San Juan 8
8
Allempo poesheñarr koyaneshaꞌ wapachet Jesúsesho ñeñth chetapreteneꞌ pakma poerrollar
1Jesúsñapaꞌ awerr Olivophno. 2Tsapathña poꞌpocheño eꞌñe awathekma alla xhenerr Parets paꞌpakllo. Shonteꞌ acheñeneshaꞌ alla waxheneterr ñesho. Ñañapaꞌ anorros allña yexhatenaneterr. 3Ñeñthña etsotayenayeñ ñoñets ñeñth ateth anareth judioneshakop ñamha fariseoneshaꞌ ñetñapaꞌ wapatoñet poesheñarr koyaneshaꞌ ñeñth rromoet all eñchet chetapretenan poꞌpsheñeñ pakma poerrollar. Nosñañet eꞌñe rroxho. 4Allñapaꞌ ateth otoset:
—Maestro, añ koyaneshaꞌpaꞌ oꞌ yentaprech eꞌñe all chetapretenan pakma poerrollar. 5Moisés poꞌñoñ ñeñth ateth anareth ñeñthpaꞌ ateth oteney, añpaꞌ xhoch yarrolleꞌch. Theꞌña phapaꞌ ¿errotheꞌtchaꞌña photeyña pha?
6Ñeñthpaꞌ tharroꞌmara ateth otoset ñatoꞌrraña eñorachet ñeñth ama pokteyaye allochñapaꞌ atthoch aꞌmethampeñetaꞌ. Jesúsñapaꞌ allentha moꞌkapaꞌ oꞌ kellkan pats potapho. 7Ñetñapaꞌ alla aꞌphthoꞌtereterr. Jesúsña echanterrtsapaꞌ ateth otanet:
—Ñerraꞌm erraꞌtsenothestheꞌ ama eñalle soꞌchñarpaꞌ sarrolleꞌchkaꞌye sanom.
8Alla moꞌkërrerr oꞌ alla kellkërranerr pats potapho. 9Ñetñapaꞌ oꞌ eꞌmet ateth otanet Jesúspaꞌ eꞌñe akophotheñ awanemwerret eꞌñe poesheñaꞌttset. Añ ñanom awanerrtsa poꞌnmeneshaxhno, atthothapaꞌ oꞌ ñapthamha Jesús epoet koyaneshaꞌ. 10Jesúsña echanterrerrpaꞌ ateth otan koyaneshaꞌ:
—Noxheshachaꞌ, ¿erroꞌtsaꞌyenetaꞌtña? Amaꞌt poesheñarrotheta ñetpaꞌ areꞌtchaꞌña koñchatape.
11Ñañapaꞌ ateth otan Jesús:
—Ama, Ayochreshathe, eseshayeꞌ nekoñchataye.
Jesúsñapaꞌ alla otererr:
—Napaꞌxhoꞌña amach nekoñchatape. Theꞌña ñerraꞌm awerrephpaꞌ amach alloꞌna ateth pephaꞌneno ñeñth amaꞌt mamesha ama pokteyaye.
Jesúspaꞌ ña aꞌpoetarsampeneꞌ acheñeneshaꞌ pokthaphña añe patsro
12Jesúsña poꞌpocheñopaꞌ serrpareꞌtaterranerr acheñeneshaꞌ, ñeñthpaꞌ ateth oterraneterr:
—Napaꞌ na ñeñthen aꞌpoetarsampeneꞌ acheñeneshaꞌ pokthaphña añe patsro. Eseshaꞌch noktherreꞌ oꞌwañchaꞌ alloꞌna kothapeꞌchatnenanet pokthaphña ñeñth atarr sosyaꞌtsañ; ñeñthpaꞌ chekmeta chopeñeꞌchyenet. Ñetñapaꞌ Yomporchaꞌ poꞌkowenño korrerret ñeñthara ñeñth poetarets.
