee d’wɔji ne dɔi kédé lé to mba kar ta nee to kag gədi kari to ne bao-rɔ gə́ gəd ya ləm, 19kari aar dɔ meekun’g njaŋg gə goo takə̰ji gə́ maji gə́ to məəi’g ləm tɔ. Njé gə́ na̰je meḛ dee unda pudum dɔ takə̰ji gə́ maji’g neelé ar meekun lə dee ndii ne mán. 20Imene gə Aleja̰drə gə́ to mbuna dee’g lé ma m’ɔm dee ji Njekurai’g gə mba kar dee ndoo ne loo kila ndɔl el ŋga.
Currently Selected:
1 Timote 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.