1 Tesalonicenses 1
1
Ri Pablo cuya pan rutzil quiwach ri hermanos e c'o Tesalónica
1Ri'in Pablo cuc' ri wachbi'il Silvano y Timoteo cakatak bi wa carta che alak, ri alak re riglesia c'o Tesalónica, alak re ri Kakaw Dios y re ri Kanimajawal Jesucristo. C'ulu c'u alak ri unimal rutzil c'u'xaj y ri utzil chomal re ri Kakaw Dios y re ri Kanimajawal Jesucristo.
Ri Pablo catioxin chwach ri Dios ruma riglesia c'o Tesalónica
2Lic xaki cojtioxin chwach ri Dios uma onoje alak echiri' caka'an orar pawi' alak. 3Xaki e c'o alak chikac'u'x chwach ri Kakaw Dios ruma ri catajin alak che uc'utic ruc' ri cubulibal c'u'x alak y ri rutzil c'u'x alak, yey ruma na ok'otam ta c'ana alak ri cubul pan c'u'x alak che ruc'unibal ri Kanimajawal Jesucristo.
4Hermanos, ri lic c'ax cana' alak ruma ri Dios, ri'oj keta'am ralak alak cha'tal ruma Rire. 5Ma echiri' xkatzijoj ri Utzilaj Tzij che alak, na xkatzijoj ta xa ruc' kach'a'tem ri'oj, ma e xkatzijoj ruc' ruchuk'ab ri Santowilaj Ruxlabixel ri Dios; yey ec'u ri' Rire xujiquiba' uwach lic katzij ri xkatzijoj. Ralak eta'am alak chi utz sa' ri kabinic kasilabic echiri' xojopon chixo'l alak, ma ronoje ri xka'ano, xka'ano re to'bal e alak.
6Ec'u ralak e lic xc'am alak re ri kabinic kasilabic ri'oj y rubinic usilabic ri Kanimajawal. Yey tob ne xc'ul alak ri Utzilaj Tzij chupa unimal c'axc'obic, chupa ri anima' alak c'o ri qui'cotemal cuya ri Santowilaj Ruxlabixel ri Dios. 7Wa' wa x'an alak e jun c'utubal chiquiwach conoje ri hermanos quicojom rubi' ri Cristo, ri e c'o chupa tak ri luwar re Macedonia y re Acaya. 8Ruma c'u ri x'an alak xe'ec utzijoxic Ruch'a'tem ri Kakaw pa tak ronoje luwar, na xew ta Macedonia y Acaya. Ma pa uq'uiyal luwar catataj wi ri cubulibal c'u'x alak ruc' ri Dios, y jec'ula' na cajawax ta chi cakatzijoj chiquiwach ri jujun chic ri xu'an ri Dios uc' alak. 9Ma e ne rique caquitzijoj ri utzilaj kac'ulic x'an ralak yey su'anic xok'otaj can alak ri quilok'nimaxic tak ri tiox cha' e calok'nimaj alak ri Jun pakatzij wi e Dios c'aslic. 10Yey caquitzijoj e oye'em alak ri Jun cape chila' chicaj, wa' e ri Jesús Ruc'ajol ri Dios, ri xc'astaj lo chiquixo'l ri ecaminak. Yey Rire cojucolobej che ri k'atbal tzij re ri Dios catajin lok.
Currently Selected:
1 Tesalonicenses 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.