San Lucas 11
11
Attho Jesúspaꞌ yexhatan poeyochreshaꞌ atethchaꞌ maꞌyochet
(Mt. 6.9-15; 7.7-11)
1Poꞌpocheño Jesúspaꞌ alla maꞌyocherrerr. Oꞌ maꞌyochwapaꞌ poesheñarrña poeyochreshaꞌpaꞌ ateth och:
—Partseshachaꞌ theꞌpaꞌ oꞌch peyxhatey maꞌyochatsa ateth peꞌth Juanañ, ñapaꞌ xhokma yexhataneꞌth ña poeyochreshaꞌ atethchaꞌ maꞌyochet.
2Jesúsñapaꞌ ateth otanet:
—Ñewa, ñerraꞌm esempoch semaꞌyochena atethchaꞌ sot:
Yompore Partso ñeñtheph peꞌntañoꞌtsen, yentapepaꞌch pha atarr Partsoph. Xhapoepaꞌch Nompore allempoch atarr phaꞌyochreshathterra arr patsro. Yetsotonapepaꞌch arr patsro ñeñth ateth pemnen pha Nompore ateth penet ñamha peꞌntaño.
3Xhokmoepaꞌch Nompore phapoeney ñamha yokrramh ñeñth allpon yepalltaꞌyena patheꞌtets yeth.
4Pephretnaꞌwonayepaꞌch Nompore allowen yoꞌchñar ñeñth ama pokteyeꞌ pentapretenye, attho Nompore yapaꞌxhoꞌña yephretnannena ñerraꞌm esempo erroth yephannena. Ñamha amach Nompore pemnatatsche sosyaꞌtañ oꞌch atarr topateney. Añchaꞌña xhoch Nompore phaꞌypoꞌñataterrey allowen sosyaꞌtsañexhno.
5Elloñapaꞌ alla yexhaterraneterr ñeñth attho eꞌñe yenamoeñoth Yompor apoeychaꞌ. Ñeñthpaꞌ ateth serrpareꞌtaterraneterr tomaꞌnteñtso.
—Ñerraꞌm eñall poesheñarr ñeñth eꞌñe kowen yeyemtenaya, amaꞌt rroxh tsapo oꞌch awey paꞌpakllo yexhoreꞌteñothpaꞌ atethchaꞌ yotos: “Napaꞌ masheñchaꞌ añekop nowena oꞌch phapoen amaꞌt koñeꞌtha rreñets, 6tharroꞌmar oꞌ xhap poesheñarr namoꞌts ñeñth wetsa bhaxhayoth, napaꞌ ama es necheno amaꞌt koñeꞌtha alloch neyemaꞌcha.” 7Tharraña ñapaꞌ poꞌponrothpaꞌ ñatoꞌ xhach otapoey: “Amach phaꞌtsrreꞌmoxhtanaꞌtatstosno tharroꞌmar oꞌ eꞌñe echarr neyottampeswena, allowen nakñetharetholleshowenpaꞌ oꞌ yemanrraꞌtwen. Ñeñthoꞌmarña ama eshkayeꞌ atantenno oꞌch nexhaꞌnmonapha atthoch es napaph.” 8Tharraña napaꞌ oꞌch notas, amaꞌt ñeñth atarr yeyemtenañaꞌ ñerraꞌm ama xhaꞌnmaponayopaꞌ yañapaꞌ ñerraꞌm alla yenamoereꞌthpaꞌ xhaꞌnmaponayach atthoch apapoey amaꞌt erraꞌtsena ñeñth atarr yenamoeñ atthoch amach alla yaꞌtsrreꞌmoxhtanaꞌtneñe es enamareꞌteꞌ. 9Ñeñthoꞌmarña napaꞌ oꞌch notas: Eꞌñe senamoeñoth, Yomporñapaꞌ apaschaꞌ. Seꞌnameꞌteñothpaꞌ señchchaꞌ, sexhoreꞌteñoth, Yomporñapaꞌ eꞌñe poeꞌmhñoteñothespaꞌ eꞌñech kowen toramphsapas. 10Tharroꞌmar ñeñth es enamareꞌtetspaꞌ ñetña es agëtset; ñamha erraꞌtsen ñeñth es eꞌnyetspaꞌ ñetñapaꞌ enteretchaꞌ, ñamha erraꞌtsen ñeñth xhoreꞌtyeneꞌ ñetñapaꞌ eꞌñech eꞌmhñotenanet Yompor.