13Fariseoneshaꞌñapaꞌ ateth ochet:
—Phapaꞌ phañeña aꞌpothetsa ñeñthoꞌmarña attho phaꞌpothenapaꞌ ama sherbeno.
14Jesúsñapaꞌ oterraneterr:
—Tharraña amaꞌt nañeña aꞌpothetsapaꞌ attho naꞌpothenapaꞌ eꞌñe sherben. Tharroꞌmar napaꞌ neñoteñ alloth nowapa ñamha neñoteñ allchaꞌ neserr. Sañapaꞌ ama señotenno alloth nowapa ñeñthoꞌmarña ama señoteñe allchaꞌ neserr. 15Sa sotatseñpaꞌ eꞌñe orrena ateth sepena, arromñatheneshasa ateth petsa. Napaꞌ amaꞌt poesheñarrapaꞌ ama notatseꞌtenaneto eꞌñe attha. 16Tharraña ñerraꞌm esempo naꞌmethenanet ñeñth ateth nentapretyenanet ñeñthpaꞌ eꞌñe poꞌñoxh ateth tharroꞌmar napaꞌ ama naptheyeꞌ es nephaꞌyeno, napaꞌ xhokmaña epan Apa ñeñth nellsenseneꞌ. 17Ñoñets ñeñth ateth anareth ñeñth sechen sa, ñeñthpaꞌ ateth oten: Ñerraꞌm epsheña aꞌpotheneꞌ eꞌñe atthekma ñeñthpaꞌ eꞌñekaꞌye poꞌñoxh otenet. 18Napaꞌ ñeñth ateth naꞌpothena na, Apaña ñeñth nellsenseneꞌ ñakaꞌyeña naꞌpotheneꞌña nokop.
19Ñetñapaꞌ ateth otereterr:
—¿Erroꞌtsenaꞌtña pha Phompor?
Jesúsñapaꞌ ateth oterraneterr:
—Amaꞌt napaꞌ ama señotenno, Apapaꞌxhoꞌ ama señoteñe. Ñerraꞌm señotennoñ na Nomporeꞌnatheꞌ señoteneñ.
20Allempopaꞌ ateth otanet Jesús all allekma aññoꞌtenet kelle ñeñth Yomporekop allempo yexhatanet allara Parets paꞌpakllo. Tharraña amaꞌt poesheñarra ama eseshayeꞌ rromaye tharroꞌmar ama xhenaꞌ allempoch ñeñth poktetsa ñokop oꞌch rromoet.
Allempo Jesús otanet allchaꞌ serr ñapaꞌ acheñeneshaꞌñapaꞌ amach errothenoth xhapoeto eꞌñe allempokma
21Allempoña Jesúspaꞌ ateth oterraneterr:
—Napaꞌ oꞌch awerren, sapaꞌ seꞌnerrenchaꞌ. Sapaꞌ orach ochñarethes serromwa. Allchaꞌ neserrpaꞌ sañapaꞌ amach sexhapo.
22Judioneshaꞌñapaꞌ ateth otannaꞌtyeset:
—Taꞌm ñapaꞌ oꞌch moetsa ñañeña, ¿ñeñthoꞌmartheꞌ ateth oten allchaꞌ serrpaꞌ yañapaꞌ añoꞌch yexhapo?
23Ñañapaꞌ alla oterraneterr:
—Sapaꞌ alla ayexhkañas arr patsro. Nañapaꞌ entoꞌmarneshan. Sapaꞌ patsoꞌmarneshasa, nañapaꞌ ama patsoꞌmarneshayayno. 24Napaꞌ oꞌ notas sapaꞌ orach ochñarethes serromwa tharroꞌmar ñerraꞌm amach sameꞌñerrno na ñeñthen peretneneꞌ ochñarets, poꞌñoxh sapaꞌ orach ochñarethes serromwa.
25Ñetñapaꞌ ateth otereterr:
—Phapaꞌ poꞌñoxh ¿eseshapeꞌtña?
