San Juan 6
6
Allempo Jesúspaꞌ rratenan shonteꞌ acheñeneshaꞌ; ñeñthña acheñeneshaꞌpaꞌ alloꞌtsen amnaroch mil
(Mt. 14.13-21; Mr. 6.30-44; Lc. 9.10-17)
1Allempoña Jesúspaꞌ awoꞌ yomhtaꞌn saꞌp Galileaso, ñeñthara saꞌp otenet Tiberias. 2Allñapaꞌ kothaꞌneñ shonteꞌ acheñeneshaꞌ tharroꞌmar ñetpaꞌ oꞌ entwoñet poꞌpartsoña attho aꞌkrratyerran allowen ñeñth atsnaꞌtyets. 3Oꞌña xhap yomhtaꞌn Jesúsñapaꞌ awos aspentho, allña anorros epoet poeyochreshaꞌ. 4Allempopaꞌ oꞌ xhapmoch pascuapo allempoch alla kosherrerr judioneshaꞌ. 5Jesúsña kowatsa aꞌyopaꞌ entapan shonteꞌ acheñeneshaꞌ ñeñth onaxhets ñeshoneth. Allempoñapaꞌ ateth otan Felipe:
—Errawachkaꞌ yerañthaña pantheꞌ ñeñthchaꞌ rros acheñeneshaꞌ ñeñth oꞌ waxhaꞌta.
6Ñewa, Jesúspaꞌ eꞌñe poꞌtomña ateth ot tharroꞌmar ñapaꞌ eñoteñ atethchaꞌ pha. 7Felipeñapaꞌ ateth och:
—Amaꞌt epoch xharroch xharraꞌ denario#6.7 Denariopaꞌ kelle ñeñth allpon tsaꞌtenet pamtharr ñeñth tarwasets all paꞌnyo. alloch yerañtha panpaꞌ amaꞌt poeshmetathollapaꞌ amatheꞌ rraꞌyeseto.
8Poeyochreshaꞌña Andrés ñeñth paꞌmoꞌnasheñ Simóm Pedropaꞌ ñañapaꞌ ateth och:
9—Arr poesheñarr wepoeshachorpaꞌ echenankaꞌye amnar pan ñeñth cebada ñamha epa kak. Atthapaꞌ amatheꞌ yepataneto, acheñpaꞌ shonteꞌkaꞌye.
10Jesúsñapaꞌ ateth otanet:
—Theꞌpaꞌ sotanet anorrxhaꞌtetepaꞌ.
Ñewa, allpaꞌ eꞌñe kowen emmoꞌraten pasetmaꞌ. Ñetñapaꞌ anorrxhaꞌtet. Yakmaneshaꞌpaꞌ ñatoꞌ amnarochtheꞌ mil eñall. 11Jesúsñapaꞌ chetan panpaꞌ parasyosoꞌtampes, allempoñapaꞌ apan poeyochreshaꞌ. Poeyochreshaꞌñapaꞌ epatyeset allowen acheñeneshaꞌ ñeñth anorrxhets all. Atthekma pha allempo apaꞌyesanet ñamha kak. Allowenetpaꞌ eꞌñe agapwawet ñeñth allpon moenaꞌyeset. 12Allempoña oꞌ rrallmeꞌchwetpaꞌ allowenetpaꞌ eꞌñepaꞌtchaꞌ yetrraꞌtwawet. Eꞌñe yetwawetpaꞌ Jesúsñapaꞌ ateth oterranerr poeyochreshaꞌ:
—Theꞌpaꞌ oꞌch saꞌyapaxherr ñeñth shotnaꞌtyets ñeñth saꞌpchatyes allochñapaꞌ amach es pertatso.
13Allempoña aꞌyapaxherret ñeñth shotaꞌtatyeset xhepaꞌtchaꞌ chorrats xharraꞌ poechena epa kañther ñeñth aꞌpchatet all rratanet amnar pan cebada. 14Attho orrtatanet poꞌpartsoña acheñeneshaꞌñapaꞌ ateth otyeset:
—Añña poꞌñoxhpaꞌ ñeñthkaꞌye aꞌmhteneꞌ Yompor poꞌñoñ ñeñth atarr yekwen oꞌch wapa añe patsro.
