San Lucas 1
1
Ñewa, añpaꞌ ñeñthkaꞌyeña eꞌñe paꞌmother penña serrparñats
1-4Masheñe Teófilo, phapaꞌ peñoteñ awañmoꞌchapaꞌ paꞌnamen esokmañen ñeñth ateth etsotayeseꞌth Jesús acheñeneshesho ñeñth eꞌñe ñanom ameꞌñaya ña, amaꞌt themeꞌttsen yokpaꞌnaña ñeñthey oꞌ yameꞌñera yamha. Ñamha allempotheñ Jesúspaꞌ orrtana paꞌnamen acheñeneshaꞌ ñeñth entyesayeꞌth eꞌñe allameꞌtets. Ñetñapaꞌ eꞌñe entwoñeteꞌth allowen ñeñth ateth phaꞌyeseꞌth. Ñetñapaꞌ serrpareꞌtyeseteꞌth ateth oten Yompor poꞌñoñ. Atthothña eñotaterryetña yamha. Ñeñth ateth eñotatyenet ñetpaꞌ shonteꞌ acheñeneshaꞌ kellkaꞌyesetañ ñeñth ateth phosa Cristo allempo wapa. Ñeñthoꞌmarña napaꞌxhoꞌña eꞌñe pokteꞌ nenteñ oꞌch nekellkonaph eꞌñe ora allpon ñeñth ateth orrtatos Jesús, tharroꞌmar napaꞌ awañmoꞌchotheñ atarr nokthapeꞌcheñ oꞌch eꞌñe neñoch errothentheꞌña ñeñth eꞌñe poꞌñoxh ateth phaꞌyesosa Jesús. Ñeñthoꞌmarña theꞌ arrpaꞌ oꞌch eꞌñe neñotataph ora allpon ñeñth oꞌ etsotwa allochñapaꞌ atthoch eꞌñe peñotwer phamha ñeñth allpon yexhatenpetpaꞌ ñeñthpaꞌ eꞌñe poꞌñoxh ateth. Ñewa, arrpaꞌ ateth oꞌ etsotwa.
Ñewa, theꞌpaꞌ oꞌch neserrpareꞌtataph attho mellañotheñpaꞌ eñotatanet oꞌch eñalleta Juan ñeñthchaꞌ apatañtatsa Yomporekop
5Awath allempo añ amhchaꞌtarethtatseꞌth Herodes all anetso Judeo, eñall ñamha poesheñarr ñeñth judioneshaꞌ poꞌkorneshar. Ñeñthpaꞌ añ paꞌsoꞌcheñ Zacarías ñeñth xhokma yemtenana poꞌpotantañ kornaneshaxhno ñeñth otenet Abíasonaꞌtar ñeñth thorratseꞌth Yompor paꞌpakllo. Zacarías poethapor añ paꞌsoꞌcheñ Elisabet; ñapaꞌxhoꞌña korneshaphnor ñeñth poꞌmhreneñ pen Aarón ñeñth korneshatatseꞌth awath. 6Ñetña epsheñoꞌmaretpaꞌ Yomporñapaꞌ eꞌñe pokteꞌ entenanet ñeñth ateth penet ñet, eꞌñe kowen etsotweññañet ora poꞌñoñ ñeñth ateth anareth awathotheñ acheñeneshakop ñeñthchaꞌ ateth phowenet. Ñeñthoꞌmarña amaꞌt poesheñarrapaꞌ amach errothenoth otarethteto, “ama pokteyaye ñeñth ateth sepena.” 7Ñetpaꞌ ama eñalleto amaꞌt poesheñarra pakñeꞌther tharroꞌmar Elisabetpaꞌ ama achoyoreꞌtañeyaye. Amaꞌt ñamha poerrollar epsheñoꞌmaret oꞌ attha poꞌnmeꞌtwenet.
