(Evangelio según San Juan) 1
1
Cristo chicham dekaskea nunak itauwai
1Yama nagkamtinig Chichamak aajakui, nu Chichama duka Apajuijai aajakui, nuigtush Chichama duke Apajuí aajakui. 2Nagkamtinish nigka Apajuijai pujujakui. 3Ashí wají aidauk ni najankamu ainawai, nunin asa makichkish ni najanachbauk atsawai. 4Niinig pujutash aajakui, nunú pujuta nu aentsun tsaaptinji aajakui. 5Nu tsaaptin suwe aidaunak tsaaptin awajsauwai, imatikamu asa suwea dushakam tsaptinnak depetkachajui.
6Aajakui makichik aents Apajuí awemamu, Juan daagtin, 7nigka tsaaptinun pachis etsegtukti tibau aajakui, nunú etsegtai ashí aents aidauk dekaskeapi titinme tabaunum. 8Juagkak tsaaptina nu aajakchauwai; ayatak tsaaptina nuna etsegtukti tusa awemamu aajakui. 9Nu dekas tsaaptin ashí aentsun tsaapmitkauwa nu, wamak ju nugka jui taatin asamtai.
10Nunú tsaaptinuk nugká akiinauwai, nuigtush nugkak ni najanamu aajakui; tujash nugkanmaya aidauk, juwapita Apajuí awemamuk tusag dekachaju ainawai. 11Niinu aidau batsatbaunum tauwai, tujash niinu aina duka dakitjajui. 12Dutikawagmataish ya aidauwa chichaman etsegtai shiig wakejus antugkag dekaskeapi tiaje, nu aidaunak Apajuí uchijí emakui, 13nunin asag Apajuí uchijí ainawai, aents wakegamunum akiintai aina nunin ainatsui, Apajuiyai akiinkaju asag.
14Nunú Chichama duka Aentsmaga akiina jutiijai wajumchik mijan pujusui. Nuna imanjig jutii wainkabiaji, Apajuí Uchijí makichkiuchia nu, wait anenkagtamuji nuigtú dekaskejishkam. 15Juan Jesusan pachis etsegtak: “Juuwai wi niina pachisan: Mina ukujui minitta nuuwai mina nagkaetasuk, wagki nigka wisha atsaig pujujakú asa” timayag duka, tiuwai.
16Wagki ashí niina imanjiya nuiyag pegkeg pujutak jukiuwaitji, shiig kuashat anentag wait anenjamjauwa dui. 17Apajuik chicham umiktina nunak Moisesai sujamsau aajakui, tujash wait anenkagtamu nuigtú dekaskea duka Jesucristui jukiuwaitji. 18Apajuinak makichik aentskesh tuke wainkachu ainawai, ni Uchijí makichkiuch Apajijai ijunag pujuwa nunú dekamtijamauwai.
Juan Yamijatin Jesucristo pachisa etsegtukbau
(Mt. 3.11-12; Mr. 1.7-8; Lc. 3.15-17)
19Juna Juan etsegkauwai, judío apuji aidau Jerusalén batsamsag sacerdote aidaun, levita aidaujai Juagkan iniasti niish yakita tusag ishitkajua dui. 20Nu aidau tusá iniam Juan ugmamtsuk etsegtumak:
—Wika Cristuchuitjai, tiuwai.
21Tutai ataktú iniinak:
—¿Tujash amesh yaitpa? ¿Eliaskaitam? tuidau.
Tama: Duchauwaitjai, tau. Tutai: —¿Profeta taatnai tibauwa dukaitam?
Tamashkam:
—Atsa, tiuwai.
22Tutai:
—¿Tujash amesh yaitpa? jutii awetabiagma nu ujakta tau asá dekatasa taji, ¿amesh yaitjai tumame?
23Tama Juan ayaak:
—Wika makichik chicham uwegshunum untsubau antuekatnai:
“Apu minitin jinta tutupit dakuektajum”, titinai tusa profeta Isaías tiuwa nuuwaitjai, tau.
24Fariseo aidau ujumak aents aidaun Juagkan iniasti tusa awemamu aidau, 25iniinak: —Ame Cristuchu, Eliaschau, profetakesh achayatkumesh ¿wagka aentsush yamiame? tuidau.
26Tiagtai Juan ayaak:
—Wika yumí yamijatjai, tujash atum ainajum anuiya awai makichik, duka atumek waintsugme, 27nigka duik nagkamas tuke pujuwaitak mina ukujui patatkawai. Wika niiya ibauchu asan ni sapatji jigkamunakesh atitmaitsujai, tiuwai.
28Ashí jujú aina duka Betábara Jordagka amain, Juan yamijatak pujamunum nunikui.