15Jesúsñapaꞌ eñotanet ñetpaꞌ añ moenenet oꞌch wapoñetpaꞌ oꞌch rromoset oꞌch noset ñeñthchaꞌ paꞌmhchaꞌtarether pet. Ñeñthoꞌmarña Jesúspaꞌ aꞌnawa awerr all aspentho eꞌñe ñapoeth.
Attho Jesúspaꞌ eꞌñe kowen chopeꞌchnen enoth oño
(Mt. 14.22-27; Mr. 6.45-52)
16Allempoña ellerren poeyochreneshaꞌñapaꞌ awanerret saꞌpatophño. 17Aꞌtaxhaꞌtwerret poꞌnoñthopaꞌ oꞌch awamperret yomhtaꞌn, Capernaumoneth. Allñapaꞌ alla chekmetamphset. Jesúsñapaꞌ ama werraꞌ all alloꞌtsaꞌyenet. 18Allñapaꞌ orrnotampesnomoet, saꞌpñapaꞌ xha emoꞌyarerta. 19Ñetñapaꞌ echotnomoet saꞌp amnar amapaꞌ pechaptheꞌ kilómetro allñapaꞌ machayothepaꞌtchaꞌ entapet Jesús chopeꞌchnen enoth oño. Oꞌ allameꞌttsamha phan noñth. Ñetñapaꞌ xhepaꞌtchaꞌ mechaꞌtapet. 20Tharraña ñapaꞌ ateth otosanet:
—Nakaꞌye oꞌ nowapa, amach attha semhchaꞌtatstapno.
21Ñetñapaꞌ moeneñetañ oꞌch agapapet noñthoth, eñotostsetpaꞌ oꞌ xhapña noñth yomhtaꞌn all sechenet.
Allempo acheñeneshaꞌpaꞌ eꞌneretaꞌ Jesús
22Tsapathña acheñeneshaꞌ ñeñth alla aꞌpatsa yomhtaꞌn ñetpaꞌ eñoteñet eꞌñe pathrra noñth allo aꞌtaxhaꞌt Jesús poeyochreshaꞌ ñamha Jesúspaꞌ enteñet amakaꞌ aꞌtapo noñtho epoet poeyochreshaꞌ eꞌñe ñapthochayeta awanmoet. 23Tharraña noñthexhnoñapaꞌ xhokma waxhena Tiberiasoth, oꞌ xhapoet allameꞌtets all rret ellerro pan ñeñth parasyosoꞌtampes Partseshaꞌ Jesús. 24Allempoña acheñeneshaꞌ ñeñth alloꞌtsen ñetñapaꞌ oꞌwañ eñchet Jesús poeyochreshowen. Ñetpaꞌxhoꞌña allentha aꞌtaxhaꞌtet ñamet noñtho, awamphset Capernaumoneth, oꞌch eꞌneretaꞌ Jesús.
Jesúspaꞌ ña yokrramh yepen yekamkëñekop alloch eꞌñe yokrrena
25Allempoña entoset yomhtaꞌnpaꞌ ateth otoset:
—Maestro, ¿esempoꞌtña pexherrña pha arrma?
26Jesúsñapaꞌ ateth otapanet:
—Na poꞌñoxhpaꞌ oꞌch notapas, sapaꞌ amakaꞌye añekpayeꞌ seꞌnenno attho oꞌ norrtatonas nepartsoña. Sapaꞌ añekpakaꞌyeña seꞌnenen attho oꞌ nerratwas pan oꞌ eꞌñe seyetwa. 27Theꞌpaꞌ oꞌch notas, sapaꞌ amach aña semaꞌyoxhratsto yokrramh ñeñth eꞌnwapoꞌ. Añchaꞌña semaꞌyoxhra sokrramh ñeñth ama eꞌnwapawoyaye; ñeñthña alloch sapaꞌ korretsasach soksheñeshokmañen eꞌñe thayotheñ amaꞌt errponañowen. Ñeñthña sokrramhpaꞌ nach sapoerreꞌ Ñeñthen Acheñetosets tharroꞌmar Apapaꞌ oꞌ llesenserren na Ñeñthen Acheñetosets arr patsro.