8-9Attheñapaꞌ xhap allempo thorrena allowen kornaneshaxhno ñeñth epoet parro yemtena Zacarías attho korneshatenet Yomporekop. Ñewa, allempopaꞌ allowen ñeñth korneshatatseꞌth Yomporekop, ñetñapaꞌ añ yexheteꞌth awoꞌch yellsheñeꞌchenet allowenet atthoch eñochet poꞌswertoth erraꞌtsenchaꞌ poesheñarrer ñeñthchaꞌ beꞌthosets Yompor paꞌpakllo allchaꞌ aꞌkrratan ñeñthchaꞌ eñmosathtatsa Yomporekop. Allempoña pamtharrpaꞌ aña orrtatsa Zacarías ñeñthchaꞌ beꞌthosets Yompor paꞌpakllo allchaꞌ aꞌkrratan ñeñthchaꞌ eñmosathtatsa Yomporekop. 10Ñewa, allempo xhap allempoch beꞌthosos poesheñarr Yompor paꞌpakllo shonteꞌ acheñeneshaꞌ ñetñapaꞌ allach thomxhaꞌtet aꞌyoth allchaꞌ maꞌyochrraꞌtoset. Amaꞌt allempo beꞌthosos Zacaríaspaꞌ attherach maꞌyochrraꞌtet aꞌyoth. 11Ñewa, Zacarías allempo sherbenan Yompor oꞌpono, allñapaꞌ machayothepaꞌtchaꞌ orrtoña Yompor poꞌmhllañotheñer. Arr thomos altar poꞌkowenroth, ñeñth altarpaꞌ allekma aꞌkrratenet ñeñth eñmosathtetsa Yomporekop, ñeñthpaꞌ attho sherbeteꞌth Yompor. 12Allempo orrtoña mellañotheñ, Zacaríasñapaꞌ atarr yoren, atarr nanak mechaꞌch. 13Mellañotheññapaꞌ ateth otosan Zacarías:
—Zacarías, amach peyorenatsto tharroꞌmar Yomporpaꞌ eꞌmoennaph ñeñth ateth penamoeñ pemaꞌyocheñoth. Ñeñthoꞌmarña theꞌ pethapor Elisabetpaꞌ eñalletaterranchaꞌ patherr asheñorr ñeñth eꞌñe pho pechemer, ñeñthñapaꞌ pesochchaꞌ Juan. 14Phapaꞌ atarrchaꞌ phokshena nanak. Shonteꞌch acheñeneshaꞌ ñeñthchaꞌ nanak phokshapretaya attho oꞌ eñalleta pechemer. 15Ñapaꞌ atarrchaꞌ asherben enteñ Yompor. Ñapaꞌ amach orrarñatheyaye, amaꞌt vinosapaꞌ amach orreñe. Amaꞌt ñamha paꞌnamen ñeñth aposaꞌtpotetsapaꞌ amach orreñe amaꞌt mamesha. Ñapaꞌ eꞌñech aña chorraya Parets Poekamkëñ. Amaꞌt allempotheñ pachor paꞌthoꞌtsen ñapaꞌ eꞌñech chorreña Parets Poekamkëñ.
16Allempoña mellañotheñpaꞌ alla otererr:
—Ñapaꞌ kowenchaꞌ kothapeꞌchaterran shonteꞌ israelenaꞌtarneshaꞌ allochñapaꞌ atthoch kothapeꞌcherret eꞌñe kowen Yomporekop ñeñthchaꞌ Poꞌpartseshar perret. 17Ñeñthña Juanpaꞌ ñeñthchaꞌña ñanom orrtatsa Yomporekop. Ñapaꞌ añchaꞌ awamenkath peneꞌ Yompor Poekamkëñ ateth peꞌth awath Elías ñeñth aꞌmhtayeꞌth Yompor poꞌñoñ. Allochñapaꞌ atthoch eꞌñe kowen amoꞌtstaterrana achemerethexhno poechemereshaꞌ. Allochñapaꞌ amaꞌt ñeñth athpareꞌtetsapaꞌ oꞌch ameꞌñaterranet ñeñth eꞌñe pokteꞌ es pets. Atthochña kothapeꞌchaterranet kowen, allochñapaꞌ atthoch agapoeret Partseshaꞌ ñerraꞌm esempoch orrta.
