San Lucas 16
16
Ateth atmaꞌntatarethtena ateth pena ñeñth kowamphsatsreꞌteneꞌ pamoꞌmteꞌ
1Elloña Jesúspaꞌ alla tomaꞌntaterranerr poeyochreshaꞌ, ñeñthpaꞌ ateth serrpareꞌtaterraneterr:
—Eñall yakma poesheñarr ñeñth atarr ekhllayoreth. Ñapaꞌ echenan paꞌcheñer ñeñth poꞌtarwas peneꞌ oꞌch kowamphsan ora allpon ñeñth echyen pamoꞌmteꞌ. Ñamha ñach kellkëneꞌ poꞌpotantañ ñeñth allpon tebhaꞌyeññañet pamoꞌmteꞌ. Attheña allempoña poesheñaꞌtets acheñeneshaꞌpaꞌ aꞌmethampeñetaꞌ pamoꞌmtayesho, ateth otoñet pamoꞌmteꞌ: “Oꞌkaꞌye attha aꞌchenkatatsreꞌtaphña ñeñth penen ñeñthchaꞌ pekwamphsatsreꞌteneꞌ.” 2Allempoña pamoꞌmteꞌ ateth eꞌmareꞌchpaꞌ allentha agotach. Allempoña wapapaꞌ ateth otaph: “Esoꞌmarwañakaꞌyeña ateth phaꞌchenkatatsreꞌtenen. Theꞌpaꞌ oꞌch peñotatnomoen eꞌñe ora allowen ñeñth allpon petarwasen tharroꞌmar theꞌpaꞌ ama nemno oꞌch alloꞌna pekwamphsatsreꞌtenen.” Oꞌ ateth otwe pamoꞌmteꞌ, ñañapaꞌ allentha awerr. 3Allempoña paꞌtarwasañer ñapthopaꞌ ateth kothapeꞌchen: “Theꞌpaꞌ amach alloꞌna netarwasaꞌneno namoꞌmtayesho; oꞌkaꞌye mopaꞌtamperrenña allo neganena. Theꞌpaꞌ errothenwachñakaꞌye nephatheꞌ. Napaꞌ ama necheno newamenk atthoch namreꞌt ñeñthchaꞌ netarwas neperreñ, ñamha ama nemno oꞌch netarwas nephaꞌ oꞌch attha nenamareꞌtyen kelle ateth phaꞌyena poꞌpsheññexhno ñeñth poꞌtarwas peneꞌ oꞌch enamareꞌtyeset kelle, tharroꞌmar na ñeñthpaꞌ atarr apenkoxhen nenteñ.” 4Allempoña oꞌ eꞌñe kothapeꞌchwepaꞌ ateth ot: “Theꞌña poꞌñoxhpaꞌ oꞌkaꞌye neñoch atethchaꞌkaꞌye nepha atthoch acheñeneshaꞌpaꞌ eꞌñech kowen agapnet paꞌpakllo tsapathoneth allempoch wañ nekhllayor ñeñth allpon nagën theꞌ netarwasoth.” 5Allempoña ateth kothapeꞌchenpaꞌ atethxhoꞌ pha. Ñeñthoꞌmarña agotatan allowen allponsheña ñeñth tebhaꞌyets pamoꞌmtayesho. Eꞌñe poesheñaꞌttsa ñanom aꞌphthoꞌtyesap, ateth otapanet: “Phapaꞌ ¿errponaꞌt petebeñña namoꞌmteꞌ?” 6Ñañapaꞌ ateth otos: “Napaꞌ netebeñkaꞌye xharroch xharraꞌ cilindro aceiteꞌ.” Ñeñth patron paꞌcheñerñapaꞌ aph allo kellkëññañ ñeñth allpon teben awathotheñ. Allempoñapaꞌ ateth otererr: “Theꞌpaꞌ oꞌch phanorr thekmapaꞌ oꞌch peꞌsherrña ñeñth xharroch xharraꞌ cilindro oꞌch pekellkërr amnaroch xharraꞌ oꞌkaꞌye allponamhaña ñeñth peteben.” 7Allempoñapaꞌ oterranerr ñamha poꞌpsheñeñ: “Phapaꞌxhoꞌña ¿errponaꞌt petebeñña namoꞌmteꞌ?” Ñañapaꞌ ateth otos: “Napaꞌ netebeñ xharroch xharraꞌ arroga trigo.” Ñeñth patron paꞌcheñerñapaꞌ aph ñamha allo kellkëññañ ñeñth allpon teben awathotheñ allempoña ñapaꞌxhoꞌña ateth otererr: “Phapaꞌxhoꞌña phanorr thekma oꞌch peꞌsherrña ñeñth xharroch xharraꞌ arroga oꞌch pekellkërr poskoch xharraꞌ; theꞌpaꞌ oꞌkaꞌye allponamhaña ñeñth allpon petebeñ namoꞌmteꞌ.” 8Allempo pamoꞌmteꞌ eñotan ñeñth paꞌtarwasañer attha shekareꞌteñ, ñañapaꞌ ateth oten: “Añ acheñer amaꞌt poeshkëñothpaꞌ eꞌñe eñoteñ oꞌch entan ñeñthchaꞌ atarr sherberreꞌ ñokop tsapathoneth.” Poꞌñoxh acheñeneshaꞌ arr patsro ñeñth ama ameꞌñetso ñetñapaꞌ atarr eñoteñet atthoch eꞌñech aña eꞌnenet ñeñthchaꞌ atarr sherberrets ñokpoet tsapathoneth. Tharraña ñeñthña ameꞌñetsapaꞌ ama tama eñoteñeto, ama es kothapeꞌcheneto oꞌch eꞌnenet ñeñthchaꞌ atarr sherberrawet ñamet tsapathoneth.