11-13‘Yompor ñeñth poeꞌntañoꞌtsen xhokmach eꞌñe kowenareꞌ es apaꞌyeney ñerraꞌm esempo es yenamoeñ. Ñapaꞌ amach aña apoenye ñeñth ama kowenayeꞌ yenteno ya. Amaꞌt sa ñeñthes arromñathes ateth sepeñ samha sechemer, eꞌñech kowen es sapoeñ ñerraꞌm esempo es enamoenes. Ateth ñerraꞌm allempo paꞌchporrñoth es enamoenes, oꞌch enamas mam#11.11-13 Ñewa, Jesús añ tomaꞌntatanet pan ñeñth poerrar penet all paꞌnyo. ñeñthchaꞌ rraꞌ, sapaꞌ amaꞌt poesheñarrothesapaꞌ amach aña sapoeñeña sechemer mapoeꞌ ñeñth ama arrapawoyaye. Amapaꞌ ñerraꞌm kak enamoenes sañapaꞌ amaꞌt poesheñarrothesapaꞌ ama aña sapoeñeña sechemer shecheph ñeñth atarr amoeroxhtatañ. Amapaꞌ ñerraꞌm paꞌmeꞌ enamoenes sañapaꞌ amaꞌt poesheñarrothesapaꞌ ama aña sapoeñeña sechemer yellas. Ñeñthoꞌmarña sa amaꞌt arromñathes amaꞌt ñamha atsrreꞌmñathes sapaꞌ eꞌñe señoteñ apaꞌyeseꞌ sechemereshaꞌ eꞌñe kowenareꞌ. Añña ñeñth Seyomporer sepen samha ñeñth poeꞌntañoꞌtsen elloña ñapaꞌ eꞌñe eñoteñ attho eꞌñe kowenareꞌ es apaꞌyenes samha. Amaꞌt Poekamkëñ ñeñth eꞌñe kowen Parets atthoña eꞌñe kowen chorratensa allowenes ñeñthes enamyeneꞌ ña.
Attho poesheñaꞌtets oteñet Jesús ñapaꞌ oneñethoꞌ poꞌwamenkoth kaxhpatenanña poꞌpotantañ oneñethexhno acheñeneshaꞌ
(Mt. 12.22-30; Mr. 3.19-27)
14Poꞌpocheño alloꞌtsen poesheñarr acheñ ñeñth chorrena oneñeth, xha opanatateñ. Allempoña Jesúspaꞌ kaxhpatosan oneñeth attho chorrenana acheñ. Attho kaxhpaꞌner oneñeth ñeñthña opanpaꞌ oꞌ alla eñorerra. Acheñeneshaꞌña allpaꞌ attha kowanrrorteñet, atarr kowen enteñet. 15Tharraña poꞌpotantañexhnoña acheñeneshaꞌpaꞌ amaꞌt mameshapaꞌ ama pokteyeꞌ eñcheto. Ñetñapaꞌ ateth otyeñet:
—Attho kaxhpatatenan oneñeth acheñpaꞌ añakaꞌye awamenkath peneꞌ Beelzebú ñeñth pompor pen allowen oneñethexhno.
16Poꞌpotantañ acheñeneshaꞌ ñetñapaꞌ xha moeneñet oꞌch topachet Jesús. Ñetpaꞌ ateth ochet:
—Yapaꞌ añ yemnen oꞌch pegatey pepartsoña entoth allochñapaꞌ atthoch yeñotaph poꞌñoxh phapaꞌ Parets Poechemereph.