18Zacaríasñapaꞌ awoꞌ aꞌphthoꞌtan mellañotheñ, awoꞌ och:
—Taꞌ, ¿errothenochña neñoch eꞌñetheꞌ poꞌñoxh oꞌch eñalleta cheshatholl? Tharroꞌmar napaꞌ oꞌ nepoꞌnmeꞌten; nethaporpaꞌxhoꞌña eꞌñe atthekmay oꞌ atarr yepoꞌnmeꞌtwen.
19Mellañotheññapaꞌ alla otererr:
—Napaꞌ ñeñthen Gabrieletets ñeñthen sherbeneꞌ Yompor. Napaꞌ ña nellsenseneꞌ atthoch neꞌñoranaꞌtapha oꞌch neñotataph añ kowen ñoñets. 20Tharraña phapaꞌ ama phameꞌñenno ñeñth ateth noteneph, ñeñthoꞌmarña theꞌ phapaꞌ oꞌch phoꞌpanat, amach eshek peꞌñorerro thayotheñ tharrempowach allempoch eñalleta pechemer, allempochña peꞌñorerra. Tharroꞌmar poꞌñoxh etsoterrach ñeñth ateth oꞌ notwaph oꞌch xhap allempo onañchareth. Arrpaꞌ allowa ñeñth ateth ot mellañotheñ.
21Atthoꞌ ellapes Zacarías oꞌponopaꞌ acheñeneshaꞌñapaꞌ koweñet aꞌyoth ama xhaꞌnerro. Atthoꞌ koweñetpaꞌ otannaꞌtet:
—¿Esoꞌmartheꞌ amoꞌ xhaꞌnerroña Yompor paꞌpaklloth?
22Allempoña xhaꞌnerrpaꞌ ama eshkayeꞌ eñoranaꞌtwerraneto. Ñetñapaꞌ otyenet poeyoxhreto, ñatoꞌ xhotheꞌ es orrtoya Yomporekop ñeñthoꞌmartheꞌña atarr ellapes oꞌpono Yompor paꞌpakllo. Ñañapaꞌ ama eshkayeꞌ eñoranaꞌtwerraneto, pototha eñotatwerranet ñeñth ateth ent Yompor paꞌpakllo.
23Allempoña oꞌ xhap allponmat ñeñth attho sherbenet Yompor paꞌpakllo, Zacaríasñapaꞌ oꞌ awerr paꞌpakllo. 24Eꞌñe allponmatatsapaꞌ oꞌ axhomenta poethapor. Allempotheñña Elisabetpaꞌ ama moeno oꞌch orrterra acheñeneshesho. Amaꞌt oꞌ amnarmha arrorrpaꞌ ñañapaꞌ ama orrteno. Ñañapaꞌ ateth oten:
25—Theꞌñapaꞌ atarr kowen moeraꞌna Yepapar, allochñapaꞌ oꞌwañchaꞌ alloꞌna penknaꞌntatnennet tharroꞌmar napaꞌ otyennet moexhopenoꞌ.
Attho mellañotheñpaꞌ eñotatanet oꞌch eñalleta Jesús
26Allempoña oꞌ pechapmha arrorr axhomenta Elisabet, Yomporñapaꞌ oꞌ alla moeñerranerr poꞌmhllañotheñer ñeñthara Gabriel. Arr moeñe anetso Nazareto ñeñthara Galilea. 27Allempoña xhap Nazareto, allñapaꞌ orrtosana poesheñarr shopsheshaꞌ ñeñth ama aꞌphllaretheyaye. Ñewa, ñeñth shopsheshaꞌpaꞌ añ oꞌpatenaya yakma ñeñthpaꞌ añ paꞌsoꞌcheñ José, ñoꞌch yoreꞌ. Ñeñthña shopsheshaꞌ arroth eñalletña David poꞌmhrenñoth; ñeñthpaꞌ añ paꞌsoꞌcheñ María. 28Mellañotheñña allempo xhap eꞌñe ñeshopaꞌ ateth otos:
—Oꞌch noxha newomhchaꞌtoseph. Yompor eꞌñe poemoereñotheph phapaꞌ atarrchaꞌ koshaterreph, ñapaꞌ eꞌñe peshoꞌtsen. Yomporpaꞌ atarr bensareꞌtampeneph. Ello pemhtanaꞌtweñ allowen phakmaneshaꞌ attho bensareꞌtampenanet ñet.