9‘Ñeñthoꞌmarña theꞌpaꞌ oꞌch notenes:
—Ñeñth allpon paꞌnamen sechyen sekhllayorowen ñeñthpaꞌ añekpoepaꞌchña sherbenes alloch seyenpoeñ poꞌpotantañ allochñapaꞌ atthochña eꞌñech kowen moererrset. Sapaꞌ añekpoepaꞌchña setarwasatña sa sekhllayor ñeñth atarr sherbets Yomporekop amaꞌt yeñoteñ kellepaꞌ atarr aꞌgastaꞌpoꞌ amaꞌt ñamha añekop ñeñth ama pokteyeꞌ enteno Yompor. Allochñapaꞌ eñallchaꞌ sokop ñeñthchaꞌ eꞌñe kowen sagerreꞌ eꞌñe all Yomporepawo esempoch sexhaxherr all, allempopaꞌ oꞌwañchaꞌ alloꞌna sherbenes kelle ñeñth patsoꞌmarekpa. Atthoch allowenes eꞌñech kowen sokrraꞌwerra Yomporepawo ñeñthpaꞌ ama awañaño.
10‘Elloña oꞌch notas:
—Amaꞌt eꞌñe koñeꞌtha yechen ñerraꞌm añekop yesherbhateñ ñeñth kowen enten Yompor, ñañapaꞌ eñoteney ateth ñerraꞌm amaꞌt atarr aton yechen attherach yesherbhateñ ñokop. Tharraña amaꞌt eꞌñe koñeꞌtha yechen ñerraꞌm ama añekpayeꞌ yesherbhateñe ñokop, ñañapaꞌ eꞌñech eñoteney atthoña amaꞌtchaꞌ atarr aton yecheneñpaꞌ attherach amach es yesherbhateñe ñokop. 11Ñamha amaꞌt eꞌñe allpona kelle yechen arr patsro amaꞌt eꞌñe patsoꞌmarekpa tharraña ñerraꞌm ama añekop yesherbhateñe ñeñth kowen enten Yompor allempopaꞌ amach errothenoth alla apoerryerroña ñeñth poꞌñoxh atarr sherbets ñeñth apoeney ña. 12Ñamha ñerraꞌm ama es yesherbhateññañe ñeñth poꞌpsheñño ateth ñerraꞌm ñeñth Yomporo, allempopaꞌ amach errothenoth apyeña ñamha ñeñth eꞌñe yokop ñeñthchaꞌ eꞌñe kowen yokshateneꞌ.
13‘Ñeñthpaꞌ atethchaꞌ netmaꞌntacha:
—Amaꞌt poesheñarrotheyapaꞌ amach errothenoth eꞌñe kowen yetarwasoña epsheñoꞌmar yamoꞌmtayekop. Tharroꞌmar ñerraꞌm ateth yephapaꞌ poesheñarr eꞌñech kowen yemorrenteñoth yoksheñeshokmañen yesherbeñ, poꞌpsheñeññapaꞌ amach eꞌñeyeꞌ yemorrenteño; xhach yottena ñerraꞌm xha yetsenaꞌteñ. Ñeñthoꞌmar atethpaꞌ amach kowenayeꞌ yesherbeñe. Ñerraꞌm aña eꞌñe semaꞌyoxhrena ñeñth eꞌñe sokpa atthoch segana aton kelle, ñeñth atethpaꞌ amach errothenoth semaꞌyoxhroña ñamha añekop ñeñth atarr sherbets Yomporekop.
14Añña fariseoneshaꞌ ñeñth eꞌmoeneꞌ Jesús ñeñth ateth serrpareꞌtatenan acheñeneshaꞌ, ñetñapaꞌ aña atarr yeꞌchapretenet kelle. Ñeñthoꞌmarña ñet allempopaꞌ poesasareꞌteñothet Jesúspaꞌ xha atarr cheꞌtatseteñet.