17Jesúsñapaꞌ eñotanet ñeñth ateth kothapeꞌchatseꞌtyenet poeyoxhreto ñokop ñeñth attho otyeñet ñapaꞌ oneñetha pompor poꞌwamenkoth kaxhpatenanetña oneñethexhno. Ñeñthoꞌmarña ñapaꞌ ateth otanet:
—Ñerraꞌm poesheñarr amhchaꞌtareth elloptannena paꞌcheñer eꞌñe ñagattsetapaꞌ eꞌñech poktakma aꞌkllatannaꞌtwerret. Atthekmach phannerra amaꞌt ñeñth eꞌñe pamoꞌtsnaꞌtarekmoet ñerraꞌm elloptannerret eꞌñe ñagattsetpaꞌ eꞌñech aꞌkllatannaꞌtwerret. 18Atthekmach phannerra ñamha oneñeth poeyochreshaxhno ñerraꞌm oneñethexhno eꞌmoñeꞌtannenet eꞌñe ñagattseta, ñetña attho womenkatenetpaꞌ xhach wañerrets amach alloꞌna womenkatneneto. Ñeñthpaꞌ ateth oꞌ notwas tharroꞌmar sapaꞌ xha sotenen napaꞌ Beelzeboꞌ poꞌwamenkoth nekaxhpatateññañ eꞌñe ña poeyochreshaꞌ ñeñth pompor pen allowen oneñethexhno. Poꞌñoxh oneñethpaꞌ amakaꞌye waporeꞌtanneno. 19Sapaꞌ ateth sotenen napaꞌ Beelzeboꞌ poꞌwamenkoth nekaxhpatateññañ eꞌñe ña poeyochreshaꞌ, ñewa, theꞌpaꞌ oꞌch notas: Ñeñth seyochreshaꞌ sepen sa ñeñth eñoteneꞌ ñamet oꞌch kaxhpatachet oneñeth acheñeneshaꞌ ñetpaꞌxhoꞌña amaña Beezebú poꞌwamenkotheyeꞌ kaxhpatateñetoña oneñeth acheñeneshaꞌ. Ñetpaꞌxhoꞌña Yomporoña poꞌwamenkoth kaxhpatatenetña oneñeth. Ñeñthña oꞌ eñotatas ñeñth ateth sotennoñ ñeñthpaꞌ amakaꞌye poꞌñoxh attheyaye. 20Poꞌñoxhkaꞌye Yompor poꞌwamenkoth nekaxhpatateñña oneñethexhno acheñeneshaꞌ ñeñthchaꞌña señotateꞌ theꞌpaꞌ oꞌ nexhapatonas Yompor poꞌkowenña ñeñth attho poꞌñoxh atarr ayochreshathtena ña.
21‘Ñeñthpaꞌ oꞌ eꞌñe notwas ateth tharroꞌmar yeñoteñ ñeñth atarr awamenkathtetsa attho atarr awamenkathtena oneñeth, ñañapaꞌ eꞌñe poꞌwamenkoth kowampesyenan allowen eꞌñe kowen ñeñth paꞌpakëll phaꞌyen. Ñapaꞌ poꞌwamenkokmañen naꞌyenan ñeñthchaꞌ eꞌñe kowampeneꞌ all amhchaꞌtarethtena ña. 22Tharraña ñerraꞌm esempo oꞌch wapoña ñeñth atarr awamenkatheshaꞌ ñeñthchaꞌ ello metanoseꞌña poꞌwamenk ateth ñerraꞌm na Nompor, ñeñthchaꞌña eꞌñe aꞌmchechatoseꞌ. Atthoña eꞌñe poerratamphsosñañ ñeñth allpon moñenaya ñeñth atarr yemoetyena ña. Allochñapaꞌ oꞌch beꞌthosos all ñeñth paꞌpakëll phaꞌyen oꞌch eꞌñe poerratampeswos ñeñth allpon oꞌpatyena ña.
