1 Samel 8
8
Israɛlje dəji Samel mbai lə dee
1Loo gə́ Samel ɓuga mba̰ ndá yeḛ unda ŋganeeje ɓa gə́ njégaŋ-rəwtaje dɔ Israɛlje’g. 2Ŋgondəree ria lə Joɛl ləm, njekɔm’g joo ria lə Abija ləm tɔ. Deḛ to njégaŋ-rəwtaje mee ɓee-boo gə́ Beer-Seba. 3Ŋgalə Samel njaa gə goo rəw gə́ bɔ deeje njaa keneŋ el. Deḛ d’ya̰ rɔ dee dan kəmkəḭ’g ləm, deḛ taa nétɔstaje d’al ne dɔ rəwta gə́ gaŋg gə dɔ najee ləm tɔ. 4Ŋgatɔgje gə́ Israɛl lai mbo̰ dɔ na̰ ree d’iŋga Samel Rama. 5Deḛ d’ulá pana: Aa oo, i lé ɓuga mba̰ ləm, ŋganije kara njaa gə goo rəw gə́ i njaa keneŋ el ləm tɔ. Ndá ɓasinè maji kari unda mbai dɔ sí’g mba karee gaŋg rəwta lə sí to gə́ deḛ ra ɓee lə ginkoji dəwje gə́ raŋg lai bèe tɔ#TtG 17.14.
6Ta gə́ deḛ pa pana: Ar neḛje mbai mba karee gaŋg rəwta lə neḛje lé lel Samel el. Bèe ɓa Samel ra ne tamaji ta Njesigənea̰’g tɔ. 7Njesigənea̰ ula Samel pana: Maji kari aar gə koso-dəwje neelé dɔ taje lai gə́ d’a gə kulai’g lé ya. Mbata to i ɓa deḛ mbadi el, nɛ to ma ɓa deḛ mbadm gə mba kam m’o̰ ɓee dɔ dee’g el ŋga. 8Néje lai gə́ deḛ ra səm, un kudee mee ndəa gə́ m’ar dee d’unda ne loo mee ɓee gə́ Ejiptə teḛ saar ɓasinè lé deḛ d’ubam d’ya̰’m ndá d’aw ra né d’ar magəje gə́ raŋg ya, yee ɓa deḛ ra ne səi-i kara bèe tɔ. 9Maji kari oo ta lə dee ya nɛ ndəji ɓa ndəji dee kɔr ləm, ar dee gər né gə́ wɔji dɔ mbai gə́ a gə ko̰ dɔ dee lé ləm tɔ.
10Samel ndaji taje lə Njesigənea̰ lai ar koso-dəwje gə́ dəjee mbai lé ya. 11Yeḛ pana: Aa ooje, néje gə́ wɔji dɔ mbai gə́ a gə ko̰ dɔ sí lé ɓa nee: Yeḛ a twa ŋgan síje gə́ diŋgam kunda dee gə́ njékal pusu-rɔje ləm, gə mbuna njérɔ gə kundaje’g ləa ləm tɔ mba kar deḛ d’aḭ ne no̰ pusu-rɔ’g ləa. 12Yeḛ a kunda dee gə́ mbai dɔ dəwje gə́ tɔl-dɔg-dɔg (1.000) ləm, gə mbai dɔ dəwje gə́ rɔ-mi rɔ-mi ləm, yeḛ a kar dee to kura-kwɔsje ləa ləm, a kar dee to njékinjakoje ləa ləma, gə njékoo nérɔje ləa gə njéra néje gə́ mee pusu-rɔje’g ləa ləm tɔ. 13Yeḛ a twa ŋgan síje gə́ dené kar dee to njépodé néje gə́ ə̰də sululu ləm, gə njédiri-néje ləma, gə njékɔb-néje ləm tɔ. 14Yeḛ a taa dəb ndɔje lə sí gə dəb ndɔ-nduúje lə sí, gə kag-koiyoje lə sí gə́ maji dum kar kuraje ləa. 15Koje gə́ seḭ iŋgaje gə goo kandə néje gə́ seḭ dubuje ləm, gə mán-nduú gə́ seḭ iŋgaje gə goo miaa̰ gə́ seḭ manje ləm tɔ lé ndá, mee né gə́ dɔg’d lé yeḛ a taa təa kára mba kar kuraje ləa. 16Yeḛ a kar kuraje lə sí gə́ diŋgam gə njé gə́ dené tel to kea̰-yeḛje ləm, yeḛ a twa maŋgje lə sí gə mulayḛ̀je-je lə sí gə́ maji d’unda mar deeje mba ra ne kula ləa-yeḛ ləm tɔ. 17Nékulje lə sí dɔg ndá yeḛ a taa kára gə́ kea̰ ləm, seḭ ya kara a toje ɓər-kulaje ləa ləm tɔ. 18Mee ndəa gən lé seḭ a raje né wəl-wəl kɔmje ne ta dɔ mbai gə́ seḭ ya ɓa toje njékɔreje lé nɛ Njesigənea̰ a koo ndu no̰ lə sí el.
19Koso-dəwje d’ɔs mbi dee jigi d’udu dɔ ta’g lə Samel. Deḛ pana: Wai! Lé riri kara mbai a si dɔ sí’g ya. 20Bèe ɓa j’a to kasje ne na̰ gə ginkoji dəwje gə́ raŋg bèe ya tɔ. Mbai lə sí lé a gaŋg rəwta lə sí ləm, yeḛ a kɔr no̰ sí ləma, yeḛ a kwɔji loo-rɔje lə sí ləm tɔ.
21Loo gə́ Samel oo taje lai gə́ koso-dəwje pa lé ndá yeḛ tel ndaji taree ila mbi Njesigənea̰’g ya. 22Yen ŋga Njesigənea̰ ula Samel pana: Maji kari oo ndu dee ndá unda mbai dɔ dee’g ya.
Samel ula dəwje gə́ Israɛl pana: Ɔdje awje. Nana kara maji karee aw mee ɓee-boo’g ləa-ləa ya.
Currently Selected:
1 Samel 8: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