15Jesúsñapaꞌ ateth otanet:
—Sapaꞌ xha sottenañ ñerraꞌmrratheꞌ atarr kowensoñ atthoña acheñeneshaꞌpaꞌ eꞌñe kowen entyensetañ. Tharraña Yomporñapaꞌ eꞌñe eñotennas seyoxher ñeñth attho sapaꞌ atarr seshkareꞌtyeñ acheñeneshaꞌ. Tharraña ñeñth eꞌñe ñañeñeta atarr kowen entyetset arr patsro, ñetñapaꞌ atarr tsenaꞌtenanet Yompor.
Moisés poꞌñoñpaꞌ ñeñth ateth anareth ñeñthpaꞌ ñeñthaña eꞌñe yemteteꞌth tharrempowa allempo orrterra Yompor poꞌkowenña ñeñth attho ayochreshathtena ña
16Allempoña Jesúspaꞌ ateth serrpareꞌtaterranerr acheñeneshaꞌ poꞌpoñoneth:
—Añña ñoñets Moisés poꞌñoñ ñeñth ateth anareth ñamha añ ñoñets ñeñth kellkaꞌyeseꞌth ñeñth aꞌmhtaꞌyesayeꞌth Yompor poꞌñoñ, ñetpaꞌ ñeñtha eꞌñe serrpareꞌteteꞌth tharrempowa allempo orrtosa Juan. Allempoteñ serrpareꞌtatosanet Juanpaꞌ ñapaꞌ añ serrpareꞌtatosanet ateth penaña Yompor poꞌkowenña attho atarr ayochreshathtena ña, ñeñthara kowen ñoñets alloch sekeshperra. Ñamha allowen acheñeneshaꞌ eꞌñe poeyoxhrokmañenet ñeñtha atarr moenenet.
17‘Tharraña amaꞌt attheñpaꞌ ñeñth ateth anareth Yompor poꞌñoñ amaꞌt pathrra kellek poeshempothollowenpaꞌ amach chenkërro. Tharroꞌmar Yompor poꞌñoñpaꞌ amach errotheno yaꞌwañatere ñeñth attho sherbeney. Patsña epoet enet ñeñthpaꞌ wañerrchaꞌ.
Attho Jesúspaꞌ yexhatosanet ama asannaꞌtpawoyaye
(Mt. 19.1-12; Mr. 10.1-12)
18‘Ama aꞌwañatpawoyaye Yompor poꞌñoñ ñeñth ateth yoteneꞌ ama asaꞌpawo yethapor tharroꞌmar ñerraꞌm eseshaꞌ serreꞌ poethapor oꞌch yorerran poꞌpsheñeñ koyaneshaꞌ ñeñthchaꞌ poethapor perretpaꞌ ñeñthñapaꞌ xhach ochñaꞌtamperrana poethaporesheꞌmañ; ñeñthpaꞌ ama kowenayeꞌ enteñe Yompor. Ñamha ñeñthchaꞌ yorerreꞌ koyaneshaꞌ asareth, ñeñth yakmarpaꞌ xhach chetapreten thaporets; ñeñthpaꞌxhoꞌña ama kowenayeꞌ enteñe Yompor.
