Gálatas 1
1
Ri Pablo cuya pan rutzil quiwach ri hermanos e c'o Galacia
1Ri'in in Pablo, in utako'n ri Dios. Na e ta c'u juna ticawex takayom lo we, na e ta juna achi cojoyom we; ma e ri Kanimajawal Jesucristo y e ri Kakaw Dios, ri Jun xuc'astajisaj lo Ruc'ajol chiquixo'l ri ecaminak. 2Junam c'u cuc' conoje ri hermanos e c'o wara wuc', cantz'ibaj pan wa carta chique riglesias e c'o che ri luwar re Galacia. 3C'ulu c'u alak ri unimal rutzil c'u'xaj y ri utzil chomal re ri Kakaw Dios y re ri Kanimajawal Jesucristo, 4ri xuya rib pa camic ruma ri kamac. Xu'an wa' ma e xraj ri' ri Kakaw Dios che cha' jela' cojresaj lo che ronoje ri na utz taj caqui'an ri winak chupa tak wa k'ij oj c'o wi. 5Kayaca c'u uk'ij ri Kakaw Dios wak'ij ora y chikawach apanok na jinta chi utakexic. Amén.
Xa jun ri Utzilaj Tzij re ri Dios
6E ri'in lic cacam wanima' che ma na jampatana xya can alak ri Dios, ri xusiq'uij alak ruma ri unimal rutzil uc'u'x ri Cristo, yey ec'u wo'ora e takem alak jun c'utunic junwi chwa ri Utzilaj Tzij re ri Cristo. 7Wa' na e ta que'elawi c'o juna chic Utzilaj Tzij puwi ri Cristo. Pero e c'o jujun xa caquisachisaj na'oj alak y e cacaj caquijalc'atij ri Utzilaj Tzij re ri Cristo. 8Tob ne junok chike ri'oj o juna ángel re chila' chicaj cutzijoj juna chic c'utunic che alak junwi chwa ri Utzilaj Tzij katzijom chi ri'oj che alak, peta c'u ri' ri k'atbal tzij re ri Dios puwi'. 9Jela' pacha' ri nubi'im lok, cambi'ij tanchi wo'ora: We c'o junok cutzijoj juna chic c'utunic junwi chwa ri Utzilaj Tzij tom chi alak, peta c'u ri' ri k'atbal tzij re ri Dios puwi'.
10¿E neba cantzucuj ri'in ri yacbal nuk'ij chiquiwach ri ticawex o e cuaj can'an janipa ri caraj ri Dios? ¿E neba cuaj ri'in quinel chi utz chiquiwach ri ticawex? We ta ri'in xa e cantzucuj ri cayac nuk'ij cuma ri ticawex, ri' na in ta sakil aj chac re ri Cristo.
Ri Utzilaj Tzij xtzijox ruma ri Pablo
11Cheta'maj c'u alak hermanos: Ri Utzilaj Tzij cantzijoj ri'in na xa ta uch'a'tem juna achi, 12na e ta juna achi xya'w chwe y na che tane juna achi xinmaj wi wa'; ma e ri Kanimajawal Jesucristo xk'alajisan chwe.
13Tom chi c'u alak puwi ri nubinic nusilabic ojertan echiri' nutakem tak ri cojobal que raj judi'ab; ruc' c'ax xebenuternabej rutinamit ri Dios ri quicojom rubi' ri Cristo y lic xintij uk'ij cansach quiwach conoje. 14Chiquixo'l ri wachbi'il junam oj q'uiyinak lok, in ri lic xinya wib che utakexic tak ri cojobal que can ri kati'-kamam ri oj aj judi'ab. 15Na ruc' ta c'u ri', ri Dios xinucha' lo ri'in echiri' c'amaja' ne quinalaxic, xinusiq'uij ruma ri unimal rutzil uc'u'x 16y xuk'alajisaj uwach Ruc'ajol chwe cha' e cantzijoj ri Utzilaj Tzij chique ri na e ta aj Israel. Yey puwi wa' na xintz'onoj tane nuna'oj che juna ticawex.
17Na xin'ec tane Jerusalem re quebe'nuwila ri ebu'anom tako'n nabe chinuwa ri'in. Ri xin'ano, e xin'ec Arabia y c'a tec'uchiri' xintzelej tanchi Damasco. 18Xic'ow na c'u oxib junab echiri' xintzelej Jerusalem re canweta'maj uwach ri Pedro y xinc'oji' chila' ruc' wo'lajuj k'ij. 19Yey na xinwil ta quiwach ri jujun chic e tako'n; xew xinwil uwach ri Jacobo, ruchak' ri Kanimajawal. 20Chwach c'u ri Dios cambi'ij che alak: Wa cantz'ibaj pan che alak lic katzij, na rak'ubal taj. 21Tec'uchiri' xin'ec tanchi che tak ri luwar re Siria y re Cilicia. 22Chupa tak la' la k'ij, ri hermanos re riglesias e c'o Judea c'amaja' ne caqueta'maj nuwach ri'in, 23xew quitom cabi'xic: «E rachi xojuternabej ruc' c'ax ruma kacojom rubi' ri Kanimajawal, wo'ora catajin che utzijoxic ri Utzilaj Tzij, yey e ne rire ri lic xraj cusachisaj uwach wa'.» 24Wuma c'u ri'in ri hermanos e aj Judea lic xquiyac uk'ij ri Dios.
Currently Selected:
Gálatas 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.