28Acheñeneshaꞌñapaꞌ ateth otereterr:
—Errothenwachkaꞌ yephaña ñeñth kowen enten Yompor.
29Jesúsñapaꞌ ateth oterraneterr:
—Ñeñth kowen enten Yomporpaꞌ oꞌch sameꞌñaꞌna na ñeñthen llesensen.
30Ñetñapaꞌ ateth otereterr:
—Errothenothwachkaꞌ pegateyña pepartsoña ñeñthchaꞌ yentpaꞌ atthothchaꞌ yameꞌñapha. Phapaꞌ eswañakaꞌ petsoten. 31Ya yatañneshañpaꞌ rraꞌyeseteꞌth ñeñth maná all amayo atethkaꞌye anwareth Yompor poꞌñoñ awathotheñ: “Rratyesaneteꞌth pan ñeñth apaneteꞌth Yompor poeꞌntañoth.”
32Jesúsñapaꞌ alla oterraneterr:
—Eꞌñe poꞌñoxh oꞌch notas: Ama Moisésoyeꞌ apaweteꞌtheña pan ñeñth wetsa entoth. Nakaꞌye Nompor sapoeneꞌña ñeñth eꞌñe poꞌñoxh sokrramh sepen. Añ sokrramhpaꞌ entothña wena. 33Naña sokrramh sepen ñeñthen oꞌ apoerres Nompor, napaꞌxhoꞌña entoth nowapa Yomporeshoth allochñapaꞌ acheñeneshaꞌña arr patsropaꞌ ñetñapaꞌ korretsetach.
34Ñetñapaꞌ ateth otereterr:
—Ayochreshathe yapaꞌxhoꞌña xhokmach phapoey ñeñth korramets.
35Jesúsñapaꞌ alla oterraneterr:
—Napaꞌ na korramhtsotets alloch eꞌñe sokrra. Eseshaꞌch wapatsa nesho ñetña amaꞌt awathapaꞌ amach alla cheporrerreteꞌthe. Eseshaꞌch nameꞌñerraya na ñetña amaꞌt awathapaꞌ amach alla oñpaꞌterreteꞌthe. Ñewa, ñeñthpaꞌ añ notenes, eseshaꞌch nameꞌñerraya na ñetñapaꞌ xhokmach eꞌñe kosherret poeyoxhreto, amaꞌt awathapaꞌ amach alla es eꞌnerreteꞌthe. 36Tharraña napaꞌ oꞌ notwas: Sapaꞌ oꞌ sentnoñ amaña sameꞌñenno. 37Allowen acheñeneshaꞌ ñeñth oꞌpatatenna Apapaꞌ ñetñapaꞌ ameꞌñerrnetchaꞌ. Eseshaꞌch nameꞌñerraya ñetñapaꞌ amach alla newaporeꞌterraneto. 38Tharroꞌmar napaꞌ ama añekpayeꞌ nowapoña entoth atthoch oꞌch aña ateth nephos ñeñth nemnen na. Napaꞌ añekopña nowapa oꞌch ateth neperr ñeñth ateth moenen Nompor ñeñth nellsenserreꞌ. 39Ñeñthpaꞌ ateth moenen Nompor ñeñth nellsenserreꞌ: Amachña xha naꞌchenkatereña acheñeneshaꞌ ñeñth ora allpon oꞌpatatenna na, xhochña ello netantaterrñañ esempowañen. 40Añmapaꞌ ñeñthña moenen Nompor: Erraꞌtsenchaꞌ neñoterreꞌ ñerraꞌm ameꞌñerrnetchaꞌ na ñeñthen Yompor Poechemeren, ñetñapaꞌ korretsetach poksheñeshokmañen thayotheñ amaꞌt errponañowen. Ñetñapaꞌ xhokmach netantaterranet esempowañen.
41Attho Jesúspaꞌ otenanet, “Napaꞌ na korramhtsotets ñeñthen wapatsa entoth”, judioneshaꞌñapaꞌ pokwanaꞌteñothet otatseꞌtyeñet. 42Ñeñthpaꞌ ateth otyeset:
—Añmapaꞌ añakaꞌye Jesús, José poechemer, ñeñth pompor ñamha pachor eꞌñekaꞌye yechmeꞌteñ. Theꞌñapaꞌ esoꞌmareꞌtña oten ñapaꞌ entothoꞌ wapa.