23‘Ñeñthoꞌmarña theꞌpaꞌ oꞌch notas allowenes: Ñerraꞌm eseshas ñeñthes ama nethorrapretenaye ñeñthña acheñerpaꞌ xhakaꞌye epatareꞌtennan ñeñth ateth nethorraꞌyena na. Ñeñthpaꞌ oꞌch netmaꞌntatasa ateth: Ñerraꞌm eseshaꞌ ama naꞌyapaxhapretenaye ñeñth naꞌyapaxhen na, ñeñthñapaꞌ xha aꞌparratseꞌtampenen aꞌyeneth.
Attho Jesúspaꞌ eñotatanet ñatoꞌ oneñethpaꞌ oꞌch alla chorrerranerr acheñ alloth xhaꞌnom awaña
(Mt. 12.43-45)
24‘Ellonethpaꞌ oꞌch alla neñotaterrserr poꞌpoñoneth: Oneñeth ñerraꞌm esempo xhaꞌnom acheñeshoth, ñeñthña oneñethpaꞌ oꞌch awyes errapharen amaꞌt amayoꞌmar eꞌnyeseꞌ poꞌpsheñeñ allchaꞌ yexherrerr allchaꞌ eꞌñe ameswerrerr kowen. Tharraña ñerraꞌm amach erra eñchepaꞌ attheñapaꞌ oꞌch ot: “Napaꞌ oꞌch alla awerren nepakllo alloth nexhaꞌnom awaña.” 25Atethchaꞌxhoꞌ pha. Oꞌch alla awerr alloth xhaꞌnom awaña. Allña oꞌch xherrpaꞌ eꞌñech kowen entwerran paꞌpakëll, eꞌñech kowen atarrapoꞌtwareth, eꞌñech kowen aññoꞌtyesareth. 26Allempoñapaꞌ oꞌch alla awerr alloꞌtsaꞌyen pamoꞌtseshaꞌpaꞌ oꞌch enanaꞌ poꞌpoñ kanxherrsheña oneñethexhno ñeñth nanak sosyareꞌ, ñeñth ello metanaꞌtweneꞌ ñeñth ateth sosyaten ñeñth waꞌñeneꞌ oꞌch yexhaprecha. Allowenetñapaꞌ oꞌch chorreñet ñeñth acheñer. Allempoña tsapathonethpaꞌ alloꞌnach sen ñeñth acheñer sosyatnomoets womenk. Elloch metanerran ñeñth ateth phatseꞌtyeseꞌth ñenmath.
27Jesús allempo ateth serrpareꞌtatenan acheñeneshaꞌpaꞌ poesheñarrña koyaneshaꞌpaꞌ machayothepaꞌtchaꞌ rrana, ñeñthpaꞌ ateth ot:
—Amaꞌt ñeñth phachor pepen phapaꞌ atarr kosheñtsoꞌtsen tharroꞌmar ñapaꞌ ñeñth peꞌñalletateꞌ pha ñeñtheph atarr kowen es peyexhkaten ñamha ñapaꞌ eꞌñe kowen kowamphsaph allempo cheshathollenphaꞌ.
28Jesúsñapaꞌ ateth och:
—Elloña allowenetpaꞌ atarr kosheñtsoꞌtsaꞌyenet ñeñth poeꞌmhñoteñothet Yompor poꞌñoñ eꞌñe ateth phowenet.
