1 Samel 3
3
Ɓar gə́ Ala ɓar Samel lé
1Samel, ŋgon basa lé ra kula lə Njesigənea̰ no̰ Eli’g. Mee ndəaje’g neelé Njesigənea̰ ula dəwje ta ta-ta el ləm, némḭdije kara teḛ ta-ta el ləm tɔ.
2Mee ndəa gə́ neelé, Eli to loo-tée’g ya. Nɛ kəmee un kudu to bibli aree oo loo njai el ŋga. 3Deḛ tɔl pərndɔ lə Ala el ɓəi ndá Samel to loo-tée’g mee kəi-kubu-si-Njesigənea̰’g, loo gə́ sa̰duk lə Ala to keneŋ lé. 4Yen ŋga Njesigənea̰ ɓar Samel ndá yeḛ ndigi təa’g pana: Oiyo yḛ̀ m’aar nee! 5Ndá yeḛ aḭ aw rɔ Eli’g ulá pana: Yḛ̀ m’aar nee, mbata i ɓarm.
Eli ilá keneŋ pana: Ma m’ɓari el. Tel aw to naŋg.
Ndá yeḛ tel aw to naŋg ya tɔ. 6Njesigənea̰ tel ɓar Samel gogo ya ɓəi. Ndá Samel ḭ aw rɔ Eli’g pana: Yḛ̀ m’aar nee, mbata i ɓarm.
Eli ilá keneŋ pana: Ŋgonəm, ma m’ɓari el. Tel aw to naŋg.
7Samel gər Njesigənea̰ el ɓəi ləm, ta lə Njesigənea̰ ya kara inja kəmee’g el ɓəi ləm tɔ.
8Njesigənea̰ ɓar Samel gɔl kára ya ɓəi, gə́ njekɔm’g gɔl munda ləa. Ndá Samel ḭ aw rɔ Eli’g pana: Oiyo, yḛ̀ m’aar nee, mbata i ɓarm.
Eli oo to gə́ Njesigənea̰ ɓa aw ɓar ŋgon neelé. 9Bèe ɓa yeḛ ula Samel lé pana: Ɔd aw to naŋg. Ɓó lé ɓari ɓəi ndá i a pana: Pata, Njesigənea̰, mbata kura ləi oo ndui ya.
Ndá Samel tel aw to loo-tée’g tɔ.
10Njesigənea̰ ree ɓaree to gə́ kédé lé ya ɓəi pana: Samel, Samel! Ndá Samel ndigi təa’g pana: Pata, mbata kura ləi oo ndui ya.
11Togə́bè ɓa Njesigənea̰ ula Samel pana: M’a gə ra né mee ɓee gə́ Israɛl kar nana kara gə́ a koo ndá mbia a kudu jigi karee si jiŋ. 12Mee ndəa’g neelé ta néje lai gə́ m’pa m’wɔji ne dɔ Eli gə dɔ njémeekəije ləa lé m’a kar dee d’aw lée’g béréré ya. M’a kun kudu ra ləm, m’a tɔl taree bém ləm tɔ. 13Ma m’ulá təsərə to gə́ m’a gə kar bo̰ néra njémeekəije ləa ɔs ta dee’g gə no̰ mbata yeḛ oo néra gə́ kərm-kərmje lə deḛ gər gao, to néra ŋganeeje gə́ ar dəwje d’ə̰ji dee ne gə́ kḛji nɛ yeḛ lal ndaŋg dee dɔ’g lé. 14Gelee gə́ nee ɓa ma man ne rɔm m’ar njémeekəije lə Eli to gə́ nékinjanéməsje əsé nékarje kara d’a kɔr ta néra gə́ kərm-kərm lə njémeekəije lə Eli lé dɔ dee’g pai godo.
15Samel to naŋg saar loo àr tɔɓəi yeḛ tɔr takəije lə Njesigənea̰. Samel ɓəl mba kɔr sor némḭdi lé kar Eli. 16Nɛ Eli ɓar Samel pana: Ŋgonəm Samel!
Yeḛ ndigi təa’g pana: Yḛ̀ m’aar nee!
17Eli dəjee pana: See ta ɗi ɓa Njesigənea̰ ulai wa. Maji kari iya səm dɔ né kára kara el. Ɓó lé i iya səm dɔ né kára dan mareeje’g ndá maji kar Ala ra səi nédɔkudu ya.
18Yen ŋga Samel ndaji tarje lai aree ɓó iya səa dɔ né kára el. Tɔɓəi Eli pana: Yeḛ to Njesigənea̰ ya. Maji karee ra né to gə́ mée wɔji.
19Samel ra tɔg. Njesigənea̰ nai səa ar taje ləa lai aw lée’g béréré ya. 20Koso-dəwje gə́ Israɛl lai gə́ un kudee Dan saar teḛ Beer-Seba lé gər to gə́ Samel to njetegginta lə Njesigənea̰ ya. 21Njesigənea̰ ree teḛ kəm dee’g Silo ta-ta. Mbata Njesigənea̰ riba dɔ rəa ar Samel loo gə́ Silo’g gə goo taje lə Njesigənea̰ lé ya.
Currently Selected:
1 Samel 3: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
