Filemón 1
1
Attho Pablopaꞌ kellkan carta Filemónakop
1Oꞌch, masheñe Filemóna, nekellkonaph añ carta, na Pablon epan masheñ Timoteo. Napaꞌ oꞌ yottampennet eꞌñe neserrpareꞌteñoth Cristo Jesús poꞌñoñ. Theꞌpaꞌ oꞌch masheñe yewomhchaꞌtaph pha ñeñtheph atarr yemorrentena ñeñtheph atarr yethorrapretenaya Yomporekop. 2Oꞌch yewomhchaꞌteñ ñamha allowen ñeñth pameꞌñeñothet xhokma apxhenet pepakllo. Ñamha oꞌch yewomhchaꞌteñ yoxh Apia ñamha masheñ Arquipo ñeñth nanak yethorrapretenaya ñamha Yomporekop. 3Eꞌñe newomhchaꞌteñothes sapaꞌ napaꞌ oꞌch notas: Yomporepaꞌch sebensareꞌtampeneꞌ ñeñthara Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.
Attho Filemón eꞌñe pameꞌñeñothan Cristo atarr morrentenana allowen ñeñth ameꞌñetsa
4-5Ñamha theꞌpaꞌ oꞌch notaph, masheñe. Napaꞌ ateth neꞌmareꞌteneph phapaꞌ nanak peyemteña Yepartseshar Jesús ñamha atarroꞌ pemorrenteña allowen Yompor poeyochreshaxhno. Ñeñthoꞌmarña na ateth neꞌmareꞌtenephpaꞌ xhokma neparasyosoꞌteñ Yompor allempo nemaꞌyochampenpha. 6Ñamha oꞌch notaph, añ nenamoeñ Yompor phokop, ñeñth allpon phameꞌñatena eꞌñe phameꞌñeñoth Yompor, ñetpaꞌxhoꞌña xhapanetepaꞌña poeyoxhreto attho nanak shonteꞌ eꞌñe kowen bensareꞌtampeney Yompor eꞌñe yameꞌñeñoth Poechemer ñeñth Cristo Jesús. 7Ñewa, masheñe atarr nokshena attho phapaꞌ atarr pemorrenteña allowen ñeñth poeyochreshaꞌ pen Parets. Attho atarr pemoerenanetpaꞌ ñeñthoꞌmarña naꞌnaña atarr phokshaten neyoxhrowen.
Attho Pablopaꞌ otenan Filemón eꞌñech kowen agërran paꞌtarwasañer Onésimo
8Ñeñthoꞌmarña theꞌpaꞌ oꞌch noterrperr poꞌpoñ: Napaꞌ ñeñthen Cristo poellsensaren ñeñthoꞌmarña phokoppaꞌ eꞌñe pokteñ oꞌtheꞌ ateth notapeñ eꞌñe neꞌmoeñokma ñeñth poktetsa atethchaꞌ pepha. 9Tharraña neñoteneph phapaꞌ atarr amoerañaph ñeñthoꞌmarña theꞌpaꞌ oꞌch notaph eꞌñe pha pemoereñoth atethñakaꞌyeña pepha. Ñewa, na Pablon ñeñthen ateth photeneꞌ napaꞌ poꞌnmhotha oꞌ yottamperrnet eꞌñe neserrpareꞌteñotha Cristo Jesús poꞌñoñ. 10Tharroꞌmar na photeneꞌ añekop ñeñth ateth nenteñ ñerraꞌmrratheꞌ nechemer. Ñewa, ñapaꞌ oꞌ nameꞌñacha arr all ayottamphsarethen ñeñthoꞌmarña theꞌpaꞌ eꞌñe nechemer nepeñ. Ñeñthpaꞌ añ paꞌsoꞌcheñ Onésimo ñeñth phaꞌtarwasañer pepeꞌth allempo ama yetampenphaꞌ.