Jesúsñapaꞌ alla oterraneterr:
—Napaꞌ ñeñthenkaꞌye poꞌñoxh xhokma soteneꞌ. 26Atarr nanak palltena xhokmach notenes ateth sepena sa, shonteꞌch neños añekop ateth nentyen. Tharraña ñeñth nellsenseneꞌ ñapaꞌ eꞌñe poꞌñoxh ateth oten ña. Napaꞌ añkaꞌyeña neꞌñoreññaña acheñeneshaꞌ arr patsro ñeñth ateth neꞌmoeññañ Apa.
27Ñetñapaꞌ ama eseshaꞌ xhapaweto poeyoxhreto ñeñth ateth otenanet Pomporekop ñeñth atarr Parets. 28Jesúsñapaꞌ alla oterraneterr:
—Ñerraꞌm esempoch sapaꞌ sechantamphsen eno korsocho na Ñeñthen Acheñetosetspaꞌ allempochña xhaponasa seyoxhro napaꞌ ñeñthen eꞌñe poꞌñoxh xhokma soteneꞌ. Xhaponasach ñamha napaꞌ ama es nepeno eꞌñe notha, añña neꞌñorena ateth yexhatenen Apa. 29Ñeñth nellsenseneꞌ ñapaꞌ eꞌñe parroꞌtsenen. Ama aꞌmontsenno, tharroꞌmar napaꞌ eꞌñe xhokma ateth nepena ñeñth moenen ña.
30Allempo ateth serrpareꞌtatenanet allempopaꞌ shonteꞌ ameꞌñaya all.
Attho ñeñth poechemer pen Yompor ñetñapaꞌ atarr kowenoꞌtsaꞌyenet; ñeñthña ama poechemer peno Yompor, ñetñapaꞌ poꞌchñara tarwasatenawet eꞌñe attha
31Allempoña Jesúspaꞌ ateth otan judioneshaꞌ ñeñth ameꞌñenaya ña:
—Ñerraꞌm xhokma sokthapeꞌchon neñoñ poꞌñoxhpaꞌ neyochreshaꞌch nepenes. 32Allempopaꞌ señoterrchaꞌ ñoñets ñeñth eꞌñe poꞌñoxh Yompor poꞌñoñ. Ñeñthña ñoñets poꞌñoxhpaꞌ toramperreschaꞌ eꞌñech kowenoꞌtsenes.
33Ñetñapaꞌ ateth otereterr:
—Yapaꞌ Abrahamkaꞌye poꞌmhrenñey. Amaꞌt awatha yapaꞌ amaꞌt poesheñarrotheyapaꞌ ama ewankaretheye atthoch eseshaꞌ yetarwasateꞌ eꞌñe attha. Esoꞌmartheꞌ phañapaꞌ photeneyña atoramphsaretheyoꞌch.
34Jesúsñapaꞌ alla oterraneterr:
—Poꞌñoxhkaꞌye notenes: Allowen ñeñth ochñaꞌtareꞌtetspaꞌ poꞌchñara wankënawet, ñetñapaꞌ poꞌchñara tarwasatenawet eꞌñe attha. 35Ñeñth atarwasatareth eꞌñe attha amach xhokmayeꞌ yexherro eꞌñe parro epoet pamoꞌmteꞌ. Tharraña na ñeñthen Poechemeren xhokma eꞌñe neyxhena epan Namoꞌmteꞌ errponañowen. 36Ñeñthoꞌmarña na ñeñthen Poechemeren ñerraꞌm na setoramperreꞌ sapaꞌ atoramphsaretheschaꞌ eꞌñe poꞌñoxh, amach alla tarwasaterrseꞌthe soꞌchñar. 37Na poꞌñoxhpaꞌ neñotenes sapaꞌ poꞌmhrenñeseñ Abrahampaꞌ tharraña sapaꞌ aña semnen oꞌch semtsan. Tharroꞌmar neñoñpaꞌ amaꞌt mameshapaꞌ ama xhennaso sa seyoxhro. 38Napaꞌ añ neñeñ ñeñth ateth nentapreteñ Apa. Sapaꞌxhoꞌña aña ateth sepen ñeñth ateth seꞌmapreteñ ñeñth sompor sepen.