Ateth apharethta poesheñarr yakma ñeñth atarr ekhllayoreth; ateth apharethta ñamha poꞌpsheñeñ yakma ñeñth atarr wokchañetets, ñeñthpaꞌ añ paꞌsoꞌcheñ Lázaro
19Elloña Jesúspaꞌ ateth serrpareꞌtatanet:
—Eñall poesheñarr ñeñth atarr ekhllayoreth ñeñth chorrenaya shetamoets atarr koxhneshareꞌ ñeñth atarr kowen apomotyesareth. Epayeꞌ koshatseꞌtatyeñ ñeñth allpon echyen. Eꞌñe poksheñothpaꞌ eꞌñe ellapeneꞌth rrallmeꞌchats. 20Eñall ñamha poesheñarr ñeñth atarr wokchañetets ñeñthñapaꞌ xha ora poetsaren, ñeñthpaꞌ añ paꞌsoꞌcheñ Lázaro. Ñañapaꞌ allach ellapeneꞌth aꞌyoth yetarroth allothekma beꞌthen ekhllayoreth paꞌpakllo. 21Ñapaꞌ añach atarr yeꞌchena oꞌch rraꞌyesan amaꞌt koñethaꞌttsa rreñets ñeñth aꞌshoreꞌtatyen ekhllayoreth poꞌmesaphnaxho. Allña ochekpaꞌ oꞌch wapoña oꞌch tsoꞌnaꞌteññañaꞌ poeptsarña. 22Attheña oꞌ xhap pamtharr allempo rroma ñeñth wokchañneshar. Oꞌ rroma mellañotheñneshaꞌña waxhaꞌtapaꞌ oꞌ aneret eꞌñe Abrahamoesho, allñapaꞌ oꞌ xhapachet atarr kosheñtso. Attheñapaꞌ xhap allempo rroma ñamha ñeñth atarr ekhllayoreth, ñeñthñapaꞌ pampoeñetaꞌ. 23Ñañapaꞌ alla xhap koñchaꞌpoetso ñeñth oꞌpatenaya ñeñth rromoets ñeñth ama ameꞌñetso. Allñapaꞌ atarr moeroxhtosa all koñchosa. Attheñapaꞌ kowaꞌ enonethpaꞌ allothña entosan Abraham allapharoꞌtsen ento. Allñapaꞌ alloꞌtsen epoet Lázaro. 24Ñeñthña ekhllayoreth allentha xhoreꞌtan Abraham, ñeñthpaꞌ ateth och: “Nompore Abrahama pemoerayeꞌchna, pemñayeꞌchon Lázaro oꞌch wapa arr atthoch eshaꞌtosan potaph oño, amaꞌt potaphothapaꞌ oꞌch onenapnaꞌ oñ atthoch aꞌyamoserraponaꞌ neñeñ oꞌ eꞌñe neporrarraꞌnmawap. Atarr nanak oꞌ nemoeroxhtosa arr tso.” 25Abrahamñapaꞌ ateth och: “Nechemerñechaꞌ theꞌpaꞌ oꞌch peyerposa ora allpon paꞌnamen ñeñth pechyeseꞌth ñeñth atarr koxhneshareꞌ pentyeseꞌth allempo phokrreꞌth patso. Lázaroñapaꞌ ama es echeꞌthe amaꞌt koñeꞌtha ñeñth atarr kowen enten ñamha. Theꞌña ñapaꞌ oꞌ atarr akshatarethterra, phañapaꞌ oꞌ atarr phaꞌkoñchatarethterra. 26Elloña theꞌpaꞌ amaꞌt eꞌñe eseshapaꞌ amach errothenoth xhapamphsapeto alloꞌtseneph tharroꞌmar phapaꞌ atserethoꞌtsenpha yomhtaꞌn. Sapaꞌxhoꞌña theꞌpaꞌ amaꞌt eꞌñe poesheñarrothesapaꞌ amach errothenoth sexhapampesyo yamha. Amatheꞌ erroth yepereꞌthe ñeñthpaꞌ ateth anareth atthoch yelloꞌtsentatarethterra.” 27Allempoña ekhllayorethpaꞌ ateth oterranerr Abraham: “Tharraña amaꞌt attheñ nomporepaꞌ theꞌpaꞌ oꞌch notaph oꞌch pemñer Lázaro all patsro nompor paꞌpakllo. 28Tharroꞌmar all napaꞌ nechen amnarsheña nemoꞌnasheñ. Ñeñthoꞌmarña nemneñ oꞌch awerr oꞌch kothapeꞌchaterranetaꞌ eꞌñe kowen theꞌt ñetpaꞌxhoꞌña esempopaꞌ alla xhapoet arr koñchaꞌpoetso.” 29Abrahamñapaꞌ alla otererr: “Ñetpaꞌ echenet Yompor poꞌñoñ ñeñth kellkëꞌth Moisés ñamha allowen ñeñth aꞌmhtayeꞌth Yompor poꞌñoñ awath. Theꞌpaꞌ eꞌmhñoterrñañetepaꞌ Yompor poꞌñoñ ñeñth echenet.” 30Ñañapaꞌ ateth oterranerr Abraham: “Ñatoꞌ amach eꞌmhñoterrñañeto Yompor poꞌñoñ, tharraña nompore Abrahama ñerraꞌm eseshaꞌ tanterrtsa rromoth ñeñthchaꞌ orrterrawet allempoñapaꞌ poꞌñoxh ñeñthchaꞌña kothapeꞌchaterrawet ello eꞌñe kowen Yomporekop.” 31Abrahamñapaꞌ alla otererr: “Ñerraꞌm amach eꞌmhñoterrñañeto Yompor poꞌñoñ ñeñth ateth kellkëꞌth Moisés ñamha allowen ñeñth aꞌmhtayeꞌth Yompor poꞌñoñ awath, theꞌña amaꞌt eseshaꞌch tanterrtsa rromothpaꞌ amach eshek xhapanetoña poeyoxhreto atthoch kothapeꞌcherret ello eꞌñe kowen Yomporekop.”
Currently Selected:
San Lucas 16: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.