29Allempo eꞌman ateth och mellañotheñ, ñañapaꞌ xha moññeꞌtacha, xha kothapeꞌch poeyoxhro:
—Taꞌ, ¿estheꞌ otenenña ñeñth ateth womhchaꞌtenen?
30Mellañotheññapaꞌ alla otererr:
—María, amach pemhchaꞌtatsto, Yomporpaꞌ atarr oꞌ morrenterrpha. 31Theꞌpaꞌ phaxhomentach, pechyoreꞌtchaꞌ ñeñthpaꞌ asheñorrchaꞌ. Ñeñthñapaꞌ pesochchaꞌ JESÚS. 32Ñeñthchaꞌ nanak amhchaꞌtarethtatsa. Otyesetchaꞌ ñapaꞌ ña Ñeñth Nanak Parets Poechemer. Pomporña ñeñthara Paretspaꞌ ñachña neꞌ amhchaꞌtareth ateth amhchaꞌtarethteꞌth paꞌtañ David. 33Attheña ñapaꞌ amhchaꞌtarethtach Jacob poꞌmhrenñekop ñeñthara israelneshaꞌ. Amaꞌt errponañapaꞌ amach wañerro ñeñth attho amhchaꞌtarethtena ña.
34Maríañapaꞌ ateth otapan mellañotheñ:
—Taꞌm ¿errothenothchaꞌña nechyoreꞌtña? Napaꞌ amaꞌt poesheñarra enkaneshaꞌ amarramtso yorennaꞌ.
35Mellañoteññapaꞌ alla otererr:
—Paretschaꞌkaꞌye Poekamkëñ pexhapoya. Ñeñth Nanak Parets poꞌwamenkpaꞌ aꞌpomamphsosephchaꞌ ateth ñerraꞌmrratheꞌ os phaꞌpomampeneꞌ. Ñeñthoꞌmarña cheshatholl ñeñthchaꞌ peꞌñalletatpaꞌ ñapaꞌ añach eꞌñe maꞌyoxhrosa ñeñth ateth moenen Parets. Otyesetchaꞌ ñapaꞌ ña eꞌñe Yompor Poechemer. 36Ñamha Elisabetña ñeñth phamoꞌts pepen, ñapaꞌxhoꞌña oꞌ thotana asheñorrotholl, amaꞌt oꞌ poꞌnmeꞌten. Ñamha amaꞌt oteñet moexhophpaꞌ theꞌñapaꞌ oꞌ pechapmha arrorr oꞌ axhomenta. 37Tharroꞌmar Yomporpaꞌ ama eñalle ñokop ñeñth atarr thorrapoꞌ enten.
38Allempoña Maríapaꞌ alla oterranerr mellañotheñ:
—Ñewa, napaꞌ eꞌñe pokteꞌ nenteñ oꞌch nesherber Yepapar ñeñth Nepartseshar nepen. Ñeñthpaꞌ atthetepaꞌch nokop ñeñth ateth photenen.
Allempoña mellañotheñpaꞌ oꞌ awerr.
Attho Maríapaꞌ emoꞌtenanaꞌ Elisabet ñeñth eꞌñe pamoꞌts pen
39-40Maríañapaꞌ allentha awoꞌ pomaꞌyorñekma oꞌch emoꞌtenanaꞌ Elisabet. All yexhenapaꞌ all shonteꞌ aspentharer allara Judeo. Allempoña xhap anetso all sechenapaꞌ beꞌthosos Zacarías paꞌpakllo, womhchaꞌtosan Elisabet. 41Ñañapaꞌ allempo eꞌmapan María ñeñth ateth womhchaꞌtospaꞌ poeꞌmarethollña ñeñth paꞌthoꞌtsenpaꞌ allenthepaꞌtchaꞌ pella. Pachorñapaꞌ eꞌñe chorreña Parets Poekamkëñ. 42Ñeñthña eñorateneꞌ, poksheñeshokmañen eñorena womenkpaꞌ ateth otapan María:
—Phapaꞌ oꞌ atarr koshaterreph Yepapar. Phapaꞌ oꞌ eꞌñe pemhtanaꞌtwe ora allowen yakmaneshaxhno attho koshatenanet ñet Yepapar. Ñamha Yepaparpaꞌ atarrchaꞌ bensareꞌtampennaph pechoyoretholl. 43Amaꞌt na Yepaparpaꞌ atarr koshatenen attho pemoꞌtenen amaꞌt ñeñtheph pachor pen ñeñthchaꞌ Yepartseshar yeperr. 44Tharroꞌmar eꞌñe allempokma neꞌmaponaph peñoñ ateth pewomhchaꞌtosen, neꞌmarethollpaꞌ eꞌñe poksheñeshothpaꞌ allenthepaꞌtchaꞌ pella natho. 45Phaña theꞌpaꞌ atarr kosheñtsoꞌtseneph tharroꞌmar phapaꞌ eꞌñe phameꞌñaꞌwoña ñeñth ateth otwenphaꞌ Yepapar. Ñeñthoꞌmarña ñeñthpaꞌ eꞌñech ateth etsoterra phokop.