43Jesúsñapaꞌ ateth otanet:
—Sapaꞌ amach attha sotatseꞌtannaꞌtyesatsto. 44Amaꞌt eseshapaꞌ amach errothenoth ameꞌñerrneto ñerraꞌm Nompor ñeñth nellsenseneꞌ ñerraꞌm ña ama kothapeꞌchaterraweto kowen. Ñetñapaꞌ netantaterranetchaꞌ esempowañen. 45Ateth kellkëꞌth ñeñth aꞌmhtayeꞌth Yompor poꞌñoñ awath, poꞌkellkopaꞌ ateth anwareth: “Allowenetpaꞌ Yomporchaꞌña eñotaterrawet.” Allowen ñeñthchaꞌ eꞌmhñoterreꞌ Nompor atthoch kowen kothapeꞌchaterranet, ñetñapaꞌ nachña ameꞌñerret.
46‘Amaꞌt eseshapaꞌ ama poentareto Apa. Napthaña na ñeñthen wapatsa Yomporeshoth nentarkaꞌyeña Apa. 47Eꞌñe poꞌñoxh notenes: Eseshaꞌch nameꞌñerraya ñetñapaꞌ korretsetach poksheñeshokmañen thayotheñ eꞌñe errponañowen. 48Napaꞌ na korramhtsotets alloch eꞌñe sokrra. 49Satañneshañpaꞌ amaꞌt rraꞌyeseteꞌth ñeñth maná all amayo, ñetñapaꞌ oꞌ kollaꞌwenet. 50Tharraña ñeñthen soteneꞌ theꞌ ñeñthña eꞌñe poꞌñoxh sokrramh ñeñthen wapatsa entoth allochñapaꞌ eseshaꞌch rreꞌpaꞌ ñetñapaꞌ korretsetach thayotheñ eꞌñe errponañowen. 51Eꞌñe poꞌñoxh napaꞌ na ñeñthen korramhtsotets alloch eꞌñe sokrra ñeñthen wapatsa entoth. Ñerraꞌm eseshaꞌ rreꞌ añ korrametspaꞌ ñetñapaꞌ korretsetach thayotheñ eꞌñe errponañowen. Añ korramets ñeñthchaꞌ nepomoerr na acheñeneshakop arr patsro alloch eꞌñe korrenet, ñeñthpaꞌ añkaꞌye nechets.
52Judioneshaꞌñapaꞌ ñeñthoꞌmaraxhoꞌ es otannaꞌtyeset. Ñetñapaꞌ ateth otyeset:
—Errothenothwachñakaꞌ apoeyña eꞌñe ña poꞌchets ñeñthchaꞌ yerraꞌ.
53Jesúsñapaꞌ alla oterraneterr:
—Poꞌñoxh oꞌch notas, ñerraꞌm ama serrerrnano nechets Ñeñthen Acheñetosets, ñerraꞌm ama sorrerrnano ñamha nerras, sapaꞌ amatheꞌ errothenoth sokrroña sa. 54Ñerraꞌm eseshaꞌ rreneꞌ nechets ñamha ñerraꞌm orrennanet nerras, ñetñapaꞌ korretsetach thayothen eꞌñe errponañowen, tharroꞌmar nañapaꞌ netantaterranetchaꞌ esempowañen. 55Tharroꞌmar nechets ñeñth eꞌñe poꞌñoxh korramhtsotets; ñerraspaꞌxhoꞌña ñeñth eꞌñe poꞌñoxh orrpapoꞌ. 56Ñeñthchaꞌ rreneꞌ nechets ñamha ñerraꞌm orrennanet nerras ñetñapaꞌ eꞌñech parrokmatennet na, napaꞌxhoꞌña eꞌñech neparrokmatenanet ñet. 57Apa ñeñth nellsenseneꞌ ñapaꞌ ama arromñatheshayaye, ñakaꞌyeña napoeneꞌña attho napaꞌxhoꞌña korretsanach. Ateth nepena namha, allowen ñeñth pokrramh nepeneꞌ napaꞌxhoꞌña añ napoenanet atthoch ñetpaꞌxhoꞌña korretsetach ñamet. 58Na ñeñthen sokrramh sepen ñeñthen wapatsa entoth. Ama attheyayno ñerraꞌmrratheꞌ pan ñeñth rreꞌth satañneshañ awath. Ñetpaꞌ oꞌ kollaꞌwenet. Eseshaꞌch eꞌñe pokrramh nepeneꞌ ñetñapaꞌ korretsetach thayotheñ eꞌñe errponañowen.