39Alla otereterr:
—Ya yatañpaꞌ Abrahamkaꞌye.
Jesúsñapaꞌ ateth oterraneterr:
—Sapaꞌ ñerraꞌm poꞌñoxh Abraham poꞌmhrenñeseñ sokthapeꞌcheneñtheꞌ ateth eꞌñe kowen kothapeꞌcheꞌth Abraham. 40Tharraña sa theꞌpaꞌ xha soꞌpatenna oꞌch semtsan na ñeñthen seserrpareꞌtateneꞌ ñoñets ñeñth eꞌñe poꞌñoxh ñeñth ateth neꞌmoeññañ Yompor. Abrahampaꞌ amakaꞌ attheyeꞌ peꞌthe. 41Sapaꞌ eꞌñe aña sokthapeꞌchen ateth pena sompor.
Ñetñapaꞌ alla otereterr:
—Yapaꞌ amakaꞌye ellapnaneshotheyeꞌ yeꞌñalleto. Eꞌñe ñaptha Yompor yepeñ ñeñthara Parets.
42Jesúsñapaꞌ alla oterraneterr:
—Ñerraꞌm poꞌñoxh Sompor sepeñeñ Parets atarrtheꞌ semorrentennañ na tharroꞌmar napaꞌ Partseshothkaꞌye nowapa oꞌ nexhap arr. Napaꞌ amakaꞌye nothayeꞌ nowapo, napaꞌ Yomporña nellsenseꞌ. 43Esoꞌmareꞌtña sapaꞌ ama xhennasoña seyoxhro ñeñth notenes. Ñatoꞌ tharroꞌmartheꞌña ama semno oꞌch seꞌmhñoten ñeñth ateth notenes. 44Sapaꞌ oneñethakaꞌye ñeñth sompor sepen. Ñeñthoꞌmarña sapaꞌ aña semnen oꞌch sepha ñeñth moenen sompor. Ñapaꞌ awathotheñ eꞌñe paꞌmothrotheñ amtsañta. Ñapaꞌ amaꞌt mameshapaꞌ ama eñoraꞌpenoña Yompor poꞌñoñ ñeñth eꞌñe poꞌñoxh tharroꞌmar ñoñets ñeñth eꞌñe poꞌñoxhpaꞌ amakaꞌye atanenoña ña poeyoxhro. Ñerraꞌm xho eñorenapaꞌ, shekëñtsach eñorena tharroꞌmar ñapaꞌ eꞌñe shekëñtsa eñoten. Poꞌñoxh sekëñetspaꞌ pomporkaꞌ penanña oneñeth. 45Tharroꞌmar napaꞌ añ notenes ñeñth eꞌñe poꞌñoxh sañapaꞌ amaña sameꞌñenno. 46Amaꞌt poesheñarrothesa sa, napaꞌ amach errothenoth sotno napaꞌ eñalloꞌ noꞌchñar. Attho napaꞌ añ notenes ñeñth eꞌñe poꞌñoxh esoꞌmareꞌtña sañapaꞌ ama sameꞌñenno. 47Erraꞌtsentheꞌ Yomporenaꞌtarpaꞌ ñetñapaꞌ xhochkaꞌye eꞌmhñoteññañet Yompor poꞌñoñ. Ñeñthoꞌmarña sapaꞌ ama seꞌmhñoteññañe poꞌñoñ, amakaꞌye Yomporenaꞌtareyayso.
Allempo Cristopaꞌ ateth otanet: Allempo ama eñalletenaꞌ Abraham, nañapaꞌ eñallana
48Judioneshaꞌñapaꞌ ateth otereterr:
—Eꞌñe poꞌñoxh ateth yoteneph, phapaꞌ samarioꞌmarneshaph, oneñetha pechorrenaya.