Attho Jesúspaꞌ otan acheñeneshaꞌ ñeñth ama kowenayeꞌ kothapeꞌchetso ñetñapaꞌ xhokma eꞌnenet partsoteñets
(Mt. 12.38-42; Mr. 8.12)
29Allempoña acheñeneshaꞌ emchorreñet Jesús, ñañapaꞌ ateth otanet:
—Acheñeneshaꞌ ñeñth korraꞌyetsa theꞌ ñetñapaꞌ ama kowenayeꞌ kothapeꞌchyeneto. Tharroꞌmar ñetpaꞌ aña eꞌnenet awoꞌch norrtatanet nepartsoteña atthoꞌchña eñotnet napaꞌ poꞌñoxhoꞌtheꞌ Parets Poechemeren ñeñthenoꞌtheꞌ Cristotosets. Tharraña amach es norrtataneto. Napaꞌ añach patherr neñotatanet ateth eñotataneꞌth Jonás awath nínivoꞌmarneshaꞌ allempo aꞌmhtaneꞌth Yompor poꞌñoñ. 30Tharroꞌmar attho eñotataneꞌth Jonás nínivoꞌmarneshaꞌ awath ñapaꞌ Yomporeshoth wena, napaꞌxhoꞌña theꞌpaꞌ atethchaꞌ neñotach namha acheñeneshaꞌ ñeñth korretsa theꞌ napaꞌxhoꞌña Yomporeshoth nowena. 31-32Tharroꞌmar awath allempo serrpareꞌtataneꞌth Jonás nínivoꞌmarneshaꞌ ñetñapaꞌ allempokma kothapeꞌcherret ello eꞌñe kowen Yomporekop. Theꞌña arr seshopaꞌ alloꞌtsenen na ñeñthen ello metaneneꞌ ñeñth ateth serrpareꞌtateꞌth Jonás. Tharraña sañapaꞌ amaña sokthapeꞌchenoña ello kowen Yomporekop. Ñeñthoꞌmarña esempowañen allempoch aꞌkrarethetwerra allowen acheñeneshaꞌ, ñeñthña nínivoꞌmarneshaꞌ ñeñth eꞌñe kowen kothapeꞌcherrets Yomporekop awath, ñetpaꞌxhoꞌña orrterretchaꞌ, ñeñthchaꞌña señotaterreꞌña sapaꞌ amaꞌt mamesha ama pokteyayeña ñeñth ateth sephaꞌyeseꞌth tharroꞌmar sapaꞌ ama sokthapeꞌcherro ello kowen Yomporekop. Ñamha theꞌpaꞌ oꞌch neyerpatasa ñeñth ateth pha awath poesheñarr koyaneshaꞌ ñeñth amhchaꞌtarethtatseꞌth atarr bhaxhayo allowanen pats saꞌponeth. Ñeñthña koyaneshaꞌpaꞌ allotheñ on oꞌch eꞌmhñotenanaꞌ Salomón poeserrpareñ ñeñth ateth atarr eñotañteꞌth. Theꞌña arr eꞌñe seshopaꞌ alloꞌtsenen ñeñthen poesheñarrana ñeñthen atarr es neñoten namha, ello nemhtaneñ attho eñotañteꞌth Salomón. Tharraña sañapaꞌ amaña es sotapoteno. Ñeñthoꞌmarña esempowañen allempoch aꞌkrarethetwerra allowen acheñeneshaꞌ, ñeñthña koyaneshaꞌ ñeñth eꞌñe kowen eꞌmhñotatseꞌth ñapaꞌxhoꞌña orrterrach, ñeñthchaꞌña señotaterreꞌ sapaꞌ ama pokteyayeña ñeñth ateth sephaꞌyeseꞌth tharroꞌmar sapaꞌ ama es sotapoteꞌthe amaꞌt eꞌñe mamesha.
