El Apocalipsis 1
1
Attho Yomporpaꞌ gatyesan Poechemer Jesucristo
1Añ ñoñets ñeñthpaꞌ attho Yomporpaꞌ gatyenan Poechemer Jesucristo, allochñapaꞌ ñachña eñotatyeseꞌ allowen ñeñth thorraꞌyetsa Yomporekop. Ñeñthchaꞌ eñotatanetpaꞌ ñeñthpaꞌ ñeñthchaꞌ awen ateth perra amaꞌt esempo. Attho eñotaten na, ñapaꞌ awoꞌt moeñon poꞌmhllañotheñer, allochñapaꞌ ñach negatyeseꞌ na ñeñthen sochetsa Juan ñeñthen thorretsa ñokop, allochñapaꞌ atthoch eñoch ñamha allowen ñeñth thorraꞌyetsa Yomporekop. 2Tharroꞌmar napaꞌ nach eñotatawet allowenet ñeñth eꞌñe poꞌñoxh ñeñth ateth eñotatenen Yompor poꞌñoñ ñamha ora ñeñth allpon eñotatenen Jesucristo amaꞌt ñamha ñeñth ora allpon gatyennet.
3Atarrchaꞌ kosheñtsoꞌtsen ñeñthchaꞌ lleyateneꞌ acheñeneshaꞌ añ ñoñets ñeñth wetsa Yomporeshoth ñeñth yeñotateneꞌ ñeñthchaꞌ ateth perra esempo. Atarrchaꞌ kosheñtsoꞌtsaꞌyen ñamha allowen ñeñthchaꞌ eꞌmhñoteneꞌ añ ñoñets ñamha eꞌñech ayemoetpoꞌ enteñet, ora allpon ñoñets ñeñth akellkareth arr. Tharroꞌmar oꞌ xhapmoch allempoch etsotwerra añ ñoñets.
Attho Juanpaꞌ kellkan kanxherr ñeñth anetser all apxhaꞌyena allowen ñeñth ameꞌñenaya Cristo
4-5Napaꞌ oꞌch nekellkonas carta allowenakpas ñeñthes apxhaꞌyetsa eꞌñe sameꞌñeñoth Yompor all ñeñth poꞌpoñeꞌttsokma anets ñeñth kanxherr ñeñth Asioꞌtsaꞌyen. Eꞌñe newomhchaꞌteñothespaꞌ oꞌch notas: Yomporepaꞌchña semoeraya epoet ñamha Poekamkëñ epoet ñamha Poechemer ñeñth Jesucristo. Ñetepaꞌchña sebensareꞌtampeneꞌ. Añ ñeñthara Yompor ñeñth xhokma eñall, amaꞌt awathotheñ xhokma eñall ñamha ñeñthara ñeñthchaꞌ werrtsa poꞌpocheño. Ñamha Poekamkëñ ñeñthpaꞌ ñeñthara kanxherr ñeñth sherbhaꞌyets eꞌñe all poꞌkonaño eꞌñe poꞌpoñeꞌttsokma sherbenet. Ñamha ñeñthara Jesucristo ñeñth atarr ayemoetpoꞌ yenten ñeñth ora allpon ñeñth eñotateney; ñamha ñeñthara Jesucristo ñeñth ñanom tanterrtsa poerromñoth ñapaꞌ amach alla rromoerreꞌthe. Atthoña paꞌmhchaꞌtarether peñ allowen amaꞌt allowen amhchaꞌtarethexhno añe patsro. Yaꞌyeꞌchoxhtatoñepaꞌch ñeñthara Jesucristo ñeñth atarr amorrentña, eꞌñe ña poemorrenteñotheypaꞌ atthoña rroma yokop allochñapaꞌ atthoch ashatarethta poꞌrras eꞌñe yokop allochñapaꞌ atthoch eꞌñe eꞌshowarethterra yoꞌchñar. 6Ñamha ñapaꞌ atthoña eꞌñe kowen agëney atthochña yaꞌmhchaꞌtarethtapretera atthochña yesherbhapreterrñañ Pompor ñeñth atarr Parets, atthey ñerraꞌmrratheꞌ ñeñth korneshatets Partsokop. Aꞌkowentaterrapoꞌch Jesucristo, amhchaꞌtarethtepaꞌch thayotheñ amaꞌt errponowañen. Ñeñthpaꞌ atthetepaꞌch Yompore.