46Maríañapaꞌ alla otererr:
—Theꞌñapaꞌ eꞌñech neyoxhrokmañen naꞌyeꞌchoxhtatoñ Yepapar.
47Nekamkëñowen atarr noksheña Yepapar ñeñth Yaꞌkeshphatañer yepen.
48Yepapar eꞌñe poemoereñothen ñapaꞌ entenen ama esoyayno, añana ñeñthen thorretsa ñokop. Tharraña theꞌpaꞌ allowen acheñeneshaꞌ ñeñthchaꞌ mererrtsa arr patsro ñetñapaꞌ atarrchaꞌ koshapreterrnet attho Yepaparpaꞌ oꞌ atarr koshaterren na.
49Tharroꞌmar ñapaꞌ ñeñth atarr awamenkathtetsa atthoña oꞌ orrtaton ñeñth nanak sherbets, ñeñthara Yepapar ñeñth otenet Ñeñth atarr nanak Parets.
50Allowen ñeñth amhchaꞌnaꞌtpoꞌ enteneꞌ Yepapar, ñañapaꞌ xhokmach atarr moererranet amaꞌt thayotheñ errponañowen amaꞌt allpon allowen acheñeneshaꞌ ñeñthchaꞌ mererrtsa arr patsro.
51Ñamha ñapaꞌ eꞌñe etsotwenan amaꞌt ñeñth atarr nanak echarr entyenet, ñamha allpon allowen acheñ ñeñth atarr asherben entyetsa, ñañapaꞌ eꞌñech pomnaren phowerranet.
52Ñamha ñeñth atarr awamenkath entyetsa ñañapaꞌ eꞌñech aꞌswatanrrortatwerranet alloth amhchaꞌtarethtenet. Tharraña ñeñth ama esosheꞌmayeꞌ entyetsopaꞌ ñetñapaꞌ Yepaparchaꞌ nowerrawet atthothchaꞌ amhchaꞌnaꞌtpoꞌ enter allowen acheñeneshaꞌ.
53Ñamha ñeñth nanak es palltaꞌyetsa, ñetñapaꞌ Yepaparchaꞌ esokmañen apwerrawet. Tharraña ñeñth atarr esokmaneñ es echyets, ñetñapaꞌ Yepaparchaꞌ poerratampeswerrawet, amach es anerreto amaꞌt koñeꞌtha. 54-55Yepaparpaꞌ añach xhokma yenpoen israelenaꞌtar ñeñth poeyochreshaꞌ pen ña. Amach poeserrano ñeñth ateth otaneꞌth awath yamoꞌmtayñeneshañ ñeñthchaꞌ ateth perranet ñamha allowen ñeñthchaꞌ poꞌmhreneñ perret. Eꞌñe ateth otaneꞌth awath Abraham poꞌmhrenñekop. Atthoch xhokma moerenanet amaꞌt errponowañen. Arrpaꞌ allowa ñeñth ateth axhotan María Yompor.
56Allempoñapaꞌ ñatoꞌ maꞌpmhatheꞌ arrorr alla aꞌpa Elisabetesho. Allothña Maríapaꞌ awerr paꞌpakllo.