Attho yeklleꞌpaꞌ añ tomaꞌntena ñeñth poꞌlampareñ pen allowen yechets
(Mt. 5.15; 6.22-23)
33Jesúspaꞌ alla serrpareꞌtaterraneterr, ñeñthpaꞌ ateth oterraneterr:
—Ñerraꞌm esempo yaꞌllchaten lampareñ, ñeñthpaꞌ ama tharrekpayeꞌ yaꞌwortateñe oꞌch yeneꞌ oꞌpono eꞌñe aꞌnaretho. Ñamha ama añekpayeꞌ yaꞌllchateñe oꞌch yeꞌrramampes koymho. Ñeñthpaꞌ añekopña yaꞌwortatenña lampareñ oꞌch yeneꞌ enoneth atthochña eꞌñech xhoyoꞌtampeswan allowen acheñeneshaꞌ ñeñth beꞌthosxhets all pokollo. 34-35Yeklleꞌpaꞌ añ tomaꞌntena ateth ñerraꞌm ñeñth poꞌlampareñ pen allowen yechets. Ñerraꞌm eꞌñe kowen womech yeklleꞌpaꞌ eꞌñech kowen entateney poetareꞌ allochñapaꞌ atthoch eꞌñe kowen thorratyenana allemeñ yechets tharroꞌmar eꞌñe kowen aꞌpoetarsamphsarethtenet. Tharraña yeklleꞌña ñerraꞌm ama eꞌñe kowen womhcheyayepaꞌ amach eꞌñe kowenayeꞌ entatenye poetareꞌ atthochña amach eshkayeꞌ thorratyenano allemeñ yechets tharroꞌmar xha ottena ñerraꞌmrratheꞌ chekmetoꞌtsaꞌyeneta. Atthekma pena ñamha yeyoxher. Ñerraꞌm eꞌñe kowen yokthapeꞌchyen yeyoxhropaꞌ atthoña xhennayaña yeyoxhro eꞌñe ora allowen Yompor pokthaphña ñeñth poꞌkowenña pen. Atthoña ora yokthaphñapaꞌ eꞌñech aꞌpoetarsamphsarethtena Yomporeshoth. Tharraña oꞌch yeñota eꞌñe yañeña tharroꞌmar ñerraꞌm ama kowenayeꞌ yokthapeꞌcheno yeyoxhro, ñeñthpaꞌ amach errothenoth aꞌpoetarsampenyeña ñeñth yokthaphña yepen. Ñeñthña yokthaphña yepenpaꞌ xhach aꞌchekmetampennay yeyoxher. 36Tharraña ñerraꞌm poꞌñoxh eꞌñe kowen yokthapeꞌchen yeyoxhro, atthoña xhennayaña yeyoxhro eꞌñe ora allowen Yompor pokthaphña atthochña yeñoteñ orrtatyeseꞌ ñeñth eꞌñe kowen enten ña. Atthoña eꞌñech kowen es yephaꞌyen ateth ñerraꞌmrratheꞌ lampareñ eꞌñe kowen xhoyoꞌtampeney atthoch eꞌñe kowen es yentyen. Allempopaꞌ oꞌwañchaꞌ alloꞌna yechekmetampesnen.
Attho Jesúspaꞌ aꞌmethareꞌtenan fariseoneshaꞌ ñeñth ateth yexhenet ñetpaꞌ ñeñthpaꞌ ama kowenayeꞌ entapretenaneto Yompor
(Mt. 23.1-36; Mr. 12.38-40; Lc. 20.45-47)
37Oꞌ serrpareꞌtatwanet Jesúspaꞌ poesheñarrña fariseoneshaꞌpaꞌ waꞌñaꞌnerran Jesús oꞌch rrallmeꞌchapreteñaꞌ paꞌpakllo. Allempo xhap Jesús allpaꞌ beꞌthosos anorros allchaꞌ rrallmeꞌchapretosan ñeñth waꞌñeneꞌ. 38Ñeñthña fariseopaꞌ entenan Jesús attho ñapaꞌ ama eꞌpotaꞌto ñeñth ateth yexhena judioneshaꞌ. Ñewa, ñetpaꞌ ateth yexhenet, amach rrallmeꞌchenetaꞌpaꞌ oꞌch eꞌpotaꞌtyeset Partsokop. Ñeñthoꞌmarña fariseopaꞌ ateth kothapeꞌch Jesúsokop:
—Taꞌm, esoꞌmartheꞌkaꞌye amaña eꞌpotaꞌtenoña ñeñth ateth poktetsa Partsokop.