Apajuí Uwigji pachisa tibau
29Kashinia dui, Juan Jesusan wainkauwai, niina adijkatatus minittaman, nunik: “Diistajum, auwai Apajuí Uwigji,#1.29 Judío aidauk ditá tudaujin tsagkugnagtasag, tuké uwijá uchijin aishmagkun maa apejakú ainawai. Juan Jesusan pachis: “Juuwai dekas Apajuí Uwigji” tiuwa nunak, jutii tudaujin mantamnatin asamtai tiuwai. ashí aents nugkanmaya aidau tudaujin akikmak mantamnatta nunú. 30Juuwai wi niina pachisan: ‘Mina ukujui makichik aents minitta nuuwai mina nagkaetasu, wagki nigka wisha atsaig tuke pujujakú asa’, timag duka. 31Wikishkam niinash yaita nunak dekachiatkun yumí yamijatmajai, Israel aents aidauk ni wantintai dekaatnume tau asan”, tiuwai.
32Junashkam Juan: “Wakaní Pegkeji nayaimpinmaya pauma nunin wajas akaiki, Jesusai ekeemtatman wainkabiajai tusa etsegkauwai. 33Nuniakuish eke dekachbaijai niish yaita nunak; tujash yumí yamijatjata tusa awetiuwa nu chichagtak: ‘Wakaní Pegkeji akaiki yayai ekeemu wainkattame, nunú atatui Wakaní Pegkejijai yamijatjatnuk’, tujutmayi. 34Wika nuna wainkau asan, nigka Apajuí Uchijiyai tusan etsegtajai”, tiuwai.
Nagkamchak Jesusa jintintaiji aajakaju
35Kashinia dui, Juan ataktú jimag jintintaijijai wajai, 36Jesús nagkaemattaman wainak: —Diistajum, auwai Apajuí Uwigji, tau.
37Tutai jimag Juagká jintintai aidau antukag, Jesusan nemagkajui. 38Nunik miniagtatman Jesús ukujin ayampá diikmá wainak:
—¿Wají atumesh egagme? tau.
Tutai dita aiinak:
—Rabí (nunak maestro taku tawai), ¿tuwí pujame? tuidau.
39Tiagtai Jesús ayaak:
—Minitajum nunikjum wainkatajum, tau.
Tima ditashkam wegag ni pujamujin wainkajui, nunikag nuig juwakajui, a las cuatro tumain wegau asamtai.
40Jimaja nuiya Juan tabaun antuk Jesusan nemagkajua duka Andrés, Simón Pedro yachiya nu aajakui. 41Andrés Jesusan wainak dekatkauk ni yachi Simogkan wejí:
—Yamaik Mesías wainkaji, tusa ujakui. (“Mesías” tawa nunak “Cristo” taku tawai.)
42Tusa Simogkan juki Jesús pujamunum ejegauwai, dutikamtai Jesús wainak, chichajak:
—Amek Simogkaitme, Juagká#1.42 “Juan” tawa nunak Simón Pedro apajin tawai tikich versión aina nuig, nuna imá Reina Valeraya duke Jonás tawai. Mt. 16.17 Jonás tawai Simón Pedro apajin. Nuniau asa pachimtakan tuinawai, tujash initaik manuscrito griego agagbau aina nuig Juan tau asamtai, aikasaik ukuaji. uchijí, tujash yamaik amek Cefas#1.42 “Cefas” tawa nunak arameo chichamnum kaya taku tawai. Tuja Pedro tawa dushakam griego chichabai kaya taku tawai duka diistá Mt. 16.18. atatme, tiuwai. (Cefas tawa nunak Pedro taku tawai.)
43Kashinia dui, Jesús Galilea wekamá Felipen igkug, chichajak:
—Nemagtukta, tiuwai.
44Felipek betsaidanmaya, Andrés Pedro aina nuna yaaktajiya nuiyag niish aajakui. 45Felipeshkam Natanaelan ujaktatus weuwai, nunik: —Jesús nazaretnumia, José uchijí wainkamji, niina pachis Moisés chicham umiktinnum agajua nu, nuigtú profeta aidaush dutiksag agajajua nu, tau.
46Tama Natanael chichaak:
—¿Nazaretnumiash makichik pegkejash jiinmainkaih? tau.
Tutai Felipe ayaak:
—Dekas wemí amesh wainkamnum, tiuwai.
47Tima Natanael Jesús pujamunum jegantatus wetatman ikaag wainak:
—Ju mina juuwai dekaskenum Israel aents, tsanumtanash tsanumchauwa nu, tau.
48Tama Natanael ayaak:
—¿Tuwí minash waitkamume? tau.
Tutai Jesús ayaak:
—Eke Felipe tajutjama ujapatsaig, higuera wakentin pujamin wainkamjame, tiuwai.
49Tama Natanael ayaak:
—Rabí, amek Apajuí Uchijiyaitme, ametme Rey Israeldau, tau.
50Tama Jesús ayaak:
—¿Higuera wakentin pujamin wainkamjame taja duikik, dekaskeapi tujutam? juna nagkaesau wají aidau wainkattame.
51Tusa nuigtú chichaak:
—Dekas tajime, Atumek nayaim ujanmatai Apajuinu ángel aidau Aentsmaga akiinauwa nuwi taa waketuidau wainkatin ainagme, tiuwai.
Currently Selected:
(Evangelio según San Juan) 1: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.