Arrpaꞌ attho eñalleta Juan ñeñth apatañtatseꞌth Yomporekop
57Allempoña xhap allempoch emareꞌten Elisabet. Ñeñthña poeꞌmarpaꞌ asheñorrotholl. 58Allowen acheñeneshaꞌ ñeñth yexhetsa all ñesho ñamha allowen pamoꞌtseshaꞌ ñetñapaꞌ eꞌñe koshaprechet. Tharroꞌmar eñoteñet Yomporpaꞌ oꞌ orrtatoñ attho ñapaꞌ atarr moereña. 59Allempoña oꞌ posokmataꞌmoen ñeñthña asheñorrothollpaꞌ oꞌ tsorratholleꞌtaꞌmoeñet tharroꞌmar ñetpaꞌ atethkaꞌye yexhenet ñeñthet judioneshet.#1.59 Añ ñoñets “atsorrareth”, añ ñeñth otets ateth yexheꞌth judioneshaꞌ. Ñeñthpaꞌ ateth: Ñerraꞌm allempo eñalletena asheñorrotholleshaꞌ ñeñth eꞌñe judioneshaꞌpaꞌ añña pomporpaꞌ oꞌch tsorrateñet poꞌchtso. Ñewa, ñeñth tsorratenetpaꞌ emathollach oꞌch xhapaꞌmoen poꞌpsokmatño. Ñewa, poꞌchtso allchaꞌ tsorret asheñorrothollpaꞌ all eꞌñech potherethollo eꞌñe poꞌñoth parrmathollo. Allempopaꞌ añ sochetañ Zacarías oꞌch anmatoñetañ pompor paꞌsoꞌcheñ. 60Tharraña pachorpaꞌ otanet:
—Napaꞌ ama nemno oꞌch sesochon neꞌmar Zacarías. Napaꞌ añchaꞌ nesoch Juan.
61Allempoña acheñeneshaꞌpaꞌ ateth ochet:
—¿Esoꞌmareꞌt pemneñña oꞌch pesoch Juan tharroꞌmar amaꞌt poesheñarra phamoꞌtspaꞌ ama eñalle ñeñth sochetsa Juan?
62Allempoña acheñeneshaꞌpaꞌ eꞌñe pototheta aꞌphthoꞌtoñet ematholl pompor eschaꞌ sochanña poechemeretholl. 63Ñapaꞌxhoꞌña pototha eñotatan acheñeneshaꞌ oꞌch apet kellkatets allchaꞌ kellkan ñeñthchaꞌ sochan poechemeretholl. Allempoñapaꞌ apet kellkatets, allñapaꞌ ateth kellkaꞌ: “Añchaꞌ yesoch Juan.” Acheñeneshaꞌñapaꞌ attha kowanrrorchet. 64Eꞌñe allempokma Zacaríasñapaꞌ allentha eñorerra. Allorokma ayeꞌchoxhtaterran Yompor. 65Acheñeneshaꞌña ñeñth yexhetsa allpaꞌ allowenet atarr mechaꞌnaꞌteñet Yompor. Ñetñapaꞌ serrpareꞌtatannaꞌtyeset all aspentharero Judeo. 66Ñamha amaꞌt allowen ñeñth eꞌmareꞌtyeseꞌ ñetñapaꞌ kothapeꞌchyeset poeyoxhreto, ateth otyenet:
—Añ cheshathollpaꞌ poꞌñoxhchaꞌ atarr sherberran Yompor tsapathoneth.
Tharroꞌmar Yomporpaꞌ atarr moereña.
Attho Zacarías atarr axhotenan Yompor Parets
67Cheshathollña pompor ñeñth Zacaríaspaꞌ añ chorrenaya Parets Poekamkëñ ñeñthña eñoraterreꞌ Yomporekop ñeñthchaꞌ ateth perra amaꞌt esempo. Ñeñthpaꞌ ateth ot Zacarías:
68—Ayeꞌchoxhtaterrapoꞌch Yompor, ñeñthara ñeñth Poꞌpartseshar pen allowen israelneshaꞌ, tharroꞌmar theꞌñapaꞌ oꞌ orrtaterrnay poemoereña ñeñthchaꞌ yaꞌkeshphaterreꞌ ñeñthey poechemer pen.
