2 Pedro 1
1
Ri Pedro cuya pan rutzil quiwach ri quicojom rubi' ri Cristo
1Ri'in, Simón Pedro, in jun aj chac y tako'n re ri Kanimajawal Jesucristo. Cantz'ibaj pan wa carta che alak, janipa ri ya'tal che alak cacubi' c'u'x alak ruc' ri Cristo jela' pacha' ka'anom ri'oj. Wa' wa chomilaj cubulibal c'u'xaj xya' chike konoje ruma ri ka Dios y Colobenel Jesucristo, ma Rire lic jusuc' ri cu'an kuc'. 2E lic q'uiyar na pawi' alak ri unimal rutzil c'u'xaj y ri utzil chomal re ri Dios, yey wa' cac'ul alak ruma eta'am alak uwach ri Dios y ri Kanimajawal Jesucristo.
Ri caraj ri Dios che ri kabinic kasilabic
3Ri Dios ruc' ri unimal uchuk'ab, uya'om chike ronoje tak ri cajawax che ri kac'aslemal y ri kabinic kasilabic chwach Rire. Yey cu'an wa' ruma ri xuya chike caketa'maj uwach Rire, ri xojusiq'uij ruc' ri unimal uchomalil y ri unimal uwach uk'ij. 4Jec'uri'la', ri Dios uya'om nima'k y chom tak bi'tisinic chike cha' ruma wa' coju'ana pacha' Rire, ma elinak lo alak puk'ab ri rayibal na chom ta uwach, ri caquitakej ri winak re ruwachulew.
5Ruma c'u xcubi' c'u'x alak ruc' ri Cristo, chirajawaxic c'u ri' cachuk'ubej ib alak cha' ri binic silabic alak cu'an lic jusuc'. Y na xew ta wa', ma lic ne chirajawaxic queta'maj alak sa' ri caraj ri Dios che alak. 6We eta'am chi c'u alak sa' ri caraj ri Dios che alak, e 'ana alak ri'. Yey chajij ib alak chi utz cha' na catzak ta alak pa mac, y jec'uri'la' cac'oji' unimal c'u'x alak. Yey ruc' c'u ri unimal c'u'x alak, e c'utu alak pa sakil wi ya'om ib alak che jun sakil binic silabic chwach ri Dios. 7Y ruma c'u lic ya'om ib alak che jun sakil binic silabic chwach ri Dios, c'ax na'a ib alak chiwach alak. Yey na xew ta wa', ma lic ya'a ib alak che uc'utic ri rutzil c'u'x alak chique conoje.
8Ma we c'o c'u tak wa' uc' alak y ya'om ib alak che u'anic tak wa', ri' na coc ta xepuyil uc' alak yey cak'alajin c'u ri' lic c'o cutikoj ri xeta'maj alak uwach ri Kanimajawal Jesucristo. 9No'j e junok na jinta tak wa' ruc', ri' e pacha' xew caril ri c'o chwach; e junam ruc' pacha' juna potz', ma xic'ow ne chuc'u'x e rojertan lic aj mac yey e ri Dios xcuyuw umac. 10E uwari'che hermanos, cambi'ij wa' che alak: E ri Dios xcha'w e alak yey e Rire siq'uiyom e alak. Ruma c'u ri', chuk'ubej ib alak che uc'utic pa ri binic silabic alak, pakatzij wi siq'uim alak yey cha'tal alak ruma ri Dios. We ca'an alak wa', ri' na catzak ta chi alak pa mac. 11Jela' c'u ri' lic cac'ul alak chi utz pa ri takanic na jinta utakexic re ri Kanimajawal y Kacolobenel Jesucristo.
12Ruma c'u ri', na canwok'otaj ta ucuxtaxic wa' che alak, tob ne eta'am chi alak wa K'ijsak y jiquibam chi c'u'x alak che. 13Ma chinuwach ri'in, xalok' c'a in c'aslic, lic usuc' cancoj pa jolom alak tak wa pixabanic. 14Ma weta'am ri nucamic xa nakaj chi c'o lo wi, yey wa' e ri Kanimajawal Jesucristo uk'alajisam lo chwe. 15E uwari'che lic inoquinak il che ucuxtaxic wa' che alak, cha' echiri' na in jinta chi uc' alak, xaki cac'un chic'u'x alak ronoje wa'.
Ri xebilow runimal uwach uk'ij ri Kanimajawal Jesucristo
16Ma ri c'utunic xka'an chiwach alak chwi ruchuk'ab y ruc'unibal ri Kanimajawal Jesucristo, na e ta ruc' nuc'um ch'a'tem no'jital cuma ticawex; ma lic ruc' ri kawach xkil runimal uwach uk'ij Rire. 17Ma ri'oj xkilo echiri' xk'alajisax runimal uchomalil y lic xyac uk'ij ruma ri Kakaw Dios. Xkata ne rukul ri Dios xch'aw chupa ri chomilaj k'ijsak c'o pakawi', jewa' xubi'ij: «E Nuc'ajol wa', ri lic c'ax canna'o y lic quinqui'cot che» xcha'. 18Xkata c'u wa kulaj petinak chila' chicaj echiri' oj c'o ruc' Rire chwa ri santowilaj juyub.#Mt. 17:1-8; Mr. 9:7; Lc. 9:35 19Wa xkilo e cujiquiba' uwach ri tzij tz'ibital can cuma ri k'alajisanelab chupa Ruch'a'tem ri Dios. Y lic utz ri ca'an alak we coc alak il che wa', ma e pacha' juna ak' cawon pa k'eku'm c'a pa ri sakribal echiri' quel lo ri nimalaj ch'umil re ri sakribal.#Ap. 22:16 Wa' e que'elawi ruc'unibal ri Cristo, ri cutzij upa ri anima' alak. 20Lic c'ut chirajawaxic nabe na camaj alak usuc' wa': Ri tz'ibital can chupa Ruch'a'tem ri Dios, na utz taj cak'alajisaxic xa ruc' una'oj juna achi. 21Ma ri k'alajisam can chupa Ruch'a'tem ri Dios, na petinak ta ruma quino'jibal ticawex, e petinak ruma ri Santowilaj Ruxlabixel ri Dios. Ma tak ri santowilaj achijab re ri Dios xech'a'tic e chirij janipa ri xuk'alajisaj ri Ruxlabixel ri Dios chique.
Currently Selected:
2 Pedro 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.