7Oꞌch sekweñ werrach Cristo, oschaꞌ aꞌswatamperreꞌ. Amaꞌt allowen acheñeneshaꞌpaꞌ entwapoeretchaꞌ eꞌñe paꞌklloyothet. Amaꞌt ñeñth pataꞌteꞌpaꞌ entwapoeretchaꞌ ñamet. Allempoña ñeñth shonteꞌ paꞌnamen acheñeneshaꞌ ñeñth yexhaꞌyetsa arr patsropaꞌ yaꞌnaꞌtapoeretchaꞌ eꞌñe poellkëñothet. Ñeñthpaꞌ eꞌñech ateth perra.
8Yompor ñeñth nanak Parets ñeñth Yepartseshar yepen ñapaꞌ xhokma eñall, amaꞌt awathotheñ xhokma eñall, ñeñthpaꞌ ñeñthara ñeñthchaꞌ werrtsa poꞌpocheño. Ñapaꞌ atethña ot: “Napaꞌ eꞌñe paꞌmothrotheñ eñallen atthen ñerraꞌmrratheꞌ kellek A ñeñth paꞌmother pen alfabeto. Allempotheñña napaꞌ xhokma eñallen esempowañenchaꞌ wañerr ñeñth allpon eñall, napaꞌ atthen ñerraꞌmrratheꞌ kellek Z ñeñth all poen alfabeto.” Añpaꞌ allowa ñeñth ateth tomaꞌntatena Cristo.
Attho Cristopaꞌ orrtana Juan eꞌñe poꞌkowenteñoth
9Theꞌ napaꞌ ñeñthen sochetsa Juan oꞌch alla noterrserr. Napaꞌ ñeñthen eꞌñe semoꞌnasheñ sephowenen sa. Napaꞌ ñeñthen semoeroxhtapretenaya eꞌñe yameꞌñeñoth Jesús. Ñamha eꞌñe yeyemteñoth ñapaꞌ eꞌñech akopha es yaꞌwanten eshekchaꞌ yaꞌmhchaꞌtarethtapretera. Ñewa, napaꞌ oꞌch neñotatas ñeñth ateth nepena na arr. Awañmoꞌcha napaꞌ eꞌñe neserrpareꞌteñoth Yompor poꞌñoñ ñeñth ateth eñotatenen Yepartseshar Jesucristo, añña ñeñth neꞌmoñeꞌteneꞌpaꞌ oꞌ waporeꞌtennetaꞌ arr atarr allaphar all rroxhpeꞌchañethollo ñeñth otenet Patmos. 10Pamtharr allempo xhapaꞌmoen añe yethro allempo xhokma yeyerpoeña Yompor napaꞌ neyerpoeñoth ñapaꞌ eꞌñe machayotha chorratna womenk Yompor Poekamkëñ. Allempoñapaꞌ machayotha neꞌm ñoñets wapa nechaꞌñoth. Atarr womenk eñen ateth ñerraꞌmrratheꞌ poktor eꞌmorrtetsa womenk. Ñeñthpaꞌ ateth oten añ ñoñets:
11—Napaꞌ ñeñthen ñanom eñallen, allempotheñña napaꞌ xhokma eñallen amaꞌt esempowañenchaꞌ wañerr ora allpon ñeñth eñall, napaꞌ atthen ñerraꞌmrratheꞌ kellek A ñeñth ñanom wetsa alfabetoth, arrowa all wañen alfabeto ñeñth yoten Z. Theꞌ napaꞌ oꞌch notaph ñeñth ora allpon ñeñthchaꞌ negatyesaph añ poktetsa oꞌch pekellkaꞌyes pepaphllo allothpaꞌ oꞌch pemñe all anetsoxhno ñeñth kanxherr ñeñth apxhaꞌyetsa all paꞌnamen anetso ñeñth ameꞌñetsa. Ñeñth ñanom añ paꞌsoꞌcheñ Efeso, allothpaꞌ Esmirna, allothpaꞌ Pérgamo, allothpaꞌ Tiatira, ñamha Sardis, ñamha Filadelfia, allothpaꞌ ñamha Laodicea. Ora añexhno anetspaꞌ ñeñth Asioꞌtsen.
12Allempoña neꞌmoen ateth ñoñetspaꞌ nañapaꞌ neptallsa oꞌch neñch eseshaꞌtheꞌ neꞌñoranaꞌtenaya. Allñapaꞌ nent kanxherr ñeñth all orratenet werare allo xhoyoꞌtenet ñeñthpaꞌ oro ayexhkatareth. 13Eꞌñe rroxho ñeñth kanxherr all orratenet werare all orrtena poesheñarr yakma ñeñthpaꞌ Jesucristo ñeñthara Ñeñth Acheñetosets. Ashtamath, paꞌshtampaꞌ eꞌñe xhen paꞌtkowa. Achanareth, poꞌchanarpaꞌ orotommoen ñeñth allo chanena poesomapo. 14Poñoth poeꞌchpaꞌ eꞌñe ora atarr wallamaꞌth ateth ñerraꞌmrratheꞌ carnero poeꞌch ñeñth eꞌñe wallamaꞌth. Amapaꞌ oꞌch not poeꞌchpaꞌ eꞌñe ora wallamaꞌth ateth ñerraꞌm seneth ñeñth otenet nieve ñeñth atarr wallamaꞌth. Paꞌklleꞌpaꞌ atarr poptena ateth ñerraꞌmrratheꞌ tsoꞌ poꞌworter nanak aꞌrrechatañ. 15Paꞌtakpaꞌxhoꞌña atthekma poptena ateth ñerraꞌm aser yachamoen. Allempo eñorena eꞌñe ateth eꞌmorrtena poꞌñoñ ateth ñerraꞌmrratheꞌ shonteꞌ oñ atarr womenk maꞌmoreten. 16Pot poꞌkowenrothpaꞌ orrenan kanxherr ranto. Poenamothpaꞌxhoꞌña all orrtena kochell ñeñth emoshemhtoꞌmar etsotañtatareth. Ora paꞌtsaꞌpoth eꞌñe ateth poptena ñerraꞌmrratheꞌ atsneꞌ atarr womenk aꞌrrechatañ.
17Allempo neñchpaꞌ eꞌñe nemhchaꞌnaꞌteñothpaꞌ nañapaꞌ oꞌ nerrmosa patso eꞌñe paꞌtko. Neyorñothpaꞌ ama nepelleno amaꞌt mamesha, xha nottena ñerraꞌmrratheꞌ xho nerromoen. Tharraña ña pototh poꞌkowenroth aꞌphllaꞌn, oten:
—Amach pemhchaꞌtatsto, napaꞌ ñeñthen ñanom eñallen, allempotheñña napaꞌ xhokma eñallen amaꞌt esempowañenchaꞌ wañerr ora allpon ñeñth eñall. 18Napaꞌ ñeñthen ama arromñatheshayayno. Amaꞌt nerromwa awaña tharraña theꞌpaꞌ oꞌ alla nokrrerra, amach alla nerromoerreꞌthe amaꞌt awatha. Ñamha napaꞌ nechen llave, ñeñth newamenk nepen alloch pomnaren nepen rromoeñets ñamha ñeñthchaꞌ agërreꞌ allowen ñeñth rromoets. 19Theꞌ phokoppaꞌ añ poktetsa oꞌch pekellkaꞌyes ora ñeñth allpon oꞌ negatyeseph ñamha allpon ñeñthchaꞌ negatyerrperr ñeñthchaꞌ ateth perrtsa esempowañen. 20Ñewa, theꞌpaꞌ oꞌch neñotataph ñeñth ateth tomaꞌntena añ kanxherr ranto ñeñth penten eꞌñe nototh nekowenroth ñeñth ama eñotenayeꞌ penteno. Ñeñth kanxherr rantopaꞌ añ tomaꞌntena ñeñth kowampesyenawet ora allowen ñeñth nameꞌñaꞌyenaya allemeñ ñeñth kanxherr anetso ñeñth apxhaꞌyetsa all. Ñamha ñeñth ateth pent ñeñth ayexhkatareth oroch all orratenet werare, ñeñthpaꞌ añ tomaꞌntena ora allpon ñeñth apxhaꞌyetsa allemeñ anetso ñeñth kanxherr ñeñth nameꞌñaꞌyenaya.
Currently Selected:
El Apocalipsis 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.