49Jesúsñapaꞌ oterraneterr:
—Napaꞌ ama xhoyeꞌ chorrenno oneñeth. Napaꞌ atarr nanak nemhchaꞌnaꞌteñ Nompor Parets. Sañapaꞌ ama semhchaꞌnaꞌtenno na. 50Napaꞌ ama añeyeꞌ neꞌneno atthoch nekowentata nañeña. Eñallña ñeñth nekowentateneꞌ na. Ña eñoretsa ateth es entyen arr patsro. 51Poꞌñoxhkaꞌ notenes: Ñerraꞌm eseshaꞌ eꞌñe kothapeꞌcherreꞌ neñoñpaꞌ ñetña amaꞌt awathapaꞌ amach eꞌñe poktakma rromoerreto.
52Judioneshaꞌñapaꞌ alla otereterr:
—Theꞌña poꞌñoxh yapaꞌ oꞌ yeñotaph phapaꞌ xha chorrenpha oneñeth. Amaꞌt Abrahampaꞌ oꞌ rromoen ñamha ñeñth aꞌmhtaꞌyesayeꞌth Yompor poꞌñoñ ñeñthpaꞌxhoꞌña oꞌ kollaꞌwenet. Theꞌña phapaꞌ ateth photeney eseshoꞌch kothapeꞌcherreꞌ peñoñpaꞌ amaꞌt awathapaꞌ añoꞌch rromoerreto. 53Phapaꞌ xhatheꞌ photenapañ ellotheꞌ pemhtaneñ attho amhchaꞌtarethteꞌth Abraham amaꞌt ñapaꞌ oꞌkaꞌye rromoen. Ñeñth aꞌmhtaꞌyesayeꞌth Yompor poꞌñoñpaꞌ ñetpaꞌxhoꞌña oꞌ kollaꞌwenet. Phapaꞌ xhatheꞌ photenapañ amatheꞌ arromñatheshayaype.
54Jesúspaꞌ ateth oterraneterr:
—Ñerraꞌm na kowentatetsa nañeña, nekowentateña eꞌñe napaꞌ amatheꞌ es sherbeno. Nomporpaꞌ ña nekowentateneꞌ ñeñthara ñeñth soteneñ Seyompor-roꞌ sepeñ samha. 55Sapaꞌ amakaꞌye señoteñe tharraña napaꞌ neñoteñkaꞌye. Ñerraꞌm na otetseñ ama neñoteñe napaꞌxhoꞌña attheneñtheꞌ ñerraꞌm sa, xhatheꞌ neshkareꞌtensoñ. Napaꞌ eꞌñe poꞌñoxh neñoteñ ñeñthoꞌmar xhokma nokthapeꞌcheññañ poꞌñoñ. 56Abraham ñeñth sa satañpaꞌ atarr nanak kosha allempo eñoch oꞌ xhap allempo ñeñth poktetsa nokop oꞌch nowapa arr patsro. Allempoña eñoch napaꞌ oꞌ nexhap arr patsro atarr nanak kosha.
57Judioneshaꞌñapaꞌ alla otereterr:
—Phapaꞌ ama pechenaꞌ amnaroch xharraꞌ pecharña phañapaꞌ esoꞌmareꞌtña photeneyña phapaꞌ penteroꞌ Abraham, ñeñthpaꞌ awathrramcheꞌ korreꞌth.
58Jesúsñapaꞌ alla oterraneterr:
—Poꞌñoxhkaꞌ napaꞌ oꞌch notas: Ama eñalletenaꞌña Abraham, nañapaꞌ eñallana.
59Ñetñapaꞌ allentha chetet mapoeꞌpaꞌ oꞌch rrolleꞌchetañ tharraña Jesúsña aꞌnawa xhaꞌnerr Parets paꞌpakllothpaꞌ oꞌ awerr oꞌ sowanerranet.
Currently Selected:
San Juan 8: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.