39Partseshaꞌña Jesúspaꞌ ateth tomaꞌntatana ñeñth ateth pena allowen fariseoneshaꞌ, ñeñthpaꞌ ateth otan ñeñth waꞌñeneꞌ:
—Ñeñthes fariseoneshas sapaꞌ eꞌñe seꞌpameꞌteneñña setaza enothpaꞌ oꞌponothñapaꞌ ama seꞌparroꞌteñe. Seplatopaꞌxhoꞌña enotha eꞌñe seꞌpataꞌteñ oꞌponothñapaꞌ ama seꞌpataꞌteñe. Eꞌñe ateth sepena samha. Eꞌñe saꞌkowentatena ñeñth enoꞌmar ñeñth ateth seyxhena sa allochñapaꞌ atthoch entenes allowen acheñeneshaꞌ sapaꞌ eꞌñoꞌ kowenes, tharraña oꞌponoth seyoxhropaꞌ ama saꞌkowentateñe, allñapaꞌ eꞌñe chorren shonteꞌ sosyaꞌtsañexhno ñeñth attho eꞌñe seshkëñoth xhokma es seprratampesyen, seshonten paꞌnamen ñeñth ama pokteyeꞌ entapretenso Yompor. 40Xha sottena ñerraꞌm erraꞌtsen poesheñarr acheñ ñeñth ama es eñoteno. Amaꞌt señoteñeña Yomporña ñeñth yexhkatyeneꞌ allowen ñeñth allpon yentyen arr patsro, ñeñth aꞌyotheꞌtsaꞌyen yeshoth ñeñthara Yompor ñeñth yexhkateꞌ ñamha yeyoxher alloch eꞌñe kowen yokthapeꞌchen oꞌpono yeyoxhro. 41Ñerraꞌm oꞌch poꞌñoxh sokthapeꞌcherr kowen seyoxhro Yomporekop atthochña eꞌñe kowen seyoxhrokmañen es sapaꞌyen atthoch seyenpaꞌyeñ poꞌpotantañ. Ñerraꞌm atethchaꞌ seperrapaꞌ Yomporñapaꞌ eꞌñech kowenareꞌ enterres.
42‘Atarr llekëñtsoꞌtsenes sa ñeñthes fariseoneshas tharroꞌmar ama attheyeꞌ sepeno ñeñth ateth oꞌ notwas. Ora allowen ñeñth senaremh sepen amaꞌt xhokma sapoeñeñ Yompor allpon ñeñth poktetsa ñokop —mentapan ñamha rudapan. Tharraña añña ñeñth nanak sherbets Yomporekop eꞌñech pokteꞌ es yepeññañ poꞌpsheñeñ ñamha eꞌñech kowen yemorrenteña Yompor. Ñeñth atethpaꞌ sañapaꞌ ama sokthapeꞌcheñe amaꞌt mamesha. Sapaꞌ ñeñthña sepalltena oꞌch eꞌñe ateth sephowa. Tharraña ñeñth attho xhokma es sapaꞌyen Yomporekop ñeñthpaꞌxhoꞌña amach sekaxhpatsche.
43‘Atarr llekëñtsoꞌtsaꞌyenes sa ñeñthes fariseoneshas tharroꞌmar sapaꞌ eꞌñe sommoꞌcheñoth atarr semneñ allowen acheñeneshaꞌpaꞌ oꞌch eꞌñe kowen entenset. Ñeñthoꞌmarña sapaꞌ aña atarr semnen oꞌch sanorrxhaꞌtyen judioneshaꞌ poꞌprawo allekma anorryen ñeñth atarr amhchaꞌnaꞌtpoꞌ enten allowen acheñeneshaꞌ. Ñamha sapaꞌ aña atarr semnen allowen acheñeneshaꞌpaꞌ oꞌch womhchaꞌtenset poemhchaꞌnañoth ñerraꞌm esempo sechopeñeꞌchen thoñoꞌmar allekma chopeñeꞌchyen allowen acheñeneshaꞌ.
44‘Atarr llekëñets sokop, tharroꞌmar sapaꞌ eꞌñe atthes ñerraꞌmrratheꞌ apampaña ñeñth amach orrteno enoth all apamparethtena arromñath oꞌpono patso. Ñeñthoꞌmarña acheñeneshaꞌpaꞌ allach chopeñeꞌchyenet all ama eseshaꞌ eñotenaye oꞌponopaꞌ alloꞌtsaꞌyen arromñathap all eꞌñe chorren sosyaꞌtsañ.