69Ñapaꞌ oꞌ orrtatonay ñeñthchaꞌ aꞌkeshphatañterrtsa ñeñth atarr awamenkatheshaꞌ ñeñthara ñeñthchaꞌ eñalletatsa David poꞌmhrenñoth, ñeñthara David ñeñth atarr sherbhayeꞌth awath Yompor.
70Ñeñthpaꞌ awathotheñ ateth eñoratyesaneꞌth ñeñth aꞌmhtaꞌyesayeꞌth poꞌñoñ, amaꞌt allowen ñeñth eꞌñe maꞌyoxhraꞌyestseꞌth Partsokop.
71Amaꞌt ñamha allowen allpon ñeñth yeꞌmoñeꞌteneꞌ ñeñth amhchaꞌnoxhetyetsa yokop, ñachña yaꞌrroyataterreꞌ.
72Atthochña etsotaterrnay ñeñth ateth otaneꞌth awath yatañneshañ ñeñthchaꞌ attho xhokma moererrya. Attheña ñapaꞌ amach poeserrano ñeñth ateth aꞌpoktat awathotheñ yokop tharroꞌmar ñeñthpaꞌ eꞌñe Partseshoth aꞌpoktatarethta.
73Ñewa, añpaꞌ ateth pha allempo Yomporpaꞌ awath otan yatañ Abraham ñeñthchaꞌ ateth perrnay eꞌñe poꞌñoxh.
74Ñeñthpaꞌ ateth oteꞌth Yompor yokop amaꞌt ñeñth allpon ñeñth yeꞌmoñeꞌteneꞌ ñeñth amhchaꞌnoxhen yentyen ya, ñañapaꞌ ñach yaꞌrroyataterreꞌ. Allochña yapaꞌ oꞌwañchaꞌ yemhchaꞌnañoth yesherber Yompor.
75Atthoch yetsotoñ ñeñth eꞌñe pokteꞌ enten Parets allochñapaꞌ atthochña pokteꞌ enteney ñamha acheñeneshaꞌ attho eꞌñe kowen es yephaꞌyen eꞌñech tharrempowa esempowach yokrrena arr patsro.
76Theꞌpaꞌ oꞌch nechemeretholle notaph: Phapaꞌ oterrpetchaꞌ ñeñthephoꞌ ñeñthchaꞌ eñoranaꞌtena ñeñth nanak Parets. Tharroꞌmar phapaꞌ phanomchaꞌ orrtatsa atthoch phaꞌkowentatyesoñ allchaꞌ oñmos Partseshaꞌ.
77Ñeñthpaꞌ atthoch phokthapeꞌchater acheñeneshaꞌ eꞌñe kowen allochña ñetpaꞌ eshekchaꞌ aphretnarethterret poꞌchñaret atthoch aꞌkeshphatarethterret.
78Theꞌpaꞌ xhapchaꞌ allempoch Yompor eꞌñe poemoereñothey xhapaterrnaychaꞌ ñeñth wetsa entoth ñeñthchaꞌ yokthapeꞌchaterreꞌ eꞌñe kowen, ñeñthña kothaphñatserpaꞌ ñeñthchaꞌ yaꞌpoetarsamperreꞌ.
79Atthochña aꞌpoetarsamphsarethterra allowen acheñeneshaꞌ ñeñth chekmetoꞌtsaꞌyeneta, ñeñth ama eñotenaye Yompor, ñetñapaꞌ aña oꞌpatenawet rromoeñets ñeñthara koñcheñets. Ñeñth attho aꞌpoetarsamphsarethey ñeñthchaꞌña yeñotateneꞌ atthoch eꞌñe kowen yoksheñeshokmañen yeyxhena arr patsro. Arrpaꞌ allowa wañ attho Zacaríaspaꞌ axhotenan Yompor eꞌñe poksheñeshokmañen.
80Añña cheshatholl Juanpaꞌ alloꞌna sen atarretnomtsa. Poekamkëñothpaꞌ atarr awamenkathetnena. Ñañapaꞌ alla yexhena allaphar amayo tharrempowa allempo orrta israelenaꞌtarneshesho.
Currently Selected:
San Lucas 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.