59Arrpaꞌ allowa ñeñth ateth yexhatenan acheñeneshaꞌ judioneshaꞌ poꞌprawo all Capernaumo.
Jesús poꞌñoñ ñeñthpaꞌ alloch yokrrena thayotheñ errponañowen
60Allempoña ateth eꞌmoeñet ateth oten, shonteꞌ poeyochreshaxhnopaꞌ ateth otyeset:
—Añ ñoñetspaꞌ amakaꞌye eꞌñeyeꞌ pokteyaye, amatheꞌ eseshaꞌ ameꞌñayo.
61Jesúspaꞌ eꞌñe poeyoxhro eñotanet xha otatseꞌtyen poeyochreshaxhno, ñeñthoꞌmarña ateth oterraneterr:
—Ñeñth ateth notenespaꞌ areꞌt pokteyeꞌ senteñe. 62Taꞌm, ¿errothenaꞌtchaꞌ sotña ñerraꞌm poꞌñoxh sentennoñ na Ñeñthen Acheñetosets oꞌch alla naꞌterreñ ento alloth nowapa awath? 63Yekamkëñ alloña eꞌñe poꞌñoxh yokrrena. Yechetspaꞌ amaꞌt koñeꞌthapaꞌ ama sherbeno. Neñoñ ñeñth neserrpareꞌtatenespaꞌ eꞌñe poꞌñoxh sekamkëñekop ñeñthña poꞌñoxh alloch eꞌñe sokrra. 64Tharraña pantantaꞌttsospaꞌ amaña sameꞌñenno.
Ñewa, Jesúspaꞌ eꞌñe allempotheñ eñotenan ñeñthchaꞌ ama ameꞌñerrtso. Eꞌñe eñotenan ñamha ñeñthchaꞌ pomoerreꞌ. 65Jesúspaꞌ alla oterraneterr:
—Ñeñthoꞌmarña napaꞌ notaseꞌth, amach eseshaꞌ nameꞌñerrayo ñerraꞌm ama Apa kothapeꞌchaterraweto atthoch kotherrnet.
66Allempotheñña shonteꞌ Jesús poeyochreshaxhno poerraxherret ñeshothpaꞌ oꞌwañ chopeñeꞌchenet parro. 67Allempoña Jesúspaꞌ ateth otan poeyochreshaꞌ ñeñth xharrasheña poechena epa:
—Sapaꞌxhoꞌ ¿semneñeꞌt oꞌch sepoerrerra samha?
68Simón Pedroñapaꞌ ateth och:
—Partseshachaꞌ, eseshaꞌwatheꞌñakaꞌye yokthaꞌ. Phapthakaꞌye pechenña ñoñets atthochña yapaꞌ korretsayach thayotheñ errponañowen. 69Yapaꞌ oꞌkaꞌye yameꞌñapha. Yapaꞌ yeñoteneph phapaꞌ pepaꞌtkaꞌye Cristotets, ñeñtheph Yompor Poechemereph.
70Jesúsña ateth otanet:
—Napaꞌ nakaꞌyeña saꞌkrerreꞌña sa, xharrasheñas sepchena epa. Ñeñthña poesheñarrpaꞌ ñeñthpaꞌ oneñethenaꞌtar.
71Ñewa, Judasokop ateth eñora. Ñeñth Judaspaꞌ ñeñth Simón Iscariote poechemer. Amaꞌt ñeñth aꞌpchenawetañ epa poeyochreshaꞌ, poesheñarrpaꞌ ñeñthchaꞌ pomoerreꞌ.
Currently Selected:
San Juan 6: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.