45Allempoña poesheñarr ñeñth atarr etsotenayeñ ñoñets ñeñth ateth anareth judioneshakop, ñañapaꞌ ateth otan Jesús:
—Maestro, ñeñth ateth photen yaꞌnaña xha moeneꞌ pepenkaten.
46Jesúsñapaꞌ ateth och:
—Sapaꞌ ñeñthes atarr etsotenayeñ ñoñets ñeñth ateth anareth judioneshakop, sapaꞌxhoꞌña atarr llekëñets sokop, tharroꞌmar sapaꞌ atarr es senaꞌyeññañ acheñeneshaꞌ ñeñth atarr echarrareꞌ entyenet ñet, poꞌñoxhpaꞌ amach errothenoth eꞌñe ateth phoweto. Sapaꞌ amaꞌt mameshapaꞌ ama ayenpoenayeꞌ sentpenaneto.
47‘Llekëñtsa ñamha sokop tharroꞌmar sa theꞌpaꞌ sathomaten enoth ñeñth atarr kowen senten sa all pampaꞌyeseteꞌth ñeñth aꞌmhtaꞌyesayeꞌth Yompor poꞌñoñ awath ñeñth moetsanatyeseꞌth ñeñth satañneshañ sepeꞌth. 48Sapaꞌ eꞌñe señoteññañ saꞌtañneshañ attho ñetpaꞌ moetsanacheteꞌth ñeñth aꞌmhtaꞌyesayeꞌth Yompor poꞌñoñ tharraña sapaꞌxhoꞌña ñeñthaña eꞌñe pokteꞌ senten samha ñeñthoꞌmar theꞌpaꞌ eꞌñe saꞌkowentampenanet all apamparethtenet.
49‘Amaꞌt Yompor awath, eꞌñe poeñoteñothpaꞌ ateth oteꞌth: “Napaꞌ oꞌch nemñe acheñeneshesho ñeñthchaꞌ aꞌmhteneꞌ neñoñ ñamha ñeñth nellsensarneshaꞌ nephaꞌyen. Tharraña patantarrña acheñeneshaꞌñapaꞌ xha moetsanatanet, poꞌpotantaññapaꞌ xha kothareꞌtyeset.” 50Atthoña eꞌñe allempotheñ ayexhkatarethta añ pats, ora allowen ñeñth aꞌmhtaꞌyesayeꞌth Yompor poꞌñoñ allpon ñeñth amtsanatyesarethtatseꞌth ashatarethetyeseteꞌth poꞌrras, sañapaꞌ allempotheñ eꞌñe saꞌyowarethtena themeꞌttsen sa ñeñthes korretsa theꞌ. 51Eꞌñe allempotheñ moetseret Abel tharrempowa allempo moetseret ñamha Zacarías ñeñthpaꞌ alla semtser Parets poꞌponro poechaꞌpetaroth alloꞌtsen altar allothekma sherbeteꞌth Yompor. Poꞌñoxhkaꞌye notenes añeneshaꞌ ñeñth korretsa theꞌ atarr ayowarethtenet.
52‘Llekëñtsa sokop ñeñtheschaꞌ eꞌñe etsotenayeñ ñoñets ñeñth ateth anareth judioneshakop tharroꞌmar sapaꞌ xha seprratampeñ acheñeneshaꞌ ñeñth alloch enteret ñeñth eꞌñe poꞌñoxh alloch keshperret. Tharroꞌmar amaꞌt sapaꞌ amakaꞌye senteññañeña Yompor poꞌkowenña, ellonethpaꞌxhoꞌña xhokma sepatareꞌteñña poꞌpotantañ ñeñth eꞌneneꞌ Yompor poꞌkowenña.
53Allempoña ñetpaꞌ eꞌñe paꞌtsrreꞌmoeñoth atarr es aꞌphthoꞌtareꞌtyeset Jesús. 54Ñetpaꞌ añ atarr eꞌnenet atthoch otatseꞌtachet allochñapaꞌ ñatoꞌ poꞌtatseꞌtateñothetpaꞌ atthoch otteñeꞌcheñet.
Currently Selected:
San Lucas 11: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.