11Ña awathpaꞌ ama es asherben peñcheꞌthe allempo petarwasacheꞌth eꞌñe attha. Theꞌñapaꞌ nanakchaꞌ asherben penter eꞌñe ateth atarr asherben nenteñ namha. 12Theꞌpaꞌ oꞌ alla nemñer pesho, eꞌñepaꞌchña kowenakma alla phagër, eꞌñech ateth pephapoer ñerraꞌmrratheꞌ eꞌñe no nechemer phagën, tharroꞌmar ñapaꞌ eꞌñe neyoxhrokmañen atarr nemorrenteña. 13Napaꞌ atarrxhoꞌ nemneñeñ oꞌch naꞌpacheñ arr ñeñthchaꞌ epan attho ñapaꞌ ñatheꞌ nesherbenayeñ. Ñewa, napaꞌ neñoteñ ñerraꞌm pha arroꞌtsenpeñchaꞌpaꞌ phatheꞌña nesherbenayeñ arr all ayottamphsarethen eꞌñe neserrpareꞌteñoth Cristo poꞌñoñ. Tharraña phapaꞌ amaña arroꞌtsenayaype ñeñthoꞌmarña napaꞌ nemneñeñ oꞌch naꞌpatonapeñ phaꞌcheñer ñeñthchaꞌ nesherbenayeñ. 14Napaꞌ amaꞌt atarr nemneñeñ oꞌch ateth nepeñ, tharraña ama nemno oꞌch ateth nepha ñerraꞌm ama pha ateth notaye, atthoña eꞌñe pha phokthaphñothpaꞌ añchaꞌña phorrtatonay pemoereña. Ama nemno oꞌch eꞌñe na neꞌmoeñokmapaꞌ oꞌch notaph atethchaꞌña pephaꞌy, ñeñthoꞌmarña theꞌpaꞌ oꞌch alla nemñer masheñ Onésimo pesho. 15Ñamha oꞌch notaph ñatoꞌ tharrekpatheꞌ yetamphsapha mameꞌ atthoch eꞌñe parrokmaterreph eꞌñe thayotheñ errponañowen. 16Theꞌpaꞌ oꞌwañchaꞌ ateth peñch ñerraꞌmrratheꞌ phaꞌtarwasañra pepeñ ñeñth ama esoyeꞌ penteꞌthe. Theꞌpaꞌ eꞌñechña ateth penter ñerraꞌmrratheꞌ eꞌñe pemoꞌnasheñ ñeñth atarr pemorrentena. Napaꞌ atarr nemoereña elloña phapaꞌ oꞌch atarr pemoerya nanak tharroꞌmar ñapaꞌ ama eꞌñe attha pemoꞌnasheñ pepeñe ateth yephannena alloweney acheñey, theꞌñapaꞌ eꞌñe yameꞌñeñoth Yompor oꞌch eꞌñe pemoꞌnasheñtera eꞌñe poktakma.
17Ñerraꞌm poꞌñoxh ateththeꞌ pentenen na ñeñthey parro atthekmay yeyemtannena, ñeñthepñapaꞌ eꞌñechkaꞌye kowen phagërña yemoꞌnasheñ Onésimo ateth ñerraꞌmrratheꞌ na eꞌñe kowen phagën. 18Ñerraꞌm xhotheꞌ erroth pennaph ñeñth ama kowenayaye amapaꞌ ñerraꞌm xhotheꞌ tebeneph, theꞌñapaꞌ nach petsaꞌterraya. 19Na Pablonpaꞌ theꞌpaꞌ oꞌch nekellkonaph eꞌñe na nototh atthoch eꞌñe kowen neñotataph nach petsaꞌterraya. Tharraña ñatoꞌ oꞌch neyerpatapha attho na phameꞌñaterraya atthoch phaꞌkeshphatarethterra, ñeñthoꞌmarña phokoppaꞌ añ poktetsa theꞌpaꞌ oꞌch alla phokshaterren namha. 20Poꞌñoxh, masheñe, napaꞌ añ eꞌñe nemnen theꞌpaꞌ oꞌch alla phokshaterren namha eꞌñe phameꞌñeñoth Yepartseshar Jesucristo. Allochñapaꞌ napaꞌxhoꞌña atthoch eꞌñe kowen noksherra neyoxhro eꞌñe nameꞌñeñoth namha Cristo.
21Napaꞌ neñoteneph phapaꞌ xhokmach peꞌmhñoten ñeñthoꞌmarña nekellkënnaph añ carta. Neñoteneph amach ñeñthayaya ateth pepho ñeñth oꞌ notwaph, phapaꞌ ellochña atarrchaꞌ kowen pephaꞌyes allowen ñeñth atarr kowentetsa. 22Theꞌpaꞌ oꞌch noterrperr poꞌpoñ: phaññoꞌtonchaꞌ ñamha nokop allchaꞌ nexhap ñerraꞌm esempoch aꞌrroyerrnet. Semaꞌyochampeñothen Yomporpaꞌ napaꞌ añ atarr nekwen ñatoꞌ esempopaꞌ aꞌrroyerrnetchaꞌ. Allempopaꞌ eshektheꞌ neta sesho oꞌch nemoꞌterrsaꞌ.
Arrpaꞌ attho soꞌtner poꞌcartoth
23Arr necartoth all womhchaꞌteneph ñamha masheñ Epafras ñeñth parro yottampenyet eꞌñe yeserrpareꞌteñoth Cristo Jesús poꞌñoñ. 24Womhchaꞌteneph ñamha masheñ Marcos ñamha masheñ Aristarco ñamha masheñ Demas ñamha masheñ Lucas. Ñetpaꞌ xhokma thorrapretennet Jesucristokop.
25Theꞌñapaꞌ ñeñthach notaph, masheñe. Yepartsesharepaꞌchña Jesucristo saꞌnataya allowenes. Ñeñthpaꞌ atthetepaꞌch Nompore. Allowa.
Pablo
Currently Selected